09/05/2015 00:01 GMT+7 Email Print Like 0

ອາຊຽນ 26: ເພີ່ມທະວີຄວາມສາມັກຄີ, ລວມເປັນເອກະພາບພາຍໃນກຸ່ມ

ກອງປະຊຸມສຸດຍອດອາຊຽນ ຄັ້ງທີ 26 (26-27/4/2015) ເປັນກອງປະຊຸມຄັ້ງທຳອິດ ໃນຖານະເປັນປະທານອາຊຽນ ຂອງ ມາເລເຊຍ ໃນປີ 2015 ພາຍໃຕ້ຫົວຂໍ້ “ປະຊາຊົນຂອງພວກເຮົາ, ປະຊາຄົມຂອງພວກເຮົາ, ວິໄສທັດຂອງພວກເຮົາ”. ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ເຂົ້າຮ່ວມ ແລະ ປະກອບຄຳຄິດຄຳເຫັນຫລາຍບັນຫາທີ່ສຳຄັນຫຼາຍ, ພິເສດແມ່ນບັນຫາເພີ່ມທະວີຄວາມສາມັກຄີ, ເປັນເອກະພາບກັນພາຍໃນກຸ່ມເພື່ອຈຸດໝາຍລວມຂອງອາຊຽນ.

ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ແລະ ບັນດາ​ຫົວໜ້າ​ຄະນະ​ຖ່າຍຮູບ​ຮ່ວມ​ກັນ
​ທີ່​ພິທີ​ໄ​ຂກອງ​ປະຊຸມ​ຂັ້ນ​ສູງ ອາ​ຊຽນ ຄັ້ງ​ທີ 26. ພາບ: ດຶກ​ຕ໋າມ/VNA

ກ່າວ​ປາ​ໄສ​ໃນ​ວາລະກອງ​ປະຊຸມ​​ຄົບ​ຄະນະ, ທ່າ​ນນາຍົກ ລັດຖະມົນຕີ ຫງວຽນ​ເຕິ​ນຢຸງ ​ໃຫ້ຄໍາ​ເຫັນ​ວ່າ ການກໍາ​ເນີ​ດ​ປະຊາ​ຄົມ ອາ​ຊຽນ ​ໃນ​​ທ້າຍ​ປີ 2015 ນີ້​ເປັນ​ຂີດ​ໝາຍ​ປະຫວັດສາດ​ຂອງວິວັດ​ການຮ່ວມ​ກຸ່ມ ອາ​ຊຽນ ​ແລະ ​ເປັນ​ຜົນສຳ​ເລັດຂອງ​ຄວາມມານະ​ພະຍາຍາມຮ່ວມ​ມື​ຢ່າງ​ບໍ່​ຢຸດ​ຢັ້ງ​ຂອງ​ບັນດາ​ປະ​ເທດ​ສະມາຊິກ ອາ​ຊຽນ ​ຕະຫຼອດ​​ໄລ​ຍະເວລາ​ເກືອບ 50 ປີຜ່ານມາ​, ສ້າງ​ພື້ນຖານ​ທີ່​ໝັ້ນ​ແກ່​ນ​ໃຫ້​ແກ່​ການ​ພັດທະນາ​ຂອງ​ອາ​ຊຽນ.
 
ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ໃຫ້​ຮູ້​ວ່າ ອາ​ຊຽນ ​​ສຳ​ເລັດ​ສ່ວນ​ຫຼາຍວຽກ​ງານ​ກໍ່ສ້າງ​ປະຊາ​ຄົມ ​ອາ​ຊຽນ ​ແລ້ວ, ສ່ວນ​ທີ່​ຍັງ​ເຫຼືອ​ບໍ່​ຫຼາຍ ​ແຕ່​ມີ​ຄວາມ​ສັບສົນ​ພໍ​ສົມຄວນ, ​ມີ​ລັກສະນະ​ເຊື່ອມ​ໂຍງ​ສູງ​ໃນ​ຂະນະເວລາ​ທີ່​ຍັງ​ເຫຼືອ​ບໍ່​ຫຼາຍ. ​ເພາະສະ​ນັ້ນ, ບັນດາ​ປະ​ເທດ​ສະມາຊິກຕ້ອງ​ຍົກ​ສູງ​ຄວາມຮັບຜິດ​ຊອບ, ປະສານ​ສົມທົບ​ຢ່າງ​ກົມ​ກືນ​ລະຫວ່າງ​ຜົນ​ຜົນ​ປະ​ໂຫຍ​ດຂອງ​ປະ​ເທດ​ຊາດ​ກັບ​ຜົນ​ປະ​ໂຫຍ​ດລວມຂອງ​ອາ​ຊຽນ. ​​ເພີ່ມ​ທະວີ​ຄວາມ​ສາມັກ​ຄີ, ເປັນ​ເອກະ​ພາບກັນ​ພາຍ​ໃນ​ກຸ່ມ​ເພື່ອ​ຈຸດໝາຍ​ລວມຂອງ ອາ​ຊຽນ.
 
ທ່ານ​ນາຍົກລັດຖະມົນຕີ ຫງວຽນ​ເຕິນຢຸງ ຢືນຢັນ​ວ່າ ຫວຽດ ນາມ​ໄດ້ ​ມີ​ຄວາມ​​ພະຍາຍາມ ​ແລະ ບັນລຸ​ຜົນ​ສໍາ​ເລັດ​ທີ່​ຕັ້ງໜ້າ​ໃນຂັ້ນ​ຕອນ​ການ​ກໍ່ສ້າງ​ປະຊາ​ຄົມ​ ອາ​ຊຽນ, ​ໃນ​ນັ້ນ ມີ​ບັນດາ​ການ​ເຄື່ອນ​ໄຫວ​ທີ່ ຫວຽດນາມ​ ​ຮັບຜິ​ບຊອບ​ປະຕິບັດ, ​ເປັນ​ເຈົ້າ​ການ​ໃນ​ການດັດ​ແກ້​​ຂໍ້​ກຳ​ນົດຕ່າງໆຢູ່​ພາຍ​ໃນປະ​ເທດ ​ເພື່ອປະຕິບັດ​ບັນດາຄຳ​ໝັ້ນ​ສັນຍາ​ໃນກຸ່ມ ອາ​ຊຽນ ​ເປັນ​ຢ່າງ​ດີ.
 
ທ່ານ​ນາ​ຍົດ​ລັດຖະມົນຕີ ຫງວຽນ​ເຕິ​ນຢຸງ ​ໄດ້​ເນັ້ນ​ໜັກ​ເຖິງ​ຄວາມ​ສຳຄັນ​ຂອງ​ການ​ກໍ່ສ້າງ​ວິ​ໄສ​ທັດ​ປະ​ຊາ​ຄົມ ອາ​ຊຽນ ຫຼັງ​ປີ 2015 ຕໍ່​ການ​ພັດທະນາ​ຂອງ​ປະຊາ​ຄົມ ​ແລະ ຍົກ​ໃຫ້​ເຫັນ​ບັນດາຂໍ້​ກຳນົດທິດ​ຍຸດ​ທະ​ສາດ​ໃຫ້​ແກ່ການ​ສ້າງ​ວິ​ໄສ​ທັດ.
 
ຕາມນັ້ນ, ວິໄສທັດຕ້ອງປະຕິບັດຕາມຫຼັກການພື້ນຖານ ຂອງປະຊາຄົມ ອາຊຽນ; ສືບຖອດ, ເສີມຂະຫຍາຍບັນດາຜົນສຳເລັດ ແລະ ຜົນງານການປະຕິບັດຂັ້ນ​ຕອນການກໍ່ສ້າງ ປະຊາຄົມ ອາຊຽນ ແຕ່ປີ 2009-2015, ເຮັດໃຫ້ການຮ່ວມກຸ່ມ ອາຊຽນ ພັດທະນາສູງຂຶ້ນ ແລະ ເລິກເຊິ່ງກວ່າເກົ່າ. ຈະ​ຕ້ອງ ວາງວິທີການ​ຕ່າງໆ​ອອກ​ມາ​ເພື່ອເພ່ີ່ມທະວີຄວາມ ສາມັກຄີ, ຄວາມ​ເປັນເອກະພາບ ແລະ ຍົກສູງ ບົດບາດ ເປັນໃຈ ກາງ ຂອງ ອາຊຽນ, ເປັນຕົ້ນແມ່ນໃນການຮັກສາສັນຕິພາບ, ຄວາມສະຫງົບ, ການພັດທະນາໃນພາກພື້ນ ແລະ ຮັບປະກັນໃຫ້ ອາຊຽນ ເສີມຂະຫຍາຍບົດບາດ ເປັນຜູ້ນຳພາ ໃນ ການແກ້ໄຂບັນດາບັນຫາໃນ ພາກພື້ນ ແລະ ຮັກສາບົດບາດສຳຄັນໃນ ໂຄງປະກອບຂອງພາກພື້ນທີ່ພວມ​ເປັນ​ຮູບ​ເປັນ​ຮ່າງ​ຂຶ້ນ. ມຸ່ງສູ້ປະຊາຊົນ ແລະ ສ້າງເງື່ອນໄຂ ເພື່ອ ໃຫ້ປະຊາຊົນກາຍເປັນເຈົ້າກຳໃນການກໍ່ສ້າງ  ປະຊາຄົມ.
 
ທ່ານນາຍົກລັດຖະມົນຕີ ຫງວຽນເຕິນຢຸງ ເນັ້ນໜັກວ່າ ອາຊຽນ ຕ້ອງສືບຕໍ່ຍູ້ແຮງການພົວພັນກັບຕ່າງປະເທດ, ເພີ່ມທະວີບົດບາດທີ່ເປັນໃຈກາງຂອງປະຊາຄົມ, ຊຸກຍູ້ການ ສົນທະນາ ແລະ ການຮ່ວມມືເພື່ອປະເຊີນໜ້າກັບສິ່ງທະທາຍດ້ານເສດຖະກິດ ແລະ ຄວາມສະຫງົບ, ນັບທັງ ຄວາມສະຫງົບທີ່ບໍ່ເປັນມູນເຊື້ອອີກນໍາ.

ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ  ​ເຂົ້າ​ຮ່ວມ​ວາລະ​ປະຊຸມ​ຄົບ​ຄະນະ
ກອງ​ປະຊຸມ​ຂັ້ນສູງ ອາ​ຊຽນ ຄັ້ງ​ທີ 26. ພາບ: ດຶກ​ຕ໋າມ/VNA


ວາລະ​ປະຊຸມ​ຄົບຄະນະ​ຂອງ​ກອງ​ປະຊຸມ​ຂັ້ນ​ສູງ ອາຊຽນ ຄັ້ງ​ທີ 26. ພາບ: ດຶກ​ຕ໋າມ/VNA

ກໍ່​ໃນ​ວາລະ​ປະຊຸມ​ຄົບ​ຄະນະ, ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ໄດ້​ສະ​ແດງຄວາ​ມຊົມ​ເຊີຍ​ຕໍ່​ບົດ​ກ່າວ​ປາ​ໄສ​ຂອງ​ທ່ານ​ນາຍົກລັດຖະມົນຕີ ມາ​ເລ​ເຊຍ ​ໃນ​ຖານະ​ທີ່​ເປັນ​ປະທານ ອາ​ຊຽນ ​ໃນ​ພິທີ​ໄ​ຂກອງ​ປະຊຸມ, ​ແບ່ງປັນ​ບັນດາ​ຄວາມຄິດ​ຄວາມ​​ເຫັນ, ສະ​ແດ​ງຄວາມ​ເປັນ​ຫ່ວງຕໍ່​ບັນດາ​ການ​ເຄື່ອນ​ໄຫວ​ທີ່​ຍັງຄ້າງ​ຄາ​ຢູ່​ທະ​ເລ​ຕະ​ເວັນ​ອອກ ກໍ່​ຄື​ຜົນກະທົບ​ບໍ່​ດີຂອງ​ມັນ. ​ພ້ອມ​ກັນ​ນັ້ນ,​ໄດ້​ເນັ້ນ​ໜັກ​ເຖິງ​ຄວາມ​ສຳຄັນ​ຂອງ​ການ​ເຄົາລົບປະຕິບັດ​ຕາມ​ບັນດາ​ຫຼັກການຄວບ​ຄຸມ​ໂດຍ​​ຕົນ​ເອງ, ​ບໍ່​​ເຮັດ​ໃຫ້​ສະພາບ​ການ​ສັບສົນວຸ່ນວາຍ​ຂຶ້ນຕື່ມ, ​ແກ້​ໄຂ​ຂໍ​້ຂັດ​ແຍ່ງ​ດ້ວຍ​ສັນຕິ​ວິທີ​ບົນ​ພື້ນຖານ​ເຄົາລົບ​ກົດໝາຍ​ສາກົນ, ​​ເປັນ​ຕົ້ນ​ແມ່ນ​ສົນທິສັ​ນຍາ​ຂອງ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982 (UNCLOS), ປະຕິ​ບັດ​ຖະ​ແຫຼ​ງການ​ວ່າ​ດ້ວຍ​ການ​ປະພຶດ​ຕໍ່​ຂອງ​ຝ່າຍ​ຕ່າງໆ ຢູ່​ທະ​ເລ​ຕາ​ເວັນ​ອອກຢ່າງ​ເຄັ່ງ​ຄັດ ​ແລະ ຄົບ​ຖ້ວນ, ສູ້ຊົນບັນລຸໄດ້ປະມວນກົດ ລະບຽບ ຢູ່ທະເລຕາເວັນອອກ (COC) ຢ່າງໂດຍໄວ.
 
ກ່ອນ​ໜ້າ​ນັ້ນ, ​ກ່າວ​ປາ​ໄສ​ທີ່​ພິທີ​ໄຂ​ກອງ​ປະຊຸມ, ທ່ານ​ນາຍົກລັດຖະມົນຕີ ມາ​ເລ​ເຊຍ Najib Razak ​ໄດ້​ເນັ້ນ​ໜັກ​ວ່າ ​ໃນຂະນະ​ທີ່​ສືບ​ຕໍ່​ຊຸກຍູ້​ການ​ພົວພັນ​ຮ່ວມ​ມື​ກັບ​ບັນດາ​ປະ​ເທດ​ຢູ່​ນອກ​ກຸ່ມ, ອາ​ຊຽນ ຕ້ອງ​ແກ້​ໄຂ​ບັນດາຂໍ້​ຂັດ​ແຍ່ງດ້ວຍ​ສັນຕິ​ວິ​ທີ, ບໍ່​ເຮັດ​ໃຫ້​ສະພາບ​ການ​ເຄັ່ງ​ຕຶງ​ຂຶ້ນຕື່ມ.
 
ທ່ານ​ນາຍົກລັດຖະມົນຕີ Najib ​ໃຫ້​ຮູ້​ວ່າ ບັນດາ​ເຫດການ​ທີ່​​ເກີດຂຶ້ນ​ໃນ​ມໍ່ໆ ນີ້ ​ໄດ້​ສ້າງ​ຄວາມ​ເປັນ​ຫ່ວງ​ຢູ່​ທະ​ເລ​ຕາ​ເວັນ​ອອກ, ​ຍ້ອນ​ຄວາມ​ສຳຄັນ​ຂອງສາຍທາງ​ເດີນ​ທ​ະ​ເລສຳລັບ​ການ​ຄ້າ​ສາກົນ, ທຸກໆ​ ​ເຫດການ​ທີ່​ເກີດ​ຂຶ້ນ​ຢູ່​ທະ​ເລ​ຕາ​ເວັ​ນອອກ ຈະ​ດຶງດູດ​ຄວາມ​ສົນ​ໃຈ. ອາ​ຊຽນ ຕ້ອງ​ມີ​ຄວາມ​ຕັ້ງ​ໃຈ, ​ເປັນ​ເຈົ້າ​ການ​ແກ້​ໄຂ​ບັນດາບັນຫາ​ນີ້ ບົນ​ພື້ນຖານ​ນໍ້າ​ໃຈ​ສ້າງສັນ.
 
ທ່ານ​ນາຍົກລັດຖະມົນຕີ Najib ​ເນັ້ນ​ໜັກ​ວ່າ ​ຕ້ອງເຄົາລົບ​ກົດໝາຍ​ສາກົນ, ​ໃນ​ນັ້ນ ມີ​ສົນທິສັນຍາ​ຂອງ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982 (UNCLOS) ຕ້ອງ​ແມ່ນ​ພື້ນຖານ​ຂອງບັນດາຂໍ້​ກຳນົດກ່ຽວ​ກັບການ​ແຊກ​ແຊງ ​ແລະ ​ເຄື່ອນ​ໄຫວ​ຢູ່​ທະ​ເລ​ຕາ​ເວັນ​ອອກ.
 
​​ໃນ​ນາມເປັນ​ປະທານ​ອາ​ຊຽນ, ມາ​ເລ​ເຊຍ ຫວັງ​ວ່າ ອາ​ຊຽນ ຈະ​ມີ​ຄວາມ​ຄືບ​ໜ້າ​ໃນ​ການ​ອອກ​ແຮງ​ສ້າງປະມວນ​ກົດ​ລະບຽບ ຢູ່ທະເລຕາເວັນອອກ (COC)​ໃຫ້​ສໍາ​ເລັດ​ໂດຍໄວ.  
ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ພົບ​ປະ​ແລກປ່ຽນ​ຄວາມ​ຄິດ​ຄວາມ​ເຫັນ​
ກັບ
ທ່ານ​ນາຍົກລັດຖະມົນຕີ ມາ​ເລ​ເຊຍ Najib Razak. ພາບ: ດຶກ​ຕ໋າມ/VNA


ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ພົບ​ປະ​ແລກປ່ຽນ​ຄວາມ​ຄິດ​ຄວາມ​ເຫັນ​
ກັບ
ທ່ານປະທານາທິບໍດີ ຟີ​ລິ​ບປິນ Benigno Aquino. ພາບ: ດຶກ​ຕ໋າມ/VNA


ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ພົບ​ປະ​ແລກປ່ຽນ​ຄວາມ​ຄິດ​ຄວາມ​ເຫັນ
​ກັບທ່ານ​ນາຍົກລັດຖະມົນຕີ ​ໄທ ປຣະຍຸດ ຈັກ​ໂອ​ຈາ.
 ພາບ: ດຶກ​ຕ໋າມ/VNA

ປະຕິບັດ​ໂດຍ: VNA/VNP
ບັນດາບົດທີ່ຖືກນຳສະເໜີ