ທີ່ການຢ້ຽມຢາມ ຫວຽດນາມ ແຕ່ວັນທີ 21-24 ມີນາ 2017, ທ່ານ ຫຼີສຽນຫຼົງ, ນາຍົກລັດຖະມົນຕີ ສິງກະໂປ ແລະ ບັນດາທ່ານຜູ້ນຳ ຫວຽດນາມ ໄດ້ເປັນເອກະສັນກັນວ່າ ຈະຊຸກຍູ້ຫຼາຍກວ່າເກົ່າການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ; ໃນນັ້ນ ໄດ້ຖືການພັດທະນາຢ່າງແຂງແຮງຂອງການພົວພັນ ຮ່ວມມືດ້ານ ການຄ້າ, ການລົງທຶນ ແລະ ເສດຖະກິດແມ່ນ ເສົາຫຼັກທີ່ໝັ້ນຄົງຂະໜົງແກ່ນຂອງສາຍພົວພັນພິເສດດັ່ງກ່າວນີ້.
ຫວຽດນາມ ແລະ ສິງກະໂປ ເປັນສອງປະເທດຢູ່ອາຊີຕາເວັນ ອອກສ່ຽງໃຕ້ ມີສາຍພົວພັນຄູ່ຮ່ວມມືຍຸດທະສາດ. ສິງກະໂປ ພວມເປັນປະເທດລົງທຶນອັນດັບ 3 ຢູ່ ຫວຽດນາມ. ຄຽງຄູ່ກັນນັ້ນ, ສາຍພົວພັນໃນບັນດາຂົງເຂດຄື: ການເມືອງ, ປ້ອງກັນປະເທດ-ປ້ອງກັນຄວາມສະຫງົບ, ການພົບປະສ້າງສັນລະຫວ່າງປະຊາຊົນສອງປະເທດ… ກໍ່ໄຂຂຶ້ນຢ່າງດີງາມ.
ບົນພື້ນຖານດັ່ງກ່າວ, ທີ່ການຢ້ຽມຢາມຄັ້ງນີ້, ທ່ານ ຫຼີສຽນຫຼົງ, ນາຍົກລັດຖະມົນຕີ ສິງກະໂປ ແລະ ທ່ານ ຫງວຽນຊວນຟຸກ ໃຫ້ຮູ້ວ່າ ສອງຝ່າຍຕ້ອງເພີ່ມທະວີການກໍ່ສ້າງຄວາມໄວ້ເນື້ອເຊື່ອໃຈຍຸດທະສາດ, ຊຸກຍູ້ການຮ່ວມມືເຊື່ອງໂຍງ ແລະ ເຮັດໃຫ້ການ ພົວພັນຄູ່ຮ່ວມມືຍຸດທະສາດລະຫວ່າງ ຫວຽດນາມ-ສິງກະໂປ ມີຄວາມເລິກເຊິ່ງກວ່າເກົ່າ.
ທ່ານ ຫງວຽນຊວນຟຸກ, ນາຍົກລັດຖະມົນຕີ ຕ້ອນຮັບ
ທ່ານ ຫຼີສຽນຫຼົງ, ນາຍົກລັດຖະມົນຕີແຫ່ງປະເທດ ສິງກະໂປ. ພາບ: ຖົ໋ງເຍິດ/VNA
ພິທີຕ້ອນຮັບຢ່າງເປັນທາງ ການໄດ້ ຈັດຂຶ້ນຢ່າງສົມກຽດທີ່ ທຳນຽບປະທານປະເທດ. ພາບ: ຖົ໋ງເຍິດ/VNA
ທ່ານ ຫງວຽນຊວນຟຸກ, ນາຍົກລັດຖະມົນຕີ ແລະ ທ່ານ ຫຼີສຽນຫຼົງ,
ນາຍົກລັດຖະມົນຕີແຫ່ງປະເທດ ສິງກະໂປ ກ່ອນທີ່ຈະປະຕິບັດການພົບປະເຈລະຈາ. ພາບ: ຖົ໋ງເຍິດ/VNA
ທ່ານ ຫງວຽນຊວນຟຸກ, ນາຍົກລັດຖະມົນຕີ ມີການພົບປະ ເຈລະຈາໃນວົງແຄບກັບ ທ່ານ ຫຼີສຽນຫຼົງ,
ນາຍົກລັດຖະມົນຕີ ແຫ່ງປະເທດ ສິງກະໂປ. ພາບ: ຖົ໋ງເຍິດ/VNA
ທ່ານ ຫງວຽນຊວນຟຸກ, ນາຍົກລັດຖະມົນຕີ ແລະ ທ່ານ ຫຼີສຽນຫຼົງ,
ນາຍົກລັດຖະມົນຕີແຫ່ງປະເທດ ສິງກະໂປ ປະຕິບັດການພົບປະເຈລະຈາ. ພາບ: ຖົ໋ງເຍິດ/VNA
ທ່ານ ຫງວຽນຊວນຟຸກ, ນາຍົກລັດຖະມົນຕີ ແລະ ທ່ານ ຫຼີສຽນຫຼົງ, ນາຍົກລັດຖະມົນຕີແຫ່ງປະເທດ ສິງກະໂປ
ໄດ້ເປັນສັກຂີພິຍານ ໃນພິທີລົງນາມໃນບົດບັນທຶກ ຊ່ວຍຈຳວ່າດ້ວຍການ ພັດທະນາໂຄງການກໍ່ສ້າງ
ເຂດອຸດສາຫະກຳ ເມືອງໃຫຍ່ ແລະ ການບໍລິການ SVIP ທີ່ ກວາງຈີ້ ຂອງ ຫວຽດນາມ. ພາບ: ຖົ໋ງເຍິດ/VNA
ທ່ານ ຫງວຽນຊວນຟຸກ, ນາຍົກລັດຖະມົນຕີ ແລະ ທ່ານ ຫຼີສຽນຫຼົງ,
ນາຍົກລັດຖະມົນຕີແຫ່ງປະເທດ ສິງກະໂປ ທີ່ກອງປະຊຸມຂ່າວ. ພາບ: ຖົ໋ງເຍິດ/VNA
ສອງຝ່າຍໄດ້ໃຫ້ຄຳໝັ້ນສັນຍາຈະຊຸກຍູ້, ເພີ່ມທະວີການຮ່ວມມືບົນຫຼາຍຂົງເຂດຄື: ເສດຖະກິດ, ການຄ້າ, ການລົງທຶນ, ການເມືອງ, ການພົບປະສ້າງສັນລະຫວ່າງປະຊາຊົນສອງປະເທດ, ການກໍ່ສ້າງພະນັກງານ, ປ້ອງກັນປະເທດ-ປ້ອງກັນ ຄວາມສະຫງົບ, ວິທະຍາສາດ, ການສຶກສາ, ເຕັກໂນໂລຊີ, ສິ່ງແວດລ້ອມ ແລະ ອື່ນໆ. ໃນນັ້ນໄດ້ເນັ້ນໜັກວ່າ ການພັດທະນາຢ່າງແຂງແຮງ ຂອງການພົວພັນຮ່ວມມື ດ້ານການຄ້າ, ການລົງທຶນ ແລະ ເສດຖະກິດລະຫວ່າງສອງປະເທດ ແມ່ນເສົາຫຼັກທີ່ໝັ້ນຄົງ ຄະໜົງແກ່ນ ຂອງການພົວພັນຄູ່ຮ່ວມມືຍຸດທະສາດ ແລະ ຢືນຢັນຈະຊຸກຍູ້ສະພາບແວດລ້ອມຂອງການເຄື່ອນໄຫວດຳເນີນເຮັດທຸລະກິດໄດ້ສະດວກກວ່າເກົ່າ, ເພີ່ມທະວີການເຊື່ອມຕໍ່ລະຫວ່າງບັນດາ ວິສາຫະກິດ.
ທ່ານ ຫຼີສຽນຫຼົງ ໃຫ້ຄຳໝັ້ນສັນຍາວ່າ ສິງກະໂປ ຈະສືບຕໍ່ຊ່ວຍເຫຼືອຫວຽດນາມ ໃນການກໍ່ສ້າງພະນັກງານ; ຊ່ວຍເຫຼືອບັນດາວິສາຫະກິດຫວຽດນາມ ເຂົ້າຮ່ວມການຕະຫຼາດໄດ້ສະດວກຂຶ້ນ; ສ້າງຕັ້ງບັນດາ ເຂດອຸດສາຫະກຳເຕັກໂນໂລຊີສູງ; ຊ່ວຍເຫຼືອ ຫວຽດນາມ ໃນການສ້າງສາປະເທດຊາດ, ນຳເຕັກໂນໂລຊີເຂົ້າໃນຊີວິດການເປັນຢູ່ ປະຈຳວັນ, ຍົກສູງລະດັບຊີວິດການເປັນຢູ່ຂອງປະຊາຊົນ; ແບ່ງປັນບົດຮຽນ, ຊ່ວຍເຫຼືອຜູ້ເລີ່ມສ້າງຕົວຂອງ ຫວຽດນາມ, ເປັນຕົ້ນແມ່ນໃນຂົງເຂດວິທະຍາສາດ-ເຕັກໂນໂລຊີ, ຊອກຫາໄດ້ ແຫຼ່ງທຶນຈາກບັນດາກອງທຶນລົງທຶນ, ຍົກສູງຄວາມສາມາດໃນການຄຸ້ມຄອງວິສາຫະກິດ, ເຊື່ອມຕໍ່ລະຫວ່າງບັນດານະຄອນໃຫຍ່ຂອງ ຫວຽດນາມ ຄື ນະຄອນ ໂຮ່ຈີມິນ, ດ່າໜັງ ກັບ ສິງກະໂປ…
ທ່ານ ຫງວຽນຝູ໋ຈ້ອງ, ເລຂາທິການໃຫຍ່ພັກກອມມູນິດ ຫວຽດນາມ ຕ້ອນຮັບ
ທ່ານ ຫຼີສຽນຫຼົງ, ນາຍົກລັດຖະມົນຕີແຫ່ງປະເທດ ສິງກະໂປ. ພາບ: ຈີ໋ຢຸງ/VNA
ທ່ານ ເຈີ່ນດ້າຍກວາງ, ປະທານປະເທດແຫ່ງ ສສ. ຫວຽດນາມ ຕ້ອນຮັບ
ທ່ານ ຫຼີສຽນຫຼົງ, ນາຍົກລັດຖະມົນຕີແຫ່ງປະເທດ ສິງກະໂປ. ພາບ: ຍານຊ໋າງ/VNA
ທ່ານນາງ ຫງວຽນທິກີມເງິນ, ປະທານສະພາແຫ່ງຊາດ ແຫ່ງ ສສ. ຫວຽດນາມ ພົບປະແລກປ່ຽນຄຳຄິດຄຳເຫັນ
ກັບທ່ານ ຫຼີສຽນຫຼົງ, ນາຍົກລັດຖະມົນຕີແຫ່ງປະເທດ ສິງກະໂປ. ພາບ: ຈ້ອງດຶກ/VNA
ທ່ານ ຫງວຽນແທ່ງຟອງ, ປະທານຄະນະກຳມະການ ປະຊາຊົນ ນະຄອນ ໂຮ່ຈີມິນ ໄດ້ມີການພົບປະແລກປ່ຽນ
ຄຳຄິດຄຳເຫັນ ກັບທ່ານ ຫຼີສຽນຫຼົງ, ນາຍົກລັດຖະມົນຕີແຫ່ງປະເທດ ສິງກະໂປ. ພາບ: ແທງຫວູ/VNA
ເນື່ອງໃນໂອກາດນີ້, ທ່ານ ຫງວຽນຊວນຟຸກ ແລະ ທ່ານ ຫຼີສຽນຫຼົງ ໄດ້ຕົກລົງກັນວ່າ ຈະຮັກສາການປືກສາ ແລະ ຮວມມືຢ່າງແໜ້ນແຟ້ນກັບບັນດາປະເທດຕ່າງໆ ໃນກຸ່ມ ອາຊຽນ. ກໍ່ສ້າງອາຊຽນ ໜຶ່ງແຫ່ງຄວາມສາມັກຄີ, ລວມເປັນເອກະພາບ, ຂະຫຍັນ, ມີຫົວຄິດປະດິດສ້າງ, ຜັນຂະຫຍາຍບົດບາດທີ່ເປັນໃຈກາງຂອງ ສະມາຄົມໃນການແກ້ໄຂ ບັນດາບັນຫາຍຸດທະສາດໃນພາກພື້ນ, ເປັນຕົ້ນແມ່ນບັນຫາຢູ່ທະເລຕາເວັນອອກ.
ຫວຽດນາມ ແລະ ສິງກະໂປ ໄດ້ຢືນຢັນຄວາມສຳຄັນຂອງການຮັກສາສັນຕິພາບ, ສະຖຽນນະພາບ, ຄວາມສະຫງົບ, ປອດໄພ ແລະ ເສລີຂອງການເດີນທະເລ, ການບິນຢູ່ທະເລຕາເວັນອອກ; ແກ້ໄຂຂໍ້ຂັດແຍ້ງດ້ວຍສັນຕີວິທີບົນພື້ນຖານກົດໝາຍສາກົນ, ໃນນັ້ນ ມີສົນທິສັນຍາຂອງສະຫະປະຊາຊາດວ່າດ້ວຍກົດໝາຍທາງທະເລ 1982 (UNCLOS 1982), ປະຕິບັດຖະແຫຼງການ ວ່າດ້ວຍການປະພຶດຕໍ່ ຂອງຝ່າຍຕ່າງໆ ຢູ່ທະເລຕາເວັນອອກ (DOC) ຢ່າງຄົບຖ້ວນ, ຊຸກຍູ້ການກໍ່ສ້າງປະມວນ ກົດລະບຽບ ການປະພຶດຢູ່ທະເລຕາເວັນອອກ (COC) ໂດຍໄວ.
ສິງກະໂປ ເປັນຄູ່ຮ່ວມມືດ້ານການຄ້າອັນດັບທີ 3 ຂອງ ຫວຽດນາມ ຢູ່ ອາຊຽນ ແລະ ເປັນອັນດັບທີ 6 ໃນໂລກ. ມູນຄ່າການຄ້າສອງສົ້ນປີ 2016 ບັນລຸໄດ້ 7,1 ຕື້ໂດລາສະຫະລັດ. ສິງກະໂປ ເປັນປະເທດລົງທຶນອັນດັບທີ 3 ຢູ່ ຫວຽດນາມ ດ້ວຍ 1.800 ໂຄງການ, ຍອດເງິນ
ລົງທຶນປະມານ 39 ຕື້ ໂດລາສະຫະລັດ. ປະຈຸບັນ ຢູ່ ຫວຽດນາມ ພວມມີ 7 ເຂດອຸດສາຫະກຳ ຫວຽດນາມ-ສິງກະໂປ, ນີ້ໄດ້ຖືວ່າ ເປັນສັນຍາລັກທີ່ເຂັ້ມແຂງຂອງສາຍພົວພັນເສດຖະກິດທີ່ໃກ້ຊິດລະຫວ່າງສອງປະເທດ. |
ປະຕິບັດໂດຍ: VNA/VNP