22/03/2016 09:58 GMT+7 Email Print Like 0

ໄຂກອງປະຊຸມສະໄໝສາມັນເທື່ອທີ 11, ສະພາແຫ່ງຊາດຊຸດທີ 13


ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 11 ສະພາ​ແຫ່ງ​ຊາດ​ຊຸດ​ທີ 13 
(ພາບ: DuyLinh)​

      ວັນ​ທີ  21/3, ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 11, ​ເຊິ່ງ​ແມ່ນ​ກອງ​ປະຊຸມ​ສຸດ​ທ້າຍ​ຂອງສະພາ​ແຫ່ງ​ຊາດ​ຊຸດ​ທີ 13 ​ໄດ້​ໄຂ​ຂຶ້ນ​ຢ່າງ​ສົມ​ກຽດ​ຢູ່​ນະຄອນຫຼວງ ຮ່າ​ໂນ້ຍ.
        ​ເຂົ້າ​ຮ່ວມ​ພິທີ​ໄຂ​ມີ​ທ່ານ ຫງວຽນ​ຟູ໋ຈ້ອງ, ​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດ ຫວຽດນາມ; ທ່ານ ​ເຈືອງ​ເຕິ໋ນຊາງ, ປະທານ​ປະ​ເທດ; ທ່ານ ຫງວຽນ​ເຕິ໋ນຢຸງ, ນາຍົກລັດຖະມົນຕີ; ທ່ານ ຫງວຽນ​ຊິງ​ຮຸ່ງ, ປະທານ​ສະພາ​ແຫ່ງ​ຊາດ; ທ່ານ ຫງວຽນ​ທ້ຽນ​ເຍິນ, ປະທານ​ຄະນະ​ກຳມະການ​ສູນ​ກາງ ​ແນວ​ໂຮມ​ປະ​ເທດ​ຊາດ​ ຫວຽດນາມ; ບັນດາ​ນັກ​ປະຕິວັດ​ຜູ້​ອາວຸ​ໂສ, ບັນດາ​ສະມາຊິກ​ສະພາ​ແຫ່ງ​ຊາດ (ສສຊ); ຜູ້ຕາງໜ້າ​ຄະນະ​ທູຕານຸທູດ ​ແລະ ບັນດາ​ອົງການ​ຈັດ​ຕັ້ງ​ສາກົນ​ຢູ່​ຫວຽດນາມ.
        ກ່າວ​ປາ​ໄສ​ໄຂ​ກອງ​ປະຊຸມ, ທ່ານ ຫງວຽນ​ຊິງ​ຮຸ່ງ, ປະທານ​ສະພາ​ແຫ່ງ​ຊາດ, ​ເນັ້ນ​ໜັກ​ເຖິງ​ຄວາມ​ສຳຄັນ ​ແລະ ຄວາມ​ໝາຍ​ພິ​ເສດ​ຂອງ ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 11 ດ້ວຍປະລິມານ​ວຽກ​ງານຢ່າງ​ຫຼວງຫຼາຍ ​ແລະ ມີ​ເນື້ອ​ໃນ​ສຳຄັນຫຼາຍ​ຢ່າງ. ທ່ານ ຫງວຽນ​ຊິງ​ຮຸ່ງ, ປະທານ​ສະພາ​ແຫ່ງ​ຊາດ ຊີ້​ແຈ້ງວ່າ:
        “ທີ່ກອງ​ປະຊຸມ​ສະ​ໄໝ​ສາມັນ​ຄັ້ງ​ນີ້, ສະພາ​ແຫ່ງ​ຊາດ​ຈະ​ພິຈາລະນາ, ຕີ​ລາຄາ​ເພີ່ມ​ເຕີມ​ຜົນ​ແຫ່ງ​ການ​ປະຕິບັດ​ໜ້າ​ທີ່​ເສດຖະກິດ-ສັງຄົມ ​ແລະ ງົບປະມານ​ແຫ່ງ​ລັດ​ປີ 2015. ຜົນ​ແຫ່ງ​ການ​ປະຕິບັດ​ແຜນການ​ພັດທະນາ​ເສດຖະກິດ - ສັງຄົມ​ໄລຍະ 5 ປີ 2011-2015 ​ແລະ ຕົກລົງ​ແຜນການ​ພັດທະນາ​ເສດຖະກິດ​-ສັງຄົມ​ໄລຍະ 2016-2020. ສະພາ​ແຫ່ງ​ຊາດ​ຈະ​ພິຈາລະນາ, ຮັບຮອງ​ເອົາ​ຮ່າງ​ກົດໝາຍຈຳນວນ​ໜຶ່ງ. ພິ​ເສດ, ສະພາ​ແຫ່ງ​ຊາດ​ຈະ​ປັບປຸງ​ການຈັດ​ຕັ້ງກົງຈັກບັນດາ​ອົງການ​ແຫ່ງ​ລັດ, ພິຈາລະນາ​ສະຫຼຸບ​ການ​ເຄື່ອນ​ໄຫວ​ຂອງ​ກົງຈັກ​ລັດ; ພິຈາລະນາ​ສະຫຼຸບ​ການ​ເຄື່ອນ​ໄຫວ​ຂອງ​ກົງຈັກ​ລັດ​ໃນ​ອາຍຸ​ການ​ຜ່ານ​ມາ ​ແລະ ບັນດາ​ບັຍຫາ​ສຳຄັນ​ອື່ນໆ​ອີກ“.
        ທ່ານ ຫງວຽນ​ຊິງ​ຮຸ່ງ, ປະທານ​ສະພາ​ແຫ່ງ​ຊາດກໍ່​ສະ​ເໜີ​ບັນດາ ສສຊ ຍົກ​ສູງ​ນ້ຳ​ໃຈ​ຮັບຜິດຊອບ, ມີ​ຄວາມສາມັກຄີ, ປະຊາທິປະ​ໄຕ, ມີພູມ​ປັນຍາ, ປະກອບ​ຫຼາຍ​ຄວາມ​ເຫັນ​ຢ່າງ​ເລິກ​ເຊິ່ງ, ມີ​ຄຸນ​ນະພາ​ບ, ປະກອບສ່ວນ​ເພື່ອ​ເຮັດ​ໃຫ້​ກອງ​ປະຊຸມ​ສຳ​ເລັດ​ຜົນ.
        ຈາກ​ນັ້ນ, ສະພາ​ແຫ່ງ​ຊາດ​ກໍ່​ຮັບ​ຟັງ​ທ່ານ ຫງວຽນ​ຊວນ​ຟຸກ, ຮອງ​ນາຍົກລັດຖະມົນຕີ ຕາງໜ້າ​ລັດຖະບານ, ສະ​ເໜີບ​ົດລາຍງານ​ຕີ​ລາຄາ​ເພີ່ມ​ເຕີມ ກ່ຽວ​ກັບ​ຜົນ​ແຫ່ງ​ການ​ປະຕິບັດ​ແຜນການ​ພັດທະນາ​ເສດຖະກິດ-​ສັງຄົມ​ປີ 2015. ການຜັນ​ຂະຫຍາຍແຜນການ​ພັດທະນາ​ເສດຖະກິດ-​ສັງຄົມ​ປີ 2016 ​ແລະ ບົດລາຍ​ງານ​ແຜນການ​ພັດທະນາ​ເສດຖະກິດ-ສັງຄົມ​ໄລຍະ 5 ປີ 2016-2020. ທ່ານ ຫງວຽນ​ທ້ຽນ​ເຍິນ, ປະທານ​ຄະນະ​ກຳມະການ​ສູນ​ກາງ ​ແນວ​ໂຮມ​ປະ​ເທດ​ຊາດ​ ຫວຽດນາມ​ສະ​ເໜີ​ບົດ​ລາຍ​ງານ​ສັງ​ລວມຄວາມ​ເຫັນ​ຂອງ​ຜູ້​ມີ​ສິດ​ເລືອກ​ຕັ້ງ​ທີ່​ສົ່ງ​ເຖິງ​ກອງ​ປະຊຸມ.
        ກ່ອນວາລະ​ໄຂ​ກອງ​ປະຊຸມ, ບັນດາ​ການ​ນຳ​ພັກ, ລັດ ​ແລະ ຜູ້ຕາງໜ້າ​ບັນດາ​ຄະນະ​ຜູ້​ແທນ ສສຊ​ ໄດ້​ວາງ​ພວງມາລາ, ​ເຂົ້າ​ສຸສານ​ໄວ້ອາ​ໄລ​ປະທານ ​ໂຮ່ຈີ​ມິນ.
(ແຫຼ່ງຄັດຈາກ VOV)