09/12/2017 13:10 GMT+7 Email Print Like 0

ຫວຽດນາມ ຍາມໃດກໍ່ຖືເປັນສຳຄັນການພົວພັນຄູ່ຮ່ວມມືຍຸດທະສາດຮອບດ້ານກັບ ສະຫະພັນລັດເຊຍ

      ໂດຍສືບຕໍ່ລາຍການຢ້ຽມຢາມ ແລະ ເຮັດວຽກ ຢູ່ສະຫະພັນລັດເຊຍ, ວັນທີ 07 ທັນວາ, ທ່ານຫົວໜ້າຄະນະກຳມະການກວດກາສູນກາງ ຫວຽດນາມ ເຈີ່ນກວກເວື້ອງ ໄດ້ມີບັນດາການພົບປະເຈລະຈາກັບ ທ່ານປະທານສະພາສະຫະພັນລັດເຊຍ (ສະພາສູງ) Evgheny Pushmin; ທ່ານປະທານພັກຄອມມູນິດສະຫະພັນລັດເຊຍ Genady Zyuganov.

ທ່ານ ເຈີ່ນກວກເວື້ອງ ພົບປະເຈລະຈາກັບ ທ່ານປະທານພັກຄອມມູນິດສະຫະພັນລັດເຊຍ Genady Zyuganov.
      ໃນການພົບປະເຈລະຈາກັບການນຳສະພາສູງ ສະຫະພັນລັດເຊຍ, ສອງຝ່າຍຖືວ່າ ການພົວພັນສອງປະເທດແມ່ນການພົວພັນມິດຕະພາບອັນເປັນມູນເຊື້ອທີ່ມີມາແຕ່ດົນນານ. ໄລຍະຜ່ານມາ, ການພົວພັນລະຫວ່າງສະພາແຫ່ງຊາດສອງປະເທດໄດ້ມີບັນດາບາດກ້າວພັດທະນາຢ່າງເຂັ້ມແຂງ ໂດຍຜ່ານບັນດາການຢ້ຽມຢາມຂັ້ນສູງຂອງການນຳສອງສະພາແຫ່ງຊາດ. ສະພາແຫ່ງຊາດ ຫວຽດນາມ ແລະ ສະພາສະຫະພັນລັດເຊຍ ໄດ້ລົງນາມໃນເອກະສານຂໍ້ຕົກລົງຮ່ວມມືຫຼາຍສະບັບ ແລະ ສ້າງສາຍພົວພັນຮ່ວມມືຢ່າງແໜ້ນແຟ້ນລະຫວ່າງບັນດາຄະນະກຳມະການສະເພາະກິດ, ປະກອບສ່ວນເຮັດໃຫ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານລະຫວ່າງປະຊາຊົນສອງປະເທດເລິກເຊິ່ງກວ່າອີກ; ກໍ່ຄືໄດ້ແລກປ່ຽນບັນດາມາດຕະການຊຸກຍູ້ການພົວພັນລະຫວ່າງສອງສະພາແຫ່ງຊາດ.
      ທີ່ການພົບປະເຈລະຈາກັບ ທ່ານປະທານພັກຄອມມູນິດສະຫະພັນລັດເຊຍ, ສອງຝ່າຍໄດ້ແລກປ່ຽນຢ່າງເລິກເຊິ່ງກວ້າງຂວາງກ່ຽວກັບສະພາບການຂອງສອງພັກ, ການພົວພັນຂອງສອງປະເທດ ກ່ຽວກັບວຽກງານກໍ່ສ້າງພັກ. ກ່ຽວກັບກຳນົດທິດການຮ່ວມມືໃນໄລຍະຈະມາເຖິງ, ສອງຝ່າຍເຫັນດີເປັນເອກະພາບຖືວ່າຄວນເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ເປັນຕົ້ນແມ່ນຄະນະຜູ້ແທນຂັ້ນສູງ ໃນປີ 2018; ຄວນດຳເນີນການພົບປະແລກປ່ຽນການຮ່ວມມືລະຫວ່າງບັນດາອົງການຈັດຕັ້ງມະຫາຊົນຂອງສອງພັກ, ໃນນັ້ນເອົາໃຈໃສ່ເປັນພິເສດເຖິງຄະນະຊາວໜຸ່ມ.
        ຕອນເຊົ້າວັນດຽວກັນ, ທ່ານຫົວໜ້າຄະນະກຳມະການກວດກາສູນກາງ ເຈີ່ນກວກເວື້ອງ ໄດ້ມາຖະຫວາຍດອກໄມ້ຢູ່ອະນຸສາວະລີລຸງໂຮ່ ຢູ່ນະຄອນຫຼວງ ມອດສະກູ ແລະ ຢ້ຽມຢາມສຸສານເລ-ນິນ.
ແຫຼ່ງຄັດຈາກ VOV