20/12/2017 16:01 GMT+7 Email Print Like 0

ອະນຸລັກຮັກສາ, ເສີມຂະຫຍາຍສາຍພົວພັນແບບພິເສດ ຫວຽດນາມ-ລາວ ໃຫ້ໝັ້ນຄົງຕະຫຼອດໄປ


ສະຫາຍ ຫງວຽນຝູ໋ຈ້ອງ ເລຂາທິການໃຫຍ່ ຄະນະບໍລິຫານງານ ສູນກາງພັກກອມມູນິດ ຫວຽດນາມ; ສະຫາຍ ເຈິ່ນດ້າຍກວາງ ປະທານປະເທດແຫ່ງ ສສ ຫວຽດນາມ ແລະ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານ ສູນກາງພັກ ປະຊາຊົນປະຕິວັດ ລາວ, ປະທານປະເທດແຫ່ງ ສປປ ລາວ ພ້ອມກັບບັນດານັກສິລະປິນໃນງານລ້ຽງຮັບຮອງ. ພາບ: ວັນດຽບ/VNA

      ຕອນຄຳ່ວັນທີ 19 ທັນວາ 2017, ທີ່ນະຄອນຫຼວງ ຮ່າໂນ້ຍ, ສະຫາຍ ຫງວຽນຝູ໋ຈ້ອງ ເລຂາທິການໃຫຍ່ ຄະນະບໍລິຫານງານ ສູນກາງພັກກອມມູນິດ ຫວຽດນາມ; ສະຫາຍ ເຈິ່ນດ້າຍກວາງ ປະທານປະເທດແຫ່ງ ສສ ຫວຽດນາມ ໄດ້ເປັນເຈົ້າພາບ ໃນງານລ້ຽງຮັບຮອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານ ສູນກາງພັກ ປະຊາຊົນປະຕິວັດ ລາວ, ປະທານປະເທດແຫ່ງ ສປປ ລາວ ແລະ ຄະນະຜູ້ແທນຂັ້ນສູງ ສປປ ລາວ ເນື່ອງໃນໂອກາດມາຢ້ຽມຢາມ ຫວຽດນາມ ຢ່າງເປັນທາງການ.
      ເຂົ້າຮ່ວມໃນງານລ້ຽງດັ່ງກ່າວ ລວມມີສະຫາຍ ຫງວຽນຊວນຟຸກ ກຳມະການກົມການເມືອງ, ນາຍົກລັດຖະມົນຕີແຫ່ງ ສສ ຫວຽດນາມ; ສະຫາຍນາງ ຫງວຽນທິກີມເງິນ ກຳມະການ ກົມການເມືອງ, ປະທານສະພາແຫ່ງຊາດ ຫວຽດນາມ; ສະຫາຍ ເຈິ່ນກວກເວື້ອງ ກຳມະການກົມການເມືອງ, ຜູ້ປະຈຳການ ຄະນະເລຂາທິການ, ປະທານຄະນະກຳມະການກວດກາ ສູນກາງ; ບັນດາທ່ານຜູ້ນຳ ຕາງໜ້າບັນດາອົງການ, ຂະແໜງການສູນກາງ ແລະ ນະຄອນ ຮ່າໂນ້ຍ.
      ສະຫາຍເລຂາທິການໃຫຍ່ ຫງວຽນຝູ໋ຈ້ອງ ໄດ້ເນັ້ນໜັກ ເຖິງສາຍພົວພັນພິເສດ ຫວຽດນາມ-ລາວ, ລາວ-ຫວຽດນາມ ໄດ້ເພີ່ມພູນຄູນສ້າງໃນຕະຫຼອດໄລຍະເວລາສູ້ຮົບ ປົກປັກຮັກສາ ປະເທດຊາດຂອງສອງປະເທດ, ສອງຊົນຊາດ ແລະ ເປັນປັດໄຈ ສຳຄັນຮັບປະກັນໄຊຊະນະຂອງພາລະກິດປະຕິວັດ ຂອງແຕ່ລະປະເທດ.
      ສະຫາຍເລຂາທິການໃຫຍ່ ຫງວຽນຝູ໋ຈ້ອງ ໃຫ້ຮູ້ວ່າ ໃນສາຖານະການໃໝ່, ສອງພັກ, ສອງລັດ ແລະ ປະຊາຊົນສອງປະເທດ ຕ້ອງຈັບມືກັນ, ຮ່ວມຈິດຮ່ວມໃຈ, ເສີຍຂະຫຍາຍມູນເຊື້ອສາມັກຄີ ແລະ ການຮ່ວມມື, ຊ່ວຍເຫຼືອເຊິ່ງກັນ ແລະ ກັນ, ສືບຕໍ່ພາເຮັດໃຫ້ພາລະກິດປະຕິວັດຂອງສອງຊົນຊາດພັດທະນາຂຶ້ນຕາມເປົ້າໝາຍສັງຄົມນິຍົມ.
 
      ສະຫາຍເລຂາທິການໃຫຍ່ ຫງວຽນຝູ໋ຈ້ອງ ໄດ້ຢືນຢັນວ່າ ພັກ, ລັດ ແລະ ປະຊາຊົນ ຫວຽດນາມ ຈະເຮັດສຸດຄວາມສາມາດຂອງຕົນພ້ອມກັບພັກ, ລັດ ແລະ ປະຊາຊົນ ລາວ ປົກປ້ອງ, ປົກປັກຮັກສາ ແລະ ເພີ່ມພູນຄູນສ້າງໃຫ້ສາຍພົວພັນມິດຕະພາບ ອັນເປັນ ມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ-ລາວ, ລາວ-ຫວຽດນາມ ພັດທະນາຂຶ້ນຢ່າງເຂັ້ມແຂງ ເພື່ອຄວາມວັດທະນາຖາວອນ ແລະ ຄວາມຜາສຸກຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາໃນພາກພື້ນ ແລະ ໂລກ.
      ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານ ສູນກາງພັກ ປະຊາຊົນປະຕິວັດ ລາວ, ປະທານປະເທດແຫ່ງ ສປປ ລາວ ຕາງໜ້າໃຫ້ພັກ, ລັດ ແລະ ປະຊາຊົນ ລາວ ສະແດງຄຳຂອບອົກຂອບໃຈຢ່າງຈິງໃຈ ແລະ ເລິກເຊິ່ງ ຕໍ່ການຊ່ວຍເຫຼືອຂອງພັກ, ລັດ ແລະ ປະຊາຊົນ ຫວຽດນາມ ໃຫ້ແກ່ພາລະກິດປະຕິວັດຂອງປະຊາຊົນ ລາວ, ບໍ່ພຽງແຕ່ໃນໄລຍະສູ້ຮົບປົກປັກຮັກສາປະເທດຊາດໃນເມື່ອກ່ອນເທົ່ານັ້ນ, ຫາກຍັງໃນໄລຍະສ້າງສາ ແລະ ພັດທະນາປະເທດຊາດໃນປະຈຸບັນອີກດ້ວຍ.
      ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານ ສູນກາງພັກ ປະຊາຊົນປະຕິວັດ ລາວ, ປະທານປະເທດແຫ່ງ ສປປ ລາວ ຢືນຢັນວ່າ ພັກ, ລັດ ແລະ ປະຊາຊົນ ລາວ ຈະເຮັດສຸດຄວາມສາມາດຂອງຕົນ ພ້ອມກັບ ຫວຽດນາມ ເພື່ອປົກປັກຮັກສາ ແລະ ເສີມຂະຫຍາຍມູນເຊື້ອມິດຕະພາບ, ນຳ້ໃຈສາມັກຄີລະຫວ່າງ ລາວ-ຫວຽດນາມ, ຫວຽດນາມ-ລາວ ໃຫ້ໝັ້ນຄົງຕະຫຼອດໄປ, ພ້ອມກັນສຶກສາໃຫ້ຮຸ່ນໜຸ່ມສອງປະເທດ ສືບຕໍ່ປົກປັກຮັກສາ ສາຍພົວພັນອັນເປັນພິເສດນີ້.
ປະຕິບັດ: VNA/VNP