20/11/2015 22:19 GMT+7 Email Print Like 0

ຫວຽດນາມ-ນິວຊີແລນມຸ່ງສູ່ວົງເງິນການຄ້າ 1,7 ຕື້ USD

ໃນບັ້ນການມາຢ້ຽມຢາມ ສສ.ຫວຽດນາມຢ່າງເປັນທາງການ ແຕ່ວັນທີ 14 ຫາ 17 ພະຈິກ 2015, ທ່ານນາຍົກລັດຖະມົນຕີ ນິວຊີແລນ John Phillip Key ແລະ ບັນດາທ່ານຜູ້ນຳ ຫວຽດນາມໄດ້ເປັນເອກະພາບກັນ ຊຸກຍູ້ຢ່າງແຂງແຮງ ການຮ່ວມມືໃນຫຼາຍຂົງເຂດ, ມຸ່ງສູ່ຈຸດໝາຍວົງເງິນການຄ້າ ສອງຝ່າຍ ບັນລຸ 1,7 ຕື້ USD ໃນປີ 2020…
ສອງຝ່າຍໄດ້ອອກຖະແຫຼງການຮ່ວມສືບຕໍ່ຢືນຢັນລະດັບ ຄວາມສຳຄັນຂອງວຽກງານຊຸກຍູ້ການຮ່ວມມືທີ່ຕ່າງຝ່າຍຕ່າງ ມີຜົນປະໂຫຍດ ໃນບັນດາຂົງເຂດບຸລິມະສິດຊຶ່ງລວມມີ: ກະສິກຳ ແລະ ການຄ້າ ກະສິ ກຳ (ໃນນັ້ນມີທັງຄວາມປອດໄພທາງດ້ານອາຫານ); ການສຶກສາ; ການບິນ; ການທ່ອງທ່ຽວ; ເຕັກໂນໂລຊີສະອາດ; ຄຸ້ມຄອງສິ່ງແວດລ້ອມ ແລະ ຄຸ້ມຄອງ ຄວາມສ່ຽງໄພທາງທຳມະຊາດ.

ສອງຝ່າຍໃຫ້ຄຳໝັ້ນໝາຍສະໜັບສະໜູນ ແລະ ສົ່ງເສີມ ວິສາຫະກິດສອງປະເທດເພີ່ມທະວີຊອກຫາໂອກາດຮ່ວມມືໃໝ່ ໃນຂອບເຂດສັນຍາຄູ່ຮ່ວມມື ຂ້າມປາຊີຟິກ(TPP), ສັນຍາການຄ້າເສລີ ອົສຕາລີ-ນິວຊີແລນ-ອາຊຽນ(AANZFTA) ແນໃສ່ຮັກສາ ການຈະເລີນເຕີບໂຕດ້ານການຄ້າ, ມຸ່ງສູ່ຈຸດໝາຍວົງເງິນການຄ້າສອງຝ່າຍ ບັນລຸ 1,7 ຕື້ USD ໃນປີ 2020…

ທ່ານນາຍົກລັດຖະມົນຕີ ຫງວຽນເຕິນຢຸງ ຕ້ອນຮັບທ່ານນາຍົກລັດຖະມົນຕີ John Key. ພາບ: ດຶກຕ໋າມ/VNA


ທ່ານນາຍົກລັດຖະມົນຕີທັງສອງໄດ້ເປັນສັກຂີພິຍານໃນການລົງນາມຂໍ້ຕົກລົງຮ່ວມມືວ່າດ້ວຍການບິນພົນລະເຮືອນ ພາບ: ດຶກຕ໋າມ/VNA
 
ເນື່ອງໃນໂອກາດນີ້, ທ່ານນາຍົກລັດຖະມົນຕີ John Phillip Key ໄດ້ຖະແຫລງການ ມີຫົວຄິດປະດິດສ້າງໃໝ່ຈຳນວນໜຶ່ງ ກ່ຽວກັບ: ໂຄງການ ປູກຜັກປອດສານພິດ ລວມມູນຄ່າ 5,6 ລ້ານ USD ໃນຊ່ວງເວລາ 5 ປີ; ເພີ່ມທະວີການຊ່ວຍໜູນ ດ້ານຄວາມຮູ້ ແລະ ເຕັກໂນໂລຊີ ໃຫ້ແກ່ພະນັກງານ ຫວຽດນາມໂດຍຜ່ານ ການສະໜອງທຶນການສຶກສາ, ຊ່ວຍ ຝຶກອົບຮົມຍົກລະດັບໄລຍະສັ້ນ ແລະ ບຳລຸງພາສາອັງກິດ; ຮ່ວມມືຈັດຕັ້ງປະຕິບັດ ໂຄງການໄລຍະ II  ວ່າດ້ວຍ ຄວາມປອດໄພລະບົບຄູກັນນໍ້າ ໃນຂົງເສດຄຸ້ມຄອງ ຄວາມສ່ຽງໄພທາງທຳມະຊາດ.

ທັງສອງຝ່າຍໄດ້ເນັ້ນໜັກເຖິງລະດັບຄວາມສຳຄັນຂອງການທີ່ຝ່າຍຕ່າງໆຕ້ອງສືບຕໍ່ຮັກສາສັນຕິພາບ ແລະ ສະຖຽນລະພາບ ຢູ່ໃນພາກພື້ນ, ຮັບປະກັນຄວາມສະຫງົບປອດໄພ ແລະ ເສລີ ດ້ານ ການເດີນທະເລຢູ່ທະເລຕາເວັນອອກ, ປະຕິບັດຕາມກົດໝາຍສາກົນ ຊຶ່ງ ລວມມີສົນທິສັນຍາ ຂອງສະຫະປະຊາຊາດວ່າດ້ວຍກົດໝາຍທະເລປີ 1982. ສອງຝ່າຍ ຮຽກຮ້ອງຝ່າຍຕ່າງໆຕ້ອງອົດກັ້ນ ແລະ ບໍ່ໃຫ້ມີການເຄື່ອນໄຫວ ເຮັດໃຫ້ສະພາບການເຄັ່ງຕຶງເພີ່ມຂຶ້ນໃນພາກພື້ນ; ບັນດາ ຝ່າຍຕ້ອງປະຕິບັດຢ່າງຄົບຖ້ວນ ແລະ ມີປະສິດທິຜົນ ຂໍ້ຖະແຫຼງການກ່ຽວກັບການປະພຶດຕໍ່ຂອງຝ່າຍຕ່າງໆຢູ່ທະເລຕະເວັນອອກ (DOC), ສອງຝ່າຍເປັນເອກະສັນກັນຮຽກຮ້ອງໃຫ້ສ້າງສຳເລັດໂດຍໄວປະມວນກົດລະບຽບການປະພຶດຕໍ່ຢູ່ທະເລຕາເວັນອອກ (COC).

ໃນໄລຍະຢູ່ຢ້ຽມຢາມຫວຽດນາມຢ່າງເປັນທາງການ, ທ່ານນາຍົກລັດຖະມົນຕີ ຫງວຽນເຕິນຢຸງ ແລະ ທ່ານນາຍົກລັດຖະມົນຕີ John Phillip Key ໄດ້ເປັນສັກຂີພິຍານລົງນາມໃນເອກະສານສະບັບຕ່າງໆເຊັ່ນ: ຂໍ້ຕົກລົງຮ່ວມມືວ່າດ້ວຍການບິນພົນລະເຮືອນ; ແຜນການຮ່ວມມືຍຸດທະສາດກ່ຽວກັບການສຶກສາ ແລະ ຂໍ້ຕົກລົງຮ່ວມມືໃນຂົງເຂດສາທາລະນະສຸກ.

ທ່ານເລຂາທິການໃຫຍ່ ຫງວຽນຝູ໋ຈ້ອງ ໃນການຕ້ອນຮັບ ທ່ານນາຍົກລັດຖະມົນຕີ John Key. ພາບ: ຈີ້ຢຸງ/VNA


ທ່ານປະທານປະເທດ ເຈືອງເຕິນຊາງ ໃນການຕ້ອນຮັບທ່ານນາຍົກລັດຖະມົນຕີ John Key. ພາບ: ຫງວຽນຄາງ/VNA


ທ່ານປະທານສະພາແຫ່ງຊາດ ຫງວຽນຊິງຮຸ່ງ ໃນການຕ້ອນຮັບ ທ່ານນາຍົກລັດຖະມົນຕີ John Key. ພາບ: ອານດັງ/VNA
 
ປະຕິບັດໂດຍ: VNA/VNP
ບັນດາບົດທີ່ຖືກນຳສະເໜີ