ວັນທີ 20 ຕຸລາ, ທີ່ການພົບປະເຈລະຈາຢູ່ນະຄອນຫຼວງ Copenhagen, ໃນການຢ້ຽມຢາມທາງລັດຖະກິດ ລາຊະອານາຈັກ ແດນມາກ ແຕ່ວັນທີ 19 - 21 ຕຸລາ, ທ່ານ ໂຕເລີມ, ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ແລະ ທ່ານນາງ Mette Frederiksen, ນາຍົກລັດຖະມົນຕີ ແດນມາກ ໄດ້ເຫັນດີເປັນເອກະພາບຮັບຮອງເອົາຖະແຫຼງການຮ່ວມ ຍົກລະດັບການພົວພັນ ຫວຽດນາມ - ແດນມາກ ຂຶ້ນເປັນຄູ່ຮ່ວມມືຍຸດທະສາດຮອບດ້ານ.
ທ່ານ ໂຕເລີມ, ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ແລະ ທ່ານນາງ Mette Frederiksen ທີ່ການພົບປະເຈລະຈາ. (ພາບ: VNA)
ດ້ວຍໝາກຜົນນີ້, ແດນມາກ ແມ່ນປະເທດທີສອງໃນສະຫະພາບ ເອີລົບ (ອີຢູ) ສ້າງຕັ້ງການພົວພັນຄູ່ຮ່ວມມືຍຸດທະສາດຮອບດ້ານກັບ ຫວຽດນາມ, ຖັດຈາກ ຝລັ່ງ.
ໃນຖະແຫຼງການຮ່ວມ ໄດ້ເນັ້ນໜັກວ່າ: ສອງຝ່າຍຢັ້ງຢືນຄືນໃໝ່ຄວາມຕັດສິນໃຈລວມ ຊຸກຍູ້ການຄ້າ, ການລົງທຶນສອງຝ່າຍ ແລະ ແກ້ໄຂບັນດາຮົ້ວກີດຂວາງ ເພື່ອແນໃສ່ເພີ່ມວົງເງິນການຄ້າ ແລະ ເງິນລົງທຶນຢູ່ ຫວຽດນາມ ແລະ ແດນມາກ; ພ້ອມທັງໃຫ້ຄຳໝັ້ນສັນຍາປົກປ້ອງ ແລະ ຊຸກຍູ້ລະບົບການຄ້າສາກົນເປີດ, ໂດຍອີງໃສ່ກົດໝາຍ, ພ້ອມກັບອົງການການຄ້າ (WTO) ຮັກສາບົດບາດໃຈກາງ, ແລະ ຊຸກຍູ້ບັນດາລະບົບມູນຄ່າຢ່າງມີປະສິດທິຜົນ, ພ້ອມນັ້ນ ກໍ່ຮັບປະກັນການປັບປຸງຄວາມອາດສາມາດເຂົ້າເຖິງຕະຫຼາດ ເໝາະສົມກັບສັນຍາການຄ້າເສລີ ຫວຽດນາມ - ອີຢູ (EVFTA) ແລະ ການພົວພັນຄູ່ຮ່ວມມືລະຫວ່າງ ສະຫະພາບ ເອີລົບ ແລະ ສັນຍາຄູ່ຮ່ວມມືຮອບດ້ານ ແລະ ກ້າວໜ້າຂ້າມ ປະຊີຟິກ (CPTPP).
ສອງຝ່າຍຊົມເຊີຍ ແລະ ເຫັນດີເປັນເອກະພາບຜັນຂະຫຍາຍສັນຍາການຄ້າເສລີ ຫວຽດນາມ - ອີຢູ (EVFTA) ຢ່າງມີປະສິດທິຜົນ ແລະ ຊຸກຍູ້ບັນດາສະມາຊິກ ອີຢູ ທີ່ຍັງເຫຼືອ ໃຫ້ສັດຕະຍາບັນສັນຍາອາລັກຂາການລົງທຶນ ຫວຽດນາມ - ອີຢູ (EVIPA), ຜ່ານນັ້ນ ກໍ່ສືບຕໍ່ໜູນຊ່ວຍການຄ້າ ແລະ ການລົງທຶນລະຫວ່າງສອງປະເທດ.
ແລະກໍ່ໃນວັນດຽວກັນ (ຕາມເວລາທ້ອງຖິ່ນ), ທີ່ນະຄອນຫຼວງ Copenhagen, ທ່ານເລຂາທິການໃຫຍ່, ປະທານປະເທດ ໂຕເລີມ ໄດ້ພົບປະຜູ້ຕາງໜ້າ ສະມາຄົມມິດຕະພາບ ແດນມາກ - ຫວຽດນາມ, ພົບປະກັບພະນັກງານ, ລັດຖະກອນ ສະຖານທູດ ຫວຽດນາມ ແລະ ປະຊາຄົມ ຊາວ ຫວຽດນາມ ຢູ່ ແດນມາກ, ອຽກລັງ ແລະ ພາກໃຕ້ ຊູແອດ; ຢ້ຽມຢາມ ຫໍພິພິທະພັນ ສີລະປະ Glyptotek, ເຂົ້າຮ່ວມຊົມລາຍການດົນຕີປະສານສຽງມິດຕະພາບ ສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ແດນມາກ (1971 – 2026).