02/12/2015 10:19 GMT+7 Email Print Like 0

ຫວຽດນາມ ແລະ UNESCO ເຊັນບົດບັນທຶກຊ່ວຍຈຳການຮ່ວມມື

(ພາບປະກອບ)
      ທ່ານ​ນາຍົກລັດຖະມົນຕີ ຫວຽດນາມ ຫງວຽນ​ເຕີ໋ນຢຸງ ຫາ​ກໍ​ຮັບ​ຮອງ​ເອົາ​ເນື້ອ​ໃນ​ຮ່າງ​ບົດ​ບັນທຶກ​ຊ່ວຍ​ຈຳກ່ຽວ​ກັບ​ການ​ຮ່ວມ​ມື​ລະຫວ່າງ​ລັດຖະບານ ຫວຽດນາມ ​ແລະ ອົງການການ​ສຶກສາ, ວິທະຍາສາດ ​ແລະ ວັດທະນະທຳ​ຂອງ ສປຊ (UNESCO) ​ໄລຍະ 2016 – 2020 ​ແລະ ​ໄດ້ມອບ​​ສິດ​ໃຫ້ການ​ນຳ​ກະຊວງ​ການ​ຕ່າງປະ​ເທດ​ ຕາງ​ໜ້າ​ລັດຖະບານ​ລົງ​ນາມ​ໃນ​ບົດ​ບັນທຶກ​ຊ່ວຍ​ຈຳ​ດັ່ງກ່າວ ກັບ​ຜູ້​ຕາງ​ໜ້າ​ຂອງ UNESCO. ​ຕາມ​ທີ່​ໄດ້​ຮັບ​ຊາບ​​ແລ້ວ ຫວຽດນາມ ​ແລະ UNESCO ​ໄດ້​ລົງ​ນາມ​ໃນ​ບົດ​ບັນທຶກ​ຊ່ວຍ​ຈຳ ​ແລະ ປະຕິ​ບັດບັນດາ​ເນື້ອ​ໃນ​ການ​ຮ່ວມ​ມື​ໃນ​ໄລຍະ 2010 – 2015. ​ເລື່ອງ​ສືບ​ຕໍ່​ລົງ​ນາມ​ໃນ​ບົດ​ບັນທຶກ​ຊ່ວຍ​ຈຳ​ກັບ UNESCO ຈະ​ປະກອບສ່ວນ​ຊຸກຍູ້​ການ​ພົວພັນ​ຮ່ວມ​ມື​​ໄລ​ຍະ 2016 – 2020 ​ໃນ​ບັນ​ດາ​ຂົງ​ເຂດ​ຄື: ການ​ສຶກສາ, ວິທະຍາສາດ​ທຳ​ມະ​ຊາດ, ວິທະຍາສາ​ດສັງຄົມ, ວັດທະນະທຳ ​ແລະ ຖະ​ແຫຼ​ງຂ່າວ - ​ສື່ສານ. ຄາດ​ຄະ​ເນ​ວ່າ: ພິທີ​ລົງ​ນາມ​​ໃນບົດ​ບັນທຶກ​ຊ່ວຍ​ຈຳ​ດັ່ງກ່າວ​ຈະ​​ໄດ້ຮັບ​ການ​ຈັດ​ຕັ້ງ​ຢູ່​ສຳ​ນັກງານ​ໃຫຍ່ UNESCO ຢູ່ Paris ​ເນື່ອງ​ໃນ​ໂອກາດ​ທ່ານນາຍົກລັດຖະມົນຕີ ຫງວຽນ​ເຕີ໋ນຢຸງ ​ໄປຢ້ຽມຢາມສຳນັກງານ  UNESCO ​ແລະ ພົບ​ປະກັບ​ຜູ້ອຳນວຍການ​ໃຫຍ່ UNESCO.
 (ແຫຼ່ງຄັດຈາກ VOV)