08/02/2014 14:15 GMT+7 Email Print Like 0

ນາຍົກລັດຖະມົນຕີ ກຳປູເຈຍ ຢ້ຽມຢາມລາວ ຢ່າງເປັນທາງການ

 
ພິທີຕ້ອນຮັບທ່ານນາຍົກລັດຖະມົນຕີ ຮຸນແຊນ
ທີ່ສຳນັກງານນາຍົກລັດຖະມົນຕີ.
ພາບ: ຮວ່າງເຈືອງ-VNA
ໃນຕອນເຊົ້າວັນທີ 6 ກຸມພາ, ຄະນະຜູ້ແທນຂັ້ນສູງລັດຖະບານກຳປູເຈຍ ນຳໂດຍທ່ານນາຍົກລັດຖະມົນຕີ ຮຸນແຊນ ໄດ້ມາຢ້ຽມຢາມ ສປປ ລາວຢ່າງເປັນທາງການ ແຕ່ ວັນທີ 6-7 ກຸມພາ ໂດຍຕອບສະໜອງ ຕາມຄຳເຊີນຂອງທ່ານ ນາຍົກລັດຖະມົນຕີລາວ ທອງສິງ ທຳມະວົງ.
ຫຼັງຈາກພິທີຕ້ອນຮັບທີ່ສຳນັກງານນາຍົກລັດຖະມົນຕີ, ທ່ານ ນາຍົກລັດຖະມົນຕີ ຮຸນແຊນ ແລະ ທ່ານນາຍົກລັດຖະມົນຕີ ທອງສິງ ທຳມະວົງໄດ້ດຳເນີນການເຈລະຈາ.
ທ່ານນາຍົກລັດຖະມົນຕີ ທອງສິງ ທຳມະວົງ ໄດ້ຕີລາຄາສູງບັນດາ ນະໂຍບາຍທີ່ຖືກຕ້ອງຂອງທ່ານນາຍົກລັດຖະມົນຕີ ຮຸນແຊນໃນການ ນຳພາປະເທດຊາດ ແລະ ຊົມເຊີຍຜົນຂອງການເລືອກຕັ້ງທີ່ສະເໝີພາບ ແລະ ຖືກຕ້ອງຕາມກົດໝາຍຢູ່ກຳປູເຈຍໃນມໍ່ມານີ້ ແລະ ແຈ້ງໃຫ້ທ່ານ ນາຍົກລັດຖະມົນຕີ ຮຸນແຊນ ຊາບກ່ຽວກັບ ສະພາບການເມືອງ, ເສດຖະກິດ-ສັງຄົມຢູ່ລາວ ແລະ ເນັ້ນໜັກວ່າ ລັດຖະບານລາວພວມຖືສຳຄັນວຽກງານພັດທະນາເສດຖະກິດ, ສູ້ຊົນແຕ່ນີ້ຮອດປີ 2015 ຈີດີປີຈະບັນລຸລະດັບເພີ່ມແຕ່ 8% ຂຶ້ນໄປ ແລະ ຫຼຸດພົ້ນອອກຈາກບັນຊີລາຍຊື່ບັນດາປະເທດດ້ອຍພັດທະນາໃນປີ 2020.
ພາຍຫຼັງການເຈລະຈາ, ນາຍົກລັດຖະມົນຕີທັງສອງທ່ານໄດ້ລົງນາມໃນເອກະສານຮ່ວມມື 7 ສະບັບ ໃນຂົງເຂດສາທາລະນະສຸກ, ຍຸຕິທຳ, ບົດບັນທຶກຊ່ວຍຈຳ ກ່ຽວກັບການຮ່ວມມືດ້ານວັດທະນະທຳ, ບົດບັນທຶນຊ່ວຍຈຳກ່ຽວກັບການສ້າງຕັ້ງສະຖານກົງສູນລະຫວ່າງສອງປະເທດ, ສັນຍາກ່ຽວກັບການສຶກສາ, ສັນຍາກ່ຽວກັບການພົວພັນລະຫວ່າງ ນະຄອນຫຼວງວຽງຈັນ ແລະ ນະຄອນຫຼວງ ພະນົມເປັນ, ບົດບັນທຶກຊ່ວຍຈຳ ກ່ຽວກັບການພົວພັນສອງຝ່າຍ ລະຫວ່າງກະຊວງປ້ອງກັນຄວາມສະຫງົບ ແລະ ກະຊວງຍຸຕິທຳກຳປູເຈຍ.
ໃນຕອນແລງຂອງວັນດຽວກັນ, ປະທານປະເທດລາວ ຈູມມາລີ ໄຊຍະສອນ ແລະ ທ່ານນາງປະທານສະພາແຫ່ງຊາດ ປານີ ຢາທໍ່ຕູ້ ກໍໄດ້ ຕ້ອນຮັບທ່ານນາຍົກລັດຖະມົນຕີ ຮຸນແຊນ ແລະ ຄະນະຜູ້ແທນຂັ້ນສູງລັດຖະບານກຳປູເຈຍ.
(TTXVN/VNP)