25/03/2015 10:00 GMT+7 Email Print Like 0

IPU 132 ສ້າງຄວາມດຶງດູດ ເພື່ອນມິດສາກົນຢ່າງແຮງ

ກະ​ກຽມ​ໃຫ້​ພິ​ທີ​ໄຂ IPU 132
        ພາ​ຍຫຼັງ 3 ປີ​ຢ່າງ​ລຽນ​ຕິດ​ຈັດ​ຕັ້ງ​ຢ​ູ່ ເຊີ​ແນວ, ປະ​ເທດ ສະ​ວິດ, ປີ 2015, ກອງ​ປະ​ຊຸມ​​ສະ​ມັດ​ຊາໃຫຍ່​ລັດ​ຖະ​ສະ​ພາ​ລະ​ຫວ່າງ​ຊາດໂລກ 132 (IPU 132) ໄດ້​ຮັບ​ການ​ຈັດ​ຕັ້ງ​ຢູ່ ຫວຽດ​ນາມ, ສ້າງ​ຄວາມ​ດຶງ​ດູດ​ອັນ​ໃຫຍ່ຫຼວງ ສຳ​ລັບ​ເພື່ອນ​ມິດ​ສາ​ກົນ. ຮອດ​ຈຸດ​ເວ​ລານີ້, ມີ​ທັງ​ໝົດ 163 ຄະ​ນະ​ຈົດ​ທະ​ບຽນ​ເຂົ້າ​ຮ່ວມ, ໃນ​ນັ້ນ​ມີ 50 ຄະ​ນະ​ຂັ້ນ​ປະ​ທານ​ສະ​ພາ​ແຫ່ງ​ຊາດ, 20 ຄະ​ນະ​ຂັ້ນ​ຮອງ​ປະ​ທານ​ສະ​ພາ​ແຫ່ງ​ຊາດ. ຈຳ​ນວນ​ຜູ້​ແທນ​ຈົດ​ທະ​ບຽນ​ເຂົ້າ​ຮ່ວມກອງ​ປະ​ຊຸມແມ່ນ​ປະ​ມານ 1650 ທ່ານ, ລື່ນ​ກາຍ​ການ​ຄາ​ດ​ຄະ​ເນ​ຂອງ​ປະ​ເທດ​ເຈົ້າ​ພາບ ຫວຽດ​ນາມ.
        ຕາມ​ທ່ານ​ນາງ ຫງວຽນ​ແທງ​ຫາຍ, ຮອ​ງ​ຫົວ​ໜ້າ​ຫ້ອງວ່າ​ການ​ສະ​ພາ​ແຫ່ງ​ຊາດ ແລ​້ວ, ຫວຽດ​ນາມ ເຄີຍ​ຈັດ​ຕັ້ງຫຼາຍ​ເຫດ​ການ​ສາ​ກົນ​ໃຫຍ່ ແລະ ສ້າງຄວາມ​ປະ​ທັບ​ໃຈ​ຢ່າງ​ແຮງ ໃຫ້​ເພື່ອນ​ມິດ​ສາ​ກົນ ​. ກອ​ງ​ປະ​ຊຸມ​ໃຫຍ່ IPU 132 ຄັ້ງ​ນີ້​ສືບ​ຕໍ່​ແມ່ນ​ໂອ​ກາດ​ເພື່ອ​ໃຫ້ ຫວຽດ​ນາມ ແນະ​ນຳ​ກ່ຽວ​ກັບ​ປະ​ຫວັດ​ສາດ, ວັດ​ທະ​ນະ​ທຳ, ການ​ທ​່ອງ​ທ່ຽວ, ປະ​ເທດ​ຊາດ, ຊາວ ຫວຽດ​ນາມ ກໍ່​ຄື​ການ​ພັດ​ທະ​ນາ​ເສດ​ຖະ​ກິດ​ທີ່​ຂະ​ຫຍັນ​ຂັນ​ເຄື່ອນ​ໃນ​ຊຸມ​ປີມໍ່ໆ​ມານີ້​ຂອງ ຫວຽດ​ນາມ. ດັ່ງ​ນັ້ນ, ໃນ​ຂອບ​ເຂດກອງ​ປະ​ຊຸມ​ IPU 132, ຄຽງ​ຄູ່​ກັບ​ບັນ​ດາ​ກອງ​ປະ​ຊຸມ​ໃຫຍ່, ຫວຽດ​ນາມ ຈັດ​ຕັ້ງ​ການ​ເຄື່ອນ​ໄຫວນອກກອງ​ປະ​ຊຸມ​ຄື: ໄປ​ຢ້ຽມ​ຢາມ​ບັນ​ດາ​ທັດ​ສະ​ນີ​ຍະ​ພາບ, ມໍ​ລະ​ດົກ​ຂອງ ຫວຽດ​ນາມ, ຫຼື​ເຂົ້າ​ຮ່ວມ​ຄ່ຳ​ຄືນ​ມະ​ຫາ​ສາ​ມັກ​ຄີ​ບັນ​ດາ​ລັດ​ຖະ​ສະ​ພາ​ຢູ່​ບ້ານ​ວັດ​ທະ​ນະ​ທຳ​ບັນ​ດາ​ເຜົ່າ ຫວຽດ​ນາມ. ທ່ານ​ນາງ ຫງວຽນ​ແທ​ງ​ຫາຍ, ເນັ້ນ​ໜັກ​ວ່າ:
        “ນີ້​ແມ່ນ​ໂອ​ກາດ​ເພື່ອ​ໃຫ້​ພວກ​ເຮົາ​ອາດ​ສາ​ມາດ​ໂຄ​ສະ​ນາ​ເຜີຍ​ແຜ່​ມູນ​ເຊື້ອວັດ​ທະ​ນະ​ທຳຂອງຫຼາຍ​ຊົນ​ເຜົ່າ​ຢູ່ ຫວຽດ​ນາມ. ພວກ​ຂ້າ​ພະ​ເຈົ້າ​ຫວັງ​ວ່າ, ຜ່ານນັ້ນ​ບັນ​ດາ​ຜູ້​ແທນ​ຈະ​ເຂົ້າ​ໃຈ​ກ່ຽວ​ກັບ​ສີ​ສັນ​ວັດ​ທະ​ນະ​ທຳ​ຂອງ ຊາວ ຫວຽດ​ນາມ ເລິກ​ເຊິ່ງ​ກ່​ວາ, ນັ້ນ​ແມ່ນ​ຄວາມ​ຮັກ​ຫອມ​ສັນ​ຕິ​ພາບ, ດຸ​ໝັ່ນ​ຂະ​ຫຍັນ​ພຽນໃນ​ການ​ອອກ​ແຮງ​ງານ ແລະ ຄວາມ​ຫ້າວ​ຫັນໃນ​ ການດຳ​ລົງຊີ​ວິດ​”
        ເນື່ອງ​ໃນ​ໂອ​ກາດນີ້, ກະ​ຊວງວັດ​ທະ​ນະ​ທຳ - ກິ​ລາ - ທ່ອງ​ທ່ຽວ ຫວຽດ​ນາມ ກໍ່​ໄດ້​ເພີ່ມ​ທະ​ວີ​ການ​ຈັດ​ຕັ້ງ​ບັນ​ດາ​ການ​ເຄື່ອນ​ໄຫວ​ໂຄ​ສະ​ນາ, ເຜີຍ​ແຜ່ ກ່ຽວ​ກັບ​ການ​ທ່ອງ​ທ່ຽວ ຫວຽດ​ນາມ ຢູ່​ບ່ອນ​ຈັດ​ຕັ້ງ​ກອງ​ປະ​ຊຸມ​ IPU ແລະ ຢູ່ບັນ​ດາ​ໂຮງ​ແຮມ​ບ່ອນ​ຄະ​ນະ​ຜູ້​ແທນ​ເຂົ້າ​ຮ່ວມ IPU 132 ພັກອາ​ໄສ, ທ່ານ​ລັດ​ຖະ​ມົນ​ຕີ​​ຊ່ວຍ​ວ່າ​ການກະ​ຊວງວັດ​ທະ​ນະ​ທຳ - ກິ​ລາ - ທ່ອງ​ທ່ຽວ ຮິ່ງວີ້ງ​ອ໋າຍ, ໃຫ້​ຮູ້​ວ່າ:
        “ບໍ່​ພຽງ​ແຕ່​ຢູ່ ຮ່າ​ໂນ້ຍ ເທົ່າ​ນັ້ນ, ພວກ​ຂ້າ​ພະ​ເຈົ້າ​ຊີ້​ນຳ​ບັນ​ດາ​ໂຮມ​ແຮມ​ແຫ່ງ​ໃຫຍ່​ໃນ​ທົ່ວ​ປະ​ເທດ, ຖ້າ​ຫາກ​ມີ​ແຂກ​​ເຄື່ອນ​ໄຫວ​ຢູ່ນອກ​ລາຍ​ການ​ຂອງກອງ​ປະ​ຊຸມ IPU 132 ກໍ່​ມີ​ແຜນ​ການ​ຕ້ອນ​ຮັບ. ກະ​ຊວງກໍ່​ໄດ້​ສົມ​ທົບ​ກັບ ຮ່າ​ໂນ້ຍ ຜັນ​ຂະ​ຫຍາຍ​ການ​ທ່ອງ​ທ່ຽວ​ຢູ່​ພາຍ​ໃນ​ນະ​ຄອນ​ຄື: ເດື່ອງ​ເລີມ, ບາດ​ຈ່າງ…”
 (ແຫຼ່ງຄັດຈາກ VOV)