12/10/2021 10:16 GMT+7 Email Print Like 0

ຫວຽດນາມ ແລະ ສິງກະໂປ ເພີ່ມທະວີການຮ່ວມມືຄວາມໝັ້ນຄົງທາງເຄືອຂ່າຍອີນເຕີແນັດ

      ທ່ານລັດຖະມົນຕີ ໂຕເລີມ ສະເໜີໃຫ້ 2 ຝ່າຍຈົ່ງສືບຕໍ່ຮັກສາ, ເປີດກວ້າງການເຄື່ອນໄຫວຮ່ວມມືສາກົນທາງເຄືອຂ່າຍອີນເຕີແນັດ ລະຫວ່າງ 2 ອົງການທີ່ມີໜ້າທີ່ຂອງ 2 ປະເທດ
(ທ່ານພົນເອກ ໂຕເລີມ, ລັດຖະມົນຕີກະຊວງຕຳຫຼວດຫວຽດນາມ)
      ຕອນເຊົ້າວັນທີ 11 ຕຸລາ, ທ່ານພົນເອກ ໂຕເລີມ, ລັດຖະມົນຕີກະຊວງຕຳຫຼວດຫວຽດນາມ ໄດ້ເຂົ້າຮ່ວມກອງປະຊຸມແບບທາງໄກ ກັບທ່ານນາງ Josephine Teo, ລັດຖະມົນຕີກະຊວງສື່ສານ ແລະ ຖະແຫຼງຂ່າວ ທັງເປັນລັດຖະມົນຕີຮັບຜິດຊອບຄວາມໝັ້ນຄົງທາງເຄື່ອຂ່າຍອີນເຕີແນັດ ສິງກະໂປ.
        ທີ່ກອງປະຊຸມ, ທ່ານລັດຖະມົນຕີ ໂຕເລີມ ສະເໜີໃຫ້ 2 ຝ່າຍຈົ່ງສືບຕໍ່ຮັກສາ, ເປີດກວ້າງການເຄື່ອນໄຫວຮ່ວມມືສາກົນທາງເຄືອຂ່າຍອີນເຕີແນັດ ລະຫວ່າງ 2 ອົງການທີ່ມີໜ້າທີ່ຂອງ 2 ປະເທດ ເພື່ອແນໃສ່ຕອບສະໜອງຄວາມຕ້ອງການຕົວຈິງດ້ວຍຮູບການທີ່ມີໄຫວພິບ, ເໝາະສົມກັບສະພາບໂລກລະບາດໂຄວິດ-19. 2 ຝ່າຍສືບຕໍ່ຊຸກຍູ້ຄວາມເປັນເອກະພາບກ່ຽວກັບຄວາມຮັບຮູ້ ແລະ ການກະທຳຂອງບັນດາປະເທດອາຊຽນ ຕໍ່ບັນຫາຄວາມໝັ້ນຄົງທາງເຄືອຂ່າຍອີນເຕີແນັດ.
        ສ່ວນທ່ານນາງ Josephine Teo ເນັ້ນໜັກເຖິງການພົວພັນຮ່ວມມືອັນດີງາມໃນໄລຍະຜ່ານມາລະຫວ່າງບັນດາອົງການປະຕິບັດກົດໝາຍ ສິງກະໂປ ແລະ ກະຊວງຕຳຫຼວດ ຫວຽດນາມ, ພ້ອມກັນນັ້ນຢືນຢັນວ່າ ສິງກະໂປ ຈະສົ່ງເສີມ, ແລກປ່ຽນກັບບັນດາປະເທດໃຫຍ່, ມີທ່າແຮງດ້ານເຕັກໂນໂລຊີຄື: ອາເມລິກາ, ຍີ່ປຸ່ນ, ສ.ເກົາຫຼີ ເພື່ອໃຫ້ບັນດາປະເທດນັ້ນສະໜັບສະໜູນ, ອຸປະຖຳໃຫ້ບັນດາອົງການທີ່ມີໜ້າທີ່ກ່ຽວກັບຄວາມໝັ້ນຄົງທາງເຄືອຂ່າຍອີນເຕີແນັດໃນ ອາຊຽນ ໄດ້ສຳຜັດ ແລະ ນຳໃຊ້ເຂົ້າໃນວຽກງານຮັບປະກັນຄວາມໝັ້ນຄົງ, ຄວາມປອດໄພທາງເຄືອຂ່າຍອີນເຕີແນັດ ແນໃສ່ມຸ່ງໄປເຖິງ “ສ້າງເຄືອຂ່າຍອີນເຕີແນັດເຂັ້ມແຂງດ້ວຍຕົນເອງໃນ ອາຊຽນ”.
(ແຫຼ່ງຄັດຈາກ VOV)