ໃນຂອບເຂດການຢ້ຽມຢາມ ແລະ ເຮັດວຽກຢູ່ ສາທາລະລັດປະຊາທິປະໄຕປະຊາຊົນລາວ ໃນລະຫວ່າງວັນທີ 16 – 18 ກໍລະກົດ 2019. ຕອນບ່າຍວັນທີ 16 ກໍລະກົດ, ທ່ານ ຫງວຽນວັນຢຸງ ຮອງລັດຖະມົນຕີກະຊວງການຕ່າງປະເທດ ຫວຽດນາມ ໄດ້ມີການພົບປະກັບ ທ່ານ ນາງ ຄຳເພົາ ເອີນທະວັນ ຮອງລັດຖະມົນຕີກະຊວງການຕ່າງປະເທດ ລາວ.
(ການພົບປະລະຫວ່າງສອງຝ່າຍ)
ທີ່ການພົບປະ, ສອງຝ່າຍໄດ້ແລກປ່ຽນສະພາບການດ້ານເສດຖະກິດ, ການເມືອງຂອງແຕ່ລະປະເທດ, ກໍ່ຄືບັນດາບັນຫາຄື: ບັນດາບັນຫາໃນພາກພື້ນ ແລະ ໂລກທີ່ຕ່າງຝ່າຍຕ່າງມີຄວາມສົນໃຈ, ພ້ອມທັງສຸມໃສ່ຕີລາຄາຜົນງານຂອງການຮ່ວມມືລະຫວ່າງສອງກະຊວງໃນໄລຍະຜ່ານມາ.
ກ່າວຄຳເຫັນທີ່ການພົບປະ, ທ່ານ ນາງ ຄຳເພົາ ເອີນທະວັນ ອວຍພອນ ຫວຽດນາມໄດ້ຮັບເລືອກຕັ້ງເປັນກຳມະການບໍ່ປະຈຳການຂອງ ສະພາຄວາມໝັ້ນຄົງ ສປຊ ເມື່ອຕົ້ນເດື່ອນມິຖຸນາທີ່ຜ່ານມາດ້ວຍຈຳນວນບັດເຫັນດີສູງກໍ່ຄືບັນດາຜົນສຳເລັດດ້ານການຕ່າງປະເທດທີ່ຫວຽດນາມບັນລຸໄດ້. ພ້ອມທັງສະເໜີໃຫ້ສອງຝ່າຍສົມທົບກັນຊຸກຍູ້ການຮ່ວມມືຕາມບັນດາກົນໄກທັງສອງຝ່າຍ ແລະ ຫຼາຍຝ່າຍ, ປະກອບສ່ວນຍົກສູງຖານະບົດບາດຂອງລາວ ແລະ ຫວຽດນາມໃນພາກພື້ນ ແລະ ສາກົນ.
ສ່ວນທ່ານ ຫງວຽນວັນຢຸງ ໄດ້ຢັ້ງຢືນວ່າ, ຕໍ່ໜ້າສະພາບການສາກົນ ແລະ ພາກພື້ນມີການຜັນແປຢ່າງສັບສົນ ແລະ ປ່ຽນແປງຢ່າງວ່ອງໄວ, ສອງປະເທດເວົ້າລວມ ແລະ ຂະແໜງການຕ່າງປະເທດເວົ້າສະເພາະຕ້ອງສົມທົບກັນຢ່າງແໜ້ນແຟ້ນກ່ວາອີກ, ແລກປ່ຽນບົດຮຽນ ແລະ ບັນດາຄະນະຜູ້ແທນໃນທຸກຂັ້ນເປັນປະຈຳເພື່ອໜູນຊ່ວຍກັນ ໃນວຽກງານການຕ່າງປະເທດ.
(ແຫຼ່ງຄັດຈາກ VOV)