03/01/2015 00:01 GMT+7 Email Print Like 0

ສຳນັກຂ່າວສານຫວຽດນາມ ເລືອກເຟັ້ນ 10 ເຫດການທີ່ພົ້ນເດັ່ນຂອງ ຫວຽດນາມ ໃນປີ 2014

ທົບທວນຄືນສະພາບເສດຖະກິດ, ວັດທະນະທຳ, ການເມືອງ ແລະ ສັງຄົມຂອງ ຫວຽດນາມ ໃນປິ 2014, ສຳນັກຂ່າວສານ ຫວຽດນາມ ໄດ້ຄັດເລືອກເອົາ 10 ເຫດການ ທີ່ພົ້ນເດັ່ນ ກວ່າໝູ່ຄື:
1. ເດັດດ່ຽວຄັດຄ້ານການກະທຳຜິດຂອງ ຈີນ ຢູ່ທະເລຕາເວັນອອກ
ວັນທີ 2 ພຶດສະພາ, ຈີນ ໄດ້ຕັ້ງຮ້ານເຈາະນ້ຳມັນ ໄຮຢາງ-981 ຢ່າງຜິດກົດໝາຍ ໃນເຂດເສດຖະກິດພິເສດ ແລະ ເຂດໄຫຼ່ທະວີບຂອງ ຫວຽດນາມ, ລະເມີດກົດໝາຍສາກົນຢ່າງຮ້າຍແຮງ, ໄປຝືນກັບການຕົກລົງ ກັນລະຫວ່າງ ຫວຽດນາມ ແລະ ຈີນ, ນາບຂູ່ຕໍ່ສັນຕິພາບ, ສະຖຽນນະພາບ, ເສລີພາບ, ຄວາມສະຫງົບ, ຄວາມປອດໄພຂອງການເດີນທະເລ ຢູ່ທະເລຕາເວັນອອກ. ດ້ວຍການສະໜັບສະໜູນຢ່າງກວ້າງ ຂວາງຂອງປະຊາຄົມໂລກ, ທົ່ວພັກ, ທົ່ວປວງຊົນ ແລະ ທົ່ວກອງທັບ ໄດ້ມີການຄັດຄ້ານການກະທຳຜິດຂອງ ຈີນ ຢ່າງແຮງ, ເດັດດ່ຽວປົກປ້ອງ ສິດອຳນາດອະທິປະໄຕຢູ່ທະເລ, ເກາະທີ່ສັກກະລະບູຊາຂອງປະເທດຊາດ. 
 

ຈີນ ນຳໃຊ້ກຳປັ່ນຫຼາຍຊະນິດກວ່າ 100 ລຳ, ໃນນັ້ນ ມີກຳປັ່ນທະຫານຂະໜາດໃຫຍ່ ແລະ ເຮືອບິນທະຫານ ຫຼາຍລຳ ຢູ່ອ້ອມຂ້າງຈຸດທີ່ຕັ້ງຮ້ານເຈາະນ້ຳມັນໄຮຢາງ-981. ພາບ: VNA

2. ປະກາດໃຊ້້ກົດໝາຍສຳຄັນຫຼາຍສະບັບ ຜັນຂະຫຍາຍການດຳເນີນລັດຖະທຳມະນູນປີ 2013
ໃນປີ 2014, ສະພາແຫ່ງຊາດໄດ້ຮັບຮອງເອົາກົດໝາຍ 29 ສະບັບ ເພື່ອເຮັດໃຫ້ບັນຍັດເສດຖະກິດດີຂຶ້ນ, ປະຕິຮູບການບໍລິຫານ-ການຍຸຕິທຳ, ຮັບປະກັນສິດທິມະນູດ, ສິດ ແລະ ພາລະໜ້າທີ່ຂອງພົນລະເມືອງ, ຍູ້ແຮງການເຊື່ອມໂຍງ ສາກົນ…ສະພາແຫ່ງຊາດ ໄດ້ຈັດຕັ້ງການລົງຄະແນນ ໄວ້ວາງໃຈ ສຳລັບການນຳທີ່ສະພາແຫ່ງຊາດ, ສະພາຜູ້ແທນ ປະຊາຊົນ ເລືອກຕັ້ງ ຫຼື ໃຫ້ສັດຕະຍາບັນ ທີ່ກອງປະຊຸມ ໄດ້ຈັດຂຶ້ນໃນໄລຍະທ້າຍປີ 2014.
 

ກອງປະຊຸມສະໄໝສາມັນເທື່ອທີ 8 ສະພາແຫ່ງຊາດ ຫວຽດນາມຊຸດທີ XIII ໄດ້ ຈັດຂຶ້ນທີ່ຫໍປະຊຸມໃໝ່ຢູ່ ເມືອງ ບາດິ່ງ, ຮ່າໂນ້ຍ.
ພາບ: ດຶກຕ໋າມ/VNA

3. ຕົວເລກຂະຫຍາຍຕົວດ້ານເສດຖະກິດເກີນເປົ້າໝາຍທີ່ວາງອອກ
ໃນສະພາບການເສດຖະກິດໂລກຍັງປະສົບຄວາມຫຍຸ້ງ ຍາກຫຼາຍປະການ, ປີ 2014 ຕົວເລກ GDP ຂອງ ຫວຽດນາມ ເພີ່ມປະມານ 5,98% ທຽບກັບປີກ່ອນ, ເກີນເປົ້າໝາຍ 5,8% ທີ່ສະພາແຫ່ງຊາດອະນຸມັດຜ່ານ. ຕົວເລກ CPI ເພີ່ມປະມານ 4,09% ທຽບກັບປີກ່ອນ. ລວມມູນຄ່າສົ່ງອອກ ບັນລຸໄດ້ປະມານ 150 ຕື້ USD, ເພີ່ມ 14% ທຽບກັບປີກ່ອນ. ແຕ່ວ່າ ລາຍຈ່າຍ ງົບປະມານເກີນດູນ; ຍັງປະສົບຄວາມຫຍຸ້ງຍາກໃນການແກ້ໄຂໜິ້ສິນ.  

ບໍລິສັດ ອຸດສາຫະກຳໜັກ ໂດຊານ ຫວຽດນາມ ຈຳກັດ ສົ່ງເຄື່ອງບຳບັດເຄມ ໄປສູ່ປະເທດ Saudi Arabia.
ພາບ: ຫງວຽນດັງເລີມ/VNA

4. ປະກາດໃຊ້ມະຕິວ່າດ້ວຍການກໍ່ສ້າງ, ພັດທະນາວັດທະນະທຳ ແລະ ຊາວ ຫວຽດນາມ
ກອງປະຊຸມຄັ້ງທີ 9 ຄະນະບໍລິຫານງານ ສູນກາງພັກ ຊຸດທີ XI ໄດ້ອະນຸມັດຜ່ານມະຕິວ່າດ້ວຍການກໍ່ສ້າງ ແລະ ພັດທະນາວັດທະນະທຳ ແລະ ຊາວ ຫວຽດນາມ ເພື່ອຕອບສະໜອງໃຫ້ແກ່ຄວາມຮຽກຮ້ອງຕ້ອງການພັດທະນາປະເທດຊາດຢ່າງໝັ້ນຄົງ.
ກອງປະຊຸມຄັ້ງທີ 9 ຄະນະບໍລິຫານງານ ສູນກາງພັກ ຊຸດທີ XI. ພາບ: ຈີ໋ຢຸງ/VNA

5. ຫຼາຍນະໂຍບາຍຊີ້ຂາດປ່ຽນແປງໃໝ່ການສຶກສາ ແລະ ບຳລຸງສ້າງ
ປະຕິບັດມະຕິຂອງກອງປະຊຸມຄັ້ງທີ 8 ຄະນະບໍລິຫານງານ ສູນກາງພັກ ຊຸດທີ XI ວ່າດ້ວຍການປ່ຽນແປງໃໝ່ການສຶກສາ ແລະ ບຳລຸງສ້າງ, ຫຼາຍນະໂຍບາຍຊີ້ຂາດ ໄດ້ປະກາດໃຊ້ຄື: ຈັດຕັ້ງການສອບເສັງຂັ້ນມັດທະຍົມສຶກສາແຕ່ປີ 2015, ກຳນົດການຕີລາຄານັກຮຽນປະຖົມສຶກສາ, ປ່ຽນແປງໃໝ່ຫຼັກສູດ, ຫຼັກສູດການສິດສອນສາມັນສຶກສາແຕ່ປີ 2018-2019… 
 
ເລີ່ມແຕ່ປີ 2015, ຜົນການສອບເສັງຂັ້ນມັດທະຍົມສຶກສາ ຈະໄດ້ນຳໃຊ້ເພື່ອຄັດເລືອກເຂົ້າມະຫາວິທະຍາໄລ
ແລະ ວິທະຍາໄລຊັ້ນສູງ. ພາບ: ເລຮຸຍຫາຍ/VNA

6. ຕໍ່ຕ້ານການສໍ້ລາດບັງຫຼວງ ແລະ ຄວາມຫຍໍ້ທໍ້ ເປັນຢ່າງແຮງ
ການຕັດສິນລົງໂທດຜູ້ຕ້ອງຫາ ຫງວຽນດຶກກຽນ ແລະ ຮວິ່ງທິຮວ່ຽນຍື ໃນຄະດີລະເມີດກົດໝາຍໃນຂົງເຂດເສດຖະກິດ; ເດັດດ່ຽວຕັດສິນລົງ ໂທດຜູ້ຕ້ອງຫາ ເຈີ່ນວັນຈວ່ຽນ ໃນຄະດີລະເມີດກົດລະບຽບໃນການປະຕິບັດນະໂຍບາຍດ້ານເຮືອນຢູ່ ແລະ ທີ່ດິນ ໄດ້ຢືນຢັນຄວາມຕັດສິນໃຈ ຢ່າງແຮງຂອງພັກ, ລັດຖະບານໃນພາລະກິດຕໍ່ຕ້ານການສໍ້ລາດບັງຫຼວງ ແລະ ຄວາມຫຍໍ້ທໍ້.

ຜູ້ຕ້ອງຫາ ຫງວຽນດຶກກຽນ ແລະ ຜູ້ຮ່ວມກະທຳຜິດ ຖືກຕັດສິນລົງໂທດ. ພາບ: ຢວານເຕິນ/VNA

7. ສຳເລັດການກູ້ຊີບກຳມະກອນໃນເລື່ອງ ທາງອຸມົງ ເຂື່ອນໄຟຟ້າທະຫຼົ່ມ ຢູ່ ເລີມດົ່ງ
ໃນເວລາ 16 ໂມງ 30 ນາທີຂອງວັນທີ 19 ທັນວາ 2014, ຫຼັງຈາກການກູ້ຊີບມາເປັນເວລາ 81 ຊົ່ວໂມງ, ກຳມະກອນ 12 ຄົນທີ່ ຄາໃນທາງອຸມົງຂອງເຂື່ອນໄຟຟ້າ ດາເຢີງ-ດາເຈີມໍ (ເລີມດົ່ງ) ໄດ້ພົ້ນໄພອັນຕະລາຍ ແລະ ນຳອອກມາຢ່າງປອດໄພ. 
 

ກຳລັງກູ້ໄພ ຊ່ວຍກຳມະກອນໃນເລື່ອງ ທາງອຸມົງເຂື່ອນໄຟຟ້າ ດາເຢີງ-ດາເຈີມໍ ຖືກລຸລົງ ໄດ້ພົ້ນໄພອັນຕະລາຍ.
ພາບ: ເຢືອງຢາງ/VNA

8. ຄວາມກ້າວໜ້າໃນການເຊື່ອມໂຍງເສດຖະກິດ
ປີ 2014, ຫວຽດນາມ ໄດ້ສຳເລັດການເຈລະຈາສັນຍາການຄ້າເສລີ (FTA) ສອງຝ່າຍກັບ ເກົາຫຼີ ແລະ FTA ກັບ ພັນທະພາບພາສີ ລວມມີ ລັດເຊຍ-ເບລາຣຸດ-ກາຊັກສະຖານ. ຫວຽດນາມ ກໍ່ເຂົ້າຮ່ວມການເຈລະຈາ FTA 3 ສະບັບ ໃນພາກພື້ນຄື: ສັນຍາຄູ່ຮ່ວມມືດ້ານ ເສດຖະກິດຢ່າງຮອບດ້ານໃນພາກພື້ນ (RCEP); ສັນຍາການຄ້າເສລີ ຄູ່ຮ່ວມມືຂ້າມປາຊີຟິກ (TPP) ແລະ ສັນຍາການຄ້າ ເສລີກັບສະມາຄົມການຄ້າເສລີ ເອີຣົບ (EFTA). 
ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ເປັນສັກຂີພິຍານ ພິທີລົງນາມໃນຂໍ້ຕົກລົງສິ້ນສຸດການເຈລະຈາສັນຍາການຄ້າເສລີ ລະຫວ່າງ
ຫວຽດນາມ ແລະ ພັນທະພາບພາສີ ລວມມີ ລັດເຊຍ-ເບລາຣຸດ-ກາຊັກສະຖານ. ພາບ: ດຶກຕ໋າມ/VNA
9. ສຳເລັດຫຼາຍກິດຈະການກໍ່ສ້າງທີ່ສຳຄັນ
ຫຼາຍກິດຈະການກໍ່ສ້າງສຳຄັນໄດ້ເປີດນຳໃຊ້ຢ່າງເປັນທາງການ, ມີຄວາມໝາຍສຳຄັນຕໍ່ໍ່ການຂະຫຍາຍເສດຖະກິດ-ສັງຄົມ, ຮັບປະກັນຕໍ່ຄວາມ ໝັ້ນຄົງສະຫງົບທາງປ້ອງກັນປະເທດ. ຕົວຢ່າງຄື: ເສັ້ນທາງດ່ວນເຊື່ອມຕໍ່ນະຄອນ ໂຮ່ຈີມິນ ກັບ ລອງແທ່ງ, ເສັ້ນທາງດ່ວນ ໂນ້ຍບ່າຍ-ລາວກາຍ, ໂຄງການກໍ່ສ້າງຂົວ ເຍີດເຕິນ…

ຂົວເຍີດເຕິນ ໃນຍາມລາຕີ. ພາບ: ຮຸຍຮຸ່ງ/VNA 
10. ມໍລະດົກ 3 ແຫ່ງໄດ້ຮັບການເຊີດຊູ
ອົງການສຶກສາ, ວິທະຍາສາດ ແລະ ວັດທະນະທຳ ສະຫະປະຊາຊາດ (UNESCO) ໄດ້ຮັບຮອງໃຫ້ເຂດທ່ອງທ່ຽວທຳມະຊາດ ຈ່າງອານ (ນິງບິ່ງ) ເປັນມໍລະດົກໂລກ ປະສົມແຫ່ງທຳອິດຂອງ ຫວຽດນາມ. ການຂັບວີຢ້ຳເຫງ້ຕີງ ໄດ້ຮັບຮອງເປັນມໍລະດົກວັດທະນະທຳບໍ່ເປັນຮູບຮ່າງ ຕາງໜ້າຂອງມະນຸດ ແລະ ຊຸດເອກະສານດ້ານບໍລິຫານຂອງສະໄໝ ຫງວຽນ ໄດ້ຮັບຮອງເປັນມໍລະດົກເອກະສານ ແຜນການຄວາມຊົງຈຳ ໂລກ ຂອງຂົງເຂດອາຊີ-ປາຊີຟິກ.

ທິວທັດທີ່ສວຍງາມຂອງມໍລະດົກ ຈ່າງອານ, ນິງບິ່ງ. ພາບ: ນິງແມ້ງຖັ໋ງ/VNA

ໂດຍ: VNA/VNP
 
ບັນດາບົດທີ່ຖືກນຳສະເໜີ