ເນື່ອງໃນໂອກາດການຢ້ຽມຢາມ ສປປ.ລາວ ຂອງ ທ່ານ ເຈິ່ນເກີມຕູ ຜູ້ປະຈຳການຄະນະເລຂາທິການສູນກາງພັກກອມມູນິດ ຫວຽດນາມ ແລະ ຄະນະຜູ້ແທນຂັ້ນສູງ ຫວຽດນາມ ຢ່າງເປັນທາງການ ຈະດຳເນີນໃນວັນທີ 09 ເມສາ 2026, ນັກຂ່າວສຳນັກຂ່າວສານ ຫວຽດນາມ ໄດ້ສຳພາດ ທ່ານນາງ ຄຳເພົາ ເອີນທະວັນ ເອກອັກຄະລັດຖະທູດ ຜູ້ມີອຳນາດເຕັມແຫ່ງ ສປປ.ລາວ ປະຈຳ ຫວຽດນາມ ກ່ຽວກັບເນື້ອໃນທີ່ກ່ຽວຂ້ອງເຖິງການຢ້ຽມຢາມ.
ທ່ານນາງ ຄຳເພົາ ເອີນທະວັນ ເອກອັກຄະລັດຖະທູດ ຜູ້ມີອຳນາດເຕັມແຫ່ງ ສປປ.ລາວ ປະຈຳ ຫວຽດນາມ (ພາບ: TTXVN)
ທ່ານນາງ ຄຳເພົາ ເອີນທະວັນ ຢັ້ງຢືນວ່າ ການຢ້ຽມຢາມ ຈະສືບຕໍ່ປັບປຸງຄວາມໄວ້ເນື້ອເຊື່ອໃຈດ້ານການເມືອງຢູ່ໃນລະດັບສູງສຸດລະຫວ່າງສອງພັກ, ສອງລັດ ໂດຍຜ່ານການເພີ່ມທະວີການແລກປ່ຽນຍຸດທະສາດ, ເປັນເອກະພາບສະຕິຄວາມຮັບຮູ້ ແລະ ການກະທຳໃນການຜັນຂະຫຍາຍມະຕິກອງປະຊຸມໃຫຍ່ຂອງພັກຂອງແຕ່ລະຝ່າຍ. ພ້ອມດຽວກັນນັ້ນ, ການຢ້ຽມຢາມກໍ່ໄດ້ສ້າງກຳລັງໜູນໃໝ່ເພື່ອຍົກສູງຄຸນນະພາບການຮ່ວມມືໃນບັນດາຂົງເຂດຫຼັກແຫຼ່ງເຊັ່ນ: ການປ້ອງກັນຊາດ - ປ້ອງກັນຄວາມສະຫງົບ, ການສຶກສາ - ບຳລຸງສ້າງ, ພັດທະນາແຫຼ່ງຊັບພະຍາກອນມະນຸດ ແລະ ສົມທົບກັບການພົວພັນຕ່າງປະເທດ.
ທ່ານນາງ ຄຳເພົາ ເອີນທະວັນ ກໍຫວັງວ່າ ສອງຝ່າຍຈະບັນລຸໄດ້ຄວາມເປັນເອກະພາບສູງກ່ຽວກັບບັນດາການກຳນົດທິດໃຫຍ່ ເພື່ອແນໃສ່ຫັນເນື້ອໃນ “ຫຸ້ນສ່ວນຍຸດທະສາດ” ເປັນລະອຽດ, ໃນນັ້ນ ສຸມໃສ່ການຍູ້ແຮງການເຊື່ອມຕໍ່ລະຫວ່າງສອງພື້ນຖານເສດຖະກິດຕາມທິດຊ່ວຍຊູກັນ, ພ້ອມກັນພັດທະນາ, ຊຸກຍູ້ບັນດາໂຄງການຈຸດສຸມກ່ຽວກັບພື້ນຖານໂຄງລ່າງ, ພະລັງງານ, ການຄ້າ - ການລົງທຶນ,… ໄປຄຽງຄູ່ກັນນັ້ນ, ທ່ານເອກອັກຄະລັດຖະທູດ ກໍເຊື່ອໝັ້ນວ່າ ດ້ວຍຄວາມຕັດສິນໃຈດ້ານການເມືອງສູງ, ພ້ອມກັບມູນເຊື້ອຜູກກັນອັນໜຽວແໜ້ນ, ບໍລິສຸດຜຸດຜ່ອງ, ສາຍພົວພັນມິດຕະພັນອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລາວ - ຫວຽດນາມ ຈະສືບຕໍ່ພັດທະນາຢ່າງແຂງແຮງ.