ຕອນເຊົ້າວັນທີ 10 ເມສາ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ໄດ້ເປັນປະທານ ກອງປະຊຸມທາງອອນລາຍທົ່ວປະເທດຂອງລັດຖະບານ ແລະ ບັນດາທ້ອງຖິ່ນກ່ຽວກັບບັນດາມາດຕະການ, ໜ້າທີ່ໃຫ້ແກ່ 4 ເນື້ອໃນໃຫ່ຍໃນການຮັບມືກັບການກະທົບຈາກໂລກລະບາດໂຄວິດ-19 ຕໍ່ທຸກດ້ານໃນຊີວິດສັງຄົມໂດຍສັງລວມ ແລະ ຮອບດ້ານ.
ພາບ: VGP
ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ໄດ້ເນັ້ນໜັກວ່າ: ໂລກລະບາດໂຄວິດ-19 ໄດ້ມີການກະທົບຢ່າງເລິກເຊິ່ງເຖິງຫຼາຍຂະແໜງ, ຂົງເຂດ. ເຖິງວ່າໃນໄຕມາດທີ 1 ປີ 2020 ລະດັບເຕີບໂຕເສດຖະກິດຂອງຫວຽດນາມ ສູງກ່ວາໝູ່ໃນພາກພື້ນ (ຄື 3,82%) ) ກໍ່ຕາມ ແຕ່ກໍ່ຍັງແມ່ນລະດັບຕ່ຳກ່ວາໝູ່ໃນຮອບເວລາ 10 ປີທີ່ຜ່ານມາ. ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ໄດ້ຊີ້ແຈ້ງວ່າ:
ກອງປະຊຸມຄັ້ງນີ້ ອາດຈະເວົ້າໄດ້ວ່າແມ່ນກອງປະຊຸມອອນລາຍ 4 ໃນ 1 ເພື່ອແນໃສ່ລະດົມທຸກແຫຼ່ງກຳລັງຂອງປະເທດຊາດດ້ວຍຄວາມຕັດສິນໃຈ, ນ້ຳໃຈຮັກຊາດ, ອົງອາດກ້າແກ່ນຂອງປະຊາຊົນຫວຽດນາມ ເພື່ອຍາດເອົາໄຊຊະນະໃນການຕ້ານໂລກລະບາດໂຄວິດ-19; ພ້ອມກັນນັ້ນ ກໍ່ຕ້ອງມານະພະຍາຍາມບືນຕົວຂຶ້ນຜ່ານຜ່າຄວາມຫຍຸ້ງຍາກໃນການຜະລິດ ແລະ ການໃຊ້ຊີວິດ. ໜ້າທີ່ຂອງພວກເຮົາແມ່ນຕ້ອງປະຕິບັດບັນດາມາດຕະການຢ່າງເຂັ້ມງວດ, ກ່ອນອື່ນໝົດ ແມ່ນບໍ່ໃຫ້ໂລກລະບາດແຜ່ລາມ, ຄວບຄຸມໂລກລະບາດໃຫ້ໄດ້ໂດຍໄວ.
ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ຮຽກຮ້ອງວ່າ: ກອງປະຊຸມຕ້ອງຍົກອອກບັນດາກົນໄກ, ນະໂຍບາຍລະອຽດ, ຖືກຕ້ອງ, ກະກຽມບັນດາມາດຕະການເພື່ອໃຫ້ພື້ນຖານເສດຖະກິດ, ວິສາຫະກິດສາມາດພັດທະນາຫຼັງໂລກລະບາດ. ທ່ານສະເໜີວ່າ:
ພວກຂ້າພະເຈົ້າຢາກເນັ້ນໜັກເຖິງບົດບາດຂອງບັນດາສູນເສດຖະກິດ, ບັນດາເຂດເສດຖະກິດຈຸດສຸມ, ບັນດາແຂວງ, ນະຄອນໃຫ່ຍແມ່ນສຳຄັນທີ່ສຸດ. ສະເໜີໃຫ້ບັນດາທ່ານເລຂາພັກແຂວງ, ປະທານຄະນະກຳມະການປະຊາຊົນທ້ອງຖິ່ນຕ່າງໆ ຈົ່ງສຸມໃສ່ຊີ້ນຳ, ແກ້ໄຂຄວາມຫຍຸ້ງຍາກ, ມານະພະຍາຍາມພ້ອມກັບລັດຖະບານ ແລະ ທົ່ວປະເທດ ປະຕິບັດໜ້າທີ່ພັດທະນາເສດຖະກິດສັງຄົມ. ພ້ອມກັນນັ້ນ ພວກຂ້າພະເຈົ້າກໍ່ເນັ້ນໜັກເຖິງບົດບາດຂອງບັນດາພາກສ່ວນວິສາຫະກິດ ໃນການປະກອບສ່ວນແກ້ໄຂວຽກເຮັດງານທຳ ແລະ ການເຕີບໂຕ.
(ແຫຼ່ງຄັດຈາກ VOV)