19/07/2016 13:12 GMT+7 Email Print Like 0

ສຳນັກຂ່າວສານຫວຽດນາມປະຕິເສດຂ່າວຜິດເຂວ ຂອງໜັງສືພິມຈີນກ່ຽວກັບບັນຫາທະເລຕາເວັນອອກ

ທ່ານນາຍົກລັດຖະມົນຕີ ຫງວຽນຊວນຟຸກໃນການພົບປະສອງຝ່າຍ ກັບທ່ານນາຍົກລັດຖະມົນຕີຫຼີເຄີສຽງ
ຢູ່ນອກກອງປະຊຸມສຸດຍອດອາຊີ-ເອີຣົບຄັ້ງທີ 11((ASEM 11). ພາບ: ຖົ໋ງເຍິດ/VNA
ວັນທີ 18 ກໍລະກົດ, ສຳນັກຂ່າວສານຫວຽດນາມ(TTXVN) ໄດ້ຮັບ ສິດຖະແຫຼງການປະຕິເສດເນື້ອໃນຜິດເຂວບໍ່ຖືກກັບຄວາມຈິງ ຂອງໜັງສືພິມຈີນທີ່ກ່ຽວພັນເຖິງບັນຫາທະເລຕາເວັນອອກໃນການພົບປະເຈລະຈາລະຫວ່າງທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ແລະ ທ່ານນາຍົກລັດມົນຕີຈີນ ຫຼີເຄີສຽງ ເມື່ອວັນທີ 14 ກໍລະກົດ 2016 ຜ່ານມາ ຢູ່ນອກກອງປະຊຸມ ສຸດຍອດອາຊີ-ເອີຣົບ (ASEM) ຊຶ່ງໄດ້ຮັບການຈັດຂຶ້ນ ຢູ່ນະຄອນຫຼວງ Ulan Bator ຂອງປະເທດມົງໂກນ.

ພາຍຫຼັງການພົບປະດັ່ງກ່າວ, ມີຫຼາຍອົງການສໍານັກງານ ຂ່າວສານທາງການຂອງຈີນ, ໃນນັ້ນມີສຳນັກຂ່າວສານຊີນຮວາ, ໜ້າເວັບ chinadaily.com.cn (ໜັງສືພິມການຕ່າງປະເທດພາກພາສາອັງກິດແປຈາກໜັງສືພິມລາຍວັນຂອງຈີນ) ແລະ ໜັງສືພິມປະຊາຊົນລາຍວັນພາກປພາສາຈີນໄດ້ຍົກຄຳເວົ້າ ຂອງທ່ານນາຍົກລັດຖະມົນຕີ ຫງວຽນຊວນຟຸກ ຢູ່ທີ່ການພົບປະ ອອກມາວ່າ: “ຫວຽດນາມເຄົາລົບຫຼັກໝັ້ນຂອງຈີນ ກ່ຽວກັບເລື່ອງ ຮ້ອງຟ້ອງສານກຳມະການທີ່ກ່ຽວຂ້ອງເຖິງບັນຫາທະເລຕາເວັນອອກ”, ພ້ອມກັນນັ້ນໃຫ້ຮູ້ວ່າ: “ຫວຽດນາມ ພ້ອມແລ້ວທີ່ຈະຊຸກຍູ້ການພົບປະເຈລະຈາສອງຝ່າຍກ່ຽວກັບ ບັນຫາທະເລ ແລະ ຄຸ້ມຄອງຢ່າງຖືກຕ້ອງບັນດາຄວາມແຕກຕ່າງ ກັບຈີນແນໃສ່ປະກອບສ່ວນໃຫ້ແກ່ສັນຕິພາບ ແລະ ຄວາມໝັ້ນຄົງ ຢູ່ພາກພື້ນ”.

ໃນຄວາມເປັນຈິງແລ້ວ, ໃນການພົບປະກັບທ່ານ ນາຍົກລັດຖະມົນຕີຈີນ, ເມື່ອເຕື້ອງເຖິງບັນຫາທະເລຕາເວັນອອກ, ທ່ານນາຍົກລັດຖະມົນຕີຫງວຽນຊວນຟຸກໄດ້ສະເໜີສອງຝ່າຍພ້ອມກັນປະຕິບັດຢ່າງເຂັ້ມງວດບັນດາຂໍ້ຕົກລົງ ແລະ ຄວາມຮັບຮູ້ລວມ ຂອງການນຳຂັ້ນສູງ, ໃນນັ້ນມີ “ຂໍ້ຕົກລົງກ່ຽວກັບຫຼັກການພື້ນຖານ ຊີ້ນຳແກ້ໄຂບັນຫາທະເລຕາເວັນອອກລະຫວ່າງຫວຽດນາມ-ຈີນ” ໂດຍທ່ານເລຂາທິການໃຫຍ່ຫງວຽນຝູ໋ຈ້ອງ ແລະ ທ່ານເລຂາທິການໃຫຍ່ ຮູຈີນທາວ ໄດ້ເອກະພາບກັນ ໃນເມື່ອ ເດືອນຕຸລາ 2011 ແນໃສ່ຊຸກຍູ້ບັນດາກົນໄກພົບປະເຈລະຈາກ່ຽວກັບທະເລດຳເນີນໄປຢ່າງມີເນື້ອແທ້ໂດຍໄວ, ພ້ອມກັນນັ້ນຄວບຄຸມ ສະຖານະການຄວາມບໍ່ລົງລອຍກັນບົນທະເລໃຫ້ດີ, ບໍ່ເຮັດໃຫ້ ສະຖານະການສັບສົມ, ປະຕິບັດຢ່າງມີປະສິດທິຜົນ, ຮອບດ້ານ ຖະແຫຼງການກ່ຽວກັບການປະພຶດຕໍ່ຂອງຝ່າຍຕ່າງໆຢູ່ທະເລຕາເວັນອອກ(DOC) ແລະ ບັນລຸໂດຍໄວປະມວນກົດລະບຽບ ການປະພຶດຕໍ່ຢູ່ທະເລຕາເວັນອອກ(COC), ປະກອບສ່ວນຮັກສາ ສັນຕິພາບແລະຄວາມໝັ້ນຄົງຢູ່ພາກພື້ນ.

ທ່ານນາຍົກລັດຖະມົນຕີຫງວຽນຊວນຟຸກກໍຢືນຢັນຄືນຫຼັກໝັ້ນຂອງຫວຽດນາມຕໍ່ຄຳຕັດສິນເມື່ອວັນທີ 12 ກໍລະກົດ 2016 ຂອງສານ ກຳມະການປະຈຳ (PCA) ຢູ່ລາໄຮ, ປະເທດໂຮນລັງກ່ຽວກັບເລື່ອງ ຟີລິບປິນຮ້ອງຟ້ອງຈີນກ່ຽວຂ້ອງເຖິງການຂັດແຍ້ງຢູ່ທະເລ ຕາເວັນອອກ.

ກ່ອນໜ້ານີ້, ວັນທີ 12 ກໍລະກົດ 2016, ໂຄສົກກະຊວງການ ຕ່າງປະເທດຫວຽດນາມ ທ່ານເລຫາຍບິ່ງ ໄດ້ຍົກໃຫ້ເຫັນ ຢ່າງຈະແຈ້ງວ່າ: “ຫວຽດນາມຊົມເຊີຍເລື່ອງສານກຳມະການ ໄດ້ອອກຄຳຕັດສິນສຸດທ້າຍເມື່ອວັນທີ 12 ກໍລະກົດຜ່ານມາ. ຫວຽດນາມອີກຄັ້ງໜຶ່ງຢືນຢັນຫຼັກໝັ້ນສະເໝີຕົ້ນສະເໝີປາຍ ຂອງຕົນກ່ຽວກັບເລື່ອງຮ້ອງຟ້ອງດັ່ງກ່າວຄືໄດ້ສະແດງໃຫ້ເຫັນຢ່າງຄົບຖ້ວນໃນຄຳຖະແຫຼງການເມື່ອວັນທີ 05 ທັນວາ 2014 ຂອງ ກະຊວງການຕ່າງປະເທດຫວຽດນາມ ທີ່ຍື່ນຕໍ່ສານກຳມະການ. ບົນຈິດໃຈດັ່ງກ່າວນັ້ນ, ຫວຽດນາມສະໜັບສະໜູນຢ່າງແຂງແຮງ ເລື່ອງແກ້ໄຂການທະເລາະພິພາດໂດຍສັນຕິວິທີ ຊຶ່ງ ລວມມີວິວັດການການຕ່າງປະເທດ ແລະ ນິຕິກຳ, ບໍ່ນຳໃຊ້ກຳລັງອາວຸດ ຫຼື ນາບຂູ່ການນຳໃຊ້ກຳລັງອາວຸດ ຕາມຂໍ້ກຳນົດ ຂອງກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດ ວ່າດ້ວຍກົດໝາຍທະເລປີ 1982, ຮັກສາສັນຕິພາບ ແລະ ຄວາມໝັ້ນຄົງໃນພາກພື້ນກໍຄືຄວາມສະຫງົບປອດໄພ, ຄວາມເສລີ ໃນການເດີນທະເລແລະການເດີນອາກາດຢູ່ທະເລຕາເວັນອອກ, ເຄົາລົບຫລັກການກົດໝາຍສູງສຸດໃນບັນດາເຂດທະເລ ແລະ ມະຫາສະໝຸດ.
 
ເນື່ອງໃນໂອກາດນີ້, ຫວຽດນາມສືບຕໍ່ຢືນຢັນອຳນາດອະທິປະໄຕ ຂອງຕົນທີ່ມີຕໍ່ໝູ່ເກາະຮວ່າງຊາ ແລະ ເຈື່ອງຊາ, ອໍານາດອະທິປະໄຕຕໍ່ເຂດນ່ານນ້ຳພາຍໃນ ແລະ ເຂດທະເລ, ສິດອຳນາດອະທິປະໄຕ ສຕັດສິນດ້ວຍຕົວເອງທີ່ມີຕໍ່ ເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງຫວຽດນາມ ທີ່ໄດ້ກຳນົດສອດຄ່ອງກັບສົນທິສັນຍາຂອງສະຫະປະຊາຊາດ ວ່າດ້ວຍກົດໝາຍທະເລປີ 1982, ກໍຄືໝົດທຸກສິດ ແລະ ຜົນປະໂຫຍດດ້ານນິຕິກຳຂອງຫວຽດນາມທີ່ກ່ຽວພັນເຖິງ ບັນດາໂຄງປະກອບດ້ານພູມສາດທີ່ຂຶ້ນກັບໝູ່ເກາະຮວ່າງຊາ ແລະ ເຈື່ອງຊາ”.
ປະຕິບັດໂດຍ: VNA/VNP