07/08/2018 10:34 GMT+7 Email Print Like 0

ບາດກ້າວຄືບໜ້າໃໝ່ໃນການເຈລະຈາ COC

      ກອງປະຊຸມລັດຖະມົນຕີການຕ່າງປະເທດ ອາຊຽນ ປະຈຳປີຄັ້ງທີ 51 (AMM 51) ໄດ້ດຳເນີນຢູ່ ສິງກະໂປ ໃນອາທິດຜ່ານມາ ໄດ້ຮັບຮູ້ສັນຍານທີ່ຄືບໜ້າໃນການເຈລະຈາກ່ຽວກັບກົດແຫ່ງການປະພຶດຢູ່ທະເລຕາເວັນອອກ (COC).

ກອງປະຊຸມຄົບຄະນະໃນຂອບເຂດ ARF 2018 ຢູ່ສິງກະໂປ ເມື່ອວັນທີ 2/8. ພາບ: Reuters
      ໂດຍລະອຽດແມ່ນ ທັງ ອາຊຽນ ແລະ ຈີນ ບັນລຸໄດ້ຂໍ້ຕົກລົງກ່ຽວກັບຮ່າງເອກະສານຜ່ອນສັ້ນຜ່ອນຍາວພຽງສະບັບໜຶ່ງດຽວເພື່ອເປັນພື້ນຖານເຈລະຈາກ່ຽວກັບ COC.
        ຮ່າງເອກະສານລວມມີ 19 ໜ້າ ແລະ ໄດ້ແບ່ງເປັນ 3 ພາກຕົ້ນຕໍ. ທ່ານລັດຖະມົນຕີການຕ່າງປະເທດ ສິງກະໂປ Vivian Balakrishnan ຖືວ່າ: “ເຖິງວ່າ COC ອາດຈະບໍ່ແກ້ໄຂໄດ້ບັນຫາຂັດແຍ້ງກັນທາງດ້ານອຳນາດອະທິປະໄຕກໍ່ຕາມ ແຕ່ມັນຈະຮັບປະກັນຮັກສາສັນຕິພາບ ແລະ ສະຖຽນລະພາບຢູ່ທະເລຕາເວັນອອກ, ປະກອບສ່ວນສ້າງຄວາມໄວ້ເນື້ອເຊື່ອໃຈ ເພື່ອຊຸກຍູ້ບັນດາບາດກ້າວຕັ້ງໜ້າກ່ວາໃນການແກ້ໄຂບັນດາການຂັດແຍ້ງນີ້”.
        ສ່ວນທ່ານລັດຖະມົນຕີການຕ່າງປະເທດ ຈີນ ຫວາງອີ ກໍ່ຕີລາຄາສູງບາດກ້າວນີ້. ຕາມທ່ານແລ້ວ, ຈີນ ແລະ ບັນດາປະເທດ ອາຊຽນ ອາດຈະຮັກສາສັນຕິພາບ ແລະ ສະຖຽນລະພາບຢູ່ທະເລຕາເວັນອອກ, ພ້ອມທັງແບ່ງປັນຄວາມຮັບຮູ້ລວມ ເພື່ອພ້ອມກັນກ້າວໄປເຖິງກົດແຫ່ງການປະພຶດໃນພາກພື້ນ ຊຶ່ງບັນດາຝ່າຍທັງໝົດຈະເຄົາລົບປະຕິບັດ.
 (ແຫຼ່ງຄັດຈາກ VOV)