ອາຊຽນ

ເປີດກວ້າງການຮ່ວມມື ASEAN - ສ ເກົາຫຼີ

ສ ເກົາຫຼີ ຢືນຢັນວ່າ ອາຊຽນ (ASEAN) ເປັນຈຸດສຸມ ໃນ ນະໂຍບາຍ ຫັນສູ່ທິດໃຕ້ໃໝ່ ຂອງ ປະທານາທິບໍດີ Moon Jae-in, ສະໜັບສະໜູນ ອາຊຽນ ເສີມຂະຫຍາຍ ບົດບາດເປັນໃຈກາງ ໃນ ຂະບວນການຮ່ວມມື ແລະ ເຊື່ອມຕໍ່ ພາກພື້ນ. ຖະແຫຼງການນີ້ ຊຶ່ງ ສ ເກົາຫຼີ ໄດ້ສະເໜີ ຢູ່ກອງປະຊຸມ ຂອງ ຄະນະກຳມະການ ຮ່ວມມື ອາຊຽນ-ສ ເກົາຫຼີ (AKJCC) ຊຶ່ງ ໄດ້ຈັດຂຶ້ນໃນວັນທີ 12 ເມສາ 2019 ທີ່ ນະຄອນຫຼວງ ຈາກາກຕາ ປະເທດ ອິນໂດເນເຊຍ. 
ໃນບົດຂຽນໃໝ່ ທີ່ຫາກໍສົ່ງຂຶ້ນເວັບ Asia News Network, ປະທານາທິບໍດີ ສ ເກົາຫຼີ Moon Jae-in ໄດ້ຢືນຢັນວ່າ ສ ເກົາຫຼີ ຈະພ້ອມກັບ 10 ປະເທດສະມາຊິກ ອາຊຽນ ຊຸກຍູ້ຢ່າງແຂງແຮງ ການພົວພັນຮ່ວມມື ໃນຫຼາຍຂົງເຂດ, ໃນນັ້ນ ມີວິທະຍາສາດ ແລະ ເຕັກໂນໂລຊີ ທີ່ທັນສະໄໝ, ເຕັກໂນໂລຊີ ຂ່າວສານ ແລະ ໂທລະຄົມມະນາຄົມ, ການຄົມມະນາຄົມ, ພະລັງງານ ແລະ ອຸດສາຫະກຳ ປ້ອງກັນຊາດ... ແນໃສ່ເປີດອະນາຄົດ ທີ່ ວັດທະນາຖາວອນ ແລະ ສັນຕິພາບໃຫ້ທົ່ວພາກພື້ນ. 

ປີ 2019, ລັດຖະບານ ສ ເກົາຫຼີ ໄດ້ປະກອບສ່ວນ ທົບສອງເທົ່າ ໃຫ້ແກ່ກອງທຶນ ຮ່ວມມື ດ້ານເສດຖະກິດ ອາຊຽນ-ສ ເກົາຫຼີ (AKEC) ຂຶ້ນເຖິງ 14 ລ້ານ ໂດລາສະຫະລັດ. 
ແຕ່ປີ 2017, ລັດຖະບານ ຂອງ ປະທານາທິບໍດີ ສ ເກົາຫຼີ Moon Jae-in ໄດ້ປະກາດຢ່າງເປັນທາງການ “ນະໂຍບາຍ ຫັນສູ່ທິດໃຕ້ ໃໝ່” ຊຶ່ງເປັນໜຶ່ງໃນບັນດາຂໍ້ລິເລີ່ມ ກ່ຽວກັບການພົວພັນກັບຕ່າງ ປະເທດທີ່ສຳຄັນ ແນໃສ່ເປີດກວ້າງ ການຮ່ວມມື ດ້ານການທູດ ແລະ ເສດຖະກິດ ລະຫວ່າງ ສ ເກົາຫຼີ ກັບບັນດາປະເທດ ບ້ານໃກ້ ເຮືອນຄຽງໃນ ອາຊີ. ຕາມນັ້ນ ນະໂຍບາຍ ສ ເກົາຫຼີ ອີງໃສ່ສາມ ປັດໃຈ ຕົ້ນຕໍຄື: ປະຊາຊົນ, ວັດທະນາຖາວອນ ແລະ ສັນຕິພາບ. ບັນດານັກຊ່ຽວຊານ ສ ເກົາຫຼີ ໄດ້ໃຫ້ຂໍ້ ສັງເກດວ່າ ການທີ່ ສ ເກົາຫຼີ ໃຫ້ບູລິມະສິດ ຊຸກຍູ້ການພົວພັນ ກັບ ອາຊຽນ ແມ່ນການເລືອກເຟັ້ນ ທີ່ຖືກຕ້ອງ, ຍ້ອນນີ້ແມ່ນ ພາກພື້ນ ມີທ່າໄດ້ປຽບຫຼາຍຢ່າງ ກ່ຽວກັບດ້ານການເມືອງ, ຄວາມສາມາດບົ່ມຊ້ອນ ໃນການ ຈະເລີນເຕີບໂຕ ແລະ ມີແຫຼ່ງຊັບພະຍາກອນ ທີ່ອຸດົມສົມບູນ. 


ສະມາຄົມ ຊາວ ຫວຽດນາມ ຢູ່ ສ ເກົາຫຼີ ຈັດຕັ້ງ ງານເທດ ສະການ ວັດທະນະທຳ ຫວຽດນາມ ທີ່ ເຂດຈະຕຸລັດ Gwanghwamun ຢູ່ໃຈກາງ
ນະຄອນຫຼວງ ເຊອູນ (ສ ເກົາຫຼີ) ເມື່ອເດືອນ ກັນຍາ 2018. ພາບ: ແມ້ງຮຸ່ງ/VNA


ງານວາງສະແດງການຄ້າ ທີ່ວາງສະແດງ ບັນດາຜະລິດຕະພັນ ເຄື່ອງໄມ້ ແລະ ເຄື່ອງເຟີນີເຈີ ຂອງ 7 ປະເທດສະມາຊິກ ຂອງ ອາຊຽນ ໄດ້ໄຂຂຶ້ນ ທີ່ສູນວາງສະແດງ KINTEX I
ຢູ່ນະຄອນ Ilsan, ແຂວງ Gyeonggi, ສ ເກົາຫຼີ ໂດຍສູນ ອາຊຽນ-ສ ເກົາຫຼີ ປະສານສົມທົບ ກັບວະຫະພັນອຸດສາຫະກຳເຄື່ອງໄມ້ ສ ເກົາຫຼີ ຈັດຕັ້ງ. ພາບ: ຫືວຕວຽນ/VNA


ຫວ່າງແລ້ວນີ້, ທີ່ຫ້ອງວາງສະແດງສິລະປະກຳ(ຮ່າໂນ້ຍ, ສະມາຄົມວິຈິສິນ Kiro ສ ເກົາຫຼີ ແລະ ສະມາຄົມວິຈິດສິນ ຫວຽດນາມ ໄດ້ຈັດພິທີໄຂ ງານວາງສະແດງ ພົບປະສັງສັນສິລະປະກໍາສາກົນ ສ ເກົາ ຫຼີ-ຫວຽດນາມ. ມີ 116 ຜົນການປະດິດແຕ່ງ ຂອງ ບັນດານັກ ສິລະປິນ ສ ເກົາຫຼີ ແລະ ຫວຽດນາມ ໄດ້ແນະນຳ ສູ່ຊາວ ນະຄອນຫຼວງ ຮ່າໂນ້ຍ.
ໃນພາບ: ນັກສິລະປິນ ເຈິ່ນແຄ໋ງເຈືອງ, ປະທານ ສະມາຄົມວິຈິດສິນ ຫວຽດນາມ ມອບຂອງຂວັນ ເປັນທີ່ລະນຶກ ໃຫ້ແກ່ສະມາຄົມ ວິຈິດສິນ Kiro ຂອງ ສ ເກົາຫຼີ. ພາບ: ແທ່ງດາດ/VNA


ວັນທີ 25 ມີນາ 2019, ບໍລິສັດໜຶ່ງສະມາຊິກ ຕໍ່ກຳປັ່ນ ຟ່າຮຶ່ງ (ເທດສະບານ ມິງດຶກ, ເມືອງ ຖຸຍງວຽນ, ນະຄອນ ຫາຍຟ່ອງ) ໄດ້ມອບກຳປັ່ນເຊື້ອນຳ້ມັນ/ທາດເຄມີ
ບັນທຸກ 6.500 ໂຕນ, ເຄື່ອງໝາຍ BS03, ໃສ່ຊື່ YN GWANGYANG ສົ່ງອອກໄປຍັງ ສ ເກົາຫຼີ. ພາບ: ຕ໋ວນຟານ/VNA


ການຜະລິດສິ້ນສ່ວນຍ່ອຍເຄື່ອງເອເລັກໂຕຣນິກ ທີ່ບໍລິສັດ Doosung Tech ຫວຽດນາມຈຳກັດ (100% ທຶນ ຂອງ ສເກົາ ຫຼີ), ທີ່ເຂດອຸດສາຫະກຳ ເລືອງເຊີນ (ແຂວງ ຮ່ວາບິ່ງ).
ພາບ: ແຢງລາມ/VNA


ລາຍການສະແດງສິລະປະມູນເຊື້ອ ລະຫວ່າງ ແຂວງ ດັກລັກ ແລະ ແຂວງ Jeollabuk (ສ ເກົາຫຼີ) ພາຍໃຕ້ຫົວຂໍ້ “ທຳນອງມິດຕະພາບ” ຊຶ່ງນອນຢູ່ໃນຂອບເຂດ
ງານເທດສະການກາເຟ ບວນມາຖວດ ຄັ້ງທີ 7 ປີ 2019. ພາບ: ຕ໋ວນແອງ/VNA


ສະຖານທູດ ສ ເກົາຫຼີ ປະຈຳ ຫວຽດນາມ ປະສານສົມທົບ ກັບກະຊວງວັດທະນະທຳ, ກິລາ ແລະ ທ່ອງທ່ຽວ ຈັດຕັ້ງ “ຄືນດົນຕີ ຫວຽດນາມ-ສ ເກົາຫຼີ ຂຳ່ນັບຮັບຕ້ອນປີໃໝ່ 2019”.
ນັກສິລະປິນປະຊາຊົນ ດັ້ງຖ໋າຍເຊີນ, ຫົວໜ້າກອງດົນຕີ Chung Chi Yong, ນັກຮ້ອງສຽງ Soprano ທີ່ມີຊື່ສຽງ Sunyoung seo ແລະ ວົງດົນຕີປະສານສຽງ ສ ເກົາຫຼີ. ພາບ: ແທງຕຸ່ງ/VNA


ພິທີໄຂສັບປະດາເລີ່ມຕົ້ນທຸລະກິດ ອາຊຽນ-ສ ເກົາຫຼີ ໄດ້ຈັດ ຂຶ້ນ ທີ່ນະຄອນ Seongnam-si, ແຂວງ Gyeonggi (ສ ເກົາ ຫຼີ) ໃນເດືອນ ກັນຍາ 2018. ນີ້ແມ່ນ ການເຄື່ອນໄຫວ
ໂດຍ ສູນອາຊຽນ-ສ ເກົາຫຼີ ແລະ ສູນປ່ຽນແປງໃໝ່ ແລະ ເສດຖະກິດ ປະດິດສ້າງ ແຂວງ Gyeonggi (GCCEI) ປະສານ ສົມທົບຈັດຕັ້ງ ແນໃສ່ ຊຸກຍູ້ ຂະບວນການເລີ່ມຕົ້ນ ທຸລະກິດ
ໃນຂົງເຂດ ເຕັກໂນໂລຊີ ຂ່າວສານ-ສື່ມວນຊົນ (ICT) ຢູ່ ບັນດາປະເທດ ອາຊຽນ. ພາບ: ແມ້ງຮຸ່ງ/VNA


ກຸ່ມບໍລິສັດ Samsung ແນະນຳຜະລິດຕະພັນໃໝ່ Galaxy S10 ທີ່ຕະຫຼາດ ຫວຽດນາມ. ພາບ: ຕ໋ຽນລືກ/VNA

ສ ເກົາຫຼີ ຕີລາຄາສູງ ບົດບາດ ແລະ ການສະໜັບສະໜູນ ຂອງ ອາຊຽນ ຕໍ່ ຄວາມຄືບໜ້າ ການເຈລະຈາສັນຕິພາບ ແລະ ເຮັດ ໃຫ້ ແຫຼມເກົາຫຼີ ປອດອາວຸດນີວເຄລຍ, ພິເສດແມ່ນການພົບປະ ຂອງ ປະມຸກລັດ ສອງປະເທດ ສ ອາເມລິກາ-ສປປ ເກົາຫຼີ ທີ່ໄດ້ ຈັດຂຶ້ນໃນມໍ່ນີ້ ຢູ່ ສິງກະໂປ (2018) ແລະ ຫວຽດນາມ (2019). ອາຊຽນ ຢືນຢັນສະໜັບສະໜູນ ບັນດາຄວາມພະຍາຍາມໃນ ການພົບປະສົນທະນາ ເພື່ອເຮັດໃຫ້ແຫຼມ ເກົາຫຼີ ປອດຈາກ ອາ ວຸດນີວເຄລຍ ໂດຍສັນຕິວິທີ. 
ໃນຊຸມປີຜ່ານມາ, ສ ເກົາຫຼີ ໄດ້ໃຫ້ການສະໜັບສະໜູນ ອາຊຽນ ໃນການກໍ່ສ້າງ ປະມວນກົດລະບຽບ ການປະພຶດຕໍ່ ຢູ່ທະເລ ຕາເວັນອອກ (COC) ຢູ່ສະເໝີ. ພ້ອມກັນນັ້ນ ໃຫ້ຄຳໝັ້ນໝາຍ ເຂົ້າຮ່ວມ ຢ່າງຕັ້ງໜ້າ ແລະ ປະກອບສ່ວນ ໃນບັນດາກົນໄກ ແລະ ເວທີປາໄສ ຮ່ວມມືພາກພື້ນ ທີ່ສຳຄັນ ຂອງ ອາຊຽນ ເຊັ່ນ: ກອງປະຊຸມຂັ້ນສູງ ອາຊີຕາເວັນອອກ (EAS), ເວທີປາໄສ ຄວາມສະຫງົບພາກພື້ນ ອາຊຽນ (ARF), ກອງປະຊຸມ ລັດຖະມົນຕີ ປ້ອງກັນປະເທດ ອາຊຽນ ເປີດກວ້າງ (ADMM+), ເວທີປາໄສທະເລ ອາຊຽນ ເປີດກວ້າງ (EAMF).

ບັນດາປະເທດ ອາຊຽນ ໄດ້ສະແດງຄວາມຊົມເຊີຍ ຕໍ່ “ນະໂຍ ບາຍ ຫັນສູ່ທິດໃຕ້ໃໝ່” ຂອງ ສ ເກົາຫຼີ ແລະ ເນັ້ນໜັກວ່າ ສ ເກົາຫຼີ ເປັນໜຶ່ງໃນບັນດາຄູ່ຮ່ວມມື ທີ່ໃກ້ຊິດ ແລະ ສຳຄັນແຖວໜ້າ ຂອງ ອາຊຽນ.

ຈຸດສຸມທີ່ພົ້ນເດັ່ນ ໃນການພົວພັນ ອາຊຽນ-ສ ເກົາຫຼີ ແມ່ນການ ພົວພັນ ຫວຽດນາມ-ສ ເກົາຫຼີ. ປັດຈຸບັນ, ສ ເກົາຫຼີ ເປັນນັກລົງ ທຶນຕ່າງປະເທດລາຍໃຫຍ່ທີສຸດ ຢູ່ ຫວຽດນາມ ດ້ວຍຍອດມູນຄ່າ ການລົງທຶນໂດຍກົງຈາກຕ່າງປະເທດ (FDI) ຈົດທະບຽນ ໄລ່ ເຖິງ ເດືອນ ຕຸລາ 2018 ມີປະມານ 65 ຕື້ ໂດລາສະຫະລັດ ກັບ ກວ່າ 7000 ໂຄງການ. ປັດຈຸບັນ ສ ເກົາຫຼີ ເປັນຄູ່ຮ່ວມມືດ້ານ ການຄ້າ ໃຫຍ່ທີສອງຂອງ ຫວຽດນາມ ແລະ ຫວຽດນາມ ເປັນຄູ່ ຮ່ວມມືດ້ານການຄ້າໃຫຍ່ທີສີ່ ຂອງ ສ ເກົາຫຼີ.

ສັນຍາການຄ້າເສລີ ຫວຽດນາມ-ສ ເກົາຫຼີ ມີຜົນສັກສິດ ແຕ່ ເດືອນ ທັນວາ 2015 ໄດ້ປະກອບສ່ວນຊຸກຍູ້ ການຄ້າສອງຝ່າຍ. ປັດຈຸບັນ ສ ເກົາຫຼີ ເປັນປະເທດ ສະໜອງການຊ່ວຍເຫຼືອ ພັດທະນາ ທາງການ (ODA) ຫຼາຍອັນດັບທີສອງ ໃຫ້ແກ່ ຫວຽດນາມ, ດ້ວຍຈຳນວນທຶນ 1,5 ຕື້ ໂດລາສະຫະລັດ ແຕ່ປີ 2016-2020.
ການພົບປະແລກປ່ຽນວັດທະນະທຳ ລະຫວ່າງ ປະຊາຊົນ ສອງ ຊາດ ຫວຽດນາມ-ສ ເກົາຫຼີ ກໍມີການພັດທະນາ ຢ່າງກວ້າງຂວາງ ບົນພື້ນຖານ ສອງຝ່າຍມີພື້ນຖານວັດທະນະທຳ ແລະ ປະຫວັດ ສາດ ທີ່ຄ້າຍຄືກັນ.

ສ ເກົາຫຼີ ເປັນຄູ່ຮ່ວມມືການຄ້າ ແລະ ເປັນນັກລົງທຶນ ໂດຍກົງ ໃຫຍ່ທີຫ້າ ຂອງ ອາຊຽນ. ໄລ່ຮອດທ້າຍປີ 2017, ວົງເງິນການຄ້າ ສອງສົ້ນ ອາຊຽນ-ສ ເກົາຫຼີ ບັນລຸ 152,5 ຕື້ ໂດລາສະຫະລັດ, ປີ 2018 ບັນລຸ ກວ່າ 160 ຕື້ ໂດລາສະຫະລັດ ແລະ ຍອດທຶນ FDI ເຂົ້າ ອາຊຽນ ແມ່ນ 5,3 ຕື້ ໂດລາສະຫະລັດ ໂດຍຜ່ານບັນດາ ຂອບເຂດຮ່ວມມື ເຊ່ັນ: ສັນຍາການຄ້າເສລີ ອາຊຽນ-ສ ເກົາຫຼີ (AFFTA) ແລະ ແຜນການເຄື່ອນໄຫວ, ສອງຝ່າຍ ກຳລັງສູ້ຊົນ ບັນລຸເປົ້າໝາຍ 200 ຕື້ ໂດລາສະຫະລັດ ໃນປີ 2020. 

ບົດ: VNP ສັງລວມ - ພາບ: VNA

 

top