16/03/2016 10:13 GMT+7 Email Print Like 0

ທ່ານ ເຈືອງເຕີ໋ນຊາງ ພົບປະກັບປະທານສະພາແຫ່ງຊາດ ແລະ ປະທານສະພາຮັບຮູ້ປອງດອງອີຣານ


(ທ່ານ​ປະທານ​ປະ​ເທດ ຫວຽດນາມ ​ເຈືອງ​ເຕີ໋ນຊາງ 
​ພົບ​ປະ​ກັບ​ທ່ານ Ali Larijani ປະທານ​ສະພາ​ແຫ່ງ​ຊາດ ອີຣານ)

      ຕອນ​ບ່າຍ​ວັນ​ທີ 14/03, ​ໃນ​ຂອບ​ເຂດ​ການ​ຢ້ຽມຢາມ ອີຣານ ຢ່າ​ງ​ເປັນ​ທາງ​ການ, ທ່ານ​ປະທານ​ປະ​ເທດ ຫວຽດນາມ ​ເຈືອງ​ເຕີ໋ນຊາງ ​ໄດ້​ພົບ​ປະ​ກັບ​ທ່ານ Ali Larijani ປະທານ​ສະພາ​ແຫ່ງ​ຊາດ ອີຣານ ​ແລະ ທ່ານ Rafsanjani ປະທານ​ສະພາ​ຮັບ​ຮູ້​ປອງ​ດອງ ອີຣານ. ນະທີ່​ນີ້, ທ່ານ​ປະທານ​ປະ​ເທດ ​ເຈືອງ​ເຕີ໋ນຊາງ ສະ​ເໜີ​ສະພາ​ແຫ່ງ​ຊາດ 2 ປະ​ເທດ​ສົມທົບ​ກັນ​ຢ່າງ​ແໜ​້ນ​ແຟ້ນ​ໃນ​ການ​ຕິດຕາ​ມກວດກາ, ຊຸກຍູ້​ການຜັນ​ຂະຫຍາຍ​ບັນດາ​ຄຳ​ໝັ້ນ​ສັນຍາ, ບັນດາ​ຂໍ້​ຕົກລົງ​ຮ່ວມ​ມື ທີ່ບັນລຸ​​ໄດ້​ລະຫວ່າງ 2 ຝ່າຍ. ທ່ານ Ali Larijani ປະທານ​ສະພາ​ແຫ່ງ​ຊາດ ​ແລະ ທ່ານ Rafsanjani ປະທານ​ສະພາ​ຮັບ​ຮູ້​ປອງ​ດອງ ຈະ​ປະກ​ອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ເລື່ອງ​ຊຸກຍູ້​ການ​ພົວພັນ​ຮ່ວມ​ມື​ມິດຕະພາບ​ທີ່​ເປັນ​ມູນ​ເຊື້ອ​ລະຫວ່າງ 2 ປະ​ເທດ​ກ່ວາ​ອີກ. ທ່ານປະທານ​ສະພາ​ແຫ່ງ​ຊາດ ​ແລະ ທ່ານປະທານ​ສະພາ​ຮັບ​ຮູ້​ປອງ​ດອງ ອີຣານ ຢືນຢັນ​ຖື​ເປັນ​ສຳຄັນ ​ແລະ ສະໜັບສະໜູນ​ການ​ພັດທະນາ​ການ​ພົວພັນ​ມິດຕະພາບການ​ຮ່ວມ​ມື​ຫລາຍ​ດ້ານ​ກັບ ຫວຽດນາມ, ພິ​ເສດ​ແມ່ນ​ໃນ​ຂົງ​ເຂດ​ເສດຖະກິດ. ທ່ານ​ປະທານ​ສະພາ​ແຫ່ງ​ຊາດ Ali Larijani ສະ​ເໜີ 2 ຝ່າຍ​ຄວນ​ແກ້​ໄຂ​ບັນຫາ​ຮ່ວມ​ມື​ທະນາຄານ ​ແລະ ​ເພີ່ມ​ທະວີ​ການ​ເຊື່ອມ​ຕໍ່​ວິ​ສາ​ຫະກິດ​ໂດຍ​ໄວ, ຖື​ນັ້ນ ​ແມ່ນ​ພື້ນຖານ​ໃຫ້​​ແກ່​ການ​ເພີ່ມ​ທະວີ​ການ​ຮ່ວມ​ມື​ດ້ານເສດຖະກິດ, ການ​ຄ້າ, ການ​ລົງທຶນ​ 2 ປະ​ເທດ. ທ່ານ​ປະທານ​ສະພາ​ແຫ່ງ​ຊາດ ອີຣານ​ ແບ່ງປັນ​ການ​ຕີ​ລາຄາ​​ໂດຍ​ຖືວ່າ: ອະນາຄົດ​ຂອງ​ໂລກ​ແມ່ນ​ຂຶ້ນ​ກັບ​ຝ່າຍ​ຕາ​ເວັນ​ອອກ ​ແລະ 2 ປະ​ເທດ​ຄວນ​ຊຸກຍູ້​ການ​ພົວພັນ​ຮ່ວມ​ມື​ໃນ​ບັນດາ​ຂົງ​ເຂດ​ທີ່​ເປັນ​ມູນ​ເຊື້ອ ​ແລະ ​ເປີດ​ກ້ວາງ​ການ​ຮ່ວມ​ມື​ໄປ​ສູ່​ບັນດາ​ຂົງ​ເຂດ​​ໃໝ່.
        ​ເມື່ອ​ພົບ​ປະ​ແລກປ່ຽນ​ກັບ​ທ່ານ​ປະທານ​ປະ​ເທດ ​ເຈືອງ​​ເຕີ໋ນຊາງ, ທ່ານ​ປະທານ​ສະພາ​ຮັບ​ຮູ້​ປອງ​ດອງ Rafsanjani ຖື​ວ່າ: ການ​ພົວພັນດ້ານ​ເສດຖະກິດ, ການ​ຄ້າ 2 ປະ​ເທດ​ຍັງ​ບໍ່​ທັນ​ເໝາະ​ສົມ​ກັບ​ຄວາມ​ສາມາດ​ບົ່ມ​ຊ້ອນ, 2 ຝ່າຍ​ຄວນ​ນຳ​ໃຊ້​ບັນດາ​ແຫຼ່ງກຳລັງ​ທັງ​ໝົດ ​ເພື່ອ​ພັດທະນາ ​ແລະ ​ເພີ່ມ​ທະວີ​ການ​ຮ່ວມ​ມື​ໃນ​ບັນດາ​ຂົງ​ເຂດ​ອື່ນໆຄື: ວິທະຍາສາດ - ​ເຕັກ​ໂນ​ໂລ​ຢີ, ການ​ສຶກສາ, ວັດທະນະທຳ.
        ​ແລະ​ໃນ​ວັນ​ດຽວ​ກັນ, ທ່ານ​ປະທານ​ປະ​ເທດ ​ເຈືອງ​ເຕີ໋ນຊາງ ​ໄດ້​ລົງ​ຢ້ຽມຢາມ​ສະຖານທູດ ຫວຽດນາມ ປະຈຳ ອີຣານ. ນະ​ທີ່​ນີ້, ທ່ານ​ປະທານ​ປະ​ເທດ​ເນັ້ນ​ໜັກ​ວ່າ: ​ແງ່​ຫວັງ​ການ​ຮ່ວມ​ມື​ໃນ​ບາງ​ຂົງ​ເຂດ ​ເຊິ່ງ 2 ຝ່າຍ​ມີ​ທ່າ​ແຮງ​ຄື: ກັ່ນ​ຕອງ​ນ້ຳ​ມັນ, ​ໂທລະ​ຄົມ​ມະ​ນາ​ຄົມ ​ແມ່ນ​ໃຫຍ່​ຫລວງ​ທີ່​ສຸດ. ທ່ານ​ປະທານ​ປະ​ເທດ​ເຈືອງ​ເຕີ໋ນຊາງ ​ເນັ້ນ​ໜັກ​ວ່າ: ພະນັກ​ງານ​ພາລະ​ກອນ​ສະຖານທູດ​ຄວນ​ສົມທົບ​ກັບ​ບັນດາ​ກະຊວງ, ຂະ​ແໜງ​ການ, ດຶງ​ດູດ​​ບັນດາ​ວິ​ສາ​ຫະກິດ​ຂະໜາດ​ກາງ ​ແລະ ນ້ອຍ​ໄປ​ຍັງ ອີຣານ ​ໂດຍ​ໄວ ​ເພື່ອ​ລົງທຶນ​ເຂົ້າ​ບັນດາ​ຂົງ​ເຂດ​ທີ່ມີ​ປະສິດທິ​ຜົນ, ປະກອບ​ກຳລັງ​ໃຫ້​ພາລະກິດ​ພັດທະນາ​ເສດຖະກິດ​ພາຍ​ໃນ​ປະ​ເທດ, ພ້ອມ​ທັງ​ຍົກ​ສູງອິດ​ທິພົນ​ຊື່​ສຽງ​ຂອງ ຫວຽດນາມ ຢູ່​ພາກ​ພື້ນ​ຕາ​ເວັນ​ອອກ​ກາງ.
(ແຫຼ່ງຄັດຈາກ VOV)