25/10/2018 10:29 GMT+7 Email Print Like 0

ສື່ມວນຊົນສາກົນໄດ້ອອກຂ່າວກ່ຽວກັບທ່ານເລຂາທິການໃຫຍ່ຫງວຽນຟູຈ້ອງຮັບດຳລົງຕຳແໜ່ງປະທານປະເທດ

ເລື່ອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ໃນວັນທີ 23 ຕຸລາ ໄດ້ຮັບການເລືອກຕັ້ງຈາກສະພາແຫ່ງຊາດຊຸດທີ 14 ດຳລົງຕຳແໜ່ງປະທານປະເທດແຫ່ງສສ.ຫວຽດນາມ ມີຫຼາຍສຳນັກຂ່າວສານສາກົນໃຫ້ຂ່າວຢ່າງຫຼວງຫຼາຍກ່ຽວກັບເຫດການນີ້.

ວັນທີ 23 ຕຸລາ, ໜັງສືພິມ ຊີນຮົວ ໄດ້ຄັດສະເໜີຊີວະປະຫວັດຫຍໍ້ຂອງທ່ານເລຂາທິການໃຫຍ່, ປະທານປະເທດຫວຽດນາມ ຫງວຽນຟູຈ້ອງ, ພ້ອມທັງໄດ້ຄັດສະເໜີຄຳແບ່ງປັນຂອງປະທານປະເທດ ພາຍຫຼັງພິທີສາບານຕົວຮັບດຳລົງຕຳແໜ່ງ. ໜັງສືພິມ ຊີນຮົວ ກໍ່ໃຫ້ຮູ້ວ່າ, ທ່ານເລຂາທິການໃຫຍ່, ປະທານປະເທດຈີນ ສີຈີ້ນຜິງ ໄດ້ສົ່ງໂທລະເລກອວຍພອນທ່ານເລຂາທິການໃຫຍ່ຫງວຽນຟູຈ້ອງ ໄດ້ຮັບດຳລົງຕຳແໜ່ງປະທານປະເທດ.

        ວັນທີ 23 ຕຸລາ, ສຳນັກຂ່າວສານ Prensa Latina ກໍ່ສ່ອງແສງຢ່າງເລິກເຊິ່ງກ່ຽວກັບເຫດການທ່ານເລຂາທິການໃຫຍ່ ຫງວຽນຟູຈ້ອງ ໄດ້ຮັບເລືອກຕັ້ງດຳລົງຕຳແໜ່ງປະທານປະເທດ ຜ່ານການປ່ອນບັດລັບຈາກສະພາແຫ່ງຊາດ, ປະຕິບັດຕາມລັດຖະທຳມະນູນຫວຽດນາມ, ຂໍ້ກຳນົດຂອງສະພາແຫ່ງຊາດ ແລະ ມະຕິຂອງກອງປະຊຸມສູນກາງພັກຊຸດທີ 8.

        ສຳນັກຂ່າວສານໃຫຍ່ແຫ່ງຕ່າງໆໃນໂລກຄື: TASS (ລັດເຊຍ), AFP (ຝລັ່ງ), Reuter (ອັງກິດ), AP (ອາເມລິກາ), Kyodo (ຍີ່ປຸ່ນ)… ກໍ່ໄດ້ໃຫ້ຂ່າວຢ່າງເລິກເຊິ່ງກ່ຽວກັບເຫດການທ່ານເລຂາທິການໃຫຍ່ຫງວຽນຟູຈ້ອງ ໄດ້ຮັບເລືອກຕັ້ງໃຫ້ດຳລົງຕຳແໜ່ງປະທານປະເທດຫວຽດນາມ ເຊັ່ນດຽວກັນ.

     ໃນລະຫວ່າງວັນທີ 23 – 24 ຕຸລາ, ໜັງສືພິມຫຼາຍສະບັບຂອງຍີ່ປຸ່ນ ໄດ້ໃຫ້ຂ່າວກ່ຽວກັບທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ໄດ້ຮັບເລືອກຕັ້ງຈາກສະພາແຫ່ງຊາດ ໃຫ້ດຳລົງຕຳແໜ່ງປະທານປະເທດແຫ່ງສສ.ຫວຽດນາມ.

        ໜັງສືພິມເສດຖະກິດຍີ່ປຸ່ນ ໄດ້ຄັດຄຳເວົ້າຂອງທ່ານປະທານປະເທດຫວຽດນາມ ຫງວຽນຟູຈ້ອງ ໃນພິທີສະບານຕົວຮັບດຳລົງຕຳແໜ່ງໂດຍຢືນຢັນວ່າ ຈະເຮັດຫຼ້ອນໜ້າທີ່ຂອງຕົນ, ຍາມໃດກໍ່ສູ້ຊົນເພື່ອປະເທດຊາດ. ໃນຂະນະນັ້ນ, ສຳນັກຂ່າວສານ NHK ໄດ້ລົງແນະນຳຊີວະປະຫວັດຫຍໍ້ຂອງທ່ານເລຂາທິການໃຫຍ່ ຫງວຽນຟຸຈ້ອງ ແລະ ເນັ້ນໜັກວ່າ: ໝາກຜົນການປ່ອນບັດຂອງສະພາແຫ່ງຊາດ ໄດ້ພິສຸດໃຫ້ເຫັນອິດທິພົນຊື່ສຽງຢ່າງສູງຂອງທ່ານເລຂາທິການໃຫຍ່ ຫງວຽນຟູຈ້ອງ ໃນຊຸມປີດຳລົງບັນດາຕຳແໜ່ງຂັ້ນສູງຂອງພັກ ແລະ ລັດ.

(ແຫຼ່ງຄັດຈາກ VOV)