10/05/2015 13:26 GMT+7 Email Print Like 0

ປະທານປະເທດ ເຈືອງເຕີນຊາງ ຕອບສຳພາດຕໍ່ບັນດາສຳນັກຂ່າວສານ ອັນດັບໜຶ່ງຂອງ ລັດເຊຍ

ທ່ານ​ປະ​ທານ​ປະ​ເທດ ເຈືອງ​ເຕີນ​ຊາງ
        ເນື່ອງ​ໃນ​ໂອກ​າດ​ຢ້ຽມ​ຢາມ​ສະ​ຫະ​ພັນ​ລັ​ດ​ເຊຍ ເຂົ້າ​ຮ່ວມ​ການ​ສະ​ເຫຼີມ​ສະຫຼອງ 70 ປີ​ແຫ່ງ​ໄຊ​ຊະ​ນະ​ໃນ​ສົງ​ຄາມ​ປົກ​ປັກ​ຮັກ​ສາ​ປະ​ເທດ​ຊາດ​ທີ່​ຍິ່ງ​ໃຫຍ່ (9/5/1945 – 9/5/2015) ຢ່າງ​ເປັນ​ທາງ​ການ, ທ່ານ​ປະ​ທານ​ປະ​ເທດ ເຈືອງ​ເຕີນ​ຊາງ ໄດ້​ຕອບ​ສຳ​ພາດຕໍ່​ບັນ​ດາ​ສ​ຳ​ນັກ​ຂ່າວ​ສາ​ນ​ອັນ​ດັບ​ໜຶ່ງ​ຂອງ​ລັດ​ເຊຍ ກ່ຽວ​ກັບ​ຄວາມ​ໝາຍ​ຂອງ​ວັນ​ໄຊ​ຊະ​ນະ ແລະ ກ່ຽວ​ກັບ​ການ​ພົວ​ພັນ 2 ຝ່າຍ ຫວຽດ​ນາມ - ສະ​ຫະ​ຫະ​ພັນ​ລັດ​ເຊຍ. ທ່ານ​ປະ​ທານ​ປະ​ເທດ ເຈືອງ​ເຕີນ​ຊາງຢັ້ງ​ຢືນ​ວ່າ: ປະ​ຊາ​ຊົນ​ໃນ​ທົ່ວ​ໂລກ, ໃນ​ນັ້ນ​ມີ​ປະ​ຊາ​ຊົນ ຫວຽດ​ນາມ ຍາ​ມ​ໃດ​ກໍ່​ຈົດ​ຈຳ ແລະ​ຮູ້​ບຸນ​ຄຸນ​​ຕໍ່ຄວາມ​ມາ​ນະ​ພະ​ຍາ​ຍາມ ແລະ ການ​ເສຍ​ສະຫຼະ​ຊີ​ວິດ​ຂອງ​ທະ​ຫານ ແລະ ປະ​ຊາ​ຊົນ ໂຊວຽດ ນັບ​ລ​້ານ​ຄົນ​ໃນ​ການ​ຕໍ່​ສູ້ມ​້າງ​ທຳ​ລາຍ​ລັດ​ທິ ຟາດ​ຊິດ. ບົດ​ຮຽນ​ປະ​ຫວັດ​ສາດ​ສະ​ແດງ​ໃຫ້​ເຫັນ​ຄວາມ​ຈຳ​ເປັນ​ຕ້ອງ​ມາ​ນະ​ພະ​ຍາ​ຍາມ​ສາ​ມັກ​ຄີ, ຮ່ວມ​ມື​ປົກ​ປັກ​ຮັກ​ສາ​ສັນ​ຕິ​ພາບ, ສະ​ກັດ​ກັ້ນ​ສົງ​ຄາມ, ການ​ປະ​ທະ​ກັນ, ເຄົາ​ລົບ​ຜົນ​ປະ​ໂຫຍດ​ຖືກ​ຕ້ອງ​ຕາມ​ກົດ​ໝາຍ, ເປັນ​ທຳ​ຂອງ​ບັນ​ດາ​ປະ​ເທດ​ບົນ​ພື້ນ​ຖານ​ກົດ​ໝາຍ​ສາ​ກົນ, ຜ່ານ​ບັນ​ດາ​ກົນ​ໄກ​ຮ່ວມ​ມື 2 ຝ່າຍ ແລະ ຫຼາຍ​ຝ່າຍ ກໍ່​ຄື​ການ​ເພີ່ມ​ທະ​ວີ​ຄວາມ​ເຂົ້າ​ອົກ​ເຂົ້າ​ໃຈ, ປັບ​ປຸງ​ຄວາມ​ສາ​ມັກ​ຄີ, ມິດ​ຕະ​ພາບ​ຂອງ​ປະ​ຊາ​ຊົນ​ບັນ​ດາ​ປະ​ເທດ​ໃນ​ໂລກ.
       ເມື່ອ​ເຕື້ອງ​ເຖິງ​ການ​ພົວ​ພັນ​ລະ​ຫວ່າງ ຫວຽດ​ນາມ ແລະ ສະ​ຫະ​ພັນ ລັດ​ເຊຍ, ທ່ານ​ປະ​ທານ​ປະ​ເທດ ເຈືອງ​ເຕີນ​ຊາງ ຮັບ​ຮູ້ວ່າ: ໃນ​ຊຸມ​ປີ​ຜ່ານ​ມາ, ​ການ​ພົວ​ພັນ ຫວຽດ​ນາມ ແລະ ສະ​ຫະ​ພັນ ລັດ​ເຊຍ ມີ​ບັນ​ດາ​ບາດ​ກ້າວ​ພັດ​ທະ​ນາ​ແຂງ​ແຮງ​ໃນ​ທຸກໆ​ຂົງ​ເຂດ. ກ່ຽວ​ກັບ​ດ້ານ​ເສດ​ຖະ​ກິດ - ການ​ຄ້າ, ສະ​ຫະ​ພັນ​ລັດ​ເຊຍ ຍາມ​ໃດ​ກໍ່​ແມ່ນ​ຄູ່​ຮ່ວມ​ມື​ການ​ຄ້າ​ທີ່​ເປັນ​ມູ​ນ​ເຊື້ອ ແລະ ສຳ​ຄັນ​ອັນ​ດັບ​ໜຶ່ງ​ຂອງ ຫວຽດ​ນາມ​. ໃນກ່​ວາ​ໜຶ່ງ​ທົດ​ສະ​ວັດ​ຜ່ານ​ມາ, ວົງ​ເງິນ​ການ​ຄ້າ 2 ປະ​ເທດ​ເພີ່ມ​ຂຶ້ນ​ເກືອບ 7 ເທົ່າຈາກ 400 ລ້ານ USD ຂຶ້ນ​ເຖິງ 2,76 ​ຕື້ USD. ທັງ 2 ປະ​ເທດ​ພວ​ມ​ສຸ້​ຊົນ​ບັນ​ລຸ 10 ຕື້ USD ໃນ​ປີ 2020. ກ່ຽວ​ກັບ​ບັນ​ຫາ​ທະ​ເລ​ຕາ​ເວັນ​ອອກ, ທ່ານ​ປະ​ທານ​ປະ​ເທດ ເຈືອງ​ເຕີນ​ຊາງ ຖະ​ແຫຼງວ່າ: ຍາມ​ໃດ ຫວຽດ​ນາມ ກໍ່​ຍົກ​ສູງ​ຄວາມ​ສຳ​ຄັນ​ຂອງ​ການ​ຮັກ​ສາ​ສັນ​ຕິ​ພາບ, ສະ​ຖຽນ​ລະ​ພາບ, ຄວາມ​ປອດ​ໄພ, ຄວາມ​ເສ​ລີ​ໃນ​ການ​ເດີນ​ທະ​ເລ ແລະ ການ​ບິນ​ຢູ່​ທະ​ເລ​ຕາ​ເວັນ​ອອກ, ແກ້​ໄຂ​ບັນ​ດາ​ຄວາມ​ຂັດ​ແຍ້ງ​ກັນ​ບົນ​ທະ​ເລ​ດ້ວຍ​ມາດ​ຕະ​ການ​ສັນ​ຕິ​ພາບ, ບົນ​ພື້ນ​ຖານ​ເຄົາ​ລົບ​ກົດ​ໝາຍ​ສາ​ກົນ, ໃນ​ນັ້ນ​ມີ​ສົນ​ທິ​ສັນ​ຍາ ສ​ປ​ຊ ກ່ຽວ​ກັບ​ກົດ​ໝາຍ​ທະ​ເລ​ປີ 1982, ປະ​ຕິ​ບັດ​ຖະ​ແຫຼງ​ການ​ກ່ຽວ​ກັບ​ການ​ປະ​ພຶດ​ຂອງ​ຝ່າຍ​ຕ່າງໆ​ຢູ່​ທະ​ເລ​ຕາ​ເວັນ​ອອ (DOC) ຢ່າງ​ຄົບ​ຖ້ວນ, ຄວາມ​ຈຳ​ເປັນ​ສ້າງ​ປະ​ມວນ​ຂໍ້​ກຳ​ນົດ​ກ່ຽວ​ກັບ​ການ​ປະ​ພຶດ​ຢູ່​ທະ​ເລ​ຕາ​ເວັນ​ອອກ (COC).
 (​ແຫຼ່ງຄັດ​ຈາກ VOV)