28/09/2018 10:10 GMT+7 Email Print Like 0

ທ່ານເລຂາທິການໃຫຍ່ ຫງວຽນຝູຈ້ອງ ຕ້ອນຮັບຄະນະຜູ້ແທນພັກກອມມູນິດ ຈີນ, ຄະນະຜູ້ແທນຂັ້ນສູງ ກູບາ

ຕອນບ່າຍວັນທີ 27 ກັນຍາ, ຢູ່ສຳນັກງານສູນກາງພັກ, ທ່ານ ຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ໄດ້ໃຫ້ການຕ້ອນຮັບທ່ານ ຈາວເລືອຈີ, ກຳມະການຄະນະປະຈຳກົມການເມືອງ, ເລຂາຄະນະກຳມະການກວດກາວິໄນສູນກາງພັກກອມມູນິດ ຈີນ ພວມຢ້ຽມຢາມ ແລະ ເຮັດວຽກຢູ່ ຫວຽດນາມ.

ທ່ານ ຈາວເລືອຈີ ແລະ ທ່ານເລຂາທິການໃຫຍ່ ຫງວຽນຝູຈ້ອງ 

ທີ່ການຕ້ອນຮັບ, ທ່ານເລຂາທິການໃຫຍ່ ຫງວຽນຝູຈ້ອງ ສະເໜີໃຫ້ 2 ຝ່າຍ ສືບຕໍ່ເພີ່ມທະວີຄວາມມານະພະຍາຍາມຊຸກຍູ້ບັນດາຂົງເຂດຮ່ວມມືໃຫ້ມີຄວາມຄືບໜ້າທີ່ດີ, ແທດຈິງ, ເຄົາລົບສິດຜົນປະໂຫຍດອັນຊອບທຳ, ຖືກຕ້ອງຕາມກົດໝາຍຂອງກັນ, ແກ້ໄຂບັນດາຄວາມບໍ່ລົງລອຍກັນຢູ່ທະເລໃຫ້ສົມເຫດສົມຜົນ, ເພີ່ມທະວີນ້ຳໃຈມິດຕະພາບລະຫລ່າງປະຊາຊົນ 2 ປະເທດ ຊຸກຍູ້ການພັດທະນາທີ່ປອດໃສ, ມີສະຖຽນລະພາບຂອງການພົວພັນ ຫວຽດນາມ - ຈີນ. ທ່ານເລຂາທິການໃຫຍ່ ຫງວຽນຝູຈ້ອງ ກໍ່ສະເໜີ ບັນດາອົງການທີ່ກ່ຽວຂ້ອງຂອງ 2 ພັກ, 2 ລັດ ເພີ່ມທະວີແບ່ງປັນບົດຮຽນໃນວຽກງານກວດກາ, ຕິດຕາມກວດກາ, ປ້ອງກັນຕ້ານການສໍ້ລາດບັງຫລວງ.

       ສ່ວນທ່ານ ຈາວເລືອຈີ ສະແດງຄວາມປາດຖະໜາວ່າ ການນຳ 2 ພັກ, 2 ລັດຈະສືບຕໍ່ເອົາໃຈໃສ່ຊີ້ນຳບັນດາຂະແໜງການ, ທ້ອງຖິ່ນຂັ້ນຕ່າງໆ ໃນນັ້ນມີບັນດາອົງການກວດກາ, ປະຕິບັດວິໄນຂອງ 2 ພັກ, ເພີ່ມທະວີການພົບປະແລກປ່ຽນ, ຮ່ວມມືຢ່າງບໍ່ຢຸດຢັ້ງ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ຈີນ ໃຫ້ນັບມື້ນັບພັດທະນາຢ່າງຕັ້ງໜ້າ, ປອດໃສ, ໝັ້ນຄົງຍາວນານໃນໄລຍະຈະມາເຖິງ.

       ແລະກໍ່ໃນຕອນບ່າຍວັນທີ 27 ກັນຍາ, ທ່ານເລຂາທິການໃຫຍ່ ຫງວຽນຝູຈ້ອງ ກໍ່ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງພັກ, ລັດ ກູບາ ໂດຍທ່ານ Roberto Morales Ojeda ກຳມະການກົມການເມືອງ, ຮອງປະທານສະພາແຫ່ງລັດ ແລະ ສະພາລັດຖະມົນຕີເປັນຫົວໜ້າຄະນະ, ທີ່ມາເຂົ້າຮ່ວມພິທີໄວ້ອາໄລທ່ານປະທານປະເທດ ເຈິ່ນດ້າຍກວາງ.

(​ແຫຼ່ງຄັດ​ຈາກ VOV)