01/11/2018 10:30 GMT+7 print

ນາຍົກລັດຖະມົນຕີ ຫງວຽນຊວນຝຸກ ຕ້ອນຮັບ ຜູ້ບັນຊາການສູງສຸດ ກອງທັບ ລາຊະອານາຈັກ ກຳປູເຈຍ

      ວັນທີ 30 ຕຸລາ, ທີ່ສຳນັກງານລັດຖະບານ, ທ່ານ ນາຍົກລັດຖະມົນຕີ ຫວຽດນາມ ຫງວຽນຊວນຝຸກ ໄດ້ໃຫ້ການຕ້ອນຮັບ ຄະນະຜູ້ແທນຂັ້ນສູງ ກອງທັບລາຊະອານາຈັກ ກຳປູເຈຍ ນຳໂດຍທ່ານ ພົນເອກ Vong Pisen ຜູ້ບັນຊາການສູງສຸດ ກອງທັບລາຊະອານາຈັກ ກຳປູເຈຍ, ມາຢ້ຽມຢາມ ຫວຽດນາມ ຢ່າງເປັນທາງການໃນລະຫວ່າງວັນທີ 29-31 ຕຸລາ.

ທີ່ການຕ້ອນຮັບ
      ທີ່ການຕ້ອນຮັບ, ທ່ານນາຍົກລັດຖະມົນຕີ ຫງວຽນຊວນຝຸກ ປາຖະໜາວ່າ ກະຊວງປ້ອງກັນປະເທດກຳປູເຈຍ ຈະສືບຕໍ່ສົມທົບກັບຝ່າຍ ຫວຽດນາມ ໃນການຊອກຫາ ທ້ອນໂຮມອັດຖິ ທະຫານອາສາສະໝັກ ແລະ ຊ່ຽວຊານ ຫວຽດນາມ ທີ່ເສຍສະຫຼະຊີວິດ ຢູ່ກຳປູເຈຍ. ທ່ານນາຍົກລັດຖະມົນຕີ ສະເໜີລັດຖະບານກຳປູເຈຍ ສ້າງເງື່ອນໄຂໃຫ້ແກ່ບັນດາກົມກອງຂອງກອງທັບ, ທະຫານປ້ອງກັນຊາຍແດນ ສົມທົບກັບອຳນາດການປົກຄອງທ້ອງຖິ່ນທີ່ມີເສັ້ນຊາຍແດນຮ່ວມກັນ ຈັດຕັ້ງບັນດາໂຄງການຮ່ວມມືດ້ວຍຫຼາຍຮູບແບບແຕກຕ່າງກັນ, ຍູ້ແຮງການຂົນຂວາຍໂຄສະນາ, ສົມທົບກັນຂົນຂວາຍປະຊາຊົນເຂດຊາຍແດນ ປະຕິບັດຂໍ້ກຳນົດກົດລະບຽບ ການຄຸ້ມຄອງ ແລະ ປ້ອງກັນຊາຍແດນຮ່ວມກັນເປັນຢ່າງດີ, ເພື່ອຈຸດປະສົງສ້າງເຂດຊາຍແດນ ລະຫວ່ງ ສອງປະເທດໃຫ້ກາຍເປັນເສັ້ນຊາຍແດນແຫ່ງສັນຕິພາບ, ສະຖຽນລະພາບ ແລະ ການພັດທະນາ.
ໂດຍເນັ້ນໜັກວ່າ ປີ 2019 ແມ່ນປີ ສະເຫຼີມສະຫຼອງ 40 ປີ ແຫ່ງວັນໄຊຊະນະລະບອບດັບສູນເຊື້ອຊາດ ຂະເໝນແດງ ຢູ່ ກຳປູເຈຍ (07 ມັງກອນ 1979 – 07 ມັງກອນ 2019), ທ່ານນາຍົກລັດຖະມົນຕີ ສະເໜີ ທ່ານຜູ້ບັນຊາການສູງສຸດ ກອງທັບລາຊະອານາຈັກ ກຳປູເຈຍ ຊຸກຍູ້ບັນດາອົງການ, ຄະນະ, ຂະແໜງການຂອງກຳປູເຈຍ ເປັນຕົ້ນແມ່ນ ກອງທັບລາຊະອານາຈັກ, ສົມທົບກັບຝ່າຍ ຫວຽດນາມ ຈັດຕັ້ງບັນການເຄື່ອນໄຫວ ສະເຫຼີມສະຫຼອງໃຫ້ເປັນຢ່າງດີ, ເຮັດໃຫ້ເຫດການປະຫວັດສາດອັນສຳຄັນນີ້ມີຄວາມໝາຍເລິກເຊິ່ງກວ່າເກົ່າ.
 (ແຫຼ່ງຄັດຈາກ VOV)