ອົງການອະນາໄມໂລກ (WHO) ຈະນໍາໃຊ້ຕົວໜັງສືໃນຕາຕະລາງພະຍັນສະນະຂອງ ເກຼັກ ເພື່ອເອີ້ນຊື່ບັນດາສາຍພັນໃໝ່ຂອງເຊື້ອໄວຣັດ SARS – CoV – 2 ແນໃສ່ຫຼີກລ້ຽງການຈຳແນກການປະພຶດກັບບັນດາປະເທດທີ່ກວດພົບສາຍພັນໃໝ່ຂອງໄວຣັດດັ່ງກ່າວກ່ອນໝູ່.
ອົງການອະນາໄມໂລກ (WHO) ຫາກໍໃຫ້ຮູ້ວ່າ ເຂົາເຈົ້າຈະນໍາໃຊ້ຕົວໜັງສືໃນຕາຕະລາງພະຍັນສະນະຂອງ ເກຼັກ ເພື່ອເອີ້ນຊື່ບັນດາສາຍພັນໃໝ່ຂອງເຊື້ອໄວຣັດ SARS – CoV – 2 ແນໃສ່ຫຼີກລ້ຽງການຈຳແນກການປະພຶດກັບບັນດາປະເທດທີ່ກວດພົບສາຍພັນໃໝ່ຂອງໄວຣັດດັ່ງກ່າວກ່ອນໝູ່. ທ່ານນາງ Maria Van Kerkhove ຫົວໜ້າກຸ່ມເຕັກນິກ ໂຄວິດ - 19 ຂອງ WHO ເນັ້ນໜັກວ່າ ຊື່ເອີ້ນໃໝ່ ຈະບໍ່ປ່ຽນແທນໃຫ້ບັນດາຊື່ເອີ້ນວິທະຍາສາດທີ່ພວມນຳໃຊ້ໃນປັດຈຸບັນ, ແຕ່ແມ່ນເພື່ອແນໃສ່ຊ່ວຍໃຫ້ການປຶກສາຫາລືຢ່າງເປີດເຜີຍ.
ຕາມລະບົບໃໝ່ແລ້ວ, ບັນດາສາຍພັນໃໝ່ທີ່ພວມໄດ້ຮັບຄວາມສົນໃຈ ຈະມີຊື່ເອີ້ນຄືດັ່ງນີ້: ສາຍພັນໃໝ່ທີ່ກວດພົບຄັ້ງທຳອິດຢູ່ ອັງກິດ, ເຊິ່ງປັດຈຸບັນໄດ້ເອີ້ນວ່າ B.1.1.7 ມີຊື່ວ່າ Alpha; ສາຍພັນ B.1.351 ທີ່ກວດພົບຄັ້ງທຳອິດ ຢູ່ ອາຟະລິກາໃຕ້ ເອີ້ນວ່າ Beta, ໃນຂະນະນັ້ນ, P.1 ທີ່ກວດພົບຢູ່ ບຣາຊິນ ເອີ້ນວ່າ Gamma. ສ່ວນສາຍພັນໃໝ່ທີ່ກວດພົບຢູ່ ອິນເດຍ B.1617 ໄດ້ແບ່ງເປັນບັນດາສາຍພັນຍ່ອຍ, ໃນນັ້ນ ສາຍພັນ B.1.617.2 ຈະຖືກເອີ້ນວ່າ Delta ແລະ ສາຍພັນ B.1.617.1 ຈະຖືກເອີ້ນວ່າ Kappa.
(ແຫຼ່ງຄັດຈາກ VOV)