21/05/2015 00:01 GMT+7 Email Print Like 0

ຫວຽດນາມ ເພີ່ມທະວີການພົວພັນຮ່ວມມືກັບ ສ.ລັດເຊຍ, ສ.ເຊັກ ແລະ ອາແຢັກບາຍຢານ

ວັນທີ 7 ພຶດສະພາ 2015, ທ່ານປະທານປະເທດ ເຈືອງເຕິນຊາງ ໄດ້ນຳໜ້າຄະນະຜູ້ແທນຂັ້ນສູງ ຫວຽດນາມ ເດີນທາງອອກຈາກ ຮ່າໂນ້ຍ ເພື່ອເຂົ້າຮ່ວມພິທີສະເຫຼີມສະຫຼອງ 70 ປີແຫ່ງໄຊຊະນະໃນສົງຄາມປົກປັກຮັກສາປະເທດຊາດທີ່ຍິ່ງໃຫຍ່ຢູ່ ສ.ລັດເຊຍ (ແຕ່ວັນທີ 7 – 10/5/2015), ຢ້ຽມຢາມທາງລັດຖະກິດ ສ. ເຊັກ (ແຕ່ວັນທີ 10 – 13/5/2015) ແລະ ຢ້ຽມຢາມ ສ. ອາແຢັກບາຍຢານ (ແຕ່ວັນທີ 13 – 15/5/2015) ຢ່າງເປັນທາງການຕາມຄຳເຊື້ອເຊີນ ຂອງທ່ານປະທານາທິບໍດີ ສ.ລັດເຊຍ Vladimir Putin, ທ່ານປະທານາທິບໍດີ ສ. ເຊັກ Milos Zeman ແລະ ທ່ານ ປະທານາທິບໍດີ ສ. ອາແຢັກບາຍຢານ Ilham Aliev. 
ຫວຽດນາມ-ສ.ລັດ​ເຊ​ຍ ​ເພີ່ມ​ທະວີ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຢ່າງຮອບດ້ານ
ໃ​ນຂອບ​ເຂດ​ການສະ​ເຫຼີ​ມສະຫຼອງ 70 ປີ​ແຫ່ງ​ໄຊ​ຊະນະ​ໃນ​ສົງຄາມ ປົກ​ປັກ​ຮັກ​ສາ​ປະ​ເທດ​​ຊາດທີ່​ຍິ່ງ​ໃຫຍ່​, ທ່ານ​ປະທານ​ປະ​ເທດ ​ເ​ຈືອງ​ເຕິ​ນຊາງ ​ມີ​ການ​ພົບ​ປະ​ເຈລະຈາ​ກັບ​ທ່ານ​ປະທານາທິບໍດີ ສ.​ເລັດ​ເຊຍ Vladimir Putin.
                   
ທັງສອງ​ຝ່າຍ​ໄດ້​ມີ​ການ​ແລກປ່ຽນຄວາມ​ຄິດ​ຄວາມ​ເຫັນ​ກ່ຽວ​ກັບ​ບັນຫາ​ການຮ່ວມ​ມື​ສອງ​ຝ່າຍ ​ແລະ ​ເປັນ​ເອກະ​ພາບ​ກັນກ່ຽວ​ກັບ​ວິທີ​ການ​ຕ່າງໆ​ເພື່ອເພີ່ມ​ທະວີ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ ລະຫວ່າງ ຫວຽດນາມ-​ສ.ລັດ​ເຊ​ຍ ​ໃນ​ໄລຍະ​ໃໝ່.
 
ພິ​ເສດ, ​ໃນ​ຂົງ​ເຂດ​ເສດຖະກິດ, ທ່ານ​ຜູ້ນຳ​ທັງ​ສອງ​​ໃຫ້​ທັດສະນະ​ວ່າ ​​​ເລື່ອງ​ສອງ​ຝ່າຍ​ຈະ​ເຊັນ​ສັນຍາ​ວ່າ​ດ້ວຍ​ຂົງ​ເຂດ​ການ​ຄ້າ​ເສລີ ລະຫວ່າງ ຫວຽດນາມ ​ແລະ ພັນທະພາບ​ເສດຖະກິດອາຊີ-​ເອີຣົບ ​ໃນ​​ທ້າຍ​ເດືອນ​ພຶດສະພາ​ນີ້ ຈະ​ເປັນ​ບາດກ້າວບຸກທະລຸ​ເພື່ອຫັນ​ໃຫ້​ປະກົດ​ຜົນ​ເປັນ​ຈິງຕົວ​ເລກ​ຄາດໝາຍມູນ​ຄ່າ​ການ​ຄ້າ​ສອງ​ຝ່າຍບັນ​ລຸ​ລະ​ດັບ 10 ຕື້ USD ​​ໃນປີ 2020.
 
ສອງ​ຝ່າຍ​ໄດ້​ຕີ​ລາຄາ​ສູງ​ຕໍ່​ການ​ເຄື່ອນ​ໄຫວ​ຂອງ​ບັນດາ​ບໍລິສັດ​ນ້ຳມັນ​ອາຍ​ແກັສ ສອງ​ປະ​ເທດ ​ແລະ ບັນດາ​ບໍລິສັດ​ຕ່າງໆ ທີ່​ພວມ​ເຄື່ອນ​ໄຫວ​ຢູ່​ໄຫຼ່​ທະວີບ​ຂອງ ຫວຽດນາມ ​ແລະ ​ໃນ​ອານາ​ເຂດ​ຂອງ ສ.​ລັດ​ເຊຍ, ຢືນຢັນ​ຈະ​ສ້າງ​ທຸກ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ແກ່​ບັນດາ​ໂຄງການສໍາ​ຫລວດ ​ແລະ ​ຂຸດ​ຄົ້ນ​ນ້ຳມັນ, ອາຍ​ແກັດ​ໃນ​ປະຈຸ​ບັນ​ກໍ່​ຄື​ບັນດາ​ໂຄງການ​ໃໝ່​ຕ່າງໆ ​ໃນ​ຂົງ​ເຂດ​ປຸງ​ແຕ່ງ ​ແລະ ກັ່ນ​ຕອງ​ນ້ຳມັນ.
 
ສອງ​ຝ່າຍ​ຢືນຢັນ​ວ່າ ຈະ​ສືບ​ຕໍ່​ຮ່ວມ​ມື​ຢ່າງຮອບດ້ານ​ໃນ​ບັນດາ​ຂົງ​ເຂດ​ຄື: ການ​ລົງທຶນ, ການ​ເງິນ-​ການ​ທະນາຄານ, ການ​ຮ່ວມ​ມື​ດ້ານ​ອຸດ​ສາ​ຫະກຳ-​ກະສິກຳ, ຂຸດ​ຄົ້ນ​ບໍ່​ແຮ່ ​ແລະ ອື່ນໆ.
 
ກ່ຽວ​ກັບ​ການ​ພົວພັນ​ດ້ານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ, ການ​ນຳ​ສອງ​ປະ​ເທດ​​ເຫັນ​ດີ​ວ່າ ສອງ​ຝ່າຍ​ຕ້ອງ​ເພີ່ມ​ທະວີ​ການສົມທົບ​ກັນ ​​ເພື່ອ​ນຳ​ເອົາການ​ຮ່ວມ​ມື​ໃນ​ຂົງ​ເຂດ​ດັ່ງກ່າວ​ເຂົ້າ​ສູ່​ລວງ​ເລິກ ​ແລະ ມີ​ປະສິດ​ທິຜົນ, ກ່ອນ​ອື່ນ​ໝົດ​ແມ່ນ​ອອກ​ແຮງຜັນຂະຫຍາຍ​ປະຕິບັດ​ການ​ຮ່ວມ​ມື​ໃນບັນດາ​ຂົງ​ເຂດ​ທີ່​ເປັນ​ມູນ​ເຊື້ອ​ຄື​: ກໍ່ສ້າງ​ທະຫານ, ຊ່ຽວຊານເຕັກນິກ.
 
ສອງ​ຝ່າຍ​ໄດ້​ຕີ​ລາຄາ​ສູງ​ຕໍ່​ການ​ຮ່ວມ​ມື​ລະຫວ່າງ​ບັນດາ​ທ້ອງ​ຖິ່ນ​​ໃນ​ໄລຍະ​ຜ່ານ​ມາ, ສະ​ເໜີ​​ຝ່າຍ​ຕ່າງໆ​ເອົາ​ໃຈ​ໃສ່​​ເພີ່ມ​ທະວີ​ການ​ພົວພັນ​ໃນ​ບັນດາ​ຂົງ​ເຂດ​ທີ່​ເປັນ​ທ່າ​ແຮ​ງຂອງ​ກັນ​ແລະ​ກັນ; ໃນ​ນັ້ນພິຈາລະນາຄວາມ​ອາດສາມາດ​ໃນ​ການ​ສ້າງ​ຕັ້ງ​ວິ​ສາ​ຫະກິດ​ຮ່ວມ​ທຸລະ​ກິດ​ປຸງ​ແຕ່ງ​ສິນ​ໃນ​ນ້ຳ-ສິນທະ​ເລ ​ແລະ ​ໄມ້​ຢູ່​ເຂດ Primori ກໍ່​ຄື​ສ້າງ​ຕັ້ງ​ເຂດອຸດສາຫະກຳ​ເບົາ​ທີ່ Moskva.

ເນື່ອງ​ໃນ​ໂອກາດ​ນີ້, ສອງ​ຝ່າຍ​ໄດ້​​ເຊັນ​ສັນຍາ​ຮ່ວມ​ມື​ລະຫວ່າງ​ອຳນາດ​ການ​ປົກຄອງ Moskva ​ແລະ ນະຄອນ ​ໂຮ່ຈີ​ມິນ. ຕາມ​ສັນຍາ​ສະບັບ​ນີ້, ອຳນາດ​ການ​ປົກຄອງ​ເຂດຊານ​ເມືອງ Moskva ​ແລະ ນະຄອນ ​ໂຮ່ຈີ​ມິນ ຈະ​ຮ່ວມ​ມື​ກັນໃນ​ບັນດາ​ຂົງ​ເຂດ​ຄື: ຫັນ​ເປັນ​​ເຕັກ​ໂນ​ໂລ​ຢີ​ທັນ​ສະ​ໄໝ, ຜະລິດ​ກົນຈັກ, ​ເຕັກ​ໂນ​ໂລ​ຢີອາຫານ​ການ​ກິນ, ​ອຸດສາຫະກໍາປຸງ​ແຕ່ງ ​ແລະ ອຸດສາຫະກຳ​ເບົາ, ການ​ຄ້າ, ກະສິກຳ, ການ​ເງິນ, ທະນາຄານ, ສາ​ທານະ​ລະ​ສຸກ, ການ​ສຶກສາ, ການທ່ອງທ່ຽວ ​ແລະ ກິ​ລາ…
 
​ໃນ​ຂອບ​ເຂດຂອງ​ການ​ຢ້ຽມຢາມ, ດ້ວຍ​ການ​ຊ່ວຍ​ເຫຼືອ​ຂອງ​ທາງ​​ໂທລະພາບ, ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ໄດ້​ອອກ​ຄຳ​ສັ່ງປະກາດ​ໃຫ້ໜ່ວຍ​ຜະລິດ​ໃໝ່​ຂອງ​ບໍລິສັດຮ່ວມ​ສໍາພັນ​ທຸລະ​ກິດ Rusvietpetro ທີ​່ຕັ້ງຢູ່​ປະ​ເທດສາທາລະນະ​ປົກຄອງ​ຕົນ​ເອງ Nhenhets ຂຶ້ນ​ກັບ ສ.ລັດ​ເຊຍ​ເລີ່​ມ​ເຄື່ອນ​ໄຫວທໍາ​ການ​ຜະລິດ. 
ທ່ານ​ປະທານາທິບໍດີ ສ.ລັດ​ເຊຍ Putin ຕ້ອນຮັບ​ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ. ພາບ: ຫງວຽນ​ຄາງ/VNA

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ພົບ​ປະ​ເຈ​ລະ​ຈາ​ກັບ​ທ່ານ​ປະທານາທິບໍດີ ສ.ລັດ​ເຊຍ Putin.
ພາບ: ຫງວຽນ​ຄາງ/VNA


ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ພ້ອມ​ກັບ​ທ່ານ​ປະທານາທິບໍດີ ສ.ລັດ​ເຊຍ Putin ​
ແລະ ບັນດາ​ທ່ານປະມຸກ​ລັດ​ປະ​ເທດ​ຕ່າງໆ ວາງ​ພວງມາລາທີ່​ອະນຸສາວະລີ​ບັນດາ​ນັກຮົບ​ນິລະນາມ
ທີ່​ໄດ້​ເສຍສະຫຼະ​ຊີວິດ​ເພື່ອ​ຊາດ. ພາບ: ຫງວຽນ​ຄາງ/VNA


ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ພ້ອມພັນ​ລະ​ຍາ ​ຖ່າຍ ຮູບ​ຮ່ວມ​ກັບ
ບັນດາ​ທ່ານຫົວໜ້າຄະນະຂອງ​​ປະ​ເທດ​ຕ່າງໆ ​ທີ່​ເຂົ້າ​ຮ່ວມ​ພິທີ​. ພາບ: ຫງວຽນ​ຄາງ/VNA


ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ແລະ ພັນ​ລະ​ຍາ ​
ເຂົ້າ​ຮ່ວມ​ພິທີ​ສວນສະໜາມ​ຢູ່​ຈະຕຸ​ລັດ​ແດງ. ພາບ: ຫງວຽນ​ຄາງ/VNA


ນີ້​ແມ່ນ​ການ​ສວນສະໜາມ​ທີ່​ມີ​ຂະໜາດ​ໃຫຍ່​ທີ່​ສຸດ​ໃນ​ປະຫວັດສາດຂອງ ສ. ​ລັດ​ເຊຍ. ພາບ: AFP/VNA

ທ່ານ​ປະທານ​ປະ​ເທດ​ພ້ອມ​ດ້ວຍ​ບັນດາ​ນັກ​ຮົບ​ເກົ່າ ລັດ​ເຊຍ. ພາບ: ຫງວຽນ​ຄາງ/VNA

ທ່ານ​ປະທານ​ປະ​ເທດຖະຫວາຍ​ດອກ​ໄມ້​ທີ່​ຮູບ​ປັ້ນ​ທ່ານ​ປະທານ ​​ໂຮ່ຈີ​ມິນ
ຢູ່​ນະຄອນຫຼວງ Moskva.
ພາບ: ຫງວຽນ​ຄາງ/VNA

 
ຫວຽດນາມ-​ສ.​ເຊັກ ​ເພີ່ມ​ທະວີ​ການ​ຮ່ວມ​ມື​ໃນຫຼາຍ​ຂົງ​ເຂດ 
​ໃນ​ຊຸມ​ປີ​ມໍ່ໆ ມານີ້, ການ​ຄ້າ​ລະຫວ່າງ​ສອງ​ປະ​ເທດ​ມີ​ການ ຂະຫຍາຍ​ຕົວ​ ແຕ່ກໍ່​ຍັງ​ໜ້ອຍ​ຖ້າ​ທຽບ​ກັບ​ທ່່າ​ແ​ຮງບົ່ມຊ້ອນ. ປີ 2012, ສ.​ເຊັກ ​ໄດ້​ປະກາດ​ຍຸດທະ​ສາດ​​ສົ່ງ​ອອກ​ແຫ່ງ​ຊາດ 2012-2020, ​ໃນ​ນັ້ນ ຈັດ ຫວຽດນາມ ​ ເຂົ້າ​ໃນບັນຊີ 12 ຕະຫລາດ​ບຸລິມະສິດ ຊຶ່ງ​​ແມ່ນປະ​ເທດ​ໜຶ່ງ​ດຽວ​ໃນ​ອາ​ຊຽນ
 
​ກ່ຽວ​ກັບ​ການ​ລົງທຶນ, ມາ​ຮອດ​ປະຈຸ​ບັນ​, ສ.​ເຊັກ ມີ 36 ​ໂຄງການ​ລົງທຶນ​ເຂົ້າ ຫວຽດນາມ ດ້ວຍຍອດ​ຈຳ​ນວນ​ທຶນ​ຈົດ​ທະ​ບຽນ 64 ລ້ານ USD, ​ເປັນ​ອັນ​ດັບ​ທີ 42 ໃນ​ຈຳ​ນວນ 101 ປະ​ເທດ ແລະ ເຂດ​ແຄ​້ວນ​ລົງ​ທຶນ​ຢູ່​ຫວຽດ​ນາມ, ສຸມ​ໃສ່​​ບັນດາຂົງ​ເຂດ​ຄື: ອະສັງຫາລິມະ​ຊັບ, ​ເບຍ, ​ອຸປະກອນ​ໄຟຟ​້າ, ວັດ​ສະດຸກໍ່ສ້າງ ​ແລະ ອື່ນໆ.

ເພາະສະ​ນັ້ນ, ​ໃນ​ການ​ຢ້ຽມຢາ​ມຄັ້ງ​ນີ້, ການ​ນຳ​ສອງ​ປະ​ເທດ​ໄດ້​ເປັນ​ເອກະ​ພາບ​ກັນຈະ​ສືບ​ຕໍ່​ເພ່ີມ​ທະວີ​ການ​ຮ່ວມ​ມື​​ໃນ ຫຼາຍ​ຂົງ​ເ​ຂດທີ່​ເປັນມູນ​ເຊື້ອ, ກໍ່​ຄື​ໃນ​ຂົງ​ເຂດປ້ອງ​ກັນ​ປະ​ເທດ-​ປ້ອງ​ກັນ​ຄວາມ​ສະຫງົບ, ວິທະຍາສາດ-​ເຕັກ​ໂນ​ໂລ​ຢີ, ວັດທະນະທຳ-​ກິລາ ​ແລະ ທ່ອງ​ທ່ຽວ, ການ​ຄົມມະນາຄົມ​ຂົນ​ສົ່ງ, ພະລັງງານ, ສື່ສານ​ທາງ​ໄກ, ຜະລິດ​ກົນ​ຈັກກະ​ສິກຳ, ​ອຸປະກອນ​ໄຟຟ້າ, ອຸປະກອນ​ທາງ​ການ​ແພດ, ວັດ​ສະດຸ​ກໍ່ສ້າງ, ປຸງ​ແຕ່ງ​ສະບຽງ​ອາຫານ ​ແລະ ອື່ນໆ.
 
ສອງ​ຝ່າຍກໍ່​ໄດ້​ແລກປ່ຽນ​ຄວາ​ມຄິດ​ຄວາມ​ເຫັນ​ກ່ຽວ​ກັບ​ບັນຫາຈຳນວນ​ໜຶ່ງ​ທີ່​ສາກົນ ​ແລະ ພາກ​ພື້ນ​ມີ​ຄວາມ​ສົນ​ໃຈ, ​ໃນ​ນັ້ນ ມີ​ບັນຫາ​ຢູ່​ທະ​ເລ​ຕາ​ເວັ​ນອອກ ​ແລະ ​ເຫັນ​ດີ​ວ່າ ຄວນ ແກ້​ໄຂ​ບັນ​ດາ​ຂໍ້ຂັດ​ແຍ້ງ​​ດ້ວຍ​ສັນຕິ​ວິທີ, ບົນ​ພື້ນ​ຖານ​ເຄົາ​ລົບ​ກົດ​ໝາຍ​ສາ​ກົນ, ໃນ​ນັ້ນ​ມີ​ສົນ​ທິ​ສັນ​ຍາຂອງ​ສະຫະ​ປະຊາ​ຊາດ​ວ່າ​ດ້ວຍ​ກົດ​ໝາຍ​ທະ​ເລ​ປີ 1982, ປະ​ຕິ​ບັດ​ຖະ​ແຫຼງ​ການ​ກ່ຽວ​ກັບ​ການ​ປະ​ພຶດ​ຕໍ່ຂອງ​ຝ່າຍ​ຕ່າງໆ​ຢູ່​ທະ​ເລ​ຕາ​ເວັນ​ອອກ (DOC) ຢ່າງ​ຄົບ​ຖ້ວນ ​ເພື່ອ​ປົກ​ປັກຮັກ​ສາ​ສັນ​ຕິ​ພາບ, ສະ​ຖຽນ​ລະ​ພາບ, ຄວາມ​ປອດ​ໄພ, ສິດ​ເສ​ລີພາບ​ຂອງການ​ເດີນ​ທະ​ເລ ແລະ ການ​ບິນ​ຢູ່​ທະ​ເລ​ຕາ​ເວັນ​ອອກ.

ພິທີ​ຕ້ອນຮັບ​ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​
ໄດ້​ຈັດ​ຂຶ້ນ​ຢ່າງ​ສົມ​ກຽດທີ່ທຳນຽບປະທານາທິບໍດີ ສ.ເຊັກ. ພາບ: ຫງວຽນຄາງ/VNA

ທ່ານ​ປະທານາທິບໍດີ ສ.​ເຊັກ Miloš Zeman
ພົບ​ປະ​ເ​ຈລະ​ຈາ​ກັບ​ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ. ພາບ: ຫງວຽນຄາງ/VNA


ທ່ານ​ປະທານ​ປະ​ເທດ ​ເຈືອງ​ເຕິ​ນຊາງແລະ ທ່ານ​ປະທານາທິບໍດີ ສ.​ເຊັກ Miloš Zeman ​
ເຂົ້າ​ຮ່ວມ​ເວທີ​ປາ​ໄສການ ຮ່ວມ​ມືດ້ານ​ເສດຖະກິດ-ທ່ອງ​ທ່ຽວ ຫວຽດນາມ ທີ່ ສ.​ເຊັກ. ພາບ: ຫງວຽນຄາງ/VNA

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ພົບ​ປະ​ກັບ​ທ່ານ​ Milan Stech
ປະທານ​ສະພາ​ສູງ​ແຫ່ງ ສ.​ເຊັກ. ພາບ: ຫງວຽນຄາງ/VNA

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ພົບ​ປະ​ກັບ​ທ່ານ​
 Jan Hamacek ປະທານ​ສະພາຕໍ່າ​ແຫ່ງ ສ.​ເຊັກ. ພາບ: ຫງວຽນຄາງ/VNA

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ພົບ​ປະ​ແລກປ່ຽນ​ຄວາມ​ຄິດ​ຄວາມ​ເຫັນ​
ກັບ​ທ່ານ Bohuslav Sobotka ​ນາຍົກລັດຖະມົນຕີ​ແຫ່ງ ສ.​ເຊັກ. ພາບ: ຫງວຽນຄາງ/VNA

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ພົບ​ປະ​ກັບ​ເພື່ອນ​ມິດ ​ເຊັກ. ພາບ: ຫງວຽນຄາງ/VNA
ທ່ານ​ປະທານ​ປະ​ເທດ ​ແລະ ພັນ​ລະ​ຍາຍ່າງ​ເລາະ​ທ່ຽວ​ຊົມ ​​ນະຄອນ Kalovy Vary. ພາບ: ຫງວຽນຄາງ/VNA

ຫວຽດນາມ-ອາ​ແຢັກ​ບາຍ​ຢານ: ຮ່ວມ​ມື​ດ້ານ​ນ້ຳມັນ​ອາຍ​ແກັສ ​ແມ່ນ​ຍຸດ​ທະ​ສາດ
​ໃນ​ການ​ຢ້ຽມຢາມ​ຄັ້ງ​ນີ້ ຂອງ​ປະທານ​ປະ​ເທດ ​ເຈືອງ​ເຕິ​ນຊາງ, ສອງ​ຝ່າຍ​ເຫັນ​ດີ​ວ່າ ຈະ​ມານະ​ພະຍາຍາມ​ຍົກ​ສູງ​ມູນ​ຄ່າ​ການ​ຄ້າ​ສອງ​ສົ້ນ ​ແຕ່​ 400 ລ້ານ USD ​ໃນ​ປີ 2014 ຂຶ້ນ​ 1 ຕື້ USD ​ໃນ​ຊຸມ​ປີ​ຈະ​ມາ​ເຖິງ.
 
ສອງ​ຝ່າຍ​ເນັ້ນ​ໜັກ​ວ່າ ຈະ​ຖື​ການ​ຮ່ວມ​ມື​ໃນຂົງ​ເຂດ​ນ້ຳມັນ​ອາຍ​ແກັສ ​ເປັນ​ທິດ​​ບຸລິມະສິດ ມີ​ລັກສະນະ​ຍຸດ​ທະ​ສາດ​ອັນ​ຍາວ​ນານ. ທ່ານ​ປະທານາທິບໍດີ Alyev ຢືນຢັນ​ວ່າ ຈະ​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ ​ເພື່ອ​ຊຸກຍູ້​ການ​ລົງທຶນ​ຂອງ ຫວຽດນາມ ຢູ່ ອາ​ແຢັກ​ບາຍ​ຢານ,​ ກ້າວ​ໄປ​ເຖິງ​ ​ສອງ​ຝ່າຍ​ຈະ​ເປີດ​ກວ້າງ​ການ​ຮ່ວມ​ມື​ຂຸດ​ຄົ້ນ​ນ້ຳມັນ​ອາຍ​ແກັສຢູ່​ປະ​ເທດ​ທີ​ສາມ.
 
​ເນື່ອງ​ໃນ​ໂອກາດ​ນີ້, ສອງ​ຝ່າຍ​ໄດ້​ລົງ​ນາມ​ໃນ​ເອກະສານຮ່ວມ​ມື​ທີ່​ສຳຄັນ​ຫຼາຍ​ສະບັບ​ຄື: ສັນຍາ​ລະຫວ່​າງລັດຖະບານ​ ວ່າ​ດ້ວຍ​ການ​ຮ່ວມ​ມື ​ແລະ ຊ່ວຍ​ເຫຼືອ​ດ້ານ​ບໍລິຫານ​ໃນ​ຂົ​ງ​ເຂດ​ພາສີ, ສັນຍາ​ລະຫວ່າງ​ລັດຖະບານ ວ່າ​ດ້ວຍການຂົນ​ສົ່ງ​ທາງ​ອາກາດ, ບົດ​ບັນທຶກ​ຊ່ວຍ​ຈຳລະຫວ່າງ​ກະຊວງ​ກະສິກຳ​ສອງ​ປະ​ເທດ​ໃນ​ຂົງ​ເຂດ​ກະສິກຳ ​ແລະ ພັດທະນາ​ຊົນນະບົດ, ບົດ​ບັນທຶກ​ຊ່ວຍຈຳ​ລະຫວ່າງ​ກະຊວງ​ການ​ຄົມມະນາຄົມ​ຂົນ​ສົ່ງ​ສອງ​ປະ​ເທດ ວ່າ​ດ້ວຍ​ການ​ຮ່ວມ​ມື​ໃນ​ຂົງ​ເຂດການ​ຄົມມະນາຄົມ​ຂົນ​ສົ່ງ, ບົດ​ບັນທຶກ​ຊ່ວຍຈຳ​ລະຫວ່າງ​ກຸ່ມ​ບໍລິສັດ​ນ້ຳມັນອາຍ​ແກັສ ຫວຽດນາມ ​ແລະ ກຸ່ມ​ບໍລິສັດ​ນ້ຳມັນ​ອາຍ​ແກ​ັສ ອາ​ແຢັກ​ບາຍ​ຢານ ວ່າ​ດ້ວຍ​ການ​ຮ່ວມ​ມື​ໃນ​ຂົງ​ເຂດ​ນ້ຳມັນອາຍ​ແກັສ.
 
ກ່ຽວ​ກັບ​ບັນຫາຂອງ​ສາກົນ ​ແລະ ພາກ​ພື້ນ, ​ໃນ​ນັ້ນ ມ​ີບັນຫາ​ຢູ່​ທະ​ເລ​ຕາ​ເວັນ​ອອກ, ທ່ານ​ປະທາ​ນາ​ທິບໍດີ ອາ​ແຢັກບາຍ​ຢານ ສະໜັບສະໜູນ​ທັດ​ສະ​ນະ​ຂອງ ຫວຽດນາມ ​ແ​ມ່ນ​ແກ້​ໄຂ​ຂໍ້​ຂັດ​ແຍ້ງ​ດ້ວຍ​ສັນຕິ​ວິທີ, ບໍ່​ນຳ​ໃຊ້​ກຳລັງ​ອາວຸດ,​​ ​ເໝາະ​ສົມ​ກັບ​ກົດ​ໝາຍ​ສາກົນ ​ແລະ ສົນ​ທິສັນຍາ​ຂອງ​ສະຫະ​ປະຊາ​ຊາດ.

ທ່ານ​ປະທາ​ນາ​ທິບໍດີ ສ.ອາ​ແຢັກ​ບາຍ​ຢານ Ilham Aliyev ​
ຕ້ອນຮັບທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ແລະ ພັນ​ລະ​ຍາ. ພາບ: ຫງວຽນ​ຄາງ/VNA


ພິທີຕ້ອນຮັບ​ໄດ້​ຈັດ​ຂຶ້ນ​ຢ່າງ​ສົມ​ກຽດທີ່ທຳນຽບປະທານາທິບໍດີ ຢູ່​ນະຄອນຫຼວງ ບາ​ກູ. ພາບ: ຫງວຽນ​ຄາງ/​VNA

ທ່ານ​ປະທາ​ນາ​ທິບໍດີ Ilham Aliyev ​ພົບ​ປະ​ເຈລະຈາ
ກັບທ່ານ​ປະທານ​ປະ​ເທດ ​ເຈືອງ​ເຕິ​ນຊາງ. ພາບ: ຫງວຽນ​ຄາງ/VNA


ທ່ານ​ປະທາ​ນາ​ທິບໍດີ  Ilham Aliyev ​ແລະ ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ໄດ້​ເປັນ​ສັກ​ຂີ​ພິຍານ
​ໃນ​ພິທີ​ລົງ​ນາມ​ບົດ​ບັດ​ທຶກ​ຊ່ວຍ​ຈຳ​ວ່າ​ດ້ວຍ​ການ​ຮ່ວມ​ມື​ລະຫວ່າງ​ກຸ່ມ​ບໍລິສັດ​ນ້ຳມັນ ອາຍ​ແກັສ ຫວຽດນາມ ​
ແລະ ກຸ່ມ​ບໍລິສັດ​ນ້ຳມັນ ອາຍ​ແກັສ ອາຍ​ແຢັກ​ບາຍ​ຢານ. ພາບ: ຫງວຽນ​ຄາງ-VNA


ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ແລະ ທ່ານ​ປະທາ​ນາ​ທິບໍດີ Ilham Aliyev ​​​ໄດ້​ມາ​ເຂົ້າ​ຮ່ວມ ​
ແລະ ກ່າວ​ປາ​ໄສ ​ໃນ​​ເວທີ​ປ​າ​ໄສ​ວິ​ສາ​ຫະກິດ ຫວຽດນາມ-​ອາ​ແຢັກ​ບາຍ​ຢານ. ພາບ: ຫງວຽນ​ຄາງ-VNA

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ພົບ​ປະ​ກັບ​ທ່ານ​ Ogtay Asadov
ປະທານ​ສະພາ​ແຫ່ງ​ຊາດ ອາ​ແຢັກ​ບາຍ​ຢານ. ພາບ: ຫງວຽນ​ຄາງ-VNA

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ຕ້ອນຮັບ​ທ່ານ​ Actua Rasitzade
ນາຍົກລັດຖະມົນຕີ ອາ​ແຢັກ​ບາຍ​ຢານ. ພາບ: ຫງວຽນ​ຄາງ-VNA


ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ພົບ​ປະ​ກັບ​ບັນດາ​ນັກ​ສຶກສາ ຫວຽດນາມ
ທີ່​ພວມ​ຮຳ່ຮຽນ​ຢູ່ ອາແຢັກ​ບາຍ​ຢານ. ພາບ: ຫງວຽນ​ຄາງ-VNA

ປະຕິບັດ​ໂດຍ: VNA/VNP
ບັນດາບົດທີ່ຖືກນຳສະເໜີ