15/03/2016 09:24 GMT+7 Email Print Like 0

ປະທານປະເທດ ເຈືອງເຕີນຊາງ ເລີ່ມຕົ້ນການຢ້ຽມຢາມທາງລັດຖະກິດເຖິງອີຣານ


ທ່ານປະທານປະເທດເຈືອງເຕີນຊາງ
ເລີ່ມຕົ້ນການຢ້ຽມຢາມທາງລັດຖະກິດເຖິງອີຣານ
(ພາບ: TTXVN)
      ໂດຍ​ຮັບ​ຄຳ​ເຊີນ​ຂອງ​ທ່ານ​ປະ​ທາ​ນາ​ທິ​ບໍ​ດີ​ອີ​ຣານ Hassan Rouhani, ໃນ​ເວ​ລາ 22 ໂມງ ວັນ​ທີ 13/03, ທ່ານ​ປະ​ທານ​ປະ​ເທດຫວຽດ​ນາມ ເຈືອງ​ເຕີນ​ຊາງ ແລະ ພັນ​ລະ​ຍາ ພ້ອມ​ກັບ​ຄະ​ນະ​ຜູ້​ແທນ​ຂັ້ນ​ສູງ​ຫວຽດ​ນາມ ​ເດີນ​ທາງ​ໄປ​ຮອດ​ສະ​ໜາມ​ບິນ Mehrabd, ເລີ່ມ​ຕົ້​ນ​ການ​ຢ້ຽມ​ຢາມ​ທາງ​ລັດ​ຖະ​ກິດ​ເຖິງ​ສ.ອິດ​ສະ​ລາມ​ອີ​ຣານ ໃນ​ລະ​ຫວ່າງວັນ​ທີ 13 – 16/03. ຕ້ອນຮັບ​ຄະ​ນະ​ຢູ່​ສະ​ໜາມ​ບິນ, ມີ​ທ່ານ​ລັດ​ຖະ​ມົນ​ຕ​ີ​ລັດ​ຖະ​ບານ​ອີ​ຣານ, ຫົວ​ໜ້າ​ກົມ​ພິ​ທີ​ການ, ທຳ​ນຽບ​ປະ​ທາ​ນາ​ທິ​ບໍ​ດ​ີ​ອີ​ຣານ, ທ່ານ​ເອກ​ອັກ​ຄະ​ລັດ​ຖະ​ທູດ​ຫວຽດ​ນາມ​ ປະ​ຈຳ​ອີ​ຣານ ຫງວຽນ​ຮົ່ງ​ແທກ, ພ້ອມ​ກັບ​ພະ​ນັກ​ງານ, ພາ​ລະ​ກອນ​ສະ​ຖານ​ທູ​ດ ແລະ ປະ​ຊາ​ຄົ​ມ​ຊາວ​ຫວຽດ​ນາມ ​ທີ່ພວມ​ດຳ​ລົງ​ຊີ​ວິດ ແລະ ເຮັດ​ວຽກ​ຢູ່​ອີ​ຣານ.
      ໃນ​ຂອບ​ເຂດ​ການ​ຢ້ຽມ​ຢາມ​ອີ​ຣານຄັ້ງ​ນີ້, ​ທ່ານ​ປະ​ທານ​ປະ​ເທດ ເຈືອງ​ເຕີນ​ຊາງ ແລະ ທ່ານ​ປະ​ທາ​ນາ​ທິ​ບໍ​ດີ​ອີ​ຣານ Hassan Rouhani ຈະ​ແລກ​ປ່ຽນ​ບັນ​ດາ​ມາດ​ຕະ​ການ​ເພື່ອ​ຊຸກ​ຍູ້​ການ​ພົວ​ພັນ​ດ້ານ​ການ​ຄ້າ 2 ຝ່າຍ, ໂດຍ​ສະ​ເພາະ​ແມ່ນ​ໃນ​ບັນ​ດາ​ຂົງ​ເຂດ​ເສດ​ຖະ​ກິດ​ສຳ​ຄັນ​ຄື ການ​ເງິນ, ທະ​ນາ​ຄານ, ນຳ​້​ມັນ​ອາຍ​ແກັດ, ພ້ອມ​ທັງ​ແລກ​ປ່ຽນ​ບັນ​ດາ​ບັນ​ຫາ​ພາກ​ພື້ນ ແລະ ສາ​ກົນ​ທີ່​ຕ່າງ​ຝ່າຍ​ຕ່າງ​ມີ​ຄວາມ​ສົນ​ໃຈ. ພິ​ທີ​ຕ້ອນ​ຮັບ​ທ່ານ​ປະ​ທານ​ປະ​ເທດ ເຈືອງ​ເຕີນ​ຊາງ ແລະ ຄະ​ນະ​ຜູ​້​ແທນ​ຫວຽດ​ນາມ ຢ່າງ​ເປັນ​ທາງ​ການ​ຖືກ​ຈັດ​ຂຶ້ນ​ໃນ​ເວ​ລາ 12 ໂມງ 30 ນາ​ທີ​ຢູ່​ທຳ​ນຽບ​ປະ​ທາ​ນາ​ທິ​ບໍ​ດີອີ​ຣານ ຢ່າງ​ສົມ​ກຽດ.
(ແຫຼ່ງຄັດຈາກ VOV)