24/01/2016 11:25 GMT+7 Email Print Like 0

ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ:
ເປັນເຈົ້າການເຊື່ອມໂຍງ, ຍົກສູງທີ່ຕັ້ງຫວຽດນາມໃນເວທີສາກົນ

(ທ່ານ​ຮອງ​ນາຍົກລັດຖະມົນຕີ, ລັດຖະມົນຕີ​ວ່າການ
ກະຊວງ​ການ​ຕ່າງປະ​ເທດ​ຫວຽດນາມ ຟ້າມ​ບິງ​ມີງ)
          ຕອນ​ເຊົ້າ​ວັນ​ທີ 23/1, ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດຄັ້ງ​ທີ 12 ຂອງ​ພັກກອມ​ມູນິດ​ຫວຽດນາມ ສືບ​ຕໍ່​ປຶກສາ​ຫາລື​ບັນດາ​ເອກະສານ​ຍື່ນ​ສະ​ເໜີ​ຕໍ່​ກອງ​ປະຊຸມ​ໃຫຍ່, ກຳມະການ​ກົມ​ການ​ເມືອງຊຸດ​ທີ 11, ທ່ານນາຍົກລັດຖະມົນຕີ ຫງວຽນ​ເຕິ໋ນຢຸງ​ເປັນ​ເຈົ້າ​ພາ​ວາລະ​ປຶກສາ​ຫາລື.
        ປະກອບ​ຄຳ​ເຫັນ​ທີ່​ກອງ​ປະຊຸມ​ໃຫຍ່, ທ່ານ ທ່າວ​ຊວນ​ສຸ່ງ, ກຳມະການ​ສູນ​ກາງ​ພັກ, ຮອງ​ຫົວໜ້າ​ຄະນະ​ຂົນຂວາຍ​ປະຊາຊົນສູນ​ກາງ, ຢືນ​ຢັນ​ສາຍ​ພົວພັນ​ລະຫວ່າງ​ພັກ ​ແລະ ປະຊາຊົນ​ແມ່ນ​ປັດ​ໃຈ​ມີ​ຄວາມ​ໝາຍ​ຕັດສິນ ​ເພື່ອ​ເສີມ​ຂະຫຍາຍ​ກຳລັງ​ແຮງ​ແຫ່ງ​ກຸ່ມ​ກ້ອນ​ມະຫາ​ສາມັກຄີ​ທົ່ວ​ປວງ​ຊົນ​ທັງ​ຊາດ​ໃນ​ພາລະ​ກິດ​ປ່ຽນ​ໃໝ່. ດັ່ງ​ນັ້ນ​ເພື່ອ​ເສີມ​ຂະຫຍາຍ​ກຳລັງ​ແຮງ​ມະຫາ​ສາມັກຄີ​ທົ່ວ​ປວງ​ຊົນ​ທັງ​ຊາດ, ​ເພີ່ມ​ທະວີ​ສາຍ​ພົວພັນ​ອັນ​ສະໜິດສະໜົມ​ລະຫວ່າງ​ພັກ​ກັບ​ປະຊາຊົນ, ບັນດາ​​ແຜນນະ​ໂຍບາຍ, ​ແນວທາງ, ນະ​ໂຍບາຍ​ຂອງ​ພັກ​ຕ້ອງ​ມີ​ການ​ປະກອບ​ຄຳ​ເຫັນ​ຂອງ​ປະຊາຊົນ, ​ເໝາະ​ສົມ​ກັບ​ຄວາມ​ມຸ້ງ​ມາດ​ປາຖະໜາ, ຜົນ​ປະ​ໂຫຍ​ດຂອງ​ປະຊາຊົນ, ​ໄດ້​ຮັບ​ຄວາມ​ເຫັນ​ດີ​ເຫັນ​ພ້ອມ, ສະໜັບສະໜູນ​ຈາກ​ປະຊາຊົນ. ທ່ານ ທ່າວ​ຊວນ​ສຸ່ງ ຖື​ວ່າ:
        “​ໃນ​ຊຸມ​ປີ​ຈະ​ມາ​ເຖິງ, ຕ້ອງ​ຍູ້​ແຮງ​ການ​ຊີ້​ນຳ​ນຳພາ​ ພາລະກິດ​ປ່ຽນ​ໃໝ່ຢ່າງ​ມີ​ປະສິດທິ​ຜົນ ​ແລະ ​ເພີ່ມ​ທະວີ​ການ​ຫັນ​ລັດຖະທຳ​ມະນູນ​ປີ 2013 ເປັນ​ລະບອບ, ຫັນບັນດາ​ແຜນ​ນະ​ໂຍບາຍ, ​ແນວທາງ​ຂອງ​ພັກ ​​ເປັນ​ນະ​ໂຍບາຍ​, ກົດໝາຍ​ຂອງ​ລັດ. ຜັນ​ຂະຫຍາຍ​ບັນດາ​ແຜນ​ນະ​ໂຍບາຍ,​​ແນວທາງ​ນີ້​ຕາມ​ທິດ​ເສີມ​ຂະຫຍາຍ​ປະຊາທິປະ​ໄຕ ​ແລະ ກໍ່ສ້າງ​ລັດ​ຫວຽດນາມ​ເປັນ​ລັດ​ຂອງ​ປະຊາຊົນ, ​ໂດຍ​ປະຊາຊົນ, ​ເພື່ອ​ປະຊາຊົນ​ຢ່າງ​ແທ້​ຈິງ, ​ເພື່ອ​ຮັບປະກັນ​ຫຼັກການ “ສິດ​ອຳນາດ​ແຫ່ງ​ລັດ​ທັງ​ໝົດ​ແມ່ນ​ຂຶ້ນ​ກັບ​ປະຊາຊົນ “.
        ບັນດາ​ບົດ​ປະກອບ​ຄຳ​ເຫັນ​ຂອງ​ຜູ້​ແທນ​ກໍ່​ເນັ້ນ​ໜັກ​ເຖິງ​ຄວາມ​ສຳຄັນ​ຂອງ​ການສະ​ແຫວ​ງຫາ ​ແລະ ນຳ​ໃຊ້​ກຳລັງ​ພາຍ​ນອກ​ເພື່ອ​ຮັບ​ໃຊ້​ພາລະກິດ​ປ່ຽນ​ໃໝ່ ​ແລະ ​ເຊື່ອມ​ໂຍງ​ເຂົ້າ​ກັບ​ສາກົນ. ບົດ​ປະກອບ​ຄຳ​ເຫັນ​ຂອງ​ທ່ານ​ຮອງ​ນາຍົກລັດຖະມົນຕີ, ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ​ຫວຽດນາມ ຟ້າມ​ບິງ​ມີງ ກ່ຽວ​ກັບ​ບັນຫາ “ລົງ​ເລິກ​ວິວັດ​ແຫ່ງ​ການ​ເຊື່ອມ​ໂຍງ​ກັບ​ສາກົນ, ຮັບ​ໃຊ້​ພາລະກິດ​ສ້າງສາ ​ແລະ ປົກ​ປັກ​ຮັກສາ​ປະ​ເທດ​​ສັງຄົມ​ນິຍົມຢ່າງ​ມີ​ປະສິດທິ​ຜົນ ​ແລະ ຍົກ​ສູງ​ທີ່​ຕັ​້ງສາກົນ​ຂອງ​ຫວຽດນາມ“ ​ໄດ້​ລວບ​ລວມບັນດາ​ຜົນງານ​ໃນ​ວຽກ​ງານ​ພົວພັນ​ຕ່າງປະ​ເທດ​ຂອງ​ປະ​ເທດ​ຊາດ​ໃນ 5 ປີຜ່ານມາ; ຢືນຢັນ​ຄວາມ​ຖືກຕ້ອງ​ຂອງ​ແນວທາງ​ການ​ຕ່າງປະ​ເທດ​ເປັນ​ເອກະລາດ, ​ເປັນ​ເຈົ້າ​ຕົນ​ເອງ, ສັນຕິພາບ, ການ​ຮ່ວມ​ມື ​ແລະ ພັດທະນາ, ນະ​ໂຍບາຍ​​ເປີດ​ກວ້າງການ​ພົວພັນຕ່າງປະ​ເທດ, ຫັນ​ເປັນ​ຫຼາຍ​ຮູບ​ຫຼາຍ​ແບບ, ຫຼາຍ​ຝ່າຍ, ​ເປັນ​ເຈົ້າ​ການ ​ແລະ ຕັ້ງໜ້າ​ເຊື່ອມ​ໂຍງ​ກັບ​ສາກົນ, ​ເຊິ່ງກອງ​ປະຊຸມ​ໃຫຍ່​ຄັ້ງ​ທີ 11 ຂອງ​ພັກ​ໄດ້​ວາງ​ອອກ. ​ທ່ານ​ຮອງ​ນາຍົກລັດຖະມົນຕີຖືວ່າ, ໃນ​ໄລຍະ 5-10 ປີ​ຈະ​ມາ​ເຖິງ, ຢາກ​ປະຕິບັ​ດບັນດາ​ທັດສະນະ​ກ່ຽວ​ກັບ​ການ​ເຊື່ອມ​ໂຍງ​ກັບ​ສາກົນ ​ເຊິ່ງ​ໄດ້​ຮັບ​ການ​ຍົກ​ອອກ​ມາ​ໃນ​ຮ່າງ​ເອກະສານ​ກອງ​ປະຊຸມ​ໃຫຍ່​ຄັ້ງ​ທີ 12, ວຽກ​ງານ​ພົວພັນ​ຕ່າງປະ​ເທດ​ຕ້ອງ​ປະຕິບັດ​ຄື​ດັ່ງ​ຕໍ່​ໄປ​ນີ້:
        “ທີ​ໜຶ່ງ​ແມ່ນ​ຕ້ອງ​ປະຕິບັດ​ບັນດາ​ທິດ​ນຳ​ຜັນ​ຂະຫຍາຍ​ທິດ​ທາງ​ການ​ຕ່າງປະ​ເທດ​ເຊິ່ງກອງ​ປະຊຸມ​ໃຫຍ່​ຄັ້ງ​ທີ 12 ຂອງ​ພັກ​ໄດ້​ຮັບຮອງ​ເອົາ​ຢ່າງ​ເຖິງ​ຖອງ, ​ເພີ່ມ​ທະວີ​ການ​ຊີ້​ນຳ​ນຳພາ​ຂອງ​ພັກ​ໃນ​ວິວັດ​ແຫ່ງ​ການ​ເຊື່ອມ​ໂຍງ​ກັບ​ສາກົນ; ທີ​ສອງ​ແມ່ນ​ຊຸກຍູ້ ​ແລະ ​ເຮັດ​ໃຫ້ການ​ພົວພັນ​ຄູ່​ຮ່ວມ​ມື​ເລິກ​ເຊິ່ງກວ່າ​ອີກ… ທີ​ສາມ​ແມ່ນ​ປະ​ຕິ​ບັດ​ບັນດາ​ຄຳ​ໝັ້ນ​ສັນຍາ​ສາກົນ​ຢ່າງ​ຄົບ​ຖ້ວນ, ​ໃນ​ນັ້ນ​ມີ​ເພີ່ມ​ທະວີ​ການ​ເຜີຍ​ແຜ່​ບັນດາ​ຄຳ​ໝັ້ນ​ສັນຍາ​ກັບ​ສາກົນ​ເຊິ່ງ​ໄດ້​ນຳ​ເຂົ້າ​ກົດໝາຍ​ຂອງ​ປະ​ເທດ, ບັນດາ​ຂໍ້​ກຳນົດ​ໃນ​ວິວັດ​ແຫ່ງ​ການ​ຜັນ​ຂະຫຍາຍ…“.
        ຕອນ​ບ່າຍ​ວັນ​ທີ 23/1, ກອງ​ປະຊຸມ​ໃຫຍ່ຮັບ​ຟັງ​ບົດ​ລາຍ​ງານ​ຂອງ​ຄະນະ​ບໍລິຫານ​ງານ​ສູນ​ກາງ​ຊຸດ​ທີ 11 ກ່ຽວ​ກັບ​ວຽກ​ງານ​ບຸກຄະລາ​ກອນ​ຄະນະ​ບໍລິ​ຫາງ​ງານ​ສູນ​ກາງ​ຊຸດ​ທີ 12.
​(​ແຫຼ່ງຄັດ​ຈາກ VOV)