20/10/2018 12:52 GMT+7 Email Print Like 0

ນາຍົກລັດຖະມົນຕີຫວຽດນາມເຂົ້າຮ່ວມກອງປະຊຸມ ASEM 12 ແລະ ພົບປະ 2 ຝ່າຍຢູ່ນອກກອງປະຊຸມ ASEM 12

      ຕອນຄ່ຳວັນທີ 18 ຕຸລາ, ຕາມເວລາທ້ອງຖິ່ນ, ກອງປະຊຸມສຸດຍອດອາຊີ - ເອີລົບ ຄັ້ງທີ 12 (ASEM 12) ຖືກໄຂຂຶ້ນຢ່າງເປັນທາງການ ຢູ່ນະຄອນຫຼວງ Brussels, ລາຊະອານາຈັກແບນຊິກ. ຄະນະຜູ້ແທນຂັ້ນສູງຫວຽດນາມ ໂດຍທ່ານນາຍົກລັດຖະມົນຕີ ຫງວຽນຊວນຟຸກ ນຳໜ້າເຂົ້າຮ່ວມກອງປະຊຸມ.

(ທ່ານນາຍົກລັດຖະມົນຕີ ຫງວຽນຊວນຟຸກ ເຂົ້າຮ່ວມກອງປະຊຸມ)
      ກ່າວຄຳເຫັນທີ່ກອງປະຊຸມ, ທ່ານປະທານສະພາເອີລົບ Donald Tusk ຕີລາຄາສູງບັນດາຜົນງານຂອງເວທີປາໄສ ນັບແຕ່ກອງປະຊຸມສຸດຍອດ ASEM 11 ຢູ່ Ulan Bator, ປະເທດມົງໂກນ ເມື່ອປີ 2016, ຍົກສູງບົດບາດຂອງ ASEM ແມ່ນກົນໄກ່ຮ່ວມມື, ເຈລະຈາທີ່ສຳຄັນແຖວໜ້າລະຫວ່າງ 2 ທະວີບ, ນຳໜ້າໃນການຊຸກຍູ້ການຮ່ວມມື 2 ຝ່າຍ ແລະ ຄວາມເປັນລະບຽບຮຽບຮ້ອຍສາກົນໂດຍອີງໃສ່ກົດໝາຍ, ປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງຢູ່ພາກພື້ນ ແລະ ໃນໂລກ.
        ດ້ວຍຫົວຂໍ້ “ອາຊີ ແລະ ເອີລົບ: ການພົວພັນຄູ່ຮ່ວມມືທົ່ວໂລກເພື່ອແນໃສ່ຮັບມືກັບບັນດາສິ່ງທ້າທາຍທົ່ວໂລກ”, ກອງປະຊຸມ ASEM 12 ມີຄວາມໝາຍສຳຄັນ ເພື່ອແນໃສ່ວາງອອກການກຳນົດທິດ, ວິໄສທັດໃນການຮ່ວມມື ASEM ໃນທົດສະວັດໃໝ່ ໂດຍອີງໃສ່ ທັງ 3 ເສົາຄ້ຳນັ້ນແມ່ນ: ການປຶກສາຫາລືດ້ານການເມືອງ, ການຮ່ວມມືດ້ານເສດຖະກິດ ແລະ ການຮ່ວມມືໃນບັນດາຂົງເຂດອື່ນໆ.
        ກ່ອນໜ້ານັ້ນ, ຕອນບ່າຍວັນທີ 18 ຕຸລາ, ເນື່ອງໃນໂອກາດເຂົ້າຮ່ວມກອງປະຊຸມ ASEM 12, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ມີການພົບປະ 2 ຝ່າຍກັບທ່ານນາຍົກລັດຖະມົນຕີຈີນ ຫຼີເຄີຊຽງ ແລະ ທ່ານນາງນາຍົກລັດຖະມົນຕີນອກແວ Erna Solberg.
        ທີ່ການພົບປະກັບທ່ານນາຍົກລັດຖະມົນຕີຈີນ ຫຼີເຄີຊຽງ, ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີວ່າ ໃນໄລຍະຈະມາເຖິງ, 2 ຝ່າຍສືບຕໍ່ຮັກສາການຢ້ຽມຢາມ ແລະ ການພົບປະລະຫວ່າງການນຳຂັ້ນສູງຂອງ 2 ພັກ, 2 ລັດ ເປັນປະຈຳ; ເພີ່ມທະວີການຊີ້ນຳ, ກະຕຸກຊຸກຍູ້ບັນດາກະຊວງ, ຂະແໜງການ ແລະ ທ້ອງຖິ່ນຂອງ 2 ປະເທດຕັ້ງໜ້າແລກປ່ຽນ, ຜັນຂະຫຍາຍບັນດາມາດຕະການຊຸກຍູ້ການຄ້າ 2 ຝ່າຍໃຫ້ພັດທະນາຢ່າງສະໝ່ຳສະເໝີ, ໝັ້ນຄົງ ໄປຄຽງຄູ່ກັບການຫຼຸດຜ່ອນການນຳເຂົ້າເກີນດຸນຂອງຫວຽດນາມ; ສ້າງເງື່ອນໄຂນຳເຂົ້າທີ່ສະດວກ ແລະ ເປີດກວ້າງຕະຫຼາດໃຫ້ແກ່ສິນຄ້າຫວຽດນາມ, ພິເສດແມ່ນຜະລິດຕະພັນກະເສດ.
        ສ່ວນທ່ານນາຍົກລັດຖະມົນຕີຈີນ ຫຼີເຄີຊຽງ ປາດຖະໜາວ່າ, 2 ຝ່າຍຈະກຳແໜ້ນກາລະໂອກາດຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃນທຸກຂົງເຂດ; ຄວບຄຸມສະພາບການໃຫ້ເປັນຢ່າງດີ ແລະ ແກ້ໄຂບັນດາການຂັດແຍ້ງກັນຢ່າງສົມເຫດສົມຜົນ, ຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກ; ປະກອບສ່ວນຊຸກຍູ້ການພົວພັນຄູ່່ຮ່ວມມືຍຸດທະສາດຮອບດ້ານລະຫວ່າງ 2 ປະເທດໃຫ້ພັດທະນາແບບຍືນຍົງ, ໝັ້ນຄົງ.
        ໃນການພົບປະກັບທ່ານນາງນາຍົກລັດຖະມົນຕີນອກແວ Erna Solberg, ນາຍົກລັດຖະມົນຕີ 2 ທ່ານໄດ້ເຫັນດີເປັນເອກະພາບນຳກັນຄວນເພີ່ມທະວີການຮ່ວມມື 2 ຝ່າຍໃນທຸກຂົງເຂດ ການເມືອງ - ການທູດ, ເສດຖະກິດ - ການຄ້າ, ວິທະຍາສາດ - ເຕັກໂນໂລຊີ… ສືບຕໍ່ສົມທົບກັນ ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍ, ໃນຂອບເຂດສະຫະປະຊາຊາດ. ນາຍົກລັດຖະມົນຕີ 2 ທ່ານກໍ່ເນັ້ນໜັກເຖິງຄວາມສຳຄັນຂອງທະເລ, ເຫັນດີນຳກັນວ່າ ບໍ່ພຽງແຕ່ອະນຸລັກຮັກສາເທົ່ານັ້ນ, ຫາກຕ້ອງພັດທະນາແບບຍືນຍົງ ແລະ ເພື່ອບັນລຸໄດ້ເປົ້າໝາຍດັ່ງກ່າວ ຄວນຮັກສາສັນຕິພາບ, ສະຖຽນລະພາບ ແລະ ການຮ່ວມມືຢູ່ບັນດາພາກພື້ນ ກໍຄືໃນທົ່ວໂລກ, ບົນພື້ນຖານກົດໝາຍສາກົນ, ບັນດາຫຼັກການພື້ນຖານຂອງສະຫະປະຊາຊາດອີກດ້ວຍ.
 (ແຫຼ່ງຄັດຈາກ VOV)