20/02/2014 15:01 GMT+7 Email Print Like 0

ບັນດາຜູ້ນຳລາວຕ້ອນຮັບ ຄະນະກວດສອບແຫ່ງລັດ ສສ ຫວຽດນາມ

 
ທ່ານນາງ ປານີ ຢາທໍ່ຕູ້, ປະທານສະພາແຫ່ງຊາດ ລາວ ຕ້ອນຮັບທ່ານ ຫງວຽນຫືວວ້ານ, ຫົວໜ້າອົງການກວດສອບແຫ່ງລັດ ຫວຽດນາມ. ພາບ: ຮວ່າງເຈືອງ-VNA
ໃນວັນທີ 19 ກຸມພາ 2014, ທີ່ນະຄອນຫຼວງ ວຽງຈັນ, ບັນດາຜູ້ນຳ ລາວ ຊຶ່ງລວມມີ ທ່ານນາງ ປານີ ຢາທໍ່ຕູ້, ປະທານສະພາແຫ່ງຊາດ ແລະ ທ່ານ ທອງສິງ ທຳມະວົງ, ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງທ່ານ ຫງຽນຫືວວ້ານ, ຫົວໜ້າອົງການກວດສອບແຫ່ງລັດ ສສ ຫວຽດນາມ ພ້ອມດ້ວຍຄະນະ.
ໃນລະຫວ່າງການຕ້ອນຮັບ ແລະ ພົບປະໂອ້ລົມ, ທ່ານ ຫງວຽນຫືວວ້ານ ໄດ້ລາຍງານຜົນງານການພົບປະເຈລະຈາ ກັບອົງການກວດສອບແຫ່ງລັດ ສປປ ລາວ ແລະ ໃຫ້ຮູ້ວ່າ ໃນປີ 2014, ຂະແໜງກວດສອບແຫ່ງລັດ ຂອງສອງປະເທດ ຈະສືບຕໍ່ແລກປ່ຽນຄະນະຜູ້ແທນຂັ້ນສູງ, ຜັນຂະຫຍາຍ ວຽກງານສຶກສາ ແລະ ກໍ່ສ້າງພະນັກງານ, ເພີ່ມທະວີການແລກປ່ຽນ ບົດຮຽນດ້ານວິຊາການ.
ຜູ້ນຳລາວທັງສອງ ເນັ້ນໜັກວ່າ ລາວ ພວມຢູ່ໃນຂະບວນວິວັດແຫ່ງການ ພັດທະນາ ແລະ ສ້າງສາປະເທດຊາດ, ຍັງມີຫຼາຍໂຄງການຕ້ອງມີການ ກວດກາ, ຄວບຄຸມຢ່າງເຄັ່ງຄັດ, ເພາະສະນັ້ນ ການຮ່ວມມື ແລະ ຊ່ວຍເຫຼືອຂອງອົງການກວດສອບແຫ່ງລັດ ຫວຽດນາມ ສະຫງວນໃຫ້ແກ່ ອົງການກວດສອບແຫ່ງລັດ ລາວ ມີຄວາມໝາຍຢ່າງແທ້ຈິງ.
ຜູ້ນຳລາວທັງສອງໄດ້ຢືນຢັນວ່າ ຈະສ້າງເງື່ອນໄຂອຳນວຍຄວາມສະດວກໃຫ້ແກ່ອົງການກວດສອບແຫ່ງລັດຂອງສອງປະເທດ ຮ່ວມມືຢ່າງ ມີປະສິດທິພາບ, ປະກອບສ່ວນຮັດແໜ້ນສາຍພົວພັນມິດຕະພາບຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ຈະເລີນ ງອກງາມຍິ່ງໆຂຶ້ນ
ໂດຍ: VNA-VNP