15/07/2016 10:29 GMT+7 Email Print Like 0

ອາຊຽນ ພິຈາລະນາກ່ຽວກັບທະເລຕາເວັນອອກ

ເຖິງແມ່ນວ່າກອງປະຊຸມພິເສດລັດຖະມົນຕີການຕ່າງປະເທດ ອາຊຽນ-ຈີນ ທີ່ຫາກໍ່ຈັດຂຶ້ນຢູ່ແຂວງ ຢຸນໜານ-ຈີນ ບໍ່ສາມາດ ອອກຖະແຫຼງການຮ່ວມໄດ້ຕາມຄວາມຄາດຫວັງ, ແຕ່ບັນດາທ່ານ ລັດຖະມົນຕີການຕ່າງປະເທດອາຊຽນໄດ້ອອກຖະແຫຼງການທາງໜັງສືພິມສະແດງຄວາມວິຕົກກັງວົນກ່ຽວກັບການຜັນແປທີ່ສັບສົນຢູ່ທະເລຕາເວັນອອກໃນເວລາຜ່ານມາ. ຖະແຫລງການອີກເທື່ອໜຶ່ງສະແດງໃຫ້ເຫັນເຖິງຄວາມເປັນເອກະພາບລວມຂອງບັນດາປະເທດ ອາຊຽນ ຕໍ່ສະພາບການຢູ່ທະເລຕາເວັນອອກໃນປະຈຸບັນ.


ວັນທີ 14 ມິຖຸນາ 2016, ທີ່ແຂວງ ຢຸນໜາມ-ຈີນ, ທ່ານຮອງນາຍົກລັດຖະມົນຕີ, ລັດຖະມົນຕີ
ການຕ່າງປະເທດ 
ຟ້າມບິ່ງມິນ ນຳໜ້າຄະນະຜູ້ແທນ ຫວຽດນາມ ເຂົ້າຮ່ວມກອງປະຊຸມພິເສດ
ລັດຖະມົນຕີການຕ່າງປະເທດ ອາຊຽນ-ຈີນ. 
ໃນພາບ: ພາບທັງໝົດໃນກອງປະຊຸມ. ພາບ: ຫາຍອຽນ/VNA



ທ່ານຮອງນາຍົກລັດຖະມົນຕີ, ລັດຖະມົນຕີ ການຕ່າງປະເທດ
ຟ້າມບິ່ງມິນ ຖ່າຍຮູບຮ່ວມກັບຫົວໜ້າຄະນະບັນດາປະເທດ ແລະ
ທ່ານເລຂາທິການໃຫຍ່ ອາຊຽນ ເລເລືອງມິນ. ພາບ: ຫາຍອຽນ/VNA



ທ່ານຮອງນາຍົກລັດຖະມົນຕີ, ລັດຖະມົນຕີ ການຕ່າງປະເທດ
ຟ້າມບິ່ງມິນ ພົບປະກັບທ່ານລັດຖະມົນຕີການຕ່າງປະເທດ ຈີນ
ຫວາງອີ ຢູ່ນອກກອງປະຊຸມທີ່ແຂວງ ຢຸນໜາມ ໃນວັນທີ 13 ມິຖຸນາ 2016. ພາບ: XNA/VNA

ກອງປະຊຸມພິເສດລັດຖະມົນຕີການຕ່າງປະເທດ ອາຊຽນ-ຈີນທີ່ ໄດ້ຈັດຂຶ້ນຢູ່ແຂວງ ຢຸນໜານ-ຈີນ ເມື່ອວັນທີ 14 ມິຖຸນາ 2016 ເລີ່​ມຈາກຄວາມຮຽກຮ້ອງຕ້ອງການຂອງ ອາຊຽນ ທີ່ຢາກ ປືກສາຫາລືກັບ ຈີນ ກ່ຽວ​ກັບສະພາບການຢູ່ທະເລຕາເວັນອອກ ໃນໄລຍະຜ່ານມາ.

ໃນກອງປະຊຸມ, ສອງຝ່າຍໄດ້ປືກສາຫາລື​ແລກປ່ຽນຄຳຄິດຄຳເຫັນນໍາ​ກັນ​ຢ່າງ​ຈິງ​ໃຈ​ກ່ຽວກັບສະພາບການ ແລະ ວິທີການ​ຕ່າງໆ​ເພື່ອແກ້ໄຂ. ບັນດາປະເທດອາຊຽນ ​ໄດ້​ສະແດງຄວາມວິຕົກກັງວົນກ່ຽວກັບ ບັນດາການຜັນແປທີ່ສັບສົນຢູ່ທະເລຕາເວັນອອກໃນໄລຍະຜ່ານມາ, ເຮັດໃຫ້ຄວາມເຄັ່ງຕຶງເພີ່ມທະວີ​ຂຶ້ນ, ທຳລາຍຄວາມໄວ້ເນື້ອເຊື່ອໃຈ, ຖ້າຫາກບໍ່ມີ​ວິທີ​ການແກ້ໄຂທີ່​ເໝາະ​ສົມ ອາດຈະມີຂໍ້​ພິພາດເກີດຂຶ້ນ, ສົ່ງ​ຜົນ​ກະທົບ​ຕໍ່ສັນຕິພາບ, ສະຖຽນລະພາບ ແລະ ຄວາມສະຫງົບ ໃນພາກພື້ນ.
 
ສິ້ນສຸດກອງປະຊຸມ, ເຖິງວ່າສອງຝ່າຍບໍ່ສາມາດອອກຖະແຫຼງການ ຮ່ວມ​ໄດ້​ ຕາມ​ຄວາມ​ຄາດ​ຫວັງກໍ່ຕາມ, ແຕ່ບັນດາທ່ານລັດຖະມົນຕີ ການຕ່າງປະເທດ ອາຊຽນທີ່ໄດ້ອອກຖະແຫຼງການທາງໜັງສືພິມ ດ້ວຍຖ້ອຍ​ທໍານອງ​ທີ່ຊື່​ຕົງ, ​ເຕັມ​ໄປ​ດ້ວຍຄວາມຮັບຜິດຊອບ​ນັ້ນ, ສ່ວນ​ໃດ​ໜ່ຶງ​ມັນ​ໄດ້ສະແດງໃຫ້ເຫັນກ່ຽວ​ກັບບັນດາບັນຫາສຳຄັນທີ່ສອງຝ່າຍ​ໄດ້​ນໍາ​ມາ​ຫາລື​ນໍາ​ກັນໃນກອງປະຊຸມຄັ້ງນີ້, ກໍ່ຄືຄວາມສົນ​ໃຈ​ເປັນພິເສດຂອງອາຊຽນ ກ່ຽວກັບສະຖານະການຢູ່ທະເລຕາເວັນອອກ ໃນປະຈຸບັນ.

ໃນຕອນທຳອິດຂອງຖະແຫຼງການ, ບັນດາທ່ານລັດຖະມົນຕີ ອາຊຽນ ຍົກໃຫ້ເຫັນຢ່າງ​ຈິງ​ໃຈວ່າ: “ພວກຂ້າພະເຈົ້າປາດ​ຖະໜາຢາກສົມທົບ ກັບຈີນ ນໍາ​ເອົາ ການຮ່ວມມືລະຫວ່າງສອງຝ່າຍຂຶ້ນສູ່ລະດັບສູງໃໝ່.​ ເຖິງ​ຢ່າງ​ໃດ​ກໍ່ຕາມ, ພວກຂ້າພະເຈົ້າກໍ່ບໍ່ອາດສາມາດມອງ​ຂ້າມ​ໄດ້ສິ່ງ​ຕ່າງໆທີ່ກຳລັງ​ເກີດຂຶ້ນຢູ່ທະເລຕາເວັນອອກ​ເພາະ​ນີ້​ເປັນ​ບັນຫາສຳຄັນໃນການພົວພັນລະຫວ່າງ ອາຊຽນ ແລະ ຈີນ ​ແລະ ​ນີ້​ກໍ່ແມ່ນຈຸດປະສົງຕົ້ນຕໍຂອງການຈັດຕັ້ງກອງປະຊຸມຄັ້ງນີ້”. 

ຕຳຫຼວດທາງທະເລ ຫວຽດນາມ ແລະ ຕຳຫຼວດ​ທາງທະເລ ຈີນ ສົມທົບກັນໃນການ​ຮ່ວມລາດຕະເວັນ,
ກວດກາ​ອາ​ຊີບປາ ຢູ່ອ່າວທະເລພາກເໜືອ. ພາບ: ຕວນແອງ/VNA



ຕຳຫຼວດທາງທະເລ ຫວຽດນາມ ແລະ ຕຳຫຼວດ​ທາງທະເລ ຈີນ ກຳລັງກວດກາໃບອະນຸຍາດໃຫ້ຫາປາຂອງຊາວປະມົງ ຈີນ
ໃນການ​ຮ່ວມລາດຕະເວັນ, ກວດກາ​ອາ​ຊີບປາ ຢູ່ອ່າວທະເລພາກເໜືອ. ພາບ: ຕວນແອງ/VNA

ເນື້ອໃນຂອງຖະແຫຼງການກໍ່ເວົ້າຢ່າງຈະແຈ້ງວ່າ: “ພວກຂ້າພະເຈົ້າ ໄດ້ມີການປືກສາຫາລືຢ່າງກົງ​ໄປ​ກົງ​ມາກັບທ່ານລັດຖະມົນຕີ ການຕ່າງປະເທດ ຈີນ ຫວາງອີ ຕໍ່ການຜັນແປທີ່ສັບສົນ ຢູ່ທະເລຕາເວັນອອກໃນໄລຍະຜ່ານມາ. ພວກຂ້າພະເຈົ້າສະແດງ ຄວາມວິຕົກກັງວົນຢ່າງເລິກເຊິ່ງຕໍ່ບັນດາການຜັນແປທີ່ສັບສົນໃນມໍ່ໆມານີ້, ມັນໄດ້ທຳລາຍຄວາມໄວ້ເນື້ອເຊື່ອໃຈ, ຄວາມເຄັ່ງຕຶງເພີ່ມທະວີຂຶ້ນ, ສົ່ງ​ຜົນ​ກະທົບ​ຕໍ່​ສັນຕິພາບ, ສະຖຽນລະພາບ ແລະ ຄວາມສະຫງົບຢູ່ທະເລຕາເວັນອອກ”.

ບັນດາທ່ານລັດຖະມົນຕີການຕ່າງປະເທດ ອາຊຽນ ໄດ້ເນັ້ນໜັກ ເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມສະຫງົບ, ຄວາມປອດໄພ, ສິດເສລີພາບຂອງການເດີນທະເລ ແລະ ການເດີນອາກາດ, ຖືວ່ານີ້ແມ່ນຜົນປະໂຫຍດ ແລະ ຄວາມຮັບຜິດຊອບລວມຂອງບັນດາປະເທດ, ກ່ອນອື່ນໝົດແມ່ນ ອາຊຽນ ແລະ ຈີນ; ສະແດງຄວາມວິຕົກກັງວົນຕໍ່ບັນດາການຜັນແປ ທີ່ສັບສົນຢູ່ທະເລຕາເວັນອອກ, ເປັນຕົ້ນແມ່ນການກໍ່ສ້າງກິດຈະການຂະໜາດໃຫຍ່, ຫັນບັນດາເກາະທຽມຕ່າງໆ ເປັນເຂດການທະຫານ ແລະ ບັນດາການ​ເຄື່ອນ​ໄຫວ​ເພື່ອຢືນຢັນສິດອໍານາດ​ອະທິປະໄຕທີ່​ບໍ່​ອີງຕາມກົດໝາຍສາກົນ.
 
“ພວກຂ້າພະເຈົ້າເນັ້ນໜັກເຖິງຄວາມສຳຄັນຂອງການຫັນເປັນເຂດປອດທະຫານ ແລະ ຄວບຄຸມຕົນເອງໃນການຜັນຂະຫຍາຍບັນດາ ການກະທຳທີ່ຈະເຮັດໃຫ້ສະພາບການຢູ່ທະເລຕາເວັນອອກສັບສົນ ເຕີ່ມຂຶ້ນ”.

ບັນດາກິດຈະກຳທີ່ກໍ່ສ້າງແບບຜິດກົດໝາຍຂອງ ຈີນ ຢູ່ເກາະ
ງາກມາ (Gac Ma) ຂຶ້ນກັບໝູ່ເກາະ ເຈ່ືອງຊາ ຂອງ ຫວຽດນາມ. ພາບ: ມາຍແທງຫາຍ



ບັນດາກິດຈະການກໍ່ສ້າງແບບຜິດກົດໝາຍຂອງ ຈີນ ຢູ່ໝູ່ເກາະ ເຈື່ອງຊາ ຂອງ ຫວຽດນາມ. ພາບ: Reuters

ຕໍ່ສະພາບການສັບສົນດັ່ງກ່າວ, ບັນດາທ່ານລັດຖະມົນຕີ ສະເໜີ ອາຊຽນ ແລະ ຈີນ ຄວນສະແດງຄວາມຕັດສິນໃຈທາງ​ດ້ານ​ການ​ເມືອງ ແລະ ພະຍາຍາມຫຼາຍກວ່າເກົ່າເພື່ອຮັບປະກັນສັນຕິພາບ ແລະ ຄວາມສະຫງົບຢູ່ທະເລຕາເວັນອອກ, ເຄົາລົບບັນດາກົດລະບຽບ ຂອງກົດໝາຍສາກົນ, ແກ້ໄຂຂໍ້ຂັດແຍ່ງໂດຍສັນຕິວິທີ, ເໝາະສົມກັບກົດໝາຍສາກົນ, ນັບທັງສົນທິສັນຍາຂອງສະຫະ ປະຊາຊາດ ວ່າດ້ວຍກົດໝາຍທະເລ(UNCLOS) 1982, ບໍ່ນຳໃຊ້ກຳລັງອາວຸດຫລືນາບ​ຂູ່​ນໍາ​ໃຊ້​ກໍາລັງ​ອາວຸດ, ຕ້ອງຄວບຄຸມ ຕົນເອງ,ບໍ່ມີ​ການກະທຳ​ໃດທີ່ເຮັດໃຫ້ສະພາບການສັບສົນເຕີ່ມຂຶ້ນ, ເປັນຕົ້ນແມ່ນບໍ່ຫັນເປັນການທະຫານ.

ບັນດາທ່ານລັດຖະມົນຕີກໍ່ສະເໝີ ອາຊຽນ ແລະ ຈີນ ຕ້ອງຍູ້ແຮງການ ຜັນຂະຫຍາຍບັນດາວິທີການ​ເພື່ອສ້າງຄວາມເຊື່ອຖື ແລະ ການພົວພັນທາງດ້ານການທູດ,​ ເປັນຕົ້ນແມ່ນປະ​ຕິ​ບັດຖະ​ແຫຼງ​ການ​ກ່ຽວ​ກັບ​ການ​ປະພຶດຕໍ່​ຂອງ​ຝ່າຍ​ຕ່າງໆ​ຢູ່​ທະ​ເລ​ຕາ​ເວັນ​ອອກ (DOC) ຢ່າງ​ມີ​ປະ​ສິດ​ທິ​ຜົນ, ສ້າງປະ​ມວນ​ກົດລະບຽບ​ການ​ປະ​ພຶດ​ຕໍ່ຂອງ​ຝ່າຍ​ຕ່າງໆ​ຢູ່​ທະ​ເລ​ຕາ​ເວັນ​ອອກ (COC) ໂດຍ​ໄວ.
 
ໃນໂອກາດນີ້, ສອງຝ່າຍກໍ່​ໄດ້ສະແດງຄວາມຊົມເຊີຍຕໍ່ຜົນຂອງກອງປະຊຸມບັນດາການນຳຂັ້ນສູງ ອາຊຽນ-ຈີນ ຄັ້ງທີ 12 ກ່ຽວກັບການປະຕິບັດ DOC ທີ່ຫາກໍ່ໄຂຂຶ້ນໃນວັນທີ 9 ມິຖຸນາຢູ່ນະຄອນ ຮ້າລອງ, ແຂວງ ກວາງນິງ (ຫວຽດນາມ); ຢືນຢັນຄືນຄຳໝັ້ນໝາຍຜັນຂະຫຍາຍ DOC ຢ່າງຄົບຖ້ວນ ແລະ ມີປະສິດທິ ພາບ, ສຳເລັດການກໍ່ສ້າງ COC ໂດຍໄວ ເພື່ອເພີ່ມທະວີຄວາມເຂົ້າໃຈ, ຄວາມໄວ້ເນື້ອເຊື່ອໃຈ ແລະ ຊຸກຍູ້ການຮ່ວມມືໃນ​ພາກ​ປະຕິບັດຕົວຈິງ, ຄຸ້ມຄອງກໍລະນີພິພາດ ແລະ ສະກັດກັ້ນການປະທະກັນ, ປະກອບສ່ວນຮັກສາສັນຕິພາບ, ສະຖຽນລະພາບ ແລະ ຄວາມສະຫງົບຢູ່ທະເລຕາເວັນອອກ, ເປັນຕົ້ນແມ່ນເພີ່ມທະວີການແລກປ່ຽນຄຳຄິດຄຳເຫັນ ເພື່ອປະຕິບັດ DOC ຢ່າງມີປະສິດທິພາບ ແລະ ກໍ່ສ້າງ COC ໂດຍໄວ.

ໃນໂອກາດນີ້, ບັນດາທ່ານລັດຖະມົນຕີກໍ່ເປັນເອກະພາບ ຈະສຳເລັດການຮ່າງຖະແຫຼງການກ່ຽວກັບຄຳໝັ້ນໝາຍປະຕິບັດປະມວນກົດລະບຽບວ່າດ້ວຍການຫຼີກລ້ຽງກໍລະນີພິພາດໂດຍບັງເອີນຢູ່ທະເລຕາເວັນອອກ ເພື່ອສະເໜີຕໍ່​ກອງປະຊຸມຂັ້ນສູງສະເຫຼີມສະຫຼອງ ອາຊຽນ-ຈີນ ຊຶ່ງຈະຈັດຂຶ້ນໃນເດືອນກັນຍາ 2016 ຢູ່ ລາວ​ເພື່ອ​ພິຈາລະນາ, ກໍ່ຄືຮັກສາໂທລະສັບສາຍດ່ວນລະຫວ່າງ ບັນດາການນຳກະຊວງການຕ່າງປະເທດ ເພື່ອແກ້ໄຂບັນດາ ບັນຫາທີ່ເກີດຂຶ້ນຢູ່ທະເລຕາເວັນອອກ.
 
ອາດສາມາດເວົ້າໄດ້ວ່າ, ການ​ທີ່ບັນດາປະເທດ ອາຊຽນ ເປັນເອກະພາບຕໍ່ເນື້ອໃນຖະແໜງການຮ່ວມ​ຜ່ານສື່​ມວນ​ຊົນ ທີ່ບັນດາທ່ານລັດຖະມົນຕີການຕ່າງປະເທດໃນກຸ່ມ ອາຊຽນ ໄດ້ນໍາສະເໜີອອກທີ່ກອງປະຊຸມດັ່ງກ່າວ ສະແດງໃຫ້ເຫັນ​ເຖິງຄວາມພະຍາຍາມຢ່າງໃຫຍ່ຫລວງ​ທີ່​ສຸດຂອງບັນດາປະເທດ ໃນກຸ່ມ ອາຊຽນ ກ່ຽວ​ກັບຫຼັກໝັ້ນຂອງຕົນຕໍ່ບັນຫາຢູ່ ທະເລຕາເວັນອອກ. ສິ່ງດັ່ງກ່າວ ມີຄວາມ ໝາຍຢ່າງຍິ່ງໃນການ ພະຍາຍາມຍົກສູງຄວາມເປັນເອກະພາບ, ກໍ່ຄືບົດບາດທີ່ເປັນໃຈກາງ ຂອງ ອາຊຽນ ຕໍ່ບັນດາບັນຫາທີ່ກ່ຽວຂ້ອງກັບສັນຕິພາບ, ຄວາມສະຫງົບໃນພາກພື້ນ ແລະ ໂລກ.
ປະຕິບັດໂດຍ: VNA/VNP 

ບັນດາບົດທີ່ຖືກນຳສະເໜີ