ຕອນຄ່ຳວັນທີ 11 ມີນາ ຕາມເວລາທ້ອງຖິ່ນ, ກອງປະຊຸມສະມັດຊາໃຫຍ່ ລັດຖະສະພາສາກົນ (IPU) ຄັ້ງທີ 146 ໄດ້ໄຂຂຶ້ນຢ່າງສົມກຽດ ຢູ່ນະຄອນ Manama ຂອງ ບາເຣນ, ດ້ວຍການເຂົ້າຮ່ວມຂອງຜູ້ແທນປະມານ 2000 ທ່ານ ມາຈາກເກືອບ 140 ປະເທດ.
ທ່ານຮອງປະທານຜູ້ປະຈຳການສະພາແຫ່ງຊາດ ເຈິ່ນແທັງເໝິນ ເປັນຫົວໜ້າຄະນະ ເຂົ້າຮ່ວມພິທີໄຂ (ພາບ: TTXVN)
ຄະນະຜູ້ແທນສະພາແຫ່ງຊາດ ຫວຽດນາມ ໂດຍທ່ານຮອງປະທານຜູ້ປະຈຳການສະພາແຫ່ງຊາດ ເຈິ່ນແທັງເໝິນ ເປັນຫົວໜ້າຄະນະ ເຂົ້າຮ່ວມພິທີໄຂ. ກ່ອນໜ້ານັ້ນ, ຄະນະຜູ້ແທນ ຫວຽດນາມ ກໍໄດ້ເຂົ້າຮ່ວມກອງປະຊຸມ ອາຊຽນ + 3 ແລະ ກອງປະຊຸມກຸ່ມພູມີສາດການເມືອງ ອາຊີ - ປາຊີຟິກ; ເຂົ້າຮ່ວມເວທີປາໄສສະມາຊິກລັດຖະສະພາຍິງ. ພາຍຫຼັງພິທີໄຂ, ຄະນະຜູ້ແທນ ຫວຽດນາມ ຈະເຂົ້າຮ່ວມວາລະປະຊຸມຄົບຄະນະຂອງສະມັດຊາໃຫຍ່, ສະພາບໍລິຫານ, ບັນດາກຳມາທິການປະຈຳການ, ເວທີປາໄສສະມາຊິກລັດຖະສະພາໜຸ່ມ ແລະ ບັນດາການເຄື່ອນໄຫວຢູ່ນອກກອງປະຊຸມ.
ກອງປະຊຸມສະມັດຊາໃຫຍ່ IPU- 146 ແລະ ບັນດາກອງປະຊຸມທີ່ກ່ຽວຂ້ອງ, ໄດ້ດຳເນີນແຕ່ວັນທີ 11 – 15 ມີນາ, ໂດຍສຸມໃສ່ປຶກສາຫາລືຫົວຂໍ້ລວມ “ຊຸກຍູ້ການຮ່ວມດຳລົງຊີວິດໃນສັນຕິພາບ ແລະ ບັນດາສັງຄົມປົກຄຸມ: ຕ້ານການປະກົດການບໍ່ໂອບເອື້ອອາລີ”. ບັນດາຜູ້ແທນຈາກລັດຖະສະພາຕ່າງໆ ຈະເຂົ້າຮ່ວມຫຼາຍວາລະປະຊຸມສຳຄັນ. ພ້ອມດຽວກັນນັ້ນ ກໍຈະປຶກສາຫາລື, ຕັດສິນ ແລະ ຮັບຮອງເອົາຮ່າງມະຕິວ່າດ້ວຍ “ການບຸກໂຈມຄີທາງເຄືອຂ່າຍອິນເຕີເນັດ ແລະ ອາດຊະຍາກອນທາງອິນເຕີເນັດ: ບັນດາຄວາມສ່ຽງໃໝ່ສຳລັບຄວາມໝັ້ນຄົງທົ່ວໂລກ.