21/10/2018 10:36 GMT+7 Email Print Like 0

ເພີ່ມທະວີການຮ່ວມມືດ້ານເສດຖະກິດ, ການຄ້າລະຫວ່າງ ຫວຽດນາມ - ກຳປູເຈຍ

      ໃນຊຸມປີຜ່ານມາ, ການພົວພັນສາມັກຄີມິດຕະພາບ, ການຮ່ວມມືຮອບດ້ານລະຫວ່າງ ຫວຽດນາມ ແລະ ກຳປູເຈຍ ບັນລຸໄດ້ບັນດາບາດກ້າວພັດທະນາອັນດີງາມ ທັງລວງກ້ວາງທັງລວງເລິກ. ການພົວພັນນັ້ນ ຫລາຍລຸ້ນຄົນໄດ້ເພີ່ມພູນຄູນສ້າງ ແລະ ພວມນັບມື້ນັບພັດທະນາຢ່າງວ່ອງໄວໃນທຸກຂົງເຂດຄື: ການເມືອງ, ເສດຖະກິດ, ວັດທະນະທຳ, ການສຶກສາ,…
ໃນນັ້ນ, ການພົວພັນດ້ານເສດຖະກິດ, ການຄ້າບັນລຸໄດ້ບັນດາບາດກ້າວກະໂດດຂັ້ນ ແລະ ກໍ່ແມ່ນໜຶ່ງໃນບັນດາປັດໄຈສຳຄັນ ປະກອບສ່ວນສ້າງການພົວພັນ ຖານບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານລະຫວ່າງ 2 ປະເທດຢ່າງສຳເລັດຜົນ. ບົດຂຽນ ເພີ່ມທະວີການຮ່ວມມືດ້ານເສດຖະກິດ, ການຄ້າລະຫວ່າງ ຫວຽດນາມ - ກຳປູເຈຍຂອງ ວັນໂດ ນັກຂ່າວ VOV, ເຊີນທ່ານຕິດຕາມຮັບຟັງ.
ຫວຽດນາມ ແລະ ກຳປູເຈຍ ແມ່ນ 2 ປະເທດທີ່ມີເງື່ອນໄຂທຳມະຊາດສະດວກ, ແລະ ໄດ້ເພີ່ມເຕີມເຊິ່ງກັນ ແລະ ກັນເພື່ອພັດທະນາ. ແລະ ໃນໄລຍະປັດຈຸບັນແມ່ນໄລຍະ “ສະດວກດີ” ເພື່ອຊຸກຍູ້ການຮ່ວມມືດ້ານເສດຖະກິດ ແລະ ການຄ້າ 2 ຝ່າຍ. ນັ້ນແມ່ນຂໍ້ສັງເກດຂອງທ່ານ ຫວູກວາງມິງ ເອກອັກຄະລັດຖະທູດ ຫວຽດນາມ ປະຈຳ ລາຊະອານາຈັກ ກຳປູເຈຍ ເມື່ອເວົ້າເຖິງຄວາມສາມາດບົ່ມຊ້ອນແຫ່ງການຮ່ວມມືລະຫວ່າງ 2 ປະເທດ:

ທ່ານ ຫວູກວາງມິງ ເອກອັກຄະລັດຖະທູດ ຫວຽດນາມ ປະຈຳ ລາຊະອານາຈັກ ກຳປູເຈຍ
      ນັບແຕ່ຕົ້ນປີ 2018 ມາຮອດປະຈຸບັນ, ບັນດາກະຊວງ, ຂະແໜງການ, ທ້ອງຖິ່ນ ແລະ ວິສາຫະກິດ 2 ປະເທດ ໄດ້ສົມທົບກັນຢ່າງແໜ້ນແຟ້ນ, ຜັນຂະຫຍາຍບັນດາການເຄື່ອນໄຫວຮ່ວມມືສຳຄັນໃນທຸກຂົງເຂດຄື: ການເມືອງ, ເສດຖະກິດ, ວັດທະນະທຳ, ການປ້ອງກັນຊາດ, ປ້ອງກັນຄວາມສະຫງົບ, ການພົວພັນແລກປ່ຽນປະຊາຊົນ, ປະກອບສ່ວນນຳການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງ ຫວຽດນາມ ແລະ ກຳປູເຈຍ ສືບຕໍ່ພັດທະນາເພື່ອຜົນປະໂຫຍດຂອງ 2 ປະເທດ.
ໄປຄຽງຄູ່ກັບຄວາມສະດວກກ່ຽວກັບເງື່ອນໄຂທຳມະຊາດນັ້ນ, ການພົວພັນຮ່ວມມືດ້ານເສດຖະກິດການຄ້າລະຫວ່າງ 2 ປະເທດ ກໍ່ຍັງໄດ້ຮັບຄວາມເອົາໃຈໃສ່ເປັນພິເສດຈາກການນຳຂັ້ນສູງ ຫວຽດນາມ ແລະ ກຳປູເຈຍ. ທີ່ບັນດາການພົບປະລະຫວ່າງການນຳຂັ້ນສູງ, 2 ຝ່າຍລ້ວນແຕ່ຢັ້ງຢືນເຖິງຄວາມສຳຄັນຂອງການຮ່ວມມືເສດຖະກິດ, ການຄ້າ ແລະ ໃຫ້ຄຳໝັ້ນສັນຍາຈະສືບຕໍ່ເປີດກ້ວາງ, ຍົກສູງປະສິດທິຜົນແຫ່ງການຮ່ວມມືໃຫ້ເໝາະສົມກັບຄວາມປາດຖະໜາ ແລະ ຄວາມສາມາດບົ່ມຊ້ອນອັນໃຫຍ່ຫລວງຂອງ 2 ປະເທດ. 2 ຝ່າຍພວມຕັດສິນໃຈສູ້ຊົນນຳວົງເງິນການຄ້ານຳເຂົ້າ-ສົ່ງອອກບັນລຸໄດ້ 5 ຕື້ USD ໃນໄລຍະຈະມາເຖິງ. ຫວຽດນາມ ເປັນສະມາຊິກ ອາຊຽນ ທີ່ມີວົງເງິນການຄ້າກັບ ກຳປູເຈຍ ໃຫຍ່ສຸດ.
ດ້ວຍບັນດາເງື່ອນໄຂ ແລະ ພື້ນຖານແຫ່ງຄວາມສະດວກຄືດັ່ງກ່າວ, ການພົວພັນເສດຖະກິດ, ການຄ້າລະຫວ່າງ ຫວຽດນາມ ແລະ ກຳປູເຈຍ ໄດ້ມີບັນດາບາດກ້າວກະໂດດຂັ້ນ. ຕາມທ່ານ ເລບຽນເກືອງ ທູດການຄ້າ ຫວຽດນາມ ປະຈຳ ກຳປູເຈຍ ໃຫ້ຮູ້ວ່າ: ໃນໄລຍະ 2001 – 2011, ວົງເງິນການຄ້າ 2 ສົ້ນໄດ້ເພີ່ມຂຶ້ນເກືອບ 17 ເທື່ອ, ແຕ່ 169 ລ້ານ USD ຂຶ້ນ 2,83 ຕື້ USD. ປີ 2017, ວົງເງິນການຄ້ານຳເຂົ້າ-ສົ່ງອອກລະຫວ່າງ 2 ປະເທດບັນລຸເກືອບ 3,8 ຕື້ USD, ເພີ່ມຂຶ້ນກ່ວາ 29% ເມື່ອທຽບໃສ່ປີ 2016; 7 ເດືອນຕົ້ນປີ 2018 ວົງເງິນການຄ້ານຳເຂົ້າ-ສົ່ງອອກລະຫວ່າງ 2 ປະເທດບັນລຸໄດ້ 2,7 ຕື້ USD, ເພີ່ມຂຶ້ນ 18,7% ເມື່ອທຽບໃສ່ໄລຍະດຽວກັນປີ 2017.
ບັນດາວິສາຫະກິດ ຫວຽດນາມ ສຸມໃສ່ເຂົ້າໃນຂົງເຂດກະສິກຳ, ຕົ້ນໄມ້ອຸດສາຫະກຳຢາງພາລາ ກວມເອົາປະມານ 70% ຈຳນວນເງິນທຶນຈົດທະບຽນ, ທີ 2 ແມ່ນການບໍລິການທະນາຄານປະກັນໄພກວມເອົາປະມານ 25%, ສ່ວນຍັງເຫຼືອແມ່ນບັນດາວິສາຫະກິດໂທລະຄົມມະນາຄົມ, ວິສາຫະກິດປຸງແຕ່ງຜະລິດເຄື່ອງໃຊ້ສອຍ, ການຂົນສົ່ງ
ເພື່ອສ້າງເງື່ອນໄຂສະດວກໃຫ້ແກ່ບັນດາການເຄື່ອນໄຫວການຄ້າ, ການລົງທຶນຢູ່ ກຳປູເຈຍ, ສະໂມສອນວິສາຫະກິດ ຫວຽດນາມ ປະຈຳ ກຳປູເຈຍ ໄດ້ຮັບການສ້າງຕັ້ງໃນເດືອນ ສິງຫາ 2018, ແນໃສ່ຊຸກຍູ້ການຮ່ວມມື ແລະ ໜູນຊ່ວຍໃນການເຄື່ອນໄຫວຮ່ວມມືເສດຖະກິດ - ການຄ້າຂອງບັນດາວິສາຫະກິດ ຫວຽດນາມ ແລະ ວິສາຫະກິດ ກຳປູເຈຍ ຊຶ່ງເຈົ້າຂອງເປັນຄົນ ຫວຽດນາມ ຢູ່ ກຳປູເຈຍ, ກໍ່ຄືເພີ່ມທະວີການພົວພັນແລກປ່ຽນ, ຮ່ວມສຳພັນ ແລະ ຮ່ວມມືກັບບັນດາວິສາຫະກິດຂອງ ກຳປູເຈຍ ແລະ ວິສາຫະກິດຢູ່ ຫວຽດນາມ. ທ່ານ ຫງວຽນແທງຢຸງ ຜູ້ອຳນວຍການທະນາຄານກະສິກຳ ແລະ ພັດທະນາຊົນນະບົດ ຫວຽດນາມ ສາຂາຢູ່ ກຳປູເຈຍ, ປະທານສະໂມສອນວິສາຫະກິດ ຫວຽດນາມ ຢູ່ ກຳປູເຈຍ ແບ່ງປັນວ່າ:
ສະໂມສອນວິສາຫະກິດ ຫວຽດນາມ ຢູ່ ກຳປູເຈຍ ເຄື່ອນໄຫວດ້ວຍທິດນຳ ແລະ ຈຸດປະສົງແມ່ນ: ລະດົມບັນດາແຫຼ່ງກຳລັງຢ່າງສຸດຂີດ, ເສີມຂະຫຍາຍທ່າແຮງຂອງບັນດາສະມາຊິກ, ສ້າງສະພາບແວກລ້ອມດ້ານຂໍ້ມູນຂ່າວສານ, ແບ່ງປັນບົດຮຽນ, ເຊື່ອມຕໍ່, ຊ່ວຍເຫຼືອເຊິ່ງກັນ ແລະ ກັນ ແລະ ແລກປ່ຽນພົວພັນກັບສະຖານທູດ ຫວຽດນາມ ປະຈຳ ກຳປູເຈຍ ໃນການເຄື່ອນໄຫວຜະລິດ, ດຳເນີນທຸລະກິດຂອງບັນດາວິສາຫະກິດພວມລົງທຶນຢູ່ ກຳປູເຈຍ.
       ພ້ອມກັບການເຄື່ອນໄຫວຮ່ວມມື 2 ຝ່າຍ, ຫວຽດນາມ ແລະ ກຳປູເຈຍ ຍັງພ້ອມກັນເຂົ້າຮ່ວມໃນບັນດາຂົງເຂດຮ່ວມມືຢູ່ພາກພື້ນຄື: ການຮ່ວມມືເຂດ 3 ຫຼ່ຽມ ພັດທະນາ ຫວຽດນາມ - ລາວ - ກຳປູເຈຍ, ການຮ່ວມມື CLMV (ລວມມີ 4 ປະເທດ: ຫວຽດນາມ, ລາວ, ກຳປູເຈຍ, ມຽນມາ), ການຮ່ວມມື ACMECS (ລວມມີ 5 ປະເທດ: ຫວຽດນາມ, ລາວ, ກຳປູເຈຍ, ມຽນມາ ແລະ ໄທ), ການຮ່ວມມືແມ່ຂອງ - ຍີ່ປຸ່ນ, ການຮ່ວມມືອະນຸພາກພື້ນແມ່ຂອງເປີດກ້ວາງ, ການຮ່ວມມື ອາຊຽນ...ໂດຍຜ່ານບັນດາການເຄື່ອນໄຫວນີ້, ການພົວພັນດ້ານເສດຖະກິດ, ການຄ້າ 2 ຝ່າຍລະຫວ່າງ 2 ປະເທດ ນັບມື້ຶ້ນັບໄດ້ຮັບການປັບປຸງ ແລະ ເພີ່ມທະວີເພື່ອຜົນປະໂຫຍດຂອງປະຊາຊົນແຕ່ລະປະເທດ, ເພື່ອຄວາມຈະເລີນຮຸ່ງເຮືອງຂອງແຕ່ລະປະເທດ ກໍ່ຄືເພື່ອສັນຕິພາບ ແລະ ສະຖຽນລະພາບໃນພາກພື້ນ.
 ບັນດາຜົນງານກ່ຽວກັບເສດຖະກິດ ແລະ ການຄ້າຈະປະກອບສ່ວນເພີ່ມພູນຄູນສ້າງສາຍພົວພັນອັນດີງາມລະຫວ່າງ ຫວຽດນາມ ແລະ ກຳປູເຈຍ ກ່ວາອີກ ສືບຕໍ່ພັດທະນາຕາມທິດນຳ "ບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານ", ປະກອບສ່ວນເຂົ້າການພັດທະນາ ແລະ ຄວາມຈະເລີນຮຸ່ງເຮືອງຂອງແຕ່ລະປະເທດ, ກໍ່ຄືຊຸກຍູ້ ອາຊຽນ ນັບມື້ນັບເຕີບໂຫຍ່ເຂັ້ມແຂງ./.
 (ແຫຼ່ງຄັດຈາກ VOV)