08/05/2015 00:01 GMT+7 Email Print Like 0

ຮ່ວມມືໃນຂົງເຂດເສດຖະກິດ: ຈຸດເດັ່ນໃນການພົວພັນ ລະຫວ່າງ ຫວຽດນາມ-ສິງກະໂປ

ທ່ານນາງ Halima Yacob, ປະທານສະພາແຫ່ງຊາດ ສິງກະໂປ ຫາກໍ່ສິ້ນສຸດການຢ້ຽມຢາມ ຫວຽດນາມ ຢ່າງເປັນທາງການ ເນື່ອງໃນໂອກາດມາເຂົ້າຮ່ວມກອງປະຊຸມ ໃຫຍ່ລັດຖະສະພາສາກົນ ຄັ້ງທີ 132 (IPU-132) ທີ່ໄດ້ຮັບ ການຈັດຂຶ້ນຢູ່ທີ່ນະຄອນຫຼວງ ຮ່າໂນ້ຍ. ການຢ້ຽມຢາມຄັ້ງນີ້ແນໃສ່ ຢາກເພີ່ມທະວີການພົວພັນລະຫວ່າງສະພາແຫ່ງຊາດສອງປະເທດ ແລະ ຊຸກຍູ້ຫຼາຍຂຶ້ນຕື່ມສາຍພົວພັນຄູ່ຮ່ວມມືຍຸດທະສາດລະຫວ່າງສອງປະເທດ, ເປັນຕົ້ນແມ່ນໃນຂົງເຂດເສດຖະກິດ ແລະ ການຄ້າ.


ທ່ານປະທານສະພາແຫ່ງຊາດ ຫງວຽນຊິງຮຸ່ງ ຕ້ອນຮັບ ທ່ານປະທານສະພາແຫ່ງຊາດ
ສິງກະໂປ ນາງ Halima Yacob. ພາບ: ຫງວຽນຄາງ/VNA

ທ່ານປະທານສະພາແຫ່ງຊາດ ຫງວຽນຊິງຮຸ່ງ ພົງປະເຈລະຈາກັບທ່ານປະທານສະພາແຫ່ງຊາດ 
ສິງກະໂປ ນາງ Halima Yacob. ພາບ: VNA

ທ່ານຮອງປະທານສະພາແຫ່ງຊາດ ນາງ ຫງວຽນທິກິມເງິນ ຕ້ອນຮັບ ທ່ານປະທານສະພາແຫ່ງຊາດ
ສິງກະໂປ ນາງ Halima Yacob. ພາບ: ຢວານເຕິນ/VNA

ທ່ານປະທານສະພາແຫ່ງຊາດ ສິງກະໂປ ນາງ Halima Yacob
ມາຢ້ຽມຢາມຫໍພິພິດທະພັນ ແມ່ຍິງ ຫວຽດນາມ. ພາບ: ເຟືອງຮວາ/VNA
ໃນການຕ້ອນຮັບ ແລະ ພົບປະເຈລະຈາກັບທ່ານນາງ Halima Yacob, ທ່ານ ຫງວຽນຊິງຮຸ່ງ, ປະທານສະພາແຫ່ງຊາດ ຫວຽດນາມ ໄດ້ຝາກຄວາມເສົ້າສະຫຼົດໃຈຂອງສະພາແຫ່ງຊາດ ແລະ ປະຊາຊົນ ຫວຽດນາມ ຕໍ່ການ​ຈາກ​ໄປ​ຂອງ​ທ່ານ ຫຼີກວນຢູ-ຜູ້ສ້າງຕັ້ງປະເທດຊອງປະຊາຊົນ ສິງກະໂປ, ເພື່ອນຜູ້ທີ່ຍິ່ງໃຫຍ່ຂອງປະຊາຊົນ ຫວຽດນາມ.
 
ກ່ຽວກັບການພົວພັນລະຫວ່າງສອງປະເທດ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໃຫ້ຮູ້ວ່າ, ສະພາແຫ່ງຊາດຫວຽດນາມປາດ​ຖະໜາ ຢາກຍູ້ແຮງກວ່າຕື່ມບັນດາການເຄື່ອນໄຫວຮ່ວມມືກັບສະພາແຫ່ງຊາດ ສິງກະໂປ ໃນການແບ່ງປັນບົດຮຽນສ້າງກົດໝາຍ, ຄວບຄຸມກວດກາ, ຈາກນັ້ນ ຊຸກຍູ້ການຮ່ວມມື, ພົບປະແລກປ່ຽນສິລະປະວັດທະນະທຳ ລະຫວ່າງລັດຖະບານ ແລະ ປະຊາຊົນສອງປະເທດ.
 
ທ່ານປະທານສະພາແຫ່ງຊາດ ຫງວຽນຊິງຮຸ່ງ ຍັງໃຫ້ຮູ້ວ່າ ຫວຽດນາມ ແລະ ສິງກະໂປ ຄວນສືບຕໍ່ຮັກສາການແລກປ່ຽນຄະນະຜູ້ແທນຂັ້ນສູງເພື່ອນຳ​ເອົາການພົວພັນຮ່ວມມື ລະຫວ່າງສອງປະເທດ ນັບມື້ນັບ​ເປັນ​ຈິງ, ມີປະສິດທິພາບ, ເປັນຕົ້ນແມ່ນໃນບັນດາຂົງເຂດຄື: ວັດທະນະທຳ, ການຄ້າ, ປ້ອງກັນ ຄວາມສະຫງົບ, ປ້ອງກັນປະເທດ…
 
ສະພາແຫ່ງຊາດ ແລະ ລັດຖະບານທັງສອງປະເທດ ຄວນສ້າງເງື່ອນໄຂອຳນວຍຄວາມສະດວກ​ໃຫ້ຫຼາຍຂຶ້ນ​ຕື່ມ​ເພ​ື່ອຮຽກຮ້ອງ, ດຶງດູດການລົງທຶນ, ຍົກລະດັບການລົງທຶນຂອງສິງກະໂປ ເຂົ້າສູ່ ຫວຽດນາມ ​​​ເໜືອ​ໃນ​ເມື່ອກ່ອນ, ຈາກນັ້ນ ຈຶ່ງຊຸກຍູ້ມູນຄ່າການຄ້າສອງສົ້ນ ຫວຽດນາມ-ສິງກະໂປ ຂຶ້ນສູ່ ລະດັບ 9,8 ຕື້ໂດລາສະຫະລັດຄືປະຈຸບັນນີ້.
 
ຊົມເຊີຍເລື່ອງ ສິງກະໂປ ສືບຕໍ່ເປີດກວ້າງການລົງທຶນກໍ່ສ້າງເຂດອຸດສາຫະກຳຢູ່ ຫວຽດນາມ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ສະເໜີ ສິງກະໂປ ເອົາໃຈໃສ່ຊ່ວຍເຫຼືອ ຫວຽດນາມ ໃນຂົງເຂດບຳລຸງສ້າງ ແລະ ທ່ອງທ່ຽວທີ່​ເປັນ​ທ່າ​ແຮງ.  ນອກຈາກນັ້ນ, ສອງຝ່າຍຄວນສືບຕໍ່ຮັກສາກົນໄກສົນທະນາປ້ອງກັນຄວາມສະຫງົບ, ປ້ອງກັນຊາດ ທີ່ໄດ້ລົງນາມນຳ​ກັນ​ແລ້ວ, ຈາກນັ້ນ ຍົກ​ລະດັບ​ການພົວພັນລະຫວ່າງສອງປະເທດ​ໃຫ້ ນັບມື້ນັບແໜ້ນແຟ້ນ ແລະ ມີປະສິດທິພາບ.
 
ເມື່ອເວົ້າເຖິງຄວາມຮັບຜິດຊອບຂອງບັນດາປະເທດສະມາຊິກ ໃນການກໍ່ສ້າງປະຊາຄົມ​ເສດຖະກິດອາຊຽນ ໃຫ້ສຳເລັດ​ໃນປີ 2015, ທ່ານປະທານສະພາແຫ່ງຊາດ ຫງວຽນຊິງຮຸ່ງ ສະເໜີ ສິງກະໂປ ສືບຕໍ່ສະໜັບສະໜູນບັນດາປະເທດໃນກຸ່ມ ອາຊຽນ ແລະ ຫວຽດນາມ ໃນການຮັກສາ ແລະ ຮັບປະກັນຄວາມສະຫງົບ, ປອດໄພຢູ່ທະເລຕາເວັນອອກ, ປະຕິບັດ DOC ເປັນຢ່າງດີ ແລະ ມຸ່ງສູ່ການກໍ່ສ້າງປະມວນກົດລະບຽບ ຢູ່ທະເລຕາເວັນອອກ (COC) ໂດຍໄວ ເພື່ອສັນຕິພາບ, ສະຖຽນນະພາບໃນພາກພື້ນ ແລະ ໂລກ ບົນພື້ນຖານເຄົານົບກົດໝາຍສາກົນ.

ທ່ານປະທານປະເທດ ເຈືອງເຕິນຊາງ ຕ້ອນຮັບ ທ່ານປະທານສະພາແຫ່ງຊາດ
ສິງກະໂປ ນາງ Halima Yacob. ພາບ: ຫງວຽນຄາງ/VNA

ທ່ານນາຍົກລັດຖະມົນຕີ ຫງວຽນເຕິນຢຸງ ຕ້ອນຮັບ ທ່ານປະທານສະພາແຫ່ງຊາດ
ສິງກະໂປ ນາງ Halima Yacob. ພາບ: ຖົ໋ງເຍີດ/VNA

ທ່ານປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ຫງວຽນທ້ຽນເຍີນ
ຕ້ອນຮັບ ທ່ານປະທານສະພາແຫ່ງຊາດ ສິງກະໂປ ນາງ Halima Yacob. ພາບ: ຫງວຽນເຢີນ/VNA
ເຫັນດີນຳທ່ານປະທານສະພາແຫ່ງຊາດ ຫງວຽນຊິງຮຸ່ງ, ທ່ານນາງ Halima Yacob ໃຫ້ຮູ້ວ່າ ນັບຕັ້ງແຕ່ວັນສ້າງຕັ້ງການພົວພັນຄູ່ຮ່ວມມືຍຸດທະສາດ (2013), ການພົວພັນ ລະຫວ່າງສອງປະເທດ ບັນລຸໄດ້ຜົນງານຕ່າງໆ ຢ່າງຮອບດ້ານພໍ​ສົມຄວນ.
 
ເຫັນດີນຳການເປີດກວ້າງການຮ່ວມມືຢ່າງຮອບດ້ານກັບ ຫວຽດນາມ , ທ່ານນາງ Halima Yacob ກໍ່ໃຫ້ຮູ້ວ່າ ສິງກະໂປມີແຜນນະໂຍບາຍຈະມອບເບ້ຍລ້ຽງໃຫ້ແກ່ນັກຮຽນ ຫວຽດນາມ, ພ້ອມກັນນັ້ນ ກໍ່ເປີດກວ້າງລະບົບກໍ່ສ້າງພະນັກງານໃຫ້ແກ່ຫວຽດນາມຕື່ມ​ອີກ.
 
ກ່ຽວກັບບັນຫາຄວາມສະຫງົບ, ຄວາມປອດໄພຂອງການເດີນທະເລໃນພາກພື້ນ, ທ່ານນາງ Halima Yacob ໃຫ້ຮູ້ວ່າ ຂໍ້ຂັດແຍ່ງໃນທະເລຕາເວັນອອກ ກ່ຽວຂ້ອງ ກັບບັນດາປະເທດທັງຢູ່ພາຍໃນ ແລະ ນອກກຸ່ມ ອາຊຽນ. ເພື່ອແກ້ໄຂບັນຫາດັ່ງກ່າວ, ບັນດາປະເທດທີ່ກ່ຽວຂ້ອງ ຕ້ອງຊອກຫາວິທີແກ້ໄຂໂດຍສັນຕິວິທີ, ບໍ່ນຳໃຊ້ກຳລັງອາວຸດ ແລະ COC ເປັນວິທີແກ້ໄຂທີ່​ມີ​ປະສິດທິ​ຜົນ​ທີ່​ສຸດ.
 
ໃນການພົບປະເຈລະຈາ, ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮຸ່ງ ແລະ ທ່ານປະທານສະພາແຫ່ງຊາດ ສິງກະໂປ ນາງ Halima Yacob ລ້ວນ​ແຕ່ເປັນເອກະພາບວ່າ ຈະຊຸກຍູ້ການແລກປ່ຽນ ບັນດາຄະນະຜູ້ແທນສະພາແຫ່ງຊາດສອງປະເທດ, ປັບປຸງກໍ່ສ້າງ ພື້ນຖານໂຄງລ່າງ, ລະບຽບ ຂັ້ນຕອນ ເອກະສານການບໍລິຫານ ເພື່ອ ດຶງດູດການລົງທຶນ. ສອງຝ່າຍ ກໍ່ເຫັນດີ​ເປັນ​ເອກະ​ພາບຈະຍູ້ແຍງ ການຮ່ວມມື ລະຫວ່າງ ສອງສະພາໃນຂອບເຂດກອງປະຊຸມໃຫຍ່ ລັດຖະສະພາໃນພາກພື້ນ ແລະ ສາກົນ.

ໃນຂອບເຂດການຢ້ຽມຢາມ ຫວຽດນາມ ຄັ້ງນີ້, ທ່ານປະທານສະພາແຫ່ງຊາດ ສິງກະໂປ ນາງ Halima Yacob ກໍ່ມີການພົບປະແລກປ່ຽນຄວາມຄິດຄວາມເຫັນກັບທ່ານປະທານປະເທດ ເຈືອງເຕິນຊາງ, ທ່ານນາຍົກລັດຖະມົນຕີ ຫງວຽນເຕິນຢຸງ, ທ່ານປະທານແນວໂຮມປະເທດຊາດ ຫວຽດນາມ ຫງວຽນທ້ຽນເຍີນ ແລະ ທ່ານຮອງປະທານສະພາແຫ່ງຊາດ ນາງ ຫງວຽນທິກິມເງິນ.

ທ່ານປະທານຄະນະກຳມະການປົກຄອງປະຊາຊົນ ນະຄອນ ໂຮ່ຈີມິນ ເລຮວ່າງກວນ ມອບໃບຢັ້ງຢືນການລົງທຶນ
ໃຫ້ສອງນັກລົງທຶນສິງກະໂປ.​ ພາບ: ກວາງຍືດ/VNA

ເວທີປາໄສວິສາຫະກິດ ຫວຽດນາມ-ສິງກະໂປ 2014 ທີ່ນະຄອນ ໂຮ່ຈີມິນ. ພາບ: ແທງຫວູ/VNA

ຮູບຈຳລອງໂຄງການກໍ່ສ້າງເຂດປະສົມອຸດສາຫະກຳ-ເມືອງໃຫຍ່-ບໍລິການ ຫວຽດນາມ-ສິງກະໂປ (VSIP)
ທີ່ ກວາງຫງາຍ ລວມຍອດມູນຄ່າລົງທຶນໄລຍະ 1 ແມ່ນ 2.631 ຕື້ດ່ົງ. ພາບ: ແທງລອງ/VNA

ກຳປັ່ນ Pacifis Express ມາແຕ່ ສິງກະໂປ ພວມປະຕິບັດ ການຂົນຖ່າຍສິນຄ້າອອກຈາກກຳປັ່ນ
ທີ່ທ່າກຳປັ່ນ ຕຽນຊາ, ດ່າໜັງ. ພາບ: ວັນເຊີນ/VNA

ບັນດາວິສາຫະກິດຕ່າງປະເທດ ເປີດກວ້າງການລົງທຶນ ຜະລິດທີ່ເຂດອຸດສາຫະກຳ
ຫວຽດນາມ-ສິງກະໂປ ທີ່ແຂວງບັກນິງ (VSIP ບັກນິງ). ພາບ: ແຢງລາມ/VNA
 

ປະຈຸບັນ, ສິງກະໂປ ພວມເປັນຄູ່ຮ່ວມມືດ້ານການຄ້າ​​ໃຫຍ່ເປັນອັນດັບ 6 ຂອງ ຫວຽດນາມ. ການລົງທຶນຂອງ ສິງກະໂປ ກໍ່ເພີ່ມຂຶ້ນ​ໄວ. ໃນປີ 2014,​ ສິງກະໂປ ໄດ້ລົງທຶນ 32,7 ຕື້ໂດລາສະຫະລັດ ເຂົ້າສູ່ ຫວຽດນາມ ແລະ ກາຍເປັນຄູ່ຮ່ວມມື ອັນດັບ 3 ​ເຂົ້າຫວຽດນາມ, ຢູ່ຕາມຫຼັງ ຍີ່ປຸ່ນ ແລະ ສ.ເກົາຫຼີ ເທົ່ານັ້ນ. ຫຼາຍກຸ່ມບໍລິສັດໃຫຍ່ຂອງ ສິງກະໂປ ຄື: Sembcorp, CapitaLand, Keppel Land, Mapletree… ພວມມີການເຄື່ອນໄຫວຢູ່ ຫວຽດນາມຢ່າງມີປະສິດທິພາບ.

ປະຕິບັດໂດຍ: VNA/VNP
ບັນດາບົດທີ່ຖືກນຳສະເໜີ