ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ແລະ
ທ່ານນາຍົກລັດຖະມົນຕີ ລາວ ທອງລຸນ ສີສຸລິດ
ຕອນເຊົ້າວັນທີ 08/02 ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ແລະ ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ເປັນປະທານຮ່ວມກອງປະຊຸມຄັ້ງທີ 39 ຄະນະກຳມະການລະຫວ່າງລັດຖະບານກ່ຽວກັບການຮ່ວມມື 2 ຝ່າຍ ຫວຽດນາມ - ລາວ. ກອງປະຊຸມຄັ້ງນີ້ ແນໃສ່ຕີລາຄາສະພາບການປະຕິບັດຂໍ້ຕົກລົງກ່ຽວກັບແຜນການຮ່ວມມື ຫວຽດນາມ - ລາວ ປີ 2016; ແລກປ່ຽນ ແລະ ເຫັນດີເປັນເອກະພາບກ່ຽວກັບທິດທາງໜ້າທີ່ການຮ່ວມມືປີ 2017. ບົນພື້ນຖານນັ້ນ, 2 ຝ່າຍລົງນາມໃນບັນດາເອກະສານຮ່ວມມື 2 ປະເທດ. ກ່າວຄຳເຫັນໄຂກອງປະຊຸມ, ທ່ານນາຍົກລັດຖະມົນຕີ ຫງວຽນຊວນຟຸກ ຊີ້ແຈ້ງວ່າ: ນີ້ແມ່ນກອງປະຊຸມຄັ້ງທຳອິດ ໂດຍນາຍົກລັດຖະມົນຕີທັງ 2 ທ່ານເປັນປະທານຮ່ວມ, ຍົກລະດັບການພົວພັນຮ່ວມມື 2 ຝ່າຍໃນການຊີ້ນຳນຳພາບໍລິຫານ, ຜັນຂະຫຍາຍການປະຕິບັດບັນດາຂໍ້ຕົກລົງຮ່ວມມື 2 ປະເທດ. ພິເສດປີ 2017, 2 ປະເທດພວມມຸ່ງໄປເຖິງສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ ແລະ 40 ປີແຫ່ງວັນເຊັນສົນທິສັນຍາມິດຕະພາບ ແລະ ຮ່ວມມືລະຫວ່າງ ຫວຽດນາມ ແລະ ລາວ. ຕີລາຄາໄລຍະຜ່ານມາ, 2 ຝ່າຍໄດ້ບູລະນະຄະນະກຳມະການຮ່ວມມືແຕ່ລະປະເທດ ໂດຍລັດຖະມົນຕີກະຊວງແຜນການ ແລະ ລົງທຶນເປັນປະທານຄະນະກຳມະການ, ທ່ານນາຍົກລັດຖະມົນຕີ ເຊື່ອໝັ້ນວ່າ: ປະທານຄະນະກຳມະການ 2 ທ່ານຈະສືບຕໍ່ຊີ້ນຳນຳພາຜັນຂະຫຍາຍຢ່າງໄວ, ຮັບປະກັນຜົນສັກສິດຂອງບັນດາເນື້ອໃນການຮ່ວມມືລະຫວ່າງ 2 ຝ່າຍຢ່າງມີປະສິດທິຜົນ. ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີວ່າ
“ຂ້າພະເຈົ້າສະເໜີຄະນະຜູ້ແທນ 2 ປະເທດເສີມຂະຫຍາຍພູມປັນຍາ, ຕີລາຄາລະອຽດ, ພາວະວິໄສໝາກຜົນແຫ່ງການຮ່ວມມືໃນໄລຍະຜ່ານມາ, ສະເໜີບັນດາມາດຕະການແກ້ໄຂທີ່ມີປະສິດທິຜົນ, ບັນດາຂໍ້ລິເລີ່ມທີ່ມີຄວາມໝາຍ, ນຳບັນດາຂໍ້ຕົກລົງຮ່ວມມືຂັ້ນສູງເຂົ້າບັນດາແຜນການຮ່ວມມືລະອຽດເປັນປະຈຳປີ, ຍົກສູງໝາກຜົນແຫ່ງການຮ່ວມມື ຫວຽດນາມ - ລາວ ໃນໄລຍະຈະມາເຖິງກ່ວາອີກ. ພວກເຮົາລ້ວນແຕ່ເຂົ້າໃຈໄດ້ວ່າ ສາຍພົວພັນທີ່ມີໜຶ່ງບໍ່ມີສອງໃນໂລກນີ້ ແມ່ນສາຍພົວພັນ ລາວ - ຫວຽດນາມ, ຫວຽດນາມ - ລາວ ແລະ ພວກເຮົາຮັກສານ້ຳໃຈອ້າຍນ້ອງທີ່ຍິ່ງໃຫຍ່ນັ້ນ ໃນບໍ່ວ່າການເຄື່ອນໄຫວໃດຂອງແຕ່ລະພັກ, ແຕ່ລະລັດຖະບານຕະຫລອດໄປ.
ສ່ວນທ່ານນາຍົກລັດຖະມົນຕີ ທອງລຸນ ສີສຸລິດ ກໍ່ສະແດງຄວາມເຊື່ອໝັ້ນວ່າ ກອງປະຊຸມຄັ້ງນີ້ ຈະປະສົບຜົນສຳເລັດຢ່າງຈົບງາມ. ທ່ານນາຍົກລັດຖະມົນຕີ ທອງລຸນ ສີສຸລິດ ກ່າວວ່າ:
“ຂ້າພະເຈົ້າອວຍພອນບັນດາຜົນງານພັດທະນາເສດຖະກິດ - ສັງຄົມຂອງ ຫວຽດນາມໃນທຸກຂົງເຂດເສດຖະກິດ, ປ້ອງກັນຊາດ, ປ້ອງກັນຄວາມສະຫງົບ, ພັດທະນາແຫຼ່ງຊັບພະຍາກອນມະນຸດ, ການທູດ. ສິ່ງນັ້ນ ເຮັດໃຫ້ທີ່ຕັ້ງຂອງ ຫວຽດນາມ ໄດ້ຮັບການຍົກສູງບົນເວທີປາໄສພາກພື້ນ ແລະ ສາກົນຢ່າງບໍ່ຢຸດຢັ້ງ. ມື້ນີ້ ພວກເຮົາພ້ອມກັນແລກປ່ຽນການຮ່ວມມື 2 ຝ່າຍ ລາວ ແລະ ຫວຽດນາມ. ນອກຈາກການຊ່ວຍເຫຼືອເຊິ່ງກັນ ແລະ ກັນ, 2 ຝ່າຍກໍ່ສະເໜີມາດຕະການຊຸກຍູ້ການລົງທຶນຂອງ ຫວຽດນາມ ເຂົ້າ ລາວ ແລະ ຂອງ ລາວ ເຂົ້າ ຫວຽດນາມ, ກ້າວເຂົ້າສູ່ໄລຍະໃໝ່ ເພື່ອແນໃສ່ນຳມາເຊິ່ງຜົນປະໂຫຍດລວມໃຫ້ 2 ປະເທດ. ພວກຂ້າພະເຈົ້າເຊື່ອໝັ້ນວ່າ ພາຍໃຕ້ການຊີ້ນຳນຳພາຂອງນາຍົກລັດຖະມົນຕີ 2 ທ່ານ, 2 ຝ່າຍຈະພ້ອມກັນແລກປ່ຽນຢ່າງກົງໄປກົງມາ, ເປີດອົກເປີດໃຈ ແລະ ກອງປະຊຸມຈະປະສົບຜົນສຳເລັດຢ່າງຈົບງາມ.”
ທ່ານນາຍົກລັດຖະມົນຕີ ທອງລຸນ ສີສຸລິດ ກໍ່ຕີລາຄາສູງບັນດາແຜນການຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນລະຫວ່າງ ລາວ ແລະ ຫວຽດນາມ ໃນໄລຍະຜ່ານມາ, ບັນດາການເຄື່ອນໄຫວລົງທຶນຂອງ 2 ປະເທດ ນັບມື້ນັບເຂົ້າສູ່ລວງເລິກ ແລະ ແທດຈິງກ່ວາ.
(ແຫຼ່ງຄັດຈາກ VOV)