28/12/2018 10:39 GMT+7 Email Print Like 0

ສືບຕໍ່ປ່ຽນແປງໃໝ່ໃນວຽກງານພະນັກງານຂອງພັກ

      ສູນກາງເຫັນດີເປັນເອກະພາບສູງຕໍ່ເລື່ອງການກໍານົດຕໍາແໜ່ງງານຄະນະບໍລິຫານງານສູນກາງພັກ ອາຍຸການ 2021-2026 ດ້ວຍຈິດໃຈແມ່ນ ເຮັດເທື່ອລະຂັ້ນ, ເທື່ອລະວຽກ, ແນ່ນອນ, ໜັກແໜ້ນ, ຮອບຄອບ
            ກອງປະຊຸມຄະນະບໍລິຫານງານສູນກາງພັກກອມມູນິດ ຫວຽດນາມ ຄັ້ງທີ 9 ຊຸດ 12 ໄດ້ປິດລົງໃນວັນທີ 26 ທັນວາ. ພາຍຫຼັງການເຮັດວຽກເປັນເວລາສອງວັນ. ທ່ານເລຂາທິການໃຫຍ່, ປະທານປະເທດ ຫງວຽນຝູຈ້ອງ ກ່າວຄຳເຫັນປິດກອງປະຊຸມໂດຍເນັ້ນໜັກ ວ່າບັນດາເນື້ອໃນຂອງກອງປະຊຸມຄັ້ງນີ້ມີຄວາມໝາຍສຳຄັນໃນການກະກຽມ ແລະ ກໍ່ສ້າງຖັນແຖວບຸກຄະລາກອນຂັ້ນສູງຂອງພັກ ໃນໄລຍະຈະມາເຖິງ.
            ກອງປະຊຸມຄັ້ງທີ 9 ໄດ້ປຶກສາຫາລືກ່ຽວກັບ ໃບສະເໜີ, ບົດລາຍງານ ແລະ ບັນດາເອກະສານທີ່ກ່ຽວຂ້ອງ ແລະ ສະເໜີບຸກຄະລາກອນ ເຂົ້າໃນການກໍານົດຕໍາແໜ່ງງານຄະນະບໍລິຫານງານສູນກາງພັກ ອາຍຸການ 2021-2026, ຈັດຕັ້ງເອົາການປ່ອນບັດໄວ້ວາງໃຈສຳລັບບັນດາກຳມະການກົມການເມືອງ, ຄະນະເລຂາ ສູນກາງພັກ ແລະ ພິຈາລະນາບົດສຳຫຼວດການຊີ້ນຳ -ນຳພາຂອງກົມການເມືອງ, ຄະນະເລຂາ ປີ 2018.
ພະນັກງານ ແລະ ວຽກງານພະນັກງານມີທີ່ຕັ້ງສຳຄັນແຖວໜ້າ
            ກ່ຽວກັບເລື່ອງກໍານົດຕໍາແໜ່ງງານຂອງຄະນະບໍຫານງານສູນກາງພັກ ອາຍຸການ 2021-2026, ທ່ານເລຂາທິການໃຫຍ່, ປະທານປະເທດ ຫວຽນຝູຈ້ອງ ຖືວ່າ ຄະນະບໍລິຫານງານສູນກາງພັກ ໄດ້ຄົ້ນຄວ້າຢ່າງລະອຽດ, ປຶກສາຫາລື ແລະ ເຫັນດີເປັນເອກະພາບສູງ ຕໍ່ໃບສະເໜີ, ບົດລາຍງານ ແລະ ເອກະສານທີ່ກ່ຽວຂ້ອງ ເຊິ່ງກົມການເມືອງໄດ້ຍື່ນສະເໜີຕໍ່ສູນກາງ. ທ່ານເລຂາທິການໃຫຍ່, ປະທານປະເທດ ຊົມເຊີຍກົມການເມືອງ ແລະ ຄະນະຊີ້ນຳໄດ້ກະກຽມຢ່າງເຂັ້ມງວດ, ຖືກຕ້ອງຕາມຂໍ້ກໍານົດຂອງພັກ, ມີການສືບທອດບັນດາບົດຮຽນຂອງ ອາຍຸການກ່ອນ, ພ້ອມທັງເພີ່ມເຕີມບັນດາທັດສະນະ, ຫຼັກການ, ວິທີການເຮັດວຽກໃໝ່, ເໝາະສົມກັບຂັ້ນຕອນຢ່າງແໜ້ນແຟ້ນ, ມີວິທະຍາສາດ.

ທ່ານເລຂາທິການໃຫຍ່, ປະທານປະເທດ ຫວຽນຝູຈ້ອງ ກ່າວຄໍາເຫັນທີ່ກອງປະຊຸມ (ພາບປະກອບ:  TTXVN)
      ທ່ານເລຂາທິການໃຫຍ່, ປະທານປະເທດ ຫວຽນຝູຈ້ອງ ຊີ້ແຈ້ງວ່າ:
            “ສູນກາງພັກໄດ້ເນັ້ນໜັກ ແລະ ຢືນຢັນອີກເທື່ອໜຶ່ງວ່າ ພະນັກງານ ແລະ ວຽກງານພະນັກງານມີທີ່ຕັ້ງສຳຄັນແຖວໜ້າ, ຕ້ອງໄດ້ດຳເນີນການຢ່າງຮອບຄອບ, ເປັນປະຈຳ, ມີປະສິດທິຜົນ ເພື່ອແນໃສ່ສ້າງຖັນແຖວພະນັກງານໃຫ້ມີຄຸນນະທາດ, ມີກຳລັງຄວາມສາມາດ, ມີຊື່ສຽງສົມກັບໜ້າທີ່ທີ່ໄດ້ຮັບມອບໝາຍ. ພະນັກງານ, ໂດຍສະເພາະແມ່ນພະນັກງານຂັ້ນຍຸດທະສາດ ເປັນປັດໄຈຕັດສິນຄວາມສຳເລັດ ຫຼື ການປາລະໄຊຂອງການປະຕິວັດ. ໃນວຽກງານພະນັກງານນັ້ນ ເລື່ອງກໍານົດຕໍາແໜ່ງງານຂອງພະນັກງານ ແມ່ນຂັ້ນຕອນເລີ່ມຕົ້ນ, ມີຄວາມໝາຍສຳຄັນທີ່ສຸດ, ຮັບປະກັນໃຫ້ແກ່ວຽກງານພະນັກງານເຂົ້າສູ່ລະບົບ, ເປັນເຈົ້າການ, ມອງກວ້າງເຫັນໄກ, ຕອບສະໜອງໄດ້ທັງຄວາມຮຽກຮ້ອງຕ້ອງການສະເພາະໜ້າ ແລະ ຍາວນານ
            ທ່ານເລຂາທິການໃຫຍ່, ປະທານປະເທດ ຫວຽນຝູຈ້ອງຢັ້ງຢືນວ່າ: ສູນກາງເຫັນດີເປັນເອກະພາບສູງຕໍ່ເລື່ອງການກໍານົດຕໍາແໜ່ງງານຄະນະບໍລິຫານງານສູນກາງພັກ ອາຍຸການ 2021-2026 ດ້ວຍຈິດໃຈແມ່ນ ເຮັດເທື່ອລະຂັ້ນ, ເທື່ອລະວຽກ, ແນ່ນອນ, ໜັກແໜ້ນ, ຮອບຄອບ; ເມື່ອກໍານົດຕໍາແໜ່ງງານເຂົ້າໃນຄະນະບໍລິຫານງານສູນກາງພັກແລ້ວ ຈຶ່ງກໍານົດຕໍາແໜ່ງງານເຂົ້າໃນ ກົມການເມືອງ, ຄະນະເລຂາ; ຈາກນັ້ນຈຶ່ງຮອດບັນດາຕຳແໜ່ງຫຼັກແຫຼ່ງ. ທີ່ກອງປະຊຸມຄັ້ງນີ້, ສູນກາງພັກໄດ້ຂຽນ ແລະ ປ່ອນບັດປິດລັບ ແນະນຳບຸກຄະລາກອນເຂົ້າໃນການກໍານົດຕໍາແໜ່ງງານຄະນະບໍລິຫານງານສູນກາງພັກ ອາຍຸການ 2021-2026.
ສາມັກຄີ, ເປັນເອກະພາບໃນການຕີລາຄາ ແລະ ກໍ່ສ້າງຖັນແຖວພະນັກງານ
ກ່ຽວກັບເລື່ອງປ່ອນບັດໄວ້ວາງໃຈຂອງສູນກາງ ສໍາລັບບັນດາກໍາມະການກົມການເມືອງ, ຄະນະເລຂາສູນກາງພັກ: ຄະນະບໍລິຫານງານສູນກາງພັກ ຢັ້ງຢືນວ່າ ເລື່ອງປ່ອນບັດໄວ້ວາງໃຈ ແມ່ນການຕີລາຄາ, ແມ່ນການຮັບຮູ້ຂອງຄະນະບໍລິຫານງານສູນກາງພັກ ສໍາລັບບັນດາຄວາມມານະພະຍາຍາມ ແລະ ໝາກຜົນທີ່ບັນລຸໄດ້ນັບແຕ່ຕົ້ນອາຍຸການມາຮອດປັດຈຸບັນ ຂອງກໍາມະການກົມການເມືອງ, ຄະນະເລຂາສູນກາງພັກແຕ່ລະຄົນ; ພ້ອມທັງຊ່ວຍໃຫ້ຜູ້ໄດ້ຮັບການປ່ອນບັດໄວ້ວາງໃຈນັ້ນ ຕ້ອງເບິ່ງຄືນຕົນເອງ, ປ່ຽນແປງດ້ວຍຕົນເອງ, ສືບຕໍ່ຝຶຶກຝົນຫຼໍ່ຫຼອມ, ຍົກສູງລະດັບຄວາມຮູ້, ໜ້າທີ່ຄວາມຮັບຜິດຊອບ ແລະ ປະສິດທິຜົນຂອງວຽກງານ ຢ່າງບໍ່ຢຸດຢັ້ງ. ການປ່ອນບັດໄວ້ວາງໃຈ ແມ່ນຊ່ອງທາງຂໍ້ມູນສໍາຄັນທີ່ສຸດ ເພື່ອຊ່ວຍໃຫ້ກົມການເມືອງຕີລາຄາ, ຊັບຊ້ອນ, ນໍາໃຊ້ພະນັກງານ, ປະກອບສ່ວນກໍ່ສ້າງຖັນແຖວພະນັກງານຂັ້ນສູງຂອງພັກ ແລະ ລັດ ໃຫ້ນັບມື້ນັບປອດໃສ, ໝັ້ນຄົງເຂັ້ມແຂງ, ຕອບສະໜອງໄດ້ຕາມຄວາມຮຽກຮ້ອງຕ້ອງການໃນການສ້າງສາ ແລະ ປົກປັກຮັກສາປະເທດຊາດ. ທ່ານ ເລຂາທິການໃຫຍ່, ປະທານປະທານປະເທດ ຫງວຽນຝູຈ້ອງ ຊີ້ແຈ້ງວ່າ:
        ຜ່ານໝາກຜົນທີ່ໄດ້ປະກາດໃນຄະນະບໍລິຫານງານສູນກາງພັກ ອີກຄັ້ງໜຶ່ງ ໄດ້ສະແດງໃຫ້ເຫັນນໍ້າໃຈຄວາມຮັບຜິດຊອບ, ສະຕິສ້າງສັນ, ກິລິຍາທ່າທີຢ່າງພາວະວິໄສ, ທ່ຽງທໍາໃນການຕີີລາຄາ ແລະ ຄວາມໄວ້ວາງໃຈຂອງສູນກາງ ສໍາລັບບັນດາກໍາມະການກົມການເມືອງ, ຄະນະເລຂາສູນກາງພັກ. ໝາກຜົນນັ້ນ ຍັງໄດ້ສະແດງໃຫ້ເຫັນຄວາມສາມັກຄີ, ເປັນເອກະພາບສູງພາຍໃນສູນກາງພັກ. ກໍາມະການກົມການເມືອງ, ຄະນະເລຂາສູຸນກາງແຕ່ລະຄົນ ຖືນີ້ແມ່ນໂອກາດທີ່ດີ ເພື່ອເບິ່ງຄືນຕົນເອງ, ເສີມຂະຫຍາຍຈຸດດີ, ແກ້ໄຂຂໍ້ຈໍາກັດ, ຈຸດອ່ອນ ເພື່ອປະຕິບັດສໍາເລັດໜ້າທີ່ທີ່ໄດ້ຮັບການມອບໝາຍໃຫ້ເປັນຢ່າງດີ, ພະຍາຍາມສູ້ຊົນ, ຝຶກຝົນຫຼໍ່ຫຼອມ, ໃຫ້ສົມກັບຄວາມໄວ້ເນື້ອເຊື່ອໃຈ ແລະ ຄວາມມຸ່ງຫວັງຂອງຄະນະບໍລິຫານງານສູນກາງພັກ, ຂອງທົ່ວພັກ ແລະ ທົ່ວປວງຊົນ”.
            ທ່ານເລຂາທິການໃຫຍ່, ປະທານປະເທດ ກໍໃຫ້ຮູ້ວ່າ ຄະນະບໍລິຫານງານສູນກາງພັກ ເຫັນດີຕໍ່ບົດສໍາຫຼວດການຊີ້ນໍາ, ນໍາພາຂອງກົມການເມືອງ, ຄະນະເລຂາສູນກາງພັກ ປີ 2018, ພ້ອມທັງຖືວ່າ ເລື່ອງສໍາຫຼວດໄດ້ຮັບການດໍາເນີນຢ່າງເຂັ້ມງວດ, ມີລັກສະນະສ້າງສັນນັບຖື, ຖືກຕ້ອງຕາມຫຼັກການ. ຄະນະບໍລິຫານງານສູນກາງພັກ ຢັ້ງຢືນວ່າ ກົມການເມືອງ, ຄະນະເລຂາສູນກາງພັກ ແມ່ນຄະນະການນໍາທີ່ມີຄວາມສາມັກຄີ, ມີຄວາມໜັກແໜ້ນທາງ ການເມືອງ, ຢຶດໝັ້ນຕໍ່ເປົ້າໝາຍ, ແນວຄິດຂອງພັກ; ຢຶດໝັ້ນຕໍ່ລັດທິມາກ - ເລນິນ, ແນວຄິດໂຮ່ຈີມິນ; ເດັດດ່ຽວໃນການປົກປ້ອງພັກ, ປົກປ້ອງລະບອບ, ປົກປັກຮັກສາເອກະລາດຊົນຊາດ ແລະອໍານາດອະທິປະໄຕແຫ່ງຊາດ. ຄະນະບໍລິຫານງານສູນກາງພັກ ຮຽກຮ້ອງໃຫ້ກົມການເມືອງ, ຄະນະເລຂາສູນກາງພັກ ສືບຕໍ່ຮັບເອົາຄໍາເຫັນປະກອບທີ່ຖືກຕ້ອງຊັດເຈນຂອງສູນກາງ ເພື່ອມີບັນດາມາດຕະການຄົບຊຸດ, ເຂັ້ມແຂງ ແລະ ຂ້ຽວຂາດກວ່າ ໃນການຊີ້ນໍາ, ນໍາພາປະຕິບັດບັນດາໜ້າທີ່ໃນຊຸມປີຕໍ່ໄປ, ພິເສດ ແມ່ນ 9 ໜ້າທີ່ຈຸດສຸມຂອງປີ 2019.
 (ແຫຼ່ງຄັດຈາກ VOV)