04/07/2018 11:11 GMT+7 Email Print Like 0

ສະຫາຍເລຂາທິການໃຫຍ່, ປະທານປະເທດ ລາວ ບຸນຍັງ ວໍລະຈິດ ຢ້ຽມຢາມ ຫວຽດນາມ

ໂດຍໄດ້ຕອບສະໜອງຕາມຄຳເຊື້ອເຊີນຂອງສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ກອມມູນິດ ຫວຽດນາມ ຫງວຽນຝູ໋ຈ້ອງ ພ້ອມດ້ວຍພັນລະຍາ, ສະຫາຍປະທານປະເທດ ເຈີ່ນດ້າຍກວາງ ພ້ອມດ້ວຍພັນລະຍາ, ສະຫາຍເລຂາທິການໃຫຍ່ ຄະນະບໍລິຫານງານ ສູນກາງພັກ ປະຊາຊົນປະຕິວັດ ລາວ, ປະທານປະເທດແຫ່ງ ສປປ. ລາວ ບຸນຍັງ ວໍລະຈິດ ພ້ອມດ້ວຍ ພັນລະຍາ ແລະ ຄະນະຜູ້ແທນຂັ້ນສູງພັກ, ລັດ ແຫ່ງ ສປປ. ລາວ ໄດ້ມາຢ້ຽມຢາມ ຫວຽດນາມ ໃນລະຫວ່າງວັນທີ 3 – 7 ກໍລະກົດ 2018.

ໃນການຢ້ຽມຢາມຄັ້ງນີ້, ສະຫາຍເລຂາທິການໃຫຍ່ຄະນະ ບໍລິຫານງານ ສູນກາງພັກ ປະຊາຊົນປະຕິວັດ ລາວ, ປະທານ ປະເທດ ແຫ່ງ ສປປ. ລາວ ບຸນຍັງ ວໍລະຈິດ ມີການພົບປະ ເຈລະຈາກັບສະຫາຍເລຂາທິການໃຫຍ່ ຄະນະບໍລິຫານງານ ສູນກາງພັກ ກອມມູນິດ ຫວຽດນາມ ຫງວຽນຝູ໋ຈ້ອງ ແລະ ມີບັນດາການພົບປະແລກປ່ຽນຄຳຄິດຄຳເຫັນກັບສະຫາຍ ປະທານປະເທດ ເຈີ່ນດ້າຍກວາງ, ສະຫາຍນາຍົກລັດຖະມົນຕີ ຫງວຽນຊວນຟຸກ ແລະ ສະຫາຍນາງ ຫງວຽນທິກິມເງິນ, ປະທານສະພາແຫ່ງຊາດ ຫວຽດນາມ.

ສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ກອມມູນິດ ຫວຽດນາມ ຫງວຽນຝູ໋ຈ້ອງ ຕ້ອນຮັບສະຫາຍ ເລຂາທິການໃຫຍ່ຄະນະບໍລິຫານງານ ສູນກາງພັກ ປະຊາຊົນ ປະຕິວັດ ລາວ, ປະທານປະເທດ ແຫ່ງ ສປປ. ລາວ ບຸນຍັງ ວໍລະຈິດ. (ພາບ: ຈີ໋ຢຸງ/VNA)

ສະຫາຍປະທານປະເທດ ເຈີ່ນດ້າຍກວາງ ພົບປະແລກປ່ຽນ ຄຳຄິດເຫັນກັບສະຫາຍ ເລຂາທິການໃຫຍ່ຄະນະບໍລິຫານງານ ສູນກາງພັກ ປະຊາຊົນ ປະຕິວັດ ລາວ, ປະທານປະເທດ ແຫ່ງ ສປປ. ລາວ ບຸນຍັງ ວໍລະຈິດ. (ພາບ: ເລີມແຄງ/VNA)
ທີ່ການພົບປະຄັ້ງຕ່າງໆ, ສອງຝ່າຍໄດ້ແຈ້ງໃຫ້ກັນສາບກ່ຽວກັບ ສະພາບການຕ່າງໆ ຂອງແຕ່ລະພັກ, ແຕ່ລະປະເທດ. ສືບຕໍ່ ຢັ້ງຢືນ ແລະ ເນັ້ນໜັກເຖິງຄວາມໝາຍ, ຄວາມສຳຄັນ ຍຸດທະສາດ ຂອງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງຫວຽດນາມ - ລາວ. 

ສອງຝ່າຍເປັນເອກກະພາບວ່າ ສາຍພົວພັນມິດຕະພາບ ທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງປະເທດ ຫວຽດນາມ - ລາວ ໂດຍປະທານ ໂຮ່ຈີມິນ ແລະ ປະທານ ໄກສອນ ພົມວິຫານ, ປະທານ ສຸຸພານຸວົງ ພ້ອມກັບບັນດາຮຸ່ນການນຳຂອງສອງພັກ, ສອງລັດ ແລະ ປະຊາຊົນສອງປະເທດ ມີການເພີ່ມພູນຄູນສ້າງ, ພວມໄດ້ຮັບການປັບປຸງ ແລະ ນັບມື້ນັບພັດທະນາຂຶ້ນ, ກາຍເປັນສັບສົມບັດທີ່ລຳ້ຄ່າ, ເປັນປັດໄຈມີຄວາມໝາຍສຸດທີ່ສຳຄັນຕໍ່ອະນາຄົດ ຂອງສອງ ປະເທດ, ເພື່ອການ ພັດທະນາຖາວອນ ແລະ ຄວາມຜາສຸກ ຂອງປະຊາຊົນ ສອງປະເທດ, ເປັນປັດໄຈທີ່ສຳຄັນເພື່ອ ປະກອບສ່ວນຍົກສູງ ຖານະບົດບາດຂອງສອງພັກ, ສອງລັດ ບົນເວທີສາກົນ, ປະກອບສ່ວນໃຫ້ແກ່ສັນຕິພາບ, ສະຖຽນລະພາບ, ຮ່ວມມື ແລະ ພັດທະນາ ຢູ່ພາກພື້ນ ແລະ ໂລກ.
 
ສອງຝ່າຍສະແດງຄວາມຍິນດີຕໍ່ບັນດາຜົນງານທີ່ບັນລຸໄດ້ຢູ່ແຕ່ລະປະເທດໃນໄລຍະຜ່ານມາ, ເປັນຕົ້ນແມ່ນພາຍຫຼັງ 2 ປີ ປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກກອມມູນິດ ຫວຽດນາມ ແລະ ມະຕິກອງປະຊຸມໃຫຍ່ຄັ້ງທີ X ຂອງພັກ ປະຊາຊົນປະຕິວັດ ລາວ; ສອງຝ່າຍເປັນເອກະສັນວ່າ ການຕໍ່ສູ້ ປົດປ່ອຍປະເທດຊາດຢ່າງມີໄຊ, ລວມປະເທດຊາດເປັນໜຶ່ງ ດຽວໃນເມື່ອກ່ອນ ແລະ ຜົນສຳເລັດໃນພາລະກິດປ່ຽນແປງໃໝ່, ສ້າງສາ ແລະ ປົກປ້ອງປະເທດຊາດໃນປັດຈຸບັນຢູ່ແຕ່ລະ ປະເທດ ມີການຊ່ວຍເຫຼືອຢ່າງຍິ່ງໃຫຍ່, ສຸດອົກສຸດໃຈ ແລະ ມີປະສິດທິຜົນ ເຊິ່ງສອງພັກ, ສອງລັດ ແລະ ປະຊາຊົນສອງປະເທດ ໄດ້ມອບໃຫ້ກັນ; ສອງຝ່າຍສະແດງຄວາມເຊື່ອໝັ້ນວ່າພາຍໃຕ້ການນຳພາຂອງພັກກອມມູນິດ ຫວຽດນາມ ແລະ ພັກປະຊາຊົນປະຕິວັດ ລາວ, ສອງປະເທດ ຈະສືບຕໍ່ບັນລຸໄດ້ຫຼາຍຜົນງານອັນຍິ່ງໃຫຍ່ ເທິງເສັ້ນທາງກ້າວສູ່ຄວາມ ວັດທະນາຖາວອນ ຕາມເປົ້າໝາຍລັດທິສັງຄົມນິຍົມ, ມີ ຖານະບົດບາດນັບມື້ນັບສູງຂຶ້ນບົນເວທີສາກົນ.
 
ສອງຝ່າຍສະແດງຄວາມເພິ່ງພໍໃຈ ຕໍ່ການພັດທະນາໃໝ່ໃນສາຍພົວພັນລະຫວ່າງສອງພັກ, ສອງລັດ ເທິງທຸກດ້ານໃນ ໄລຍະຜ່ານມາ, ພິເສດແມ່ນຜົນສຳເລັດຂອງປີສາມັກຄີ ຫວຽດນາມ-ລາວ, ລາວ-ຫວຽດນາມ 2017, ສ້າງເງື່ອນໄຂອຳນວຍຄວາມສະດວກໃຫ້ສອງພັກ, ສອງລັດ ສືບຕໍ່ຮັດແໜ້ນແລະ ເພີ່ມທະວີສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ຫວຽດນາມ-ລາວ ກ້າວສູ່ລະດັບສູງໃໝ່.
 
ສອງຝ່າຍໄດ້ເຫັນດີເປັນເອກະພາບບັນດານະໂຍບາຍ, ວິທີແກ້ໄຂເພື່ອ ແນໃສ່ສືບຕໍ່ພາເຮັດໃຫ້ສາຍພົວພັນ ລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ນັບມື້ນັບພັດທະນາ ເຂົ້າສູ່ລວງເລິກ, ຕົວຈິງ ແລະ ມີປະສິດ ທິຜົນເທິງທຸກ ຂົງເຂດ, ປະກອບສ່ວນເຂົ້າໃນ ພາລະກິດການ ປ່ຽນແປງໃໝ່ຂອງແຕ່ລະປະເທດຢ່າງມີໄຊ, ຍຸດທະສາດ ພັດທະນາຂອງແຕ່ລະປະເທດ ບົນຮາກຖານເສີມຂະຫຍາຍ ຈິດໃຈເປັນເຈົ້າຕົນເອງ, ການຮ່ວມມືແບບສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ, ໃຫ້ຄວາມບຸລິມະສິດໃຫ້ກັນ, ມີການຊ່ວຍເຫຼືອ ແລະ ສ້າງເງື່ອນໄຂອຳນວຍຄວາມສະດວກ ເຊິ່ງກັນ ແລະ ກັນ ເພື່ອຄວາມວັດທະນາຖາວອນຂອງ ແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໂລກ.
 
ສອງຝ່າຍເປັນເອກະພາບ ໃນການສືບຕໍ່ສົມທົບກັນຢ່າງແໜ້ນແຟ້ນ, ປະຕິບັດ ບັນດາຂໍ້ຕົກລົງລະຫວ່າງການນຳຂັ້ນສູງສອງ ພັກ, ສອງລັດຢ່າງມີປະສິດທິຜົນ; ເຮັດໃຫ້ການພົວພັນທາງການເມືອງເຂົ້າສູ່ລວງເລິກ, ຮັບປະກັນການກຳນົດທິດ ໃຫ້ການພົວພັນຮ່ວມມືລະຫວ່າງສອງປະເທດ, ເພີ່ມທະວີ ການຮ່ວມມືດ້ານການທູດ, ການປ້ອງກັນຊາດ - ປ້ອງກັນ ຄວາມສະຫງົບ, ສືບຕໍ່ຮັກສາບັນດາການພົບປະລະຫວ່າງ ການນຳຂັ້ນສູງສອງພັກ, ສອງ ລັດ; ເປີດກວ້າງການຮ່ວມມື,ຊ່ວຍເຫຼືອເຊິ່ງກັນ ແລະ ກັນ ລະຫວ່າງ ບັນດາ ຄະນະຂອງພັກ, ກະຊວງ, ຂະແໜງການ, ບັນດາຄະນະກຳມະການຂອງສະພາແຫ່ງຊາດ, ແນວໂຮມ ປະເທດຊາດ, ອົງການປະຊາຊົນ ແລະ ບັນດາທ້ອງຖິ່ນຂອງ ສອງປະເທດ; ຍູ້ແຮງການໂຄສະນາເຜີຍແຜ່ຢ່າງ ກວ້າງຂວາງເຖິງປະຊາຊົນ ທຸກຊົນຊັ້ນ, ເປັນຕົ້ນແມ່ນຮຸ່ນໜຸ່ມຂອງປະເທດກ່ຽວກັບມູນເຊື້ອຂອງສາຍພົວພັນສາມັກຄີແບບພິເສດລະຫວ່າງຫວຽດນາມ-ລາວ, ລາວ-ຫວຽດນາມ.
 
ເນື່ອງໃນໂອກາດນີ້, ສະຫາຍເລຂາທິການໃຫຍ່ຄະນະບໍລິຫານງານ ສູນກາງພັກ ປະຊາຊົນປະຕິວັດ ລາວ, ປະທານປະເທດ ແຫ່ງ ສປປ. ລາວ ບຸນຍັງ ວໍລະຈິດ ສະແດງຄວາມແບ່ງປັນ ຢ່າງເລິກເຊິ່ງກັບປະຊາຊົນ ຫວຽດນາມ ຢູ່ບັນດາແຂວງ ທີ່ໄດ້ຮັບຜົນເສຍຫາຍຢ່າງໜັກໜ່ວງ ຈາກໄພທຳມະຊາດ ທີ່ເກີດຂຶ້ນໃນໄລຍະຜ່ານມາ.
 
ສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ກອມມູນິດ ຫວຽດນາມ ຫງວຽນຝູ໋ຈ້ອງ ພ້ອມດ້ວຍພັນລະຍາ ເປັນເຈົ້າພາບໃນງານລ້ຽງຮັບຕ້ອນ ສະຫາຍເລຂາທິການໃຫຍ່ ຄະນະບໍລິຫານງານ ສູນກາງພັກ ປະຊາຊົນປະຕິວັດ ລາວ, ປະທານປະເທດ ແຫ່ງ ສປປ. ລາວ ບຸນຍັງ ວໍລະຈິດ ແລະ ພັນລະຍາ ພ້ອມກັບຄະນະຜູ້ແທນຂັ້ນສູງ ລາວ ທີ່ມາຢ້ຽມຢາມ ຫວຽດນາມ.
 
ພາຍຫຼັງການເຮັດວຽກຢູ່ ຮ່າໂນ້ຍ, ສະຫາຍເລຂາທິການໃຫຍ່ ຄະນະບໍລິຫານງານ ສູນກາງພັກ ປະຊາຊົນປະຕິວັດ ລາວ, ປະທານປະເທດ ແຫ່ງ ສປປ. ລາວ ບຸນຍັງ ວໍລະຈິດ ແລະ ພັນລະຍາ ພ້ອມດ້ວຍຄະນະຜູ້ແທນຂັ້ນສູງພັກ, ລັດ ແຫ່ງ ສປປ. ລາວ ສືບຕໍ່ໄປຢ້ຽມຢາມບາງຮາກຖານເສດຖະກິດ, ວັດທະນະທຳ ຢູ່ແຂວງ ແທງຮວ໋າ, ນິງບິ່ງ, ຝູ໋ຖໍ້ ແລະ ກອງບັນຊາການທະຫານ ເຂດ 2.
ປະຕິບັດ: VNA/VNP