15/01/2015 09:29 GMT+7 Email Print Like 0

ຫວຽດນາມ ປາດຖະໜາເພີ່ມທະວີການຮ່ວມມື ກັບລາຊະອານາຈັກ ອັງກິດ ໃນທຸກຂົງເຂດ


ທ່ານ​ນາຍົກລັດຖະມົນຕີຫວຽດນາມ ຫງວຽນ​ເຕິ​ນຢຸງ
 
ຕ້ອນຮັບ​ທ່ານ ເອກ​ອັກຄະ​ລັດຖະທູດ​ອັງກິດ Giles Lever
(ພາບ: VGP)

ຕອນ​ບ່າຍ​ວັນ​ທີ 13/01, ຢູ່​ຮ່າ​ໂນ້ຍ, ທ່ານ​ນາຍົກລັດຖະມົນຕີຫວຽດນາມ ຫງວຽນ​ເຕິ​ນຢຸງ ໄດ້​ໃຫ້ການ​ຕ້ອນຮັບ​ທ່ານ ເອກ​ອັກຄະ​ລັດຖະທູດ​ອັງກິດ Giles Lever ຮັບ​ດຳລົງຕຳ​ແໜ່​ງ ປະຈຳ​ຫວຽດນາມ. ທີ່ການ​ຕ້ອນຮັບ, ທ່ານ​ນາຍົກລັດຖະມົນຕີຫວຽດນາມ ຫງວຽນ​ເຕິ​ນຢຸງ ຢືນ​ຢັນ​ວ່າ: ຫວຽດນາມ ຖືເປັນ​ສຳຄັນ ແລະ ປາດ​ຖະໜາ​ພ້ອມ​ກັບ​ອັງກິດ ມານະ​ພະຍາຍາມ​ຜັນ​ຂະຫຍາຍ​ໂຄງການ​ເຄື່ອນ​ໄຫວ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຢ່າງ​ແທດ​ຈິງ ແລະ ມີ​ປະສິດທິ​ຜົນ, ນຳ​ມາ​ເຊິ່ງຜົນ​ປະ​​ໂຫຍ​ດລວມ​ໃຫ້​ທັງ 2 ປະ​ເທດ. ທ່ານ​ນາຍົກລັດຖະມົນຕີ ຫວຽດນາມ ຫງວຽນ​ເຕິ​ນຢຸງ ສະ​ເໜີ​ 2 ຝ່າຍຊຸກຍູ້ການ​ຮ່ວມ​ມື​ໃນ​ບັນດາ​ຂົງ​ເຂດ​ການ​ເມືອງ-ການ​ທູດ, ເສດຖະກິດ, ການ​ຄ້າ, ການ​ລົງທຶນ, ການ​ສຶກສາ-ບຳລຸງ​ສ້າງ, ວິທະຍາສາດ-ເຕັກ​ໂນ​ໂລ​ຊີ, ການ​ປ້ອງ​ກັນຊາ​ດປ້ອງ​ກັນ​ຄວາມ​ສະຫງົບຢ່າງແຮງ​ກ່ວາ​ອີກ; ສະ​ເໜີ ອັງກິດສືບ​ຕໍ່​ໜູນ​ຊ່ວຍ ODA ໃຫ້​ແກ່​ຫວຽດນາມ. ທ່ານ​ນາຍົກລັດຖະມົນຕີຫວຽດນາມ ຫງວຽນ​ເຕິ​ນຢຸງ ປາດຖະໜາ​ວ່າ: ລາຊະ​ອານາຈັກ​ອັງກິດ ຈະ​ສະໜັບສະໜູນ​​ເລື່ອງ​ບັນດາ​ປະ​ເທດ​ສະມາຊິກ​ສະຫະພັນ​ເອີ​ລົບ (EU) ໃຫ້ສັດຕະຍາບັນສັນຍາ​ການ​ຮ່ວມ​ມື ແລະ ຄູ່​ຮ່ວມ​ມື​ຮອບດ້ານ ຫວຽດນາມ-EU (PCA) ​​ແລະ ລົງ​ນາມ​ໃນ​ສັນຍາການ​ຄ້າ​ເສລີ (FTA) ລະຫວ່າງ ຫວຽດນາມ-EU ໂດຍ​ໄວ. ທ່ານ​ນາຍົກລັດຖະມົນຕີຫວຽດນາມ ຫງວຽນ​ເຕິ​ນຢຸງ ຖື​ວ່າ: ເລື່ອງ​ໃຫ້​ສັດຕະຍາບັນ ແລະ ລົງ​ນາມ​ໃນ​ບັນດາ​ສັນຍາ​ນີ້​ຈະ​ສ້າງ​ຂອບ​ເຂດ​ນິຕິ​ກຳ ໃໝ່ ແລະ ເງື່ອນ​ໄຂ​ສະດວກ ເພື່ອ​ຊຸກຍູ້​ການ​ຮ່ວມ​ມື​ລະຫວ່າງຫວຽດນາມ -ອັງກິດ ເວົ້າ​ສະ​ເພາະ ແລະ ຫວຽດນາມ-EU ເວົ້າ​ລວມຢ່າງ​ແຮງ.

ສ່ວນ​ທ່ານ​ເອກ​ອັກຄະ​ລັດຖະທູດ​ອັງກິດ Giles Lever ຢືນຢັນ​ວ່າ: ລາຊະ​ອານາຈັກ​ອັງກິດ ຍາມ​ໃດ​ກໍ່​ຖື​ເປັນ​ສຳຄັນ​ການ​ພົວພັນ​ກໍ່​ຄື​ສະໜັບສະ ໜູນ​ວິວັດ​ການ​ພັດທະນາ ແລະ ວັດທະນາ​ຖາວອນ​ຂອງ​ຫວຽດນາມ. ທ່ານ​ເອກ​ອັກຄະ​ລັດຖະທູດ​ອັງກິດ ໃຫ້​ຮູ້​ວ່າ: ລາຊະ​ອານາຈັກ​ອັງກິດ ໄດ້​​ໃຫ້ ສັດຕະຍາບັນ PCA ຢ່າງ​ເປັນ​ທາງ​ການ ແລະ ເນັ້ນ​ໜັກ​ວ່າ ອັງກິດ​ຈະ​ສະໜັບສະໜູນ​ເລື່ອງ EU ໃຫ້​ສັດຕະຍາບັນ ແລະ ເຊັນ​ສັນຍາ PCA ແລະ FTA ກັບ​ຫວຽດນາມ​​ໂດຍ​ໄວ. ທ່ານ​ເອກ​ອັກຄະ​ລັດຖະທູດ​ອັງກິດ Giles Lever ຊີ້​ແຈ້ງວ່າ: ລາຊະ​ອານາຈັກ​ອັງກິດ ກໍ່​ປາດ​ຖະໜາ​ຢາກຮ່ວມ​ມື​ຢ່າງ​ແໜ້ນ​ແຟ້ນກັບ​ຫວຽດນາມ​ໃນ​ບັນດາ​ບັນຫາ​ທົ່ວ​ໂລກ​ຄື: ການ​ຮັບ​ມື​ກັບ​ການ​ປ່ຽນ​ແປງຂອງ​ດິນຟ້າ​ອາກາດ; ການ​ປ້ອງ​ກັນ, ຕ້ານ​ການ​ຄ້າຂາຍ​ສັດ​ປ່າ, ພືດທຳ​ມະ​ຊາດຢ່າງຜິດ​ກົດໝາຍ ແລະ ການ​ເຄື່ອນ​ໄຫວ​ປົກ​ປັກ​ຮັກສາ​ສັນຕິພາບ​ຂອງ​ສະຫະ​ປະຊາ​ຊາດ. ເນື້ອ​ໃນທັງ​ໝົດ​ນີ້​ 2 ຝ່າຍຈະ​ເຕື້ອງ​ເຖິງ ແລະ ຫັນ​ເປັນ​ລະອຽດ​ໃນ​ການ​​ເຈລະຈາ​ຍຸດ​ທະ​ສາດ​ຂັ້ນ​ລັດຖະມົນຕີ​ຊ່ວຍ​ວ່າການ​ກະຊວງ​ການ​ຕ່າງປະ​ເທດ​ອັງກິດ ແລະ ຫວຽດນາມ ຈະ​ມາ​ເຖິງ.

 (ແຫຼ່ງຄັດຈາກ VOV)