17/08/2021 08:43 GMT+7 print

ລັດຖະບານຮ່ວມເດີນທາງພ້ອມກັບວິສາຫະກິດ

      ລັດຖະບານ, ບັນດາກະຊວງ, ຂະແໜງການ, ທ້ອງຖິ່ນໄດ້ມີຄວາມມານະພະຍາຍາມຫຼາຍຢ່າງ ສ້າງເງື່ອນໄຂເປັນຢ່າງດີທີ່ສຸດເພື່ອໜູນຊ່ວຍບັນດາວິສາຫະກິດກ່ຽວກັບກົນໄກເພື່ອຮັກສາ, ຟື້ນຟູ ແລະ ພັດທະນາການຜະລິດ.
ທ່ານນາຍົກລັດຖະມົນຕີຫວຽດນາມ ຟ້າມມິນຈິງ ກ່າວຄຳເຫັນທີ່ກອງປະຊຸມແບບທາງໄກທົ່ວປະເທດ
(ພາບ: VGP)
      ໂລກລະບາດໂຄວິດ-19 ແກ່ຍາວເປັນເວລາ 1 ກວ່າປີຜ່ານມາ ໄດ້ສົ່ງຜົນສະທ້ອນເຖິງທຸກຂະແໜງການ ແລະ ຊີວິດການເປັນຢູ່ໃນລະດັບທີ່ແຕກຕ່າງກັນ. ແຕ່ຄວາມເສຍຫາຍຢ່າງໜັກໜ່ວງທີ່ສຸດ, ສັງເກດຈາກແງ່ມູມເສດຖະກິດແມ່ນວິສາຫະກິດ. ເພື່ອຊ່ວຍໃຫ້ວິສາຫະກິດຫຼຸດຜ່ອນຄວາມຫຍຸ້ງຍາກ, ໃນຄວາມສາມາດຂອງຕົນ, ລັດຖະບານ, ບັນດາກະຊວງ, ຂະແໜງການ, ທ້ອງຖິ່ນໄດ້ມີຄວາມມານະພະຍາຍາມຫຼາຍຢ່າງ ສ້າງເງື່ອນໄຂເປັນຢ່າງດີທີ່ສຸດເພື່ອໜູນຊ່ວຍບັນດາວິສາຫະກິດກ່ຽວກັບກົນໄກເພື່ອຮັກສາ, ຟື້ນຟູ ແລະ ພັດທະນາການຜະລິດ.
        ໄລ່ຮອດເດືອນ ກໍລະກົດ 2021, ຫວຽດນາມ ມີວິສາຫະກິດປະມານ 840.000 ແຫ່ງພວມເຄື່ອນໄຫວ. ໂລກລະບາດໂຄວິດ-19 ແຜ່ລະບາດຮອບທີ 4 ດ້ວຍສາຍພັນໃໝ່ Delta, ພິເສດແມ່ນເລີ່ມແຕ່ເດືອນ ກໍລະກົດ 2021, ໄດ້ເຮັດໃຫ້ປະຊາຄົມວິສາຫະກິດປະສົບກັບຄວາມຫຍຸ້ງຍາກຫຼາຍຢ່າງ. ໃນຈຳນວນ 8 ກຸ່ມທີ່ປະສົບກັບຄວາມຫຍຸ້ງຍາກເຊິ່ງວິສາຫະກິດພວມປະເຊີນໜ້ານັ້ນ, ສິ່ງທີ່ໜ້າສົນໃຈແມ່ນຍອດຄວາມຕ້ອງການຖືກຫຼຸດລົງເຮັດໃຫ້ໃບສັ່ງຊື້, ສັນຍາລ້ວນແຕ່ຫຼຸດລົງ; ລາຍຮັບຫຼຸດລົງຢ່າງແຮງໃນວົງກວ້າງ; ລະບົບການຜະລິດ, ການໃຊ້ສອຍ, ການສົ່ງອອກກໍ່ຖືກຕັດຕອນ; ການຈໍລະຈອນສິນຄ້າປະສົບກັບຄວາມຫຍຸ້ງຍາກ ຍ້ອນແຕ່ລະທ້ອງຖິ່ນມີນະໂຍບາຍປ້ອງກັນ, ຕ້ານໂລກລະບາດທີ່ແຕກຕ່າງກັນ; ຄວາມສ່ຽງຂາດແຄນແຮງງານເມື່ອປະຕິບັດການແຍກຫ່າງສັງຄົມແກ່ຍາວ…
ເຂົ້າຮ່ວມຢ່າງໄວ, ເປັນເຈົ້າການ
        ດ້ວຍຈິດໃຈຮ່ວມເດີນທາງພ້ອມກັບວິສາຫະກິດ, ລັດຖະບານ, ນາຍົກລັດຖະມົນຕີໄດ້ປະກາດໃຊ້ຫຼາຍນະໂຍບາຍ, ຍົກອອກມາດຕະການໜູນຊ່ວຍເພື່ອແກ້ໄຂການເຄື່ອນໄຫວຜະລິດ ດຳເນີນທຸລະກິດຂອງວິສາຫະກິດຢ່າງທັນການ. ໃນຄວາມສາມາດຂອງຕົນ, ລັດຖະບານ ໄດ້ສັບຊ້ອນ, ຈັດແບ່ງແຫຼ່ງກຳລັງເພື່ອໜູນຊ່ວຍໃຫ້ແກ່ບັນດາວິສາຫະກິດຜ່ານຜ່າຄວາມຫຍຸ້ງຍາກ, ຮັກສາການຜະລິດຜ່ານບັນດານະໂຍບາຍການເງິນ, ປີການເງິນຄື ການຫຼຸດຜ່ອນພາສີ, ໜູນຊ່ວຍຄ່າດອກເບ້ຍ, ຫຼຸດຜ່ອນລາຄາໄຟຟ້າ, ນ້ຳປະປາ, ຄ່າໂທລະສົມມະນາຄົມ… ລັດຖະບານກໍ່ເປັນເຈົ້າການປະກາດໃຊ້ບັນດາມາດຕະການໜູນຊ່ວຍຢ່າງຕັ້ງໜ້າໃຫ້ແກ່ບັນດາວິສາຫະກິດ, ຫຼຸດຜ່ອນຫຼາຍລະບຽບການບໍລິຫານ. ບາງນະໂຍບາຍໜູນຊ່ວຍໃຫ້ແກ່ວິສາຫະກິດບັນລຸໄດ້ໝາກຜົນຄື ນະໂຍບາຍໃຫ້ວິສາຫະກິດກູ້ຢືມທຶນ. ຕາມທ່ານນາຍົກລັດຖະມົນຕີຫວຽດນາມ ຟ້າມມິນຈິງ ແລ້ວ, ສິດອຳນາດຂອງລັດຖະບານຮອດໃສ, ລັດຖະບານຈະນຳໃຊ້ຢ່າງສຸດຂີດເພື່ອແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ.
ລັດຖະບານໄດ້ ແລະ ຈະມານະພະຍາຍາມຈົນສຸດຄວາມສາມາດໃນເງື່ອນໄຂທີ່ສາມາດເຮັດໄດ້
        ລັດຖະບານຫວຽດນາມ ສືບຕໍ່, ຢຶດໝັ້ນມາດຕະການໜູນຊ່ວຍວິສາຫະກິດທີ່ໄດ້ວາງອອກ. ກ່າວຄຳເຫັນທີ່ກອງປະຊຸມແບບທາງໄກທົ່ວປະເທດລະຫວ່າງນາຍົກລັດຖະມົນຕີກັບຜູ້ຕາງໜ້າບັນດາວິສາຫະກິດ, ສະຫະສະມາຄົມ ແລະ ບັນດາທ້ອງຖິ່ນກ່ຽວກັບບັນດາມາດຕະການແກ້ໄຂຄວາມຫຍຸ້ງຍາກ, ຊຸກຍູ້ການຜະລິດດຳເນີນທຸລະກິດໃນສະພາບເກີດໂລກລະບາດໂຄວິດ-19 ຜ່ານມາ, ທ່ານນາຍົກລັດຖະມົນຕີ ຟ້າມມິນຈິງ ຢືນຢັນວ່າ:
        “ລັດຖະບານພວມມານະພະຍາຍາມຈົນສຸດຄວາມສາມາດຂອງຕົນ. ພັກ, ລັດ, ລັດຖະບານ ຍາມໃດກໍ່ມີຄວາມສະເໝີຕົ້ນສະເໝີປາຍດ້ວຍຈິດໃຈ “ຜົນປະໂຫຍດທີ່ກົມກຽວ, ແບ່ງປັນຄວາມສ່ຽງ”. ນາຍົກລັດຖະມົນຕີຈະສ້າງຕັ້ງໜ່ວຍປະຕິບັດງານພິເສດເພື່ອແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ. ກະຊວງແຜນການ ແລະ ການລົງທຶນ ສືບຕໍ່ກຳແໜ້ນສະພາບການ, ຊ່ອງແສງຄວາມຫຍຸ້ງຍາກ, ເປັນເສນາທິການໃຫ້ແກ່ລັດຖະບານ, ນາຍົກລັດຖະມົນຕີ ເພື່ອຍົກອອກມາດຕະການແກ້ໄຂຢ່າງທັນການ. ກະຊວງສາທາລະນະສຸກຮີບເຮັ່ງສັກວັກຊິນຢ່າງທັນການ, ດັດປັບຂັ້ນຕອນການປ້ອງກັນ ຕ້ານໂລກລະບາດ, ເພື່ອໃຫ້ບັນດາວິສາຫະກິດນຳໃຊ້ໂດຍອີງຕາມເງື່ອນໄຂຕົວຈິງ ເພື່ອຜະລິດ, ດຳເນີນທຸລະກິດ. ກະຊວງການເງິນ ຮີບເຮັ່ງຜັນຂະຫຍາຍມາດຕະການຫຼຸດພາສີ, ມີມາດຕະການແກ້ໄຂກ່ຽວກັບຕະຫຼາດອະສັງຫາລິມະຊັບ, ນຳພາ ແລະ ລະດົມທຸກແຫຼ່ງກຳລັງນອກລັດ”.
        ລັດຖະບານກໍ່ຊີ້ນຳບັນດາທ້ອງຖິ່ນຮັບປະກັນສິນຄ້າຖືກຂົນສົ່ງໃຫ້ລຸລ່ວງ, ຮັກສາລະບົບສະໜອງໃຫ້ເປັນປົກກະຕິ, ສ້າງເງື່ອນໄຂພັດທະນາເສດຖະກິດ. ທ່ານລັດຖະມົນຕີກະຊວງຄົມມະນາຄົມຂົນສົ່ງຫວຽດນາມ ຫງວຽນວັນເຖ, ໃຫ້ຮູ້ວ່າ:
        “ປະຈຸບັນບໍ່ມີເລື່ອງກີດຂວາງການຈໍລະຈອນສິນຄ້າ, ສຳລັບບັນດາປະເພດສິນຄ້າຮັບໃຊ້ການສົ່ງອອກ, ສິນຄ້າທີ່ຈຳເປັນຮັບໃຊ້ຊີວິດການເປັນຢູ່ຂອງປະຊາຊົນ ຫຼື ຊ່ວຍບັນເທົ່າທຸກ ພວກຂ້າພະເຈົ້າຈະສະໜອງລະຫັດ QR ສະນັ້ນໃນເສັ້ນທາງຂົນສົ່ງແມ່ນຈະບໍ່ຖືກກີດຂວາງ. ພວກຂ້າພະເຈົ້າຢືນຢັນວ່າ ບັນດາເອກະສານປະກາດໃຊ້ໃນປະຈຸບັນລ້ວນແຕ່ລຸລ່ວງທັງໝົດ”.
        ລັດຖະບານ ແລະ ອຳນາດການປົກຄອງທ້ອງຖິ່ນຍາມໃດກໍ່ຈະຮ່ວມເດີນທາງ, ຮຽງບ່າຮຽງໄຫຼ່, ໜູນຊ່ວຍປະຊາຄົມວິສາຫະກິດ, ກໍຄືການຕອບບຸນແທນຄຸນຕໍ່ການປະກອບສ່ວນ, ຮ່ວມແຮງຮ່ວມໃຈຂອງວິສາຫະກິດ ເພື່ອພ້ອມກັບປະເທດຊາດຜ່ານຜ່າຈຸດເວລາທີ່ຫຍຸ້ງຍາກນີ້. ດ້ວຍການຮ່ວມແຮງຮ່ວມໃຈຈາກລັດຖະບານ, ຫວັງວ່າຖັນແຖວນັກທຸລະກິດຫວຽດນາມ ໃນປະຈຸບັນ ຈະບໍ່ພຽງແຕ່ຜ່ານຜ່າໂລກລະບາດໂຄວິດ-19 ເທົ່ານັ້ນ, ຫາກຍັງສ້າງເຄື່ອງໝາຍການຄ້າສະເພາະຂອງຕົນ, ປະກອບສ່ວນເຂົ້າໃນການພັດທະນາຂອງປະເທດຊາດອີກດ້ວຍ.
(ແຫຼ່ງຄັດຈາກ VOV)