23/07/2015 00:01 GMT+7 Email Print Like 0

ຮ່າຂາລວນ-ຄູຝຶກທີ່ເກ່ງກ້າສາມາດຂອງກິລາ ຫວຽດນາມ

ຄູຝຶກ ຮ່າຂາລວນ ບໍ່ພຽງແຕ່ແມ່ນຄູຝຶກຜູ້ທີ່ເກ່ງກ້າສາມາດ ເທົ່ານັ້ນ, ເພິ່ນຍັງເປັນຜູ້ນຳກິລາ 5 ປະເພດຈາກຕ່າງປະເທດເຂົ້າມາພັດທະນາຢູ່ ຫວຽດນາມ ຄື: ເຕະກະຕໍ້, ເປຕັງ, ແຮນບອນ, ໂບລິ້ງ ແລະ Woodball. ຍິ່ງກວ່ານັ້ນ, ເພິ່ນຍັງຊ່ວຍເຮັດໃຫ້ກິລາປະເພດ ເຕະກະຕໍ້ ແລະ ເປຕັງ ຂອງ ຫວຽດນາມ ຍາດໄດ້ຫຼາຍຜົນງານດີເດັ່ນໃນການແຂ່ງຂັນຢູ່ພາຍໃນ ແລະ ໂລກ, ກາຍເປັນ “ບໍ່ຄຳ” ຂອງກິລາ ຫວຽດນາມ ທີ່ບັນດາການແຂ່ງຂັນຢູ່ງານມະຫາກຳກິລາ ຊີເກມ ຫຼາຍຄັ້ງ.
ໃນວົງການກິລາຫວຽດນາມ, ທ່ານ ຮ່າຂາລວນ ໄດ້ຮູ້ເຖິງ ເປັນຄູຝຶກຜູ້ໜຶ່ງທີ່ເກ່ງກ້າສາມາດ ແລະ ມີນຳ້ໃຈ. ກ່ອນອື່ນ ໝົດແມ່ນຕ້ອງເວົ້າເຖິງກິລາປະເພດເຕະກະຕໍ້, ນີ້ແມ່ນກິລາ ປະເພດໜຶ່ງທີ່ຍາດໄດ້ຫຼາຍຜົນງານດີເດ່ັນມາໃຫ້ແກ່ກິລາ ຫວຽດນາມ ໃນຊຸມປີມໍ່ໆ ມານີ້ ແລະ ມີຄວາມສະໜິດ ຕິດພັນກັບຊື່ສຽງຂອງຄູຝຶກ ຮ່າຂາລວນ ແລະ ທ່ານ ຮວ່າງວິງຢາງ, ເລຂາທິການໃຫຍ່ ຄະນະກຳມະການ ໂອແລມປິກ ແຫ່ງຊາດ.
 
17 ປິກ່ອນ, ເມື່ອຄູຝຶກ ຮ່າຂາລວນ ໄດ້ຮັບໜ້າທີ່ພັດທະນາປະເພດກິລາ ເຕະກະຕໍ້ ເພື່ອປະກອບສ່ວນນຳກິລາ ຫວຽດນາມ ກັບຄືນສູ່ ຊີເກັມ. ຍາມນັ້ນ, ປະຊາຊົນທຸກຄົນ ທີ່ອາໄສຢູ່ຮ່ອມເລກທີ 55 ຂອງເມືອງ ຮາຍບ່າຈຶງ, ນະຄອນ ຮ່າໂນ້ຍ ບໍ່ສາມາດລືມໄປໄດ້ຮູບພາບຄູຝຶກ ເລຂາລວນ ກັບນັກຮຽນຂອງຕົນເຕະໄປເຕະມາໜ່ວຍກະຕໍ້ ທີ່ເກົ່າແກ່. ຫຼາຍຄົນໄດ້ເວົ້າວ່າ “ຄົນບໍ່ມີວຽກເຮັດງານທຳ, ໝົດມື້ ຮູ້ແຕ່ເຕະໄຕເຕະມາໝາກບານບໍ່ແມ່ນໝາກບານ, ກະຕໍ້ບໍ່ແມ່ນກະຕໍ້...”


ທ່ານ ຮ່າຂາລວນ ພວມເປັນຮອງປະທານສະຫະພັນ Woodball ອາຊີ,
ທັງເປັນຄູຝຶກທິມຊາດ Woodball ຫວຽດນາມ.


ເພິ່ນເປັນຜູ້ທີ່ມີຄຸນງາມຄວາມດີໃນການພັດທະນາປະເພດ

ກິລາ Woodball ຢູ່ ຫວຽດນາມ. 

ເຖິງວ່າ ໃນໄວອາຍຸສູງກໍ່ຕາມ, ແຕ່ເພິ່ນຍັງສະຫຼະເວລາ

ແລະ ນຳ້ໃຈຂອງຕົນໃຫ້ແກ່ການພັດທະນາປະເພດກິລາ Woodball ຂອງປະເທດຊາດ. 

ຄູຝຶກ ຮ່າຂາລວນ ແລະ ທິມ Woodball ຫວຽດນາມ ຍາດໄດ້ຫຼຽນຄຳ 1 ຫຼຽນ ແລະ ຫຼຽນທອງ 3 ຫຼຽນ
ທີ່ ອາຊຽນ Beach Games 4 ຢູ່ ພູເກັດ (ໄທ).


ທ່ານ ຮ່າຂາລວນ ກັບໃບທຸງທີ່ເປັນຂີດໝາຍລະນຶກ ແຕ່ສະໄໝກໍ່ສ້າງທິມເຕະກະຕໍ້ ຮ່າໂນ້ຍ ເມື່ອປີ 1990. 


ຫຼາຍລາງວັນ ແລະ ສິ່ງທີ່ລະນຶກ ໃນຕະຫຼອດຊີວິດ ຕິດພັນກັບກິລາ ຫວຽດນາມ ຂອງ ເພິ່ນ.


ທ່ານ ຮ່າຂາລວນ ພວມຮັກສາຫຼາຍຕຳແໜ່ງທີ່ສຳຄັນໃນວົງ
ການກິລາ ຫວຽດນາມ ແລະ ໂລກຄື: ຮອງປະທານ ສະຫະພັນເຕະກະຕໍ້ໂລກ, ຄູຝຶກທິມເຕະກະຕໍ້ ຫວຽດນາມ, ຮອງປະທານສະຫະພັນ Woodball ອາຊີ, ຄູຝຶກທິມ Woodball ຫວຽດນາມ ແລະ ອື່ນໆ. 
ເປັນປະເພດກິລາທີ່ແປກປະຫຼາດ ແລະ ໃໝ່ອ່ຽມຢູ່ ຫວຽດນາມ, ເພາະສະນັ້ນ ຄູຝຶກ ຮ່າຂາລວນ ພ້ອມນັກຮຽນຂອງຕົນຕ້ອງໄປໂຄສະນາເຜີຍແຜ່ການຫຼິ້ນເຕະກະຕໍ້ຢູ່ທົ່ວທຸກແຂວງ, ນະຄອນແຕ່ໃຕ້ຫາເໜືອ. ບໍ່ວ່າ ຢູ່ໂຮງແຂ່ງຂັນ ກິລາ ຫຼື ສະໜາມຝຶກຊ້ອມກໍ່ຕາມ, ຖ້າມີໂອກາດເພື່ອແນະນຳການເຕະກະຕໍ້ເຖິງໝູ່ມະຫາຊົນແມ່ນທ່ານ ລວນ ກັບນັກຮຽນ ກໍ່ສະແດງດ້ວຍຄວາມສຸດອົກສຸດໃຈ. ຫວນຄິດຄືນເຖິງຕອນນັ້ນ, ທ່ານ ລວນ ເວົ້າຢອກວ່າ: “ເວລານັ້ນ, ພວກຂ້າພະເຈົ້າບໍ່ຕ່າງຫຍັງກັບຄະນະ ນັກມວຍໜຶ່ງໄປສະແດງມວຍຢູ່ທ້ອງຖະໜົນ”.
 
ຈາກຄວາມມານະພະຍາຍາມຢ່າງສຸດຈິດສຸດໃຈຂອງທ່ານ ຮ່າຂາລວນ ພ້ອມນັກຮຽນຂອງຕົນ, ປະເພດກິລາເຕະກະຕໍ້ ໄດ້ຮັບການນິຍົມຫຼິ້ນຢູ່ ຮ່າໂນ້ຍ ແລະ ເປີດກວ້າງອອກສູ່ 10 ກວ່າແຂວງ, ນະຄອນຕ່າງໆ​ ໃນທົ່ວປະເທດອີກດ້ວຍ.
 
ປະຈຸບັນ, ເຕະກະຕໍ້ ໄດ້ກາຍເປັນປະເພດກິລາທ່າແຮງຂອງ ຫວຽດນາມ. ບໍ່ພຽງແຕ່ເຂົ້າຮ່ວມໃນການຄຸ້ມຄອງ, ພັດທະນາຂະບວນການຫຼິ້ນເຕະກະຕໍ້ເທົ່ານັ້ນ, ທ່ານ ຮ່າຂາລວນ ຍັງມີການຊີ້ນຳທິມເຕະກະຕໍ້ຍິງຢ່າງໂດຍກົງອີກດ້ວຍ. ທິມເຕະກະຕໍ້ຍິງ ຫວຽດນາມ ພາຍໃຕ້ການນຳພາຂອງເພິ່ນ ໄດ້ກາຍເປັນໜຶ່ງໃນບັນດາທິງເຕະກະຕໍ້ແຖວໜ້າໃນໂລກ. ນອກຈາກນັ້ນ, ເພິ່ນຍັງປະສົບຜົນສຳເລັດໃນການລະດົມ ສະຫະພັນເຕະກະຕໍ້ໂລກ ນຳບັນດາປະເພດກິລາເຕະກະຕໍ້ຍິງເຂົ້າໃນລະບົບການແຂ່ງຂັນລວມຂອງສະຫະພັນດັ່ງກ່າວ.
 
ນອກຈາກເຕະກະຕໍ້, Woodball ໄດ້ທ່ານ ຮ່າຂາລວນ ນຳເອົາເມືອ ຫວຽດນາມ ແລະ ຫຼັງຈາກນັ້ນ ອີກ 3 ປີ, ປະເພດກິລາດັ່ງກ່າວ ກໍ່ຍາດໄດ້ຫຼາຍລາງວັນດີໃນ ບັນດາການແຂ່ງຂັນຢູ່ພາກພື້ນ ແລະ ໂລກ. ປີ 2014, ທິມ Woodball ຫວຽດນາມ ໄປເຂົ້າຮ່ວມ Asian Beach Games 4 ຢູ່ ພູເກັດ (ໄທ) ແລະ ຍາດມາໃຫ້ຄະນະນັກກິລາ ຫວຽດນາມ 1 ຫຼຽນຄຳ ແລະ 3 ຫຼຽນທອງ, ເປັນອັນດັບ 2 ໃນຈຳນວນ 8 ປະເທດທີ່ເຂົ້າຮ່ວມການແຂ່ງຂັນ Woodball.
 
ໃນໄວອາຍຸທີ່ໄດ້ພັກຜ່ອນ, ແຕ່ທ່ານ ຮ່າຂາລວນ ຍັງມີໜ້າແຕ່ 8 ໂມງເຊົ້າຫາ 5 ໂມງແລງ ເພື່ອຊີ້ນຳທິມ Woodball ຫວຽດນາມ ກະກຽມໃຫ້ງານມະຫາກຳກິລາຫາດຊາຍ ອາຊີ ປີ 2016 (Asian Beach Games 5)  ໂດຍ ຫວຽດນາມ ເປັນເຈົ້າພາບຈັດຕັ້ງຢູ່ ຍາຈາງ, ແຂວງ ແຄງຮ່ວາ.
 
ເມື່ອໄດ້ຖາມວ່າ ເປັນຫຍັງບັນດາປະເພດກິລາທີ່ເພິ່ນເອົາມາ ແລະ ພັດທະນາຢູ່ ຫວຽດນາມ ລ້ວນແຕ່ປະສົບຜົນສຳເລັດ ສູງໝົດ, ທ່ານ ຮ່າຂາລວນ ໃຫ້ຮູ້ວ່າ ຍ້ອນບັນດາປະເພດກິລາ ນີ້ ເໝາະສົມກັບເນື້ອກາຍກໍ່ຄືນິໄສຂອງຄົນ ຫວຽດນາມ.
ບົດ: ຖາວວີ-ພາບ: ວັນກວ່ຽນ
ບັນດາບົດທີ່ຖືກນຳສະເໜີ