10/01/2018 10:43 GMT+7 Email Print Like 0

ໄຂງານວາງສະແດງຮູບພາບບຸນປີໃໝ່ປະຈຳຊາດ ຫວຽດນາມ - ຈີນ ຢູ່ປັກກິງ

      ໂດຍຮັບຄຳເຊີນຂອງກະຊວງວັດທະນະທຳ ຈີນ, ທ່ານ ຫງວຽນງອກທ້ຽນ ລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ແລະ ຄະນະປະຕິບັດງານຂັ້ນສູງໄດ້ຢ້ຽມຢາມ ຈີນ ຢ່າງເປັນທາງການ ແຕ່ວັນທີ 7 – 9 ມັງກອນ.
      
ໄຂງານວາງສະແດງຮູບພາບບຸນປີໃໝ່ປະຈຳຊາດ ຫວຽດນາມ - ຈີນ ຢູ່ປັກກິງ
(ພາບ: TTXVN)
      ໃນຕອນບ່າຍວັນທີ 8 ມັງກອນ, ທ່ານ ລັດຖະມົນຕີ ຫງວຽນງອກທ້ຽນ ໄດ້ເຂົ້າຮ່ວມພິທີໄຂງານວາງສະແດງຮູບພາບບຸນປີໃໝ່ປະຈຳຊາດ ຫວຽດນາມ - ຈີນ ຢູ່ສະມາຄົມມິດຕະພາບການຕ່າງປະເທດປະຊາຊົນນະຄອນ ປັກກິ່ງ.
        ທີ່ງານວາງສະແດງ, ສາທາລະນະຊົນ ແລະ ແຂກຢ້ຽມຊົມມີໂອກາດໄດ້ຮັບຊົມບັນດາຊຸດຮູບພາບພື້ນເມືອງ ຫວຽດນາມ ດ້ວຍປະເພດທີ່ເປັນເອກະລັກສະເພາະຕ່າງໆຄື: ພາບ ດົງໂຮ່, ພາບ ຮ່າງຈົ໋ງ… ບັນດາຮູບພາບທີ່ມີສີສັນ ຫວຽດນາມນີ້ປະກອບມີ 3 ຫົວຂໍ້: ພາບບຸນປີໃໝ່ປະຈຳຊາດ, ພາບບູຊາ ແລະ ພາບທີ່ມີຄວາມໝາຍກ່ຽວກັບ ຄອບຄົວ, ກ່ຽວກັບມູນເຊື້ອ ແລະ ກົກເຄົ້າ. ສ່ວນບັນດາຮູບພາບພື້ນເມືອງທີ່ເປັນເອກະລັກສະເພາະຂອງ ຈີນ ກໍ່ກວມເອົາຫຼາຍຄຸນຄ່າກ່ຽວກັບຄວາມງາມ, ຈິດໃຈ ແລະ ການເຫຼື້ອມໃສຂອງຄົນບູຮານ. ບັນດາຮູບພາບພື້ນເມືອງຂອງ ຈີນ ໄດ້ສ່ອງແສງໃຫ້ເຫັນຢ່າງຈະແຈ້ງຈຸດທີ່ຄ້າຍຄືກັນກັບ ຫວຽດນາມ ກ່ຽວກັບ ຮີດຄອງປະເພນີໃນການຊື້ຮູບພາບໃນໂອກາດບຸນປີໃໝ່, ສ້າງຄວາມອົບອຸ່ນ ແລະ ພາວະນາຂໍ້ໃຫ້ປີໃໝ່ປະສົບແຕ່ຄວາມໂຊກດີ ແລະ ຄວາມວັດທະນາຖາວອນ. ງານວາງສະແດງເປີດບໍລິການເຖິງວັນທີ 15 ມັງກອນ.
 (ແຫຼ່ງຄັດຈາກ VOV)