26/07/2018 14:15 GMT+7 Email Print Like 0

ນາຍົກລັດຖະມົນຕີ ລາວ ເປັນປະທານໃນກອງປະຊຸມຂ່າວກ່ຽວກັບເຫດການໄພນ້ຳຖ້ວມທີ່ເມືອງ ສະໜາມໄຊ ແຂວງ ອັດຕະປື

ຕອນແລງວັນທີ 25 ກໍລະກົດ 2018, ທີ່ນະຄອນຫຼວງ ວຽງຈັນ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບອຸບັດເຫດ ການແຕກຫັກ ຂອງເຂື່ອນກັ້ນນ້ຳ ແຫ່ງທີ 3 ເຊປຽນ-ເຊນ້ຳນ້ອຍ ເມືອງ ສະໜາມໄຊ ແຂວງອັດຕະປື.
 

ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ເປັນປະທານໃນກອງປະຊຸມຂ່າວ
ທີ່ໄດ້ຈັດຂຶ້ນຢູ່ນະຄອນຫຼວງ 
ວຽງຈັນ.​ (ພາບ: THX/VNA)


ຕາມນັກຂ່າວຂອງຂ່າວສານຫວຽດນາມ ປະຈຳ ລາວ, ຕອນແລງວັນທີ 25 ກໍລະກົດ 2018, ທີ່ນະຄອນຫຼວງ ວຽງຈັນ, ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ໄດ້ເປັນ ປະທານໃນກອງປະຊຸມຂ່າວເພື່ອຖະແຫຼງຂ່າວຕໍ່ສື່ມວນຊົນທັງພາຍໃນ ແລະ ຕ່າງປະເທດ ກ່ຽວກັບອຸບັດເຫດ ການແຕກຫັກ ຂອງເຂື່ອນກັ້ນນ້ຳ ແຫ່ງທີ 3 ເຊປຽນ-ເຊນ້ຳນ້ອຍ ເມືອງ ສະໜາມໄຊ ແຂວງອັດຕະປື.

ທ່ານນາຍົກລັດຖະມົນຕີ ລາວ ກ່າວວ່າ ຜົນກະທົບຈາກໄພ ນ້ຳຖ້ວມຄັ້ງນີ້ ແມ່ນຮ້າຍແຮງ, ໃຫຍ່ຫຼວງ ແລະ ອາດເວົ້າໄດ້ວ່າ ເປັນຄັ້ງທຳອິດໃນຮອບຫຼາຍສິບປີ.

ສາເຫດກໍ່ແມ່ນຝົນຕົກໜັກຕິດຕໍ່ກັນຫຼາຍວັນ ປະລິມານ ນ້ຳຂຶ້ນສູງຫຼາຍເຮັດໃຫ້ອ່າງເກັບນ້ຳ ສຳຮອງຂອງເຂື່ອນໄຟຟ້າ ເຊປຽນ-ເຊນ້ຳນ້ອຍຮັບນ້ຳບໍ່ໄດ້ເລີຍແຕກ ເຂື່ອນແຕກນ້ຳສຸລົງ ມາສູ່ບ້ານເຮືອນປະຊາຊົນຢ່າງກະທັນຫັນ ເຮັດໃຫ້ບ້ານເຮືອນຈົມຢູ່ໃຕ້ນ້ຳ ກະແສນ້ຳໄຫຼແຮງ ພັດເອົາ ເຮືອນ ພ້ອມດ້ວຍຄົນໄປຕາມກະແສນ້ຳ. 

ປະຈຸບັນ, ສ່ວນປະຊາຊົນທີ່ລົບໄພຢູ່ຫຼັງຄາເຮືອນ ແລະ ຕົ້ນໄມ້ໃຫຍ່ນັ້ນແມ່ນໄດ້ກອບກູ້ເອົາມາໝົດແລ້ວຕັ້ງແຕ່ເວລາ 19.00 ໂມງວັນທີ 24 ກໍລະກົດ 2018 ແລະ ໄດ້ເອົາເຂົາເຈົ້າ ມາໄວ້ຫ້ອງການປົກຄອງເມືອງ, ໂຮງຮຽນຢູ່ເທດສະບານເມືອງ ແລະ ຢູ່ທີ່ສູງປອດໄພ. 

ໜ່ວຍກູ້ໄພໄດ້ດຳເນີນການກວດກາ, ລົງທະບຽນ ແລະ ກວດສຸຂະພາບ, ຈັດສັນທີ່ຢູ່ອາໄສຊົ່ວຄາວ, ຊ່ວຍບັນເທົາ ທຸກດ້ວຍເຄື່ອງນຸ່ງຫົ່ມ, ອາຫານ, ຢາປົວພະຍາດ ໄດ້ໃນ ລະດັບຕົ້ນ ລໍຖ້ານ້ຳລົງຈຶ່ງສືບຕໍ່ຊ່ວຍປະຊາຊົນຕໍ່ໄປ. 

ຈຳນວນຜູ້ທີ່ຂາດທີ່ຢູ່ອາໄສມີເຖິງ 587 ຄອບຄົວ ແລະ 3.060 ຄົນ. ຜູ້ຫາຍສາບສູນແມ່ນ 131 ຄົນ, ບ້ານ 13 ແຫ່ງໄດ້ຮັບ ຜົນສະທ້ອນ.

ນ້ຳຈາກຈຸດຖືກຜົນກະທົບທຳອິດນັ້ນໄດ້ຫຼຸດລະດັບລົງ ແຕ່ປະລິມານນ້ຳຊ້ຳພັດກຳລັງໄຫຼເທລົງ 6 ບ້ານທາງໃຕ້ຕື່ມ ອີກ. 

ຕອນບ່າຍວັນທີ 25 ກໍລະກົດ, ລັດຖະບານ ລາວ ໄດ້ຈັດ ກອງປະຊຸມດ່ວນ ແລະ ຕົກລົງສ້າງຕັ້ງຄະນະສະເພາະກິດຂຶ້ນໂດຍມອບໝາຍໃຫ້ທ່ານຮອງນາຍົກລັດຖະມົນຕີ ສອນໄຊ ສີພັນດອນ ເປັນຫົວໜ້າຄະນະ, ປະກອບດ້ວຍພາກສ່ວນ ທີ່ກ່ຽວຂ້ອງ.

ຄະນະສະເພາະກິດ ຈະໄດ້ປະເມີນຜົນເສຍຫາຍ ຊອກຫາ ສາເຫດທີ່ພາໃຫ້ເກີດການແຕກຫັກຂອງອ່າງເກັບນ້ຳດັ່ງກ່າວ ຮ່ວມກັບບໍລັດສັດທີ່ໄດ້ຮັບການສຳປະທານ ກວດກາຄວາມ ຮັບຜິດຊອບ ແລະ ພັນທະຂອງແຕ່ລະຝ່າຍໃນການແກ້ໄຂ ເຫດການໃນຄັ້ງນີ້.

ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ໃຫ້ຮູ້ວ່າ ເພິ່ນຈະຕິດຕາມຢ່າງເຄັ່ງຄັດ ບັນດາວຽກງານແກ້ໄຂເຫດການ ດັ່ງກ່າວ.

ຕາງໜ້າລັດຖະບານ ແລະ ປະຊາຊົນ ລາວ, ທ່ານນາຍົກ ລັດຖະມົນຕີ ລາວ ທອງລຸນ ສີສຸລິດ ສະແດງຄວາມຂອບອົກຂອບໃຈຕໍ່ບັນດາລັດຖະບານ, ປະຊາຊົນບັນດາປະເທດ ເພື່ອນມິດ ແລະ ບັນດາອົງການຈັດຕັ້ງສາກົນທີ່ ມີການແບ່ງປັນ ຄວາມຊ່ວຍເຫຼືອລັດຖະບານ ແລະ ປະຊາຊົນລາວ.

ທ່ານນາຍົກ ລັດຖະມົນຕີ ລາວ ທອງລຸນ ສີສຸລິດ ຮຽກຮ້ອງໃຫ້ປະຊາຊົນໝົດທຸກຄົນໃນທົ່ວປະເທດ ແລະ ປະຊາຊົນລາວ ທີ່ພວມອາໄສຢູ່ຕ່າງປະເທດ ມີຄວາມຊ່ວຍເຫຼືອ ເຊິ່ງກັນ ແລະ ກັນ ເພື່ອແກ້ໄຂບັນຫານີ້.

ທ່ານນາຍົກ ລັດຖະມົນຕີ ລາວ ທອງລຸນ ສີສຸລິດ ສະແດງຄວາມໝັ້ນໃຈວ່າ ເຫດການດ່ັງກ່າວ ຈະແກ້ໄຂໄດ້ຢ່າງວ່ອງໄວ. 

ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ກໍ່ສະເໜີໃຫ້ ປະຊາຊົນຊາວ ສືບຕໍ່ຕິດຕາມພະຍາກອນອາກາດ, ຍ້ອນໃນໄລຍະນີ້ ອາກາດອາດຈະມີການປ່ຽນແປງເລື້ອຍໆ. ພ້ອມແລ້ວການກະກຽມເພື່ອປະເຊີນໜ້າກັບທຸກໆ ກໍລະນີ ທີ່ອາດຈະເກີດຂຶ້ນ.

ທ່ານນາຍົກ ລັດຖະມົນຕີ ລາວ ທອງລຸນ ສີສຸລິດ ໄດ້ມອບໃຫ້ພັກ, ອຳນາດປົກຄອງທ້ອງຖິ່ນ ແຕ່ຊັ້ນສູນກາງ ຈົນເຖິງທ້ອງຖິ່ນ, ດ້ວຍຄວາມຮັບຜິດຊອບສູງທີ່ສຸດ, ຊ່ວຍຫຼຸດຜ່ອນຜົນເສຍຫາຍ ແລະ ພ້ອມກັບປະຊາຊົນຜ່ານຜ່າອຸບັດເຫດນີ້ ໂດຍໄວ.
ປະຕິບັດ: VNA/VNP