25/04/2015 11:36 GMT+7 Email Print Like 0

ໂສມໜ້າໃໝ່ ຂອງຄອງເໝືອງ ຍຽວລົກ-ທິແງ່

ຫຼາຍປີກ່ອນນີ້, ຄອງເໝືອງຍຽວລົກ-ທິແງ່ ເປັນລຳຄອງ ທີ່ເປີະ ເປື້ອນສົກກະປົກ ທີ່ສຸດໃນນະຄອນໂຮ່ຈີມິນ, ແຕ່ມາຮອດ ປັດຈຸບັນ ມັນໄດ້ຮັບການປ່ຽນແປງໃຫ້ດີຂຶ້ນ  ແລະ ກາຍເປັນ ລຳຄອງເໝືອງ ທີ່ສວຍງາມທີ່ສຸດຂອງນະຄອນ. 

ກ່ອນປີ 1975, ຢູ່ຕາມສອງຝາກຝັ່ງຄອງເໝືອງ ຍຽວລົກ-ທິແງ່ ແມ່ນເຕັມແຕ່ເຮືອນປະຊາຊົນ ໃນນີ້ສ່ວນຫລາຍແມ່ນຂອງຊາວ ຜູ້ອອກແຮງງານທີ່ທຸກຍາກ. ເຂົາເຈົ້າມາຈາກທຸກຫົນແຫ່ງຊັດເຊພະເນຈອນເຂົ້າມາໄຊງ່ອນເພື່ອຫາຢູ່ຫາກິນ. ເມື່ອບໍ່ມີບ່ອນຢູ່ພວກເຂົາເຈົ້າຈຶ່ງໄດ້ມາທີ່ນີ້ ເພື່ອປຸກຕູບ, ປຸກຮ້ານຊົ່ວຄາວພໍມີຊີວິດໄປແຕ່ລະວັນ. ແຕ່ລະເຮືອນມີພຽງຊາວ, ສາມສິບແມັດມົນ ທົນ, ມຸງສັງກະສີ, ເຈ້ຍນ້ຳມັນ ຫຼືໃບໄມ້ ແລະ ຢູ່ໃນນັ້ນ ສະມາຊິກຄອບຄົວແຕ່ຫ້າ, ເຈັດ ຫລື ສິບຄົນ ອັດກັນຢູ່ ໃຊ້ຊີວິດ ຮ່ວມກັນກັບປວກ, ແມງສາບ, ໜູ ແລະ ອື່ນໆ. ສິ່ງເສດເຫລືອ ທຸກຢ່າງແມ່ນເຂົາເຈົ້າໄດ້ຖອກເທລົງຄອງເໝືອງນັ້ນໝົດ. ເທື່ອເລັກເທື່ອໜ້ອຍ, ສອງຝັ່ງລຳຄອງກໍເຕັມໄປດ້ວຍຂີ້ເຫຍື້ອ ແລະ ນ້ຳໃນຄອງກໍ່ເປັນສີດໍາຂຸ້ນສົ່ງກິ່ນເໝັນໜ້າຂີ້ດຽດທີ່ສຸດ. ຄວາມຍາວຂອງ ເຂດບໍລິເວນດັ່ງກ່າວນີ້ໄດ້ໄປຜ່ານ 7 ເມືອງ. ໃນນັ້ນ, ມີບັນດາ ເມືອງທີ່ນອນຢູ່ໃນໃຈກາງນະຄອນຄື: ເມືອງ 1 ແລະ ເມືອງ 3 ຊ່ຶງເປັນບ່ອນຢູ່ອາໄສຂອງ 5 ໝື່ນຄອບຄົວດ້ວຍພົນລະເມືອງທັງໝົດປະມານ 1,2 ລ້ານຄົນ.

ຫຼັງປົດປ່ອຍ, ຄະນະກຳມະການປະຊາຊົນ ນະຄອນໂຮ່ຈີມິນ ໄດ້ກຳນົດ ການດັດແປງຄອງເໝືອງ ຍຽວລົກ-ທິແງ່ຄືນໃໝ່, ແມ່ນໂຄງການຈຸດສຸມ ຊຶ່ງຕ້ອງໄດ້ລົງມືຄົ້ນຄວ້າ ແລະ ປະຕິບັດ ໂດຍທັນທີ, ຕັດສິນໃຈລຶບຊື່ສາຍນໍ້າລຳຄອງທີ່ແສນເປິເປື້ອນ ເນົ່າເໝັນ ແລະ ຮົກເຮື້ອແຫ່ງນີ້ ເພື່ອປັບປຸງປ່ຽນແປງ ຊີວິດ ການເປັນຢູ່ ຂອງປະຊາຊົນ ກໍຄືສ້າງໂສມໜ້າໃໝ່ ໃຫ້ແກ່ ພາບລວມຂອງຕົວເມືອງ.

ພ້ອມກັບການສະໜັບສະໜູນຊ່ວຍເຫລືອ ຈາກທະນາຄານ ໂລກ (WB), ປີ 1993 ພະແນກຄົມມະນາຄົມຂົນສົ່ງນະຄອນ ໂຮ່ຈີມິນ ໄດ້ຜັນຂະຫຍາຍປະຕິບັດ ໂຄງການ ຍຽວລົກ-ທິແງ່ ໄລຍະ 1 ດ້ວຍທຶນທັງໝົດ 8.600 ຕື້ດົ່ງ. ໃນນັ້ນ, ທຶນ ODA ຂອງ WB ແມ່ນ 5.252 ຕື້ດົ່ງ, ທຶນສົມທົບຈາກ ງົບປະມານ ນະຄອນ ແມ່ນ 3.348 ຕື້ດົ່ງ ແລະ ຕ້ອງຍົກຍ້າຍບ່ອນຢູ່ຈຳນວນ 7.000 ຄອບຄົວ. ໂຄງການໄດ້ຈົກຂູດຂີ້ຕົມອອກ 1,1 ກວ່າ ລ້ານໂຕນ, ເທເບຕົງໄດ້ 16.000 ກວ່າແມັດ ເພື່ອ ກໍ່ ແນວກັນເຈື່ອນຢູ່ ສອງຝັ່ງລຳຄອງ ແລະ  ກໍ່ສ້າງເສັ້ນທາງ ຮວ່າງຊາ-ເຈື່ອງຊາ ແລ່ນລຽບຕາມ ສອງຝັ່ງລຳຄອງ ດ້ວຍຄວາມຍາວ 15 ກິໂລແມັດ, ເຮັດໃຫ້ການ ຄົມມະນາຄົມ ໄດ້ສະດວກສະບາຍ. ພາຍຫລັງໃຊ້ເວລາເກືອບ 20 ປີ ກໍ່ສ້າງໂຄງການ ຊຶ່ງປະກອບດ້ວຍຫລາຍໆກິດຈະການທີ່ສຳຄັນ, ມາຮອດເດືອນ ສິງຫາ ປີ 2012, ໂຄງການດັ່ງກ່າວ ໄດ້ສະຫຼອງ ການສຳເລັດ ໃນຄວາມປິຕິຊົມຊື່ນຂອງປະຊາຊົນນັບຫຼາຍລ້ານຄົນ.

ພາຍຫລັງໂຄງການສຳເລັດໄດ້ເຮັດໃຫ້ໂສມໜ້າຂອງນະຄອນ ມີຄວາມປ່ຽນແປງໃໝ່ ຊຶ່ງສົ່ງຜົນກະທົບ ທີ່ຕັ້ງໜ້າໃຫຍ່ຫຼວງ ຕໍ່ການພັດທະນາ ດ້ານເສດຖະກິດ, ຊີວິດການເປັນຢູ່ຂອງ ປະຊາຊົນ ແລະ ສັງຄົມ, ນໍາເອົາຜົນປະໂຫຍດໂດຍກົງມາສູ່ປະຊາຊົນຈໍານວນ 1,2 ລ້ານຄົນ ໂດຍການປັບປຸງ ເງື່ອນໄຂອະນາໄມ, ລົດຜ່ອນ ໄພນ້ຳຖ້ວມ, ພ້ອມກັນນັ້ນ ກໍສາມາດຫລຸດຜ່ອນສະພາບລົດຕິດໃນຖະໜົນເລວັນສີ, ແກັກມ້າງທ້າງຕ້າມ, ນາມກີ່ເຂີຍເຫງຍ ແລະ ອື່ນໆ. 


ແລ່ນລຽບຕາມສອງຝັ່ງຄອງເໝືອງ ແມ່ນຖະໜົນສອງສາຍ ຄື ຮວ່າງຊາ-ເຈື່ອງຊາ. 


ຕອນໜຶ່ງ ຂອງຄອງເໝືອງ ຍຽວລົກ-ທິແງ່ ຢູ່ເຂດເມືອງ 3. 


ຮາວລະບຽງ ຮັກສາຄວາມປອດໄພຢູ່ຕາມສອງຝັ່ງຄອງເໝືອງ ໄດ້ຮັບການອອກແບບ
ຢ່າງສວຍງາມ ແລະ ມີຄວາມປະສານ ກົມກຽວກັບພາບພົດລວມ. 



ລະບົບຫົດນ້ຳໂດຍອັດຕະໂນມັດໃຫ້ແກ່ບັນດາຕົ້ນໄມ້ ຢູ່ສອງຝັ່ງ ຄອງເໝືອງ. 



ຕົ້ນໄມ້ສີຂຽວປຸກເປັນແຖວ ສ້າງບັນຍາກາດອັນເຍືອກເຢັນ ຕາມສອງຝັ່ງຄອງເໝືອງ. 


ຄອງເໝືອງຍຽວລົກ-ທິແງ່ ເປັນເຂດແດນເຊື່ອຕໍ່ທຳມະຊາດ ທີ່ແບ່ງເຂດໃຈກາງເມືອງ
ກັບ ເມືອງຕ່າງໆ ຢູ່ຊານກຳແພງ ນະຄອນໂຮ່ຈີມິນ. 



ສູນກິລາກາຍຍະກຳທີ່ທັນສະໄໝແຫ່ງໜຶ່ງຢູ່ແຄມຝັ່ງ ຄອງເໝືອງ ຍຽວລົກ-ທິແງ່. 


ຕົ້ນໄມ້ສີຂຽວປຸກເປັນແຖວ ສ້າງບັນຍາກາດອັນເຍືອກເຢັນ ຕາມສອງຝັ່ງຄອງເໝືອງ. 


ທາງຍ່າງທີ່ກວ້າງຂວາງ ເລາະລຽບຕາມສອງຝັ່ງຄອງເໝືອງ. 


ບັນດາອຸປະກອນສຳລັບການຫັດກາຍຍະບໍລິຫານ ໄດ້ຖືກຕິດຕັ້ງ ຢູ່ຕາມສອງຝັ່ງຄອງໝືອງ ຊ່ວຍໃຫ້ປະຊາຊົນ
ມີເງື່ອນໄຂຝຶກ ແອບກິລາ ຍົກສູງສຸຂະພາບໃຫ້ແຂງແຮງ. 



ວັດ ຟ໋າບຮວາ ທີ່ເກົ່າແກ່ ສົ່ງຮົ່ມເງົາລົງສາຍລຳຄອງ.


ຄວາມງາມທີ່ທັນສະໄໝຂອງບັນດາຕົວເມືອງໃໝ່ ນັບມື້ນັບ ຫຼາຍ
ຢູ່ຕາມຝັ່ງຄອງເໝືອງ ຍຽຍລົກ-ທິແງ່.

 
ປະຈຸບັນ, ຄອງເໝືອງຍຽວລົກ-ທິແງ່ ໄດ້ກາຍເປັນ ຄວາມເອກ ອ້າງທະນົງໃຈ ຂອງຊາວນະຄອນໂຮ່ຈີມິນ. ລໍາຄອງທີ່ເຕັມໄປດ້ວຍນໍ້າສີດໍາເປີະເປື້ອນເນົ່າເໝັນໃນເມື່ອກ່ອນ ມາບັດນີ້ ໄດ້ກັບ ຄືນມາເປັນສາຍນ້ຳທີ່ຂຽວສົດໃສ ແລະ ຝູງປານ້ອຍໃຫຍ່ລອຍລ່ອງໄປມາຕາມສາຍນໍ້າອັນໃສເຢັນ. ຄ້າຍແລງມາ, ປະຊາຊົນ ຈໍານວນຫລວງຫລາຍ ຍ່າງເລາະລຽບຕາມສອງຝັ່ງລຳຄອງ ເພື່ອຕາກອາກາດ. ເສັ້ນທາງຮວ່າງຊາ ແລະ ເຈື່ອງຊາ ໄດ້ປົກຄຸມ ໄປດ້ວຍຮົ່ມເຢັນຂອງຕົ້ນໄມ້ສີຂຽວ. ຄຽງຂ້າງພົມຫຍ້າສີຂຽວ ຢູ່ແຄມທາງແມ່ນຟຸດບາດທີ່ກວ້າງຂວາງ, ສະອາດ ສໍາລັບຄົນ ຍ່າງ. ຍາມຄໍ່າຄືນມາ, ການເຄື່ອນໄຫວທຸລະກິດຢູ່ທີ່ນີ້ ມີບັນຍາກາດຟົດຟື້ນ, ເຕັມໄປດ້ວຍຜູ້ຄົນ ແລະ ຮ້າງຮ້ານຕ່າງໆເຊັ່ນຮ້ານອາຫານ, ຮ້ານກາເຟ ເປັນຕົ້ນ.  ເມື່ອໄຟຟ້າຕົວເມືອງຮຸ່ງຂຶ້ນ,  ສາຍຄອງເໝືອງປຽບເໝືອນແຜ່ນແພໄໝທີ່ອ່ອນນຸ່ມ, ຄົດໂຄ້ງກາຍເມືອງຕ່າງໆ ພາຍໃຕ້ແສງໄຟມະຍິບມະຍັບສີສັນຕ່າງໆ.  ບັນດາບໍລິສັດທ່ອງທ່ຽວ ກໍເລີ່ມເປີດ ບໍລິການທ່ອງທ່ຽວເທິງລຳຄອງແຫ່ງນີ້.

ປະຊາຊົນຜູ້ໃຊ້ຊີວິດຢູ່ສອງຝັ່ງຄອງເໝືອງ ໄດ້ມີການລົງທຶນ ນັບ ຫຼາຍຕື້ດົ່ງ ເພື່ອກໍ່ສ້າງເຮືອນຊານຂອງເຂົາເຈົ້າຄືນໃໝ່. ພາບໃນເຂດພື້ນທີ່ຍຽວລົກ-ທິແງ່ ເວົ້າລວມ ແລະ ພາບລຽບ ຕາມສອງຝັ່ງ ລຳຄອງນີ້ ເວົ້າສະເພາະແມ່ນ ໄດ້ມີການ ປ່ຽນແປງໃໝ່ຢ່າງເຫັນໄດ້ຊັດ. ທ່ານ ຫງວຽນແທັງເຊືອງ, ເຮືອນລາວຢູ່ເມືອງ 3, ໃຊ້ຊີວິດ ຢູ່ຕາມຝັ່ງ ຄອງເໝືອງ ຍຽວລົກ-ທິແງ່ ມາແຕ່ປີ 1992 ໄດ້ເຜີຍຄວາມໃນໃຈອອກມາວ່າ: “ສະໄໝນັ້ນ, ຈະນອນຝັນ ຂ້າພະເຈົ້າກໍ່ບໍ່ກ້າຄຶດວ່າ ສາຍຄອງເໝືອງນີ້ ຈະສະອາດສະອາງ ແລະ ງາມຕາ ຄືທຸກວັນນີ້. ມື້ຈັດພິທີເປີດການນໍາໃຊ້ລຳຄອງນີ້, ພໍ່ແມ່ປະຊາຊົນຢູ່ແຫ່ງນີ້ ມີຄວາມມ່ວນຊື່ນດີໃຈເປັນຢ່າງຍິ່ງ”.

ຕາມທ່ານ ຟານເຈົາຖ້ວນ, ຜູ້ອຳນວຍການຄະນະຄຸ້ມຄອງໂຄງການອະນາໄມສິ່ງແວດລ້ອມ ນະຄອນໂຮ່ຈີມິນ ໄລຍະ 2 ໃຫ້ຮູ້ວ່າ, ໂຄງການໄລຍະສອງຈະໄດ້ເລີ່ມລົງມືນັບແຕ່ປີ 2015 ເປັນຕົ້ນໄປ ດ້ວຍມູນຄ່າການລົງທຶນທັງໝົດ 542 ລ້ານ USD, ໃນນັ້ນແຫຼ່ງທຶນກູ້ຢືມຈາກ ODA ແມ່ນ 450 ລ້ານ USD, ສ່ວນຍັງເຫຼືອ ແມ່ນຈາກແຫຼ່ງທຶນສົມທົບຂອງນະຄອນ. ໂຄງການນີ້ລວມມີຫຼາຍກິດຈະການໃຫຍ່ເຊ່ັນ: ກໍ່ສ້າງທໍ່ລອດພື້ນ ຕັ້ງແຕ່ນ້ຳສ້າງ ເບີ່ດົງ ເຖິງໂຮງງານກໍາຈັດນໍ້າເປື້ອນ ຍຽວລົກ-ທິແງ່ ຢູ່ເມືອງ 2, ກໍ່ສ້າງໂຮງງານ ບຳບັດນ້ຳເປື້ອນ ດ້ວຍກຳລັງການຜະລິດ 480.000 ແມັດກ້ອນຕໍ່ວັນ, ກໍ່ສ້າງຕາໜ່າງຕະຄອງລະບາຍນ້ຳ ຊັ້ນ 2, ຊັ້ນ 3 ແລະ ລະບົບທໍ່ຕໍ່ນໍ້າເປື້ອນລະຫວ່າງຄອບຄົວຕ່າງໆຢູ່ເມືອງ 2... ເຖິງປີ 2019, ຈະສໍາເລັດໂຄງການທັງໝົດ.
ບົດ: ຫງວຽນແອວງ - ພາບ: ຫງວຽນລວນ
ບັນດາບົດທີ່ຖືກນຳສະເໜີ