03/02/2021 09:00 GMT+7 print

ຫຼາຍປະເທດຫວັງວ່າ ມຽນມາ ຈະມີສະຖຽນລະພາບໂດຍໄວ

      ທ່ານປະທານາທິບໍດີອາເມລິກາ Joe Biden ໄດ້ຮຽກຮ້ອງໃຫ້ກອງທັບມຽນມາ ຈົ່ງປະລະສິດອຳນາດໂດຍທັນທີ, ພ້ອມທັງອອກຄຳສັ່ງພິຈາລະນາຄືນເລື່ອງຈັດວາງບັນດາມາດຕະການລົງໂທດຄືນໃໝ່.
(ພາບ: REUTERS)
      ພາຍຫຼັງກອງທັບມຽນມາ ຈັບຕົວທ່ານນາງທີ່ປຶກສາແຫ່ງລັດ Aung Sun Suu Kyi, ທ່ານປະທານາທິບໍດີ UWin Myint, ທ່ານລັດຖະມົນຕີກະຊວງການເງິນ ແລະ ແຜນການ Soe Nyunt Lwin ພ້ອມກັບເຈົ້າໜ້າທີ່ບາງທ່ານຂຶ້ນກັບພັກສະຫະພັນແຫ່ງຊາດເພື່ອປະຊາທິປະໄຕ (NLD) ໃນຕອນເຊົ້າວັນທີ 01 ກຸມພາ, ຫຼາຍປະເທດໄດ້ອອກຖະແຫຼງການຫວັງວ່າ ປະເທດຢູ່ອາຊີຕາເວັນອອກສ່ຽງໃຕ້ນີ້ຈະມີສະຖຽນລະພາບໂດຍໄວ.
        ວັນທີ 01 ກຸມພາ, ທ່ານປະທານາທິບໍດີອາເມລິກາ Joe Biden ໄດ້ຮຽກຮ້ອງໃຫ້ກອງທັບມຽນມາ ຈົ່ງປະລະສິດອຳນາດໂດຍທັນທີ, ພ້ອມທັງອອກຄຳສັ່ງພິຈາລະນາຄືນເລື່ອງຈັດວາງບັນດາມາດຕະການລົງໂທດຄືນໃໝ່. ທ່ານປະທານາທິບໍດີ Joe Biden ເນັ້ນໜັກວ່າ, ອາເມລິກາ ຈະສົມທົບກັບບັນດາຄູ່ຮ່ວມມືໃນພາກພື້ນ ແລະ ໂລກ ເພື່ອແນໃສ່ຟື້ນຟູກົດໝາຍ, ກໍຄືຄວາມຮັບຜິດຊອບຂອງບັນດາເປົ້າໝາຍທີ່ກ່ຽວຂ້ອງເຖິງການກໍ່ລັດຖະປະຫານດ້ານການທະຫານຢູ່ ມຽນມາ.
        ສ່ວນກະຊວງການຕ່າງປະເທດຍີ່ປຸ່ນ ສະແດງ “ຄວາມວິຕົກກັງວົນຢ່າງເລິກເຊິ່ງ” ຕໍ່ສະພາບການຢູ່ມຽນມາ, ພ້ອມທັງກະຕຸກຊຸກຍູ້ບັນດາຝ່າຍດຳເນີນວິວັດທະນາການຫັນເປັນປະຊາທິປະໄຕ ແລະ ໄກ່ເກ່ຍປອງດອງຊາດ.
        ໃນຂະນະນັ້ນ, ທ່ານປະທານສະພາເອີລົບ, ປະທານຄະນະກຳມະການເອີລົບ, ນາຍົກລັດຖະມົນຕີອັງກິດ, ໂຄສົກລັດຖະບານຝລັ່ງ ກໍ່ສະແດງຄວາມວິຕົກກັງວົນກ່ຽວກັບສະພາບການຢູ່ມຽນມາ, ພ້ອມທັງຮຽກຮ້ອງໃຫ້ບັນດາຝ່າຍຈົ່ງເຄົາລົບເຈດຈຳນົງຂອງປະຊາຊົນມຽນມາ ເຊິ່ງສະແດງອອກຜ່ານການເລືອກຕັ້ງເມື່ອວັນທີ 08 ພະຈິກ 2020.
(ແຫຼ່ງຄັດຈາກ VOV)