10/07/2016 23:01 GMT+7 Email Print Like 0

ນັກສິນລະປິນກາຍະສິນອາວຸໂສ ແລະ ທີມກາຍະສິນເຍົາວະຊົນ

ໄດ້ຮູ້ຈັກໂດຍຜ່ານບັນດາລາຍການສະແດງທີ່ຈັບອົກຈັບໃຈ, ສວຍງາມ ແລະ ສ້າງຄວາມປະທັບໃຈໃນດວງໃຈຂອງຜູ້ຊົມບໍ່ວ່າເທົ່າໃດຄົນ, ນັກສະແດງກາຍະສິນ ຫງອກວຽນ ຍັງເປັນທີ່ຮູ້ຈັກເຖິງນ້ຳໃຈທີ່ແສນປະເສີດ ແລະ ມີເມດຕາເມື່ອທ່ານໄດ້ຮັບ, ລ້ຽງດູ ແລະ ສິດສອນກາຍະສິນໃຫ້ເດັກນ້ອຍທີ່ປະສົບກັບຄວາມຫຍຸ້ງຍາກຫຼາຍຄົນ. ປະຈຸບັນນັກສະແດງກາຍຍະສິນ ທີ່ມີອາຍຸ 70 ປີນີ້ ໄດ້ຮັບເອົາລູກລ້ຽງຫລາຍກວ່າ 300 ຄົນ ແລະ ພ້ອມກັບເຂົາເຈົ້າ ສ້າງຄະນະກາຍະສິນມາຍາກົນເຍົາວະຊົນ ໄປສະແດງຢູ່ຫຼາຍແຫ່ງໃນທົ່ວປະເທດ.
ເຮືອນຫລັງນ້ອຍໆຕັ້ງຢູ່ທາງຮ່ອມຂອງຄອບຄົວນັກສິລະປິນ ຫງອກວຽນ (ຊື່ເທິງເວທີສະແດງແມ່ນທ່ານ ຫງວຽນວັນດຶກ )ຢູ່ເມືອງ 4, ນະຄອນໂຮ່ຈີມິນ, ກໍ່ແມ່ນສະຖານທີ່ຝຶກແອບຂອງຄະນະກາຍະສິນໃນແຕ່ລະມື້. ເມື່ອເຫັນວ່າ ນ້ອງ ຫງວຽນເລກວ໋ກບາວ (ອາຍຸ 5 ປີ, ຢູ່ເມືອງ ກູຈີ, ນະຄອນໂຮ່ຈີມິນ) ມີພອນສະຫວັນທາງດ້ານກາຍະສິນ, ແມ່ຂອງນ້ອງ ກວ໋ກບາວ ໄດ້ໄປຊອກຫາເຮືອນນັກສິລະປິນ ຫງອກວຽນ ເພື່ອໃຫ້ທ່ານຮັບເອົານ້ອງ ກວ໋ກບາວ ມາເປັນລູກລ້ຽງ ແລະ ສອນກາຍະສິນໃຫ້ນ້ອງ. ນັກສິ ລະປິນກວ໋ກບາວໄດ້ຮັບປາກດ້ວຍຄວາມມ່ວນຊື່ນ ແລະ ໃຫ້ຮູ້ວ່າ ນີ້ແມ່ນການຮັບເອົາລູກລ້ຽງຄັ້ງສຸດທ້າຍຂອງຕົນ. ເມື່ອຮູ້ວ່າພວກຂ້າພະເຈົ້າມີຂໍ້ຂ້ອງໃຈທ່ານກໍ່ຫົວຍິ້ມແລ້ວອະທິບາຍວ່າ : “ຍ້ອນຂ້າພະເຈົ້າມີອາຍຸແກ່ແລ້ວ, ບໍ່ຮູ້ວ່າຈະມີເຫື່ອແຮງລ້ຽງດູໃຜໄດ້ ອີກບໍຈຶ່ງຮັບເຂົ້າມາຕື່ມ”.

ນັກສິລະປິນກາຍະສິນ ຫງວຽນວັນດຶກ, ອາຍຸ 70 ປີ, ດ້ວຍນາມເທິງເວທີສະແດງແມ່ນ ຫງອກວຽນ ( ເດືອນກຸມພາ 2016 ).


ນັກສິລະປິນ ຫງອກວຽນ ແນະນຳໃຫ້ຫຼານຂອງຕົນຝຶກແອບກາຍະສິນເທິງລົດຖີບລໍ້ດ່ຽວ.


ນັກສິລະປິນ ຫງອກວຽນ ຝຶກແອບໃຫ້ສະມາຊິກນ້ອຍຂອງຄະນະກາຍະສິນ, ມາຍາກົນ ຫງອກວຽນ ວິທີການແອນອ່ອນໂຕ.


ນັກສິລະປິນ ຫງອກວຽນ ແນະນຳວິທີໂຍນບ້ວງ ໃຫ້ສະມາຊິກຍິງ ຂອງຄະນະກາຍະສິນ, ມາຍາກົນເຍົາວະຊົນ ຫງອກວຽນ.


ສະມາຊິກໝົດທຸກຄົນໃນຄະນະກາຍະສິນຕ່າງກໍໄດ້ຮັບການ ສິດສອນ, ແນະນຳ ຈາກນັກສິລະປິນ ຫງອກວຽນ ດ້ວຍຄວາມຫມົດຈິດຫມົດໃຈ. 


ຄະນະກາຍະສິນ, ມາຍາກົນເຍົາວະຊົນ ຫງອກວຽນ ກັບບັນດາສະມາຊິກທີ່ເປັນລູກຄີງ, ລູກລ້ຽງ ແລະ ຫຼານຂອງນັກສິລະປິນ ຫງອກວຽນ.


ເວລາພັກຜ່ອນທີ່ຫາຍາກຂອງນັກສິລະປິນກາຍະສິນ ຫງອກວຽນ ຫຼັງການສະແດງ.
 
ຍ້ອນຄວາມມັກຮັກມາຍາກົນມາແຕ່ຄາວຍັງນ້ອຍ, ນັກກາຍະສິນ ຫງອກວຽນ ໄດ້ຊອກຫາທຸກວິທີເພື່ອ ຮຽນວິຊາກາຍຍະສິນ ແລະ ມາຍາກົນ. ທ່ານບໍ່ທ້ໍຖອຍຕໍ່ອຸປະສັກໃດໆນັບແຕ່ເປັນການລັກ ຮຽນວິຊາກາຍະສິນຈາກຄະນະກາຍຍະສິນຂ້າງຖະໜົນຈົນເຖິງການຂໍເປັນລູກສິດຂອງບັນດາຄະນະກາຍະສິນທີ່ມີຊື່ສຽງດ້ວຍຄວາມຕັດສິນໃຈເດີນໄປຕາມຄວາມຫລົງໄຫລຈົນເຖິງກົກເຖິງປາຍ. ຍ້ອນມີພອນສະຫວັນ, ທ່ານຈຶ່ງໄດ້ຝຶກແອບຫຼາຍລາຍການທີ່ມີຄວາມຊຳນານ ກໍ່ຄືລາຍການປະດິດຄິດສ້າງຂຶ້ນມາເອງ, ລາຍການມາຍາກົນທີ່ໂດດເດັ່ນສະເພາະຂອງຕົນ, ອັນໄດ້ສ້າງຊື່ສຽງໃຫ້ນັກກາຍະສິນ ຫງອກວຽນ ໂດ່ງດັງ ແລະ ມີຊື່ສຽງ ໃນເວທີການສະແດງກາຍະສິນ, ມາຍາກົນພາຍໃນປະເທດໄລຍະກ່ອນປີ 1975.

ຄະນະກາຍະສິນຄອບຄົວ ໂດຍທ່ານສ້າງຕັ້ງຂຶ້ນເມື່ອປີ 1986 ມີບັນດານັກສະແດງຕົ້ນຕໍແມ່ນລູກຫຼານໃນຄອບຄົວ. ຫຼັງການໄປສະແດງເຂດຫ່າງໄກສອກຫຼີກ, ນັກສະແດງ ຫງອກວຽນ ໄດ້ຮັບເອົາພວກນ້ອງນ້ອຍທີ່ເປັນລູກກ່ຳພ້າກ່ຳພອຍມາເປັນລູກລ້ຽງ ແລະ ສອນວິຊາກາຍະສິນໃຫ້. ດ້ວຍເຫດນັ້ນຄະນະກາຍະສິນຈຶ່ງນັບມື້ນັບໃຫຍ່ຂຶ້ນ. ຍ້ອນວ່າບັນດາສະມາຊິກໃນຄະນະກາຍະສິນສ່ວນຫຼາຍແມ່ນເດັກນ້ອຍ, ສະນັ້ນເປົ້າໝາຍຕົ້ນຕໍເຊິ່ງຄະນະກາຍະສິນມຸ່ງເຖິງແມ່ນເຍົາວະຊົນ ແລະ  ນັກຮຽນ. ມີບາງໄລຍະ ຄະນະກາຍະສິນ ຫງອກວຽນ ໄດ້ກາຍເປັນສະຖານທີ່ ທີ່ຮູ້ຈັກຂອງນ້ອງນ້ອຍເຍົາວະຊົນ ນະຄອນໂຮ່ຈີມິນ. ນັບຕັ້ງແຕ່ ທາວເກີ່ມວຽນ (ສວນສັດ), ເຂດໜອງ ກີ່ຮ່ວາ, ສວນສາທາລະນະ ຕາວດ່ານ ຕະຫຼອດຮອດຫໍວັດທະນະທຳເຍົາວະຊົນ, ໂຮງຮຽນປະຖົມ… ລ້ວນແຕ່ເປັນເວທີສະແດງຂອງຄະນະກາຍະສິນ ຫງອກວຽນ ເປັນປະຈຳ ເຊິ່ງເຮັດໃຫ້ມີ ສຽງຫົວ, ຄວາມເບີກບານມ່ວນຊື່ນແກ່ພວກນ້ອງ ໂດຍຜາ່ນບັນດາລາຍການສະແດງກາຍະສິນ ແລະ ມາຍາກົນທີ່ເປັນເອກະລັກສະເພາະ.

ຄະນະກາຍະສິນ, ມາຍາກົນເຍົາວະຊົນ ຫງອກວຽນ ທີ່ໄດ້ຮູ້ຈັກແມ່ນຄະນະກາຍະສິນຄອບຄົວໜຶ່ງດຽວຢູ່ນະຄອນໂຮ່ຈີມິນໃນປະຈຸບັນໄດ້ເຄື່ອນໄຫວການສະແດງມາເປັນເວລາ 30 ກວ່າປີ. ບັນດາສະມາຊິກໃນຄະນະກາຍະສິນແມ່ນສະມາຊິກມະຫາຄອບຄົວ 3 ລຸ້ນຄົນ, ເຊິ່ງເລີ່ມມາຈາກ ນັກສິລະປິນ ຫງອກວຽນ ເປັນຫົວໜ້າຄະນະກາຍະສິນ, ທັງຜູ້ເປັນພໍ່, ເປັນອາຈານສອນຕະຫລອດ ຮອດສະມາຊິກຜູ້ອື່ນໆທີ່ເປັນລູກຄີງ, ລູກລ້ຽງ ແລະ ຜູ້ເປັນລູກຫຼານຂອງຕົນ.

ນັກສິລະປິນ ຫງອກວຽນ ກວດກາຄືນບັນດາອຸປະກອນການສະແດງ ກ່ອນຈະນຳໄປສະແດງ.


ນັກສະແດງກາຍະສິນ ມິນເມິນ, ລູກຊາຍກົກຂອງນັກສິລະປິນ ຫງອກວຽນ ສະແດງຮັບໃຊ້ບັນດານັກຮຽນ
ໂຮງຮຽນປະຖົມ ກີວລອງ, ເມືອງບິງແທ້ງ, ນະຄອນໂຮ່ຈີມິນ.



ສາກສະແດງການຕີມວຍຕະຫຼົກ ແລະ ດຸເດືອດລະຫວ່າງສະມາຊິກເຍົາວະຊົນສອງຄົນ ຂອງຄະນະກາຍະສິນມາຍາກົນເຍົາວະຊົນ ຫງອກວຽນ
ໄດ້ດຶງດູດຄວາມສົນໃຈຂອງຜູ້ຊົມ.



ຮອຍຍິ້ມອັນບໍລິສຸດຂອງບັນດານ້ອງນ້ອຍເມື່ອໄດ້ເຫັນປະຈັກຕາບັນດາການສະແດງກາຍະສິນ,
ມາຍາກົນທີ່ດູດດຶ່ມ ແລະ ຄຶກຄື້ນຂອງຄະນະກາຍະສິນມາຍາກົນເຍົາວະຊົນ ຫງອກວຽນ.



ຄວາມປາຖະໜາຢາກໃຫ້ມີຄວາມເບີກບານມ່ວນຊື່ນ, ມີສຽງຫົວໃຫ້ແກ່ບັນດານ້ອງນ້ອຍເຍົາວະຊົນນັ້ນ
ຄືຄວາມມ່ວນຊື່ນຂອງນັກສິລະປິນກາຍະສິນ ຫງອກວຽນ.

 
ຈາກຄະນະກາຍະສິນນີ້, ໄດ້ມີສະມາຊິກຫຼາຍຄົນເຕີບໃຫຍ່, ມີບາງຄົນກໍ່ເດີນຕາມອາຊີບເປັນນັກກາຍະສິນ, ມີບາງຄົນກໍ່ໄປປະກອບອາຊີບອື່ນ. ໄດ້ເຫັນບັນດາລູກຫຼານເຕີບໃຫຍ່, ມີຊີວິດການເປັນຢູ່ມີຄວາມສະຫງົບສຸກ, ນັ້ນຄືຄວາມສຸກຂອງນັກສິລະປິນ  ກາຍຍະສິນ ຫງອກວຽນ.
ບົດ: ເຊີນເຫງັຍ - ພາບ: ທົງຫາຍ

ບັນດາບົດທີ່ຖືກນຳສະເໜີ