ເນື່ອງໃນໂອກາດສະເຫຼີມສະຫຼອງ 50 ປີ ແຫ່ງວັນເຊັນສັນຍາ ປາຣີ ວ່າດ້ວຍການຢຸດຕິສົງຄາມ ສ້າງສັນຕິພາບຢູ່ ຫວຽດນາມ ຄືນໃໝ່ (27/1/1973-27/1/2023), ກຸ່ມນັກຂ່າວສຳນັກຂ່າວສານ ຫວຽດນາມ ປະຈຳ ນະຄອນຫຼວງ ວໍຊິງຕັນ, ປະເທດ ອາເມລິກາ ໄດ້ມີການແລກປ່ຽນກັບ ປອ. Andrew Wells-Dang, ນັກຊ່ຽວຊານຂັ້ນສູງກ່ຽວກັບ ຫວຽດນາມ ຢູ່ສູນ ອາຊີ ສັງກັດສະຖາບັນ ສັນຕິພາບ ອາເມລິກາ.
ພິທີເຊັນສັນຍາປາຣີ 1973 (ພາບ: TTXVN)
ເມື່ອຕີລາຄາກ່ຽວກັບຫາງສຽງໃນໝູ່ປະຊາຊົນ ອາເມລິກາ ຕໍ່ເລື່ອງຢຸດຕິສົງຄາມຢູ່ ຫວຽດນາມ, ປອ. Andrew Wells-Dang ຖືວ່າ ເມື່ອຫວນຄືນສັນຍາປາຣີ 1973, ປະຊາຊົນ ອາເມລິກາ ຈື່ໄດ້ຄວາມສຳຄັນຂອງສັນຍາໃນການຈັດສົ່ງພົນທະຫານ ອາເມລິກາ ທີ່ພວມເຂົ້າຮ່ວມສົງຄາມ ຢູ່ ຫວຽດນາມ ກັບຄືນ ປະເທດ, ມອບຊະເລີຍເສິກ ແລະ ພາໄປເຖິງການຢຸດຕິລະບອບເກນທະຫານຢູ່ ອເມລິກາ.
ຕາມທັດສະນະຂອງ ປອ. Andrew Wells-Dang ແລ້ວ, ປະທານາທິບໍດີ Richard Nixon ໃນໄລຍະນັ້ນ ຮັບຮູ້ວ່າ ສົງຄາມນີ້ບໍ່ໄດ້ຮັບການສະໜັບສະໜູນຈາກປະຊາຊົນ ແລະ ຊອກຫາວິທີຢຸດຕິສົງຄາມໃນຂະນະທີ່ ອາເມລິກາ ຍັງມີກຽດສັກສີ ແລະ ຍັງມີອິດທິພົນຊື່ສຽງ.
ກ່ຽວກັບຄວາມໝາຍຄວາມສັນຍາປາຣີ ນັ້ນ, ທ່ານ ປອ. Andrew Wells-Dang ໃຫ້ຂໍ້ສັງເກດວ່າ, ພາຍຫຼັງທີ່ສົງຄາມສິ້ນສຸດລົງ, ອາເມລິກາ ແລະ ຫວຽດນາມ ໄດ້ເຫັນດີເປັນເອກະພາບ ສ້າງການພົວພັນທາງການທູດຄືນໃໝ່ ແລະ ສ້າງການຮ່ວມມືໃນຫຼາຍຂົງເຂດ, ນັບທັງລະຫວ່າງລັດຖະບານ ແລະ ປະຊາຊົນສອງປະເທດ. ການຮ່ວມມືນີ້ ລວມມີການໜູນຊ່ວຍຂອງ ອາເມລິກາ ເພື່ອແກ້ໄຂຜົນຮ້າຍຢ້ອນຫຼັງຈາກສົງຄາມ, ເປັນຕົ້ນແມ່ນລະເບີດຍັງບໍ່ທັນແຕກ, ທາດພິດສີສົ້ມ ເຊິ່ງໄດ້ລະບຸໃນສັນຍາປາຣີ.