ນາງ ຫງວຽນທິແອວງ ເຂົ້າຮ່ວມການແຂ່ງຂັນ ຢ່າງດີເລີດ ແລະ ຍາດໄດ້ຫຼຽນຄຳ ໃນການແລ່ນ 5.000 ມ ຍິງ ດ້ວຍຜົນງານ17 ນາ ທີ 00 ວິນາທີ 28 ທີ່ SEA Games 32. ພາບ: ຫງວຽນຕ໋ຽນຕ໋ວນ

ບັນດາສິ່ງມະ​ຫັດ​ສະ​ຈັນ ກ່ຽວກັບ ແລ່ນ ແລະ ລານ

ທີ່ SEA Games 32, ນາງ ຫງວຽນທິແອວງ ເປັນນັກກິລາ ຍາດໄດ້ ຫຼຽນຄຳ ຫຼາຍທີ່ສຸດ ໃຫ້ທີມ ຫວຽດນາມ (ລາຍການບຸກຄົນ),  ກັບ 4 ຫຼຽນຄຳ ໃນລາຍການແລ່ນ 1.500 ມ, 5.000 ມ, 10.000 ມ ແລະ 3.000 ມ ຜ່ານສິ່ງກີດຂວາງ. ພິ​ເສດ, ນັກ​ແລ່ນ ຊາວ ບັກ​ຢາງ ໄດ້ສ້າງ​ຄວາມ​ປະ​ທັບ​ໃຈ​ເປັນ​ພິ​ເສດ ເມື່ອ​ຍາດ​ໄດ້ 2 ຫຼຽນ​ຄຳ​ ໃນ​ລາຍການແລ່ນ 1.500 ມ ແລະ 3.000 ມ ຜ່ານສິ່ງກີດຂວາງ​ ໃນ​ເວ​ລາ 20 ນາ​ທີ. ດ້ວຍ​ຜົນງານ 4 ຫຼຽນຄຳ ໃນແຂ່ງຂັນແລ່ນ ແລະ ລານ, ນີ້​ແມ່ນ​ນັກ​ກິ​ລາ​ ຫວຽດ​ນາມ ຄົນ​ທຳ​ອິດ​ ທີ່​ຍາດ​ໄດ້ຫຼຽນ​ຄຳ​ ຫຼາຍ​ທີ່​ສຸດ​ໃນ SEA Games ຄັ້ງ​ໜຶ່ງ.

ໃນ​ເດືອນ ​ສິງຫາ 2018, ທີ່​ງານ​ມະຫາ​ກຳ Asiad 18 ​ຈັດ​ຂຶ້ນ​ຢູ່​ນະ ຄອນຫຼວງ​ ຈາ​ກາ​ຕາ, ອິນໂດເນເຊຍ ນາງ ຫງວຽນ​ທິແ​ອວງ ​ໄດ້​​ເຂົ້າ​ຮ່ວມ ລາຍ​ການແຂ່ງຂັນ ຜ່ານສິ່ງກີດຂວາງ 3.000 ມ ​ແລະ ຍາດ​ໄດ້​ຫຼຽນ​ທອງ ​​ປະຫວັດສາດ​ ໃຫ້ປະເພດກິລາແລ່ນ ແລະ ລານ ຫວຽດນາມ. ນີ້ເປັນຄັ້ງທຳອິດ ຫວຽດນາມ ຄວ້າໄດ້ຫຼຽນ ໃນລາຍ ການນີ້ ດ້ວຍຜົນງານ 9 ນາທີ 43 ວິນາທີ 83, ນາງ ແອວງ ໄດ້ທຳລາຍສະ ຖິຕິແຫ່ງຊາດ ຂອງ ນັກກິລາຍິງລຸ້ນກ່ອນ ຫງວຽນທິເຟືອງ ເຖິງ 19,15 ວິນາທີ. 

ໃນປີ 2019, ນາງ ແອວງ ສືືບຕໍ່ເຂົ້າຮ່ວມ SEA Games 30 ທີ່ປະ ເທດ ຟີລິບປິນ ແລະ ຍາດໄດ້ຜົນງານທີ່ດີເລີດ ເມື່ອປ້ອງກັນ ໄດ້ 2 ຫຼຽນຄຳ ໃນງານມະຫາກຳກິລາ ຄັ້ງກ່ອນ ແລະ ຄວ້າຫຼຽນຄຳ ເປັນ ຄັ້ງທຳອິດ ໃນລາຍການແຂ່ງຂັນຜ່ານສິ່ງກີດຂວາງ 3.000 ມ. ​ໃນ ງານມະຫາກຳ ຄັ້ງ​ນີ້, ດ້ວຍຜົນງານ 10 ນາທີ 00 ວິນາທີ 02 ໃນ​ລາຍການແຂ່ງຂັນ ຜ່ານສິ່ງກີດຂວາງ 3.000 ​ມ, ນາງ ຫງວຽນ​ທິ​ແອວງ ໄດ້ສ້າງ​ສະຖິຕິ​ໃໝ່ ຂອງ​ SEA Games ເມື່ອ​ໄວ​ກວ່າ​ສະຖິ ຕິ​ເກົ່າ 0,56 ວິນາທີ ໂດຍ Rini Budiarti ສ້າງໄວ້ ໃນ SEA Games 26.

ວິກິດການໄວອາຍຸຊາວປີ

 ນາງ ຫງວຽນ​ທິ​ແອວງ ກຳເນີດໃນຄອບຄົວ ເຮັດອາຊີບ ກະສິກຳ ຢ່າງດຽວ ​ຢູ່​ບ້ານ​ ຍ່ວນ, ຕາແສງ ໝີ໊​ຮ່າ, ເມືອງ ລ້າງ​ຢາງ, ແຂວງ ບັກ​ຢາງ. ນາງ ເປັນລູກຄົນທີ 7 ໃນຄອບຄົວ ທີ່ມີ ອ້າຍເອື້ອຍນ້ອງ 8 ຄົນ. ເມື່ອ​ມີ​ອາຍຸ 15 ປີ, ນາງ ຫງວຽນ​ທິ​ແອວງ ​ໄດ້​ເລີ່​ມ​ອາຊີບ ເປັນ​ນັກ​ກິລາ ແລ່ນ ແລະ ລານ. ​ໃນ​​ມື້​ທຳ​ອິດ ​ທີ່​ຄະນະ​ນັກ​ກິລາ​ແຂວງ​ຄັດ ເລືອກນັກຮຽນ, ສາວນ້ອຍ​ ຫງວຽນ​ທິ​ແອວງ ​ໄດ້​ລົງທະບຽນ​ເຂົ້າ​ຮ່ວມ. ແຕ່ເນື່ອງຈາກຮູບຮ່າງທີ່ຈໍາກັດ ກັບນໍ້າໜັກ ບໍ່ເຖິງ 40 ກິໂລ ກຼາມ ແລະ ສູງ ປະມານແມັດເຄິ່ງ, ສະນັ້ນນາງ ເກືອບຈະພາດ. ແຕ່ຍ້ອນຄວາມພະຍາຍາມ ຢ່າງຕໍ່ເນື່ອງ ແລະ ເຝິກຊ້ອມ ຢ່າງຈິງ ຈັງ, ນາງ ແອວງ ໄດ້ຮັບຄວາມໄວ້ວາງໃຈ ຈາກຄະນະຄູຝຶກ ແລະ ຖືກ ເອີ້ນເຂົ້າທີມຊາດ.

ທ່ານ​ປະທານ​ປະ​ເທດ ຫວໍວັນເຖືອງ ​ໄດ້​ມອບ​ຫຼຽນ​ໄຊ ​ແຮງ​ງານ​ຊັ້ນ 2 ​ໃຫ້ “ນາງ​ສາວ​ຄຳ” ຫງວຽນທິແອວງ. ພາບ: ຖົ໋ງເຍິດ/VNA

ໃນປີ 2014, ນາງ ແອວງ ຖືກກວດພົບວ່າ ໝາກໄຂ່ຫຼັງ ອັກເສບ. ການປິ່ນປົວ, ພັກຜ່ອນ ເສຍເວລາປະມານ 2 ປີ, ອາຊີບຂອງ “ຄູ່ຂາຄໍາ” ໃນປະເພດກິລາ ແລ່ນ ແລະ ລານ ຫວຽດນາມ ມີຊ່ວງ ເວລາ ເບິ່ງຄືວ່າ ຕ້ອງໄດ້ສິ້ນສຸດລົງ ຕອນອາຍຸຊາວປີ. ນາງ ແອວງ ຍັງຈົດຈຳ ການໃຫ້ກຳລັງໃຈ ຂອງພໍ່ວ່າ: “ຖ້າຕັ້ງໃຈ ເດີນຕາມເສັ້ນ ທາງ ກິລາ ມືອາຊີບ, ຈົ່ງພະຍາຍາມ ຈະປະສົບຜົນສໍາເລັດ”.

ການໃຫ້ກຳລັງໃຈຈາກພໍ່, ແມ່, ຍາດຕິພີ່ນ້ອງ, ຄູສອນ ແລະ ໝູ່ ເພື່ອນ ໄດ້ຊ່ວຍໃຫ້ ນາງ ແອວງ ຜ່ານຜ່າໄລຍະເວລາທີ່ຖືວ່າ ເປັນ ວິກິດການ ຂອງ ຍິງສາວ ໃນໄວ 20 ປີ. ເພາະສະ​ນັ້ນ, ​ໃນເວລາ​ຕໍ່ມາ ບໍ່​ວ່າ​ຈະ​ໄປ​ແຂ່ງຂັນ​ຢູ່​ໃສ, ຈະ​ປະສົບ​ຜົນສຳ​ເລັດ ​ແນວ​ໃດ​ກໍ່ຕາມ, ​ພໍ່​ແມ່ ​ຍັງຄົງແມ່ນບ່ອນອີງ ທາງດ້ານ ຈິດໃຈ ທີ່ໜັກແໜ້ນ ຂອງ ນາງ ແອວງ. ແມ່ຂອງນາງ ແອວງ ໄດ້ ແບ່ງປັນວ່າ: “ພວກຂ້າພະເຈົ້າ​ສະໜັບສະໜູນລູກ ບົນເສັ້ນທາງ ທີ່ ລູກໄດ້ເລືອກຢູ່ສະເໝີ, ໃຫ້ກຳລັງໃຈລູກ ຕ້ອງພະຍາຍາມ ເພື່ອສີ ສັນທຸງຊາດ ຂອງ ປະເທດຊາດ”. 

ສືບ​ຕໍ່​ສ້າງ​ຄວາມ​ຝັນ​ໃຫ້​​ ແລ່ນ ແລະ ລານ​ ຫວຽດ​ນາມ

ເມື່ອ​ສິ້ນ​ສຸດ​ການ​ເຄື່ອນ​ໄຫວ​ ທ່ີ SEA Games 32, ນາງ ຫງວຽນ​ທິ​ແອວງ ​ໄດ້​ກາຍ​ເປັນ​ໜຶ່ງ​ໃນ​ນັກ​ກິລາ ​ຫວຽດນາມ 2 ຄົນ​ທີ່​ຍາດ​ໄດ້ 12 ຫຼຽນ​ຄຳ ​ໃນ​ການ​ແຂ່ງຂັນ ແລ່ນ ແລະ ລານ ຢູ່ SEA Games, ພ້ອມ​ກັບນັກກິລາ ຫງວຽນທິຮວ່ຽນ. 

ຫຼັງ​ຈາກປະສົບຜົນສໍາເລັດ ທີ່ໜ້າມະຫັດສະຈັນຢູ່ SEA Games 32, ນາງ ຫງວຽນ​ທິ​ແອວງ ບໍ່ຢຸດຢູ່ກັບໄຊຊະນະ, ນາງ ໄດ້​ຕັ້ງ​ເປົ້າ​ໝາຍ ​ປ່ຽນ​ສີ​ ຫຼຽນ ​​ໃນ ASIAD 2023.

ທັດສະນະຂອງ “ຄູ່ຂາຄໍາ” ໃນວົງການແລ່ນ ແລະ ລານ ຫວຽດນາມ ກໍຄື: “ກິລາແມ່ນຄວາມ ພະຍາຍາມ ຢ່າງບໍ່ຢຸດຢັ້ງ, ເພາະສະນັ້ນ ພາຍຫຼັງງານມະຫາກຳ, ຂ້າພະເຈົ້າຈະສືບຕໍ່ສຸມໃສ່ ຢ່າງຕັ້ງໜ້າ ເຂົ້າໃນຂະບວນການ ຝຶກຊ້ອມ ຢູ່ທີມຊາດ. ພ້ອມ​ກັນ​ນັ້ນ ແມ່ນ​ ເອົາ​ໃຈ​ໃສ່​ ກວດຄືນ​ ການ​ແຂ່ງຂັນ ໃນງານ​ມະຫາ​ກຳ​ກິລາ ​ເພື່ອ​ຖອດ​ຖອນ​ບົດຮຽນ​ ແລະ ຜ່ານ​ນັ້ນແມ່ນ​ປັບປຸງ, ແກ້ໄຂ ຈຸດ​ອ່ອນ. ຕົວຢ່າງ: ການໃຊ້ພະລັງງານ ທີ່ເໝາະສົມ ສໍາລັບ ແຕ່ລະໄລຍະ ການແລ່ນ; ສະ​ສົມ​ຄວາມ​ເຂັ້ມ​ແຂງ​ທາງ​ດ້ານ​ຮ່າງ​ກາຍ ເພື່ອ​ເອົາ​ຊະ​ນະ​ບັນ​ດາ​ສິ່ງ​ທ້າ​ທາຍ​ສາ​ກົນ​ ທີ່​ຈະ​ມາ​ເຖິງ”.

ຜົນສຳເລັດຂອງນາງ ແອວງ ໃນຕະຫຼອດງານມະຫາກຳ 3 ຄັ້ງ​ທີ່​ຜ່ານ​ມາ​ ໄດ້​ສະ​ແດງ​ໃຫ້​ເຫັນ​ຢ່າງ​ຈະ​ແຈ້ງ​ເຖິງ ​ຄວາມພະ​ຍາ​ຍາມ, ຄວາມ​ອົດ​ທົນ ແລະ ​ພະ​ລັງ​ຈິດໃຈ ຝຶກຊ້ອມຂອງນາງ. ນອກຈາກ ນຳຄວາມພາກພູມໃຈ ມາໃຫ້ປະເທດຊາດ​ແລ້ວ, ນາງ ແອວງ ຍັງຍັງ​ສະ​ແດງ​ໃຫ້​ເຫັນ ຄວາມຕັ້ງໝັ້ນຝຶກຝົນຫຼໍ່ຫຼອມ ແລະ ຈິດ​ໃຈ​ພະຍາ ຍາມ​ຜ່ານ​ຜ່າ​ສິ່ງ​ທ້າ​ທາຍ. ບັນດາຫຼຽນ​ຄຳ​ຂອງ ນາງ​ແອວງ ​ໄດ້​ສ້າງ​ແຮງ​ບັນ​ດານ​ໃຈ​ໃຫ້​ຊາວໜຸ່ມ ຫວຽດ​ນາມ ຢ່າງແທ້ຈິງ. ນັ້ນຄື ຜົນ ສຳເລັດ ແມ່ນມາຈາກຄວາມຫຼົງໄຫຼ ແລະ ຄວາມພາກພຽນ ພະຍາຍາມ. 

ບົດ: ຖາວວີ - ພາບ: ຫງວຽນຕ໋ຽນແອງຕ໋ວນ, ຄວາຫງວຽນ, VNA - ແປໂດຍ: ບິກລຽນ