10/04/2016 17:20 GMT+7 Email Print Like 0

ທ່ານຫງວຽນຊວນຟຸກສາບານຕົນດຳລົງຕຳແໜ່ງນາຍົກລັດຖະມົນຕີ


ທ່ານນາຍົກລັດຖະມົນຕີຄຄົນໃໝ່ ຫງວຽນຊວນຟຸກ ສາບານຕົວດຳລົງຕຳແໜ່ງ. (ແຫຼ່ງ: chinhphu.vn) 
ຕອນເຊົ້າຂອງມື້ວັນທີ7ເມສາ, ໂດຍປະຕິບັດ ຕາມລາຍການ ຂອງກອງປະຊຸມສະໄໝສາມັນ ຄັ້ງທີ11, ສະພາແຫ່ງຊາດໄດ້ດຳເນີນການເລືອກຕັ້ງທ່ານ ຫງວຽນຊວນຟຸກ ດຳລົງຕຳແໜ່ງເປັນ ນາຍົກລັດຖະມົນຕີ ຕາມຮູບແບບລົງຄະແນນສຽງປິດລັບ. 

ເລີ່ມຕົ້ນວາລະການເຮັດວຽກໃນຕອນເຊົ້າ ວັນທີ7 ເມສາ, ທ່ານ ຫງວຽນແຮງຟຸກ, ກຳມະການຄະນະປະຈຳ ສະພາແຫ່ງຊາດ, ເລຂາທິການໃຫຍ່ສະພາແຫ່ງຊາດ ໄດ້ຕາງໜ້າຄະນະປະຈຳສະພາແຫ່ງຊາດລາຍງານໝາກຜົນຂອງການປຶກສາຫາລືຢູ່ທີ່ຄະນະຜູ້ແທນ ສະພາ ແຫ່ງຊາດກ່ຽວກັບການຄາດຄະເນບຸກຄະລາກອນເພື່ອການເລືອກຕັ້ງນາຍົກລັດຖະມົນຕີ. 

ຫລັງຈາກນັ້ນ, ທ່ານປະທານປະເທດ ເຈີ່ນດ້າຍກວາງໄດ້ລາຍງານກ່ຽວກັບການຮັບເອົາຄໍາຄິດເຫັນ ແລະ ອະທິບາຍຊີ້ແຈງ ຄຳເຫັນຂອງຜູ້ແທນສະພາແຫ່ງຊາດ ກ່ຽວກັບການຄາດຄະເນບຸກຄະລາກອນເພື່ອການເລືອກຕັ້ງນາຍົກລັດຖະມົນຕີ. ສະພາແຫ່ງຊາດໄດ້ດຳເນີນ ການພິຈາລະນາ, ລົງຄະແນນສຽງຮັບຮອງເອົາລາຍຊື່ ເພື່ອການເລືອກຕັ້ງນາຍົກລັດຖະມົນຕີ. 

ສະພາແຫ່ງຊາດດຳເນີນການເລືອກຕັ້ງນາຍົກລັດຖະມົນຕີດ້ວຍຮູບການລົງຄະແນນສຽງແບບປິດລັບ. 

ຕາມຜົນຂອງການປ່ອນບັດທີ່ໄດ້ປະກາດ, ມີ 446 ຜູ້ແທນລົງຄະແນນສຽງສະໜັບສະໜູນ, ກວມ 90,26 %ໃນຈຳນວນຜູ້ແທນສະພາແຫ່ງຊາດ, ໃນນັ້ນມີ 44 ບັດ ບໍ່ເຫັນດີໃຫ້ທ່ານຫງວຽນຊວນຟຸກດຳລົງຕຳແໜ່ງເປັນ ນາຍົກລັດຖະມົນຕີ. 

ຫຼັງຈາກຄະນະກວດນັບບັດລົງຄະແນນສຽງ ປະກາດໝາກຜົນ, ທ່ານເລຂາທິການໃຫຍ່ ສະພາ ແຫ່ງຊາດ ຫງວຽນແຮ້ງຟຸກ ໄດ້ລາຍງານຮ່າງມະຕິ ກ່ຽວກັບການເລືອກຕັ້ງດຳລົງຕຳແໜ່ງນາຍົກລັດຖະມົນຕີລັດຖະບານ. 

ມີຈຳນວນ 474 ຜູ້ແທນກົດປຸ່ມເຫັນດີ(ກວມເອົາ 96,15% ຂອງຈຳນວນຜູ້ແທນສະພາແຫ່ງຊາດ), ສະພາແຫ່ງຊາດໄດ້ຮັບຮອງເອົາມະຕິຕົກລົງດັ່ງກ່າວ. 

ຫຼັງຈາກນັ້ນພິທີຮັບຕຳແໜ່ງເປັນນາຍົກລັດຖະມົນຕີ ໄດ້ຮັບການ ດຳເນີນໂດຍພາຍໄຕ້ສຽງດົນຕີອັນຊົງກຽດ, ທຸງຊາດ, ລັດຖະທຳມະນູນແລະ ກອງສຸລິຍາງໃນຊຸດເຄື່ອງແບບນຳເຂົ້າສູ່ເວທີ. ຈາກບ່ອນນັ່ງຂອງຜູ້ແທນ, ທ່ານຫງວຽນຊວນຟຸກ ກ້າວຂຶ້ນກົ້ມຫົວເຄົາລົບ ຕໍ່ໜ້າທຸງຊາດແລ້ວກ້າວສູ່ ເວທີກ່າວຄຳສາບານຕົນ. 

ກ່າວຄຳສາບານຕົນໃນພິທີຮັບຕຳແໜ່ງ ຢູ່ຕໍໜ້າສະພາແຫ່ງຊາດ ແລະ ພີ່ນ້ອງຮ່ວມຊາດ, ທ່ານນາຍົກລັດຖະມົນຕີຄົນໃໝ່ ຫງວຽນຊວນຟຸກ ໄດ້ກ່າວວ່າ: “ຂ້າພະເຈົ້າຂໍສະແດງຄວາມ ຂອບອົກຂອບໃຈເປັນຢ່າງສູງ ຕໍ່ສະພາແຫ່ງຊາດ ທີ່ໄດ້ ເລືອກຕັ້ງຂ້າພະເຈົ້າດຳລົງຕຳແໜ່ງເປັນ ນາຍົກລັດຖະມົນຕີແຫ່ງສາທາລະນະລັດ ສັງຄົມນິຍົມຫວຽດນາມ ດ້ວຍຄວາມໄວ້້ເນື້ອເຊື່ອໃຈ. ຕໍ່ໜ້າທຸງສີແດງດາວຄຳອັນສັກສິດຂອງຊາດ, ຕໍ່ໜ້າສະພາແຫ່ງຊາດ, ຕໍ່ໜ້າພີ່ນ້ອງທັງຊາດ ແລະ ຜູ້ມີສິດເລືອກຕັ້ງໃນທົ່ວປະເທດ, ຂ້າພະເຈົ້າຂໍສາບານຕົນວ່າ: ຈະເດັດດ່ຽວຈົ່ງຮັກພັກດີ ຕໍ່ປະເທດຊາດ, ຕໍ່ປະຊາຊົນ, ຕໍ່ລັດຖະທຳມະນູນ ແຫ່ງສາທາລະນະລັດສັງຄົມນິຍົມຫວຽດນາມ. ຂ້າພະເຈົ້າຂໍປະຕິຍານຕົນຈະພະຍາຍາມສູ້ຊົນ ຝຶກຝົນ ຫຼໍ່ຫຼອມຕົນເອງເພື່ອສຳເລັດທຸກໜ້າທີ່ວຽກງານຂອງພັກ, ລັດ ແລະ ປະຊາຊົນມອບໝາຍໃຫ້ເປັນຢ່າງດີ”. 

ຫຼັງຄຳສາບານຕົນ, ທ່ານນາງ ຫງວຽນທິກິມເງີນ, ປະທານສະພາແຫ່ງຊາດໄດ້ຖະແຫລງວ່າ:  “ສະພາແຫ່ງຊາດສາທາລະນະລັດສັງຄົມນິຍົມ ຫວຽດນາມໄດ້ຮັບຮອງເອົາຄຳສາບານຕົນ ຂອງທ່ານນາຍົກລັດຖະມົນຕີ ຫງວຽນຊວນຟຸກ. 

ຕາງໜ້າສະພາແຫ່ງຊາດ, ທ່ານປະທານສະພາແຫ່ງຊາດ ໄດ້ມອບຊໍ່ດອກໄມ້ໃຫ້ແກ່ທ່ານນາຍົກລັດຖະມົນຕີ ຫງວຽນຊວນຟຸກ ແລະ ອວຍພອນ ທ່ານນາຍົກລັດຖະມົນຕີຄົນໃໝ່ ຈົ່ງປະສົບຜົນສຳເລັດ ຕໍ່ໜ້າທີ່ວຽກງານທີ່ພັກ, ລັດ ແລະ ປະຊາຊົນມອບໝາຍໃຫ້ເປັນຢ່າງດີ ຖືກຕ້ອງຕາມ ຄຳສາບານຕົນຂອງທ່ານເອງ.

ກ່າວປາໄສຕໍ່ສະພາແຫ່ງຊາດຫຼັງສາບານຕົນ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ສະແດງຄວາມຂອບອົກຂອບໃຈຢ່າງສູງມາຍັງສະພາແຫ່ງຊາດ, ລັດຖະບານ ແລະ ບັນດາທ່ານທີ່ຫາກໍ່ພົ້ນຕໍາແໜ່ງ; ຢືນຢັນການທີ່ທ່ານໄດ້ຮັບຄວາມເຊື່ອໝັ້ນໄວ້ວາງໃຈຈາກສະພາແຫ່ງຊາດເລືອກຕັ້ງໃຫ້ດໍາລົງຕໍາແໜ່ງເປັນຫົວໜ້າຄະນະລັດຖະບານ ແມ່ນຖືເປັນກຽດ ອັນໃຫຍ່ຫຼວງ ແລະ ກໍແມ່ນໜ້າທີ່ຮັບຜິດຊອບ ອັນໜັກໜ່ວງທີ່ພັກ, ລັດ ແລະ ປະຊາຊົນມອບໝາຍໃຫ້. 

ທ່ານນາຍົກລັດຖະມົນຕີ ຫງວຽນຊວນຟຸກກ່າວວ່າ: “ຂ້າພະເຈົ້າຂໍປະຕິຍານວ່າຈະພະຍາຍາຈົນສຸດ ຄວາມສາມາດຂອງຕົນເພື່ອຮັບໃຊ້ປະເທດຊາດ, ຮັບໃຊ້ປະຊາຊົນ, ທັງໝົດເພື່ອຈຸດໝາຍກໍ່ສ້າງສາທາລະນະລັດສັງຄົມນິຍົມຫວຽດນາມໂດຍທີ່ປະຊາຊົນ ມີຄວາມຮັ່ງມີ, ປະເທດຊາດເຂັ້ມແຂງ,ປະຊາທິປະໄຕ, ຍຸຕິທຳ, ສິວິໄລ. ໃນຖານະເປັນຫົວໜ້າອົງການບໍລິຫານ ລັດສູງສຸດ, ປະຕິບັດສິດອໍານາດບໍລິຫານ,ເປັນອົງການ ບໍລິຫານງານຂອງສະພາແຫ່ງຊາດ, ຂ້າພະເຈົ້າພ້ອມກັນ ກັບບັນດາສະມາຊິກລັດຖະບານຈະອອກແຮງ ກໍ່ສ້າງລັດຖະບານໃຫ້ເຂັ້ມແຂງ, ມີຄວາມເປັນເອກະພາບ, ມີຄວາມສາມັກຄີ, ມີປະສິດທິຜົນ, ມີຜົນສັກສິດ,ແລະ ມີການເຄື່ອນໄຫວຢ່າງເດັດຂາດ ຮັບໃຊ້ປະຊາຊົນ ຢ່າງຫມົດຈິດຫມົດໃຈເຮັດສຳເລັດພາລະບົດບາດ, ໜ້າທີ່ຂອງຕົນຕາມລະບຽບກົດໝາຍ ແລະ ລັດຖະທຳມະນູນກໍານົດ. ພາຍໃຕ້ການຊີ້ນຳນຳພາຂອງພັກ, ການຄວບຄຸມກວດກາຢ່າງໄກ້ສິດ, ການຮ່ວມມື ສະໜັບສະໜູນ ຂອງສະພາແຫ່ງຊາດ, ຂອງປະທານປະເທດ,ແນວໂຮມປະເທດຊາດຫວຽດນາມ ແລະ ປະຊາຊົນຫວຽດນາມທຸກຖ້ວນໜ້າ. 

ລັດຖະບານ ແລະ ນາຍົກລັດຖະມົນຕີ ສືບຕໍ່ເສີມຂະຫຍາຍມູນເຊື້ອອັນດີງາມ ແລະ ໝາກຜົນທີ່ບັນລຸໄດ້ຂອງລັດຖະບານຊຸດກ່ອນໆ; ຮັບຟັງຄຳຄິດຄຳເຫັນ, ຄວາມມຸ່ງມາດປາດຖະໜາ ຂອງປະຊາຊົນຜູ້ມີສິດເລືອກຕັ້ງໃນທົ່ວປະເທດ ຢ່າງເຂັ້ມງວດ; ອອກແຮງແກ້ໄຂບັນດາຈຸດອ່ອນຂໍ້ຈຳກັດ, ອອກແຮງສູ້ຊົນ, ປະຕິບັດຢ່າງມີຜົນສໍາເລັດບັນດາຈຸດໝາຍ, ໜ້າທີ່ພັດທະນາເສດຖະກິດ-ສັງຄົມ; ຍູ້ແຮງຂະບວນການປ່ຽນແປງໃໝ່ ແລະ ເຊື່ອມໂຍງເຂົ້າກັບສາກົນຢ່າງຮອບດ້ານ; ສຸມໃສ່ປະຕິຮູບວຽກງານບໍລິຫານລັດ, ສ້າງສະພາບ ແວດລ້ອມທີ່ເອື້ອອໍານວຍໃຫ້ແກ່ການລົງທຶນ-ດຳເນີນ ທຸລະກິດ;ເສີມຂະຫຍາຍສິດປະຊາທິປະໄຕ; ເພີ່ມທະວີລະບຽບວິໄນໃນກົງຈັກບໍລິຫານແຫ່ງລັດ ແລະ ທົ່ວສັງຄົມ; ຍົກສູງປະສິດທິຜົນໃນວຽກງານປ້ອງກັນ ແລະ ຕ້ານໄພສໍ້ລາດບັງຫຼວງ, ການຟຸມເຟືອຍ; ເດັດດ່ຽວຕໍ່ສູ້ປົກປັກຮັກສາຄວາມເປັນເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນ ຂອງປະເທດຊາດໄວ້ຢ່າງໝັ້ນຄົງ; ເບິ່ງແຍງດູແລ ຊີວິດການເປັນຢູ່ໃນດ້ານວັດຖຸ ແລະ ຈິດໃຈ ຂອງ ປະຊາຊົນຢູ່ສະເໝີ”. 

ຫຼັງຈາກການກ່າວປາໄສ, ທ່ານນາຍົກລັດຖະມົນຕີຄົນໃໝ່ ຫງວຽນຊວນຟຸກ ໄດ້ມອບຊໍ່ດອກໄມ້ ແລະ ຄຳອວຍພອນອັນຈົບງາມທີສຸດ ໃຫ້ແກ່ທ່ານອະດີດນາຍົກລັດຖະມົນຕີຫງວຽນເຕິນຢຸງ. 

ສໍາລັບບຸກຄະລາກອນຮອງນາຍົກລັດຖະມົນຕີ ແລະ ບັນດາສະມາຊິກລັດຖະບານ ທ່ານນາຍົກ ລັດຖະມົນຕີ ຈະນໍາສະເໜີຕໍ່ສະພາແຫ່ງຊາດ ເພື່ອ ພິຈາລະນາຮັບຮອງແຕ່ງຕັ້ງ ຢູ່ໃນວາລະການເຮັດວຽກຕໍ່ໄປຂອງກອງປະຊຸມ. 

ທ່ານນາຍົກລັດຖະມົນຕີ ຫງວຽນຊວນຟຸກ ເກີດວັນທີ20/7/1954 ຢູ່ທີ່ແຂວງກວາງນາມ, ປະລິນຍາຕີ ດ້ານເສດຖະກິດຈາກມະຫາວິທະຍາໄລເສດຖະກິດແຫ່ງຊາດຮ່າໂນ້ຍ(ປີ1978),ຈົບທິດສະດີການເມືອງຊັ້ນສູງ. ເປັນກຳມະການຄະນະບໍລິຫານງານສູນກາງພັກສະໄໝທີX, XI ແລະXII; ກຳມະການກົມການເມືອງສະໄໝທີXI, XII; ຜູ້ແທນສະພາແຫ່ງຊາດຊຸດທີ XI ແລະ XIII. 

ກ່ອນທີ່ໄດ້ຮັບການເລືອກຕັ້ງເປັນນາຍົກລັດຖະມົນຕີ, ທ່ານຫງວຽນຊວນຟຸກ ເຄີຍດຳລົງຕຳແໜ່ງຕ່າງໆຄື: ກຳມະການ ຄະນະປະຈຳພັກແຂວງກວາງນາມ,ເປັນຮອງປະທານແລ້ວຕໍ່ມາເປັນຮອງປະທານ ຜູ້ປະຈຳ ການຄະນະກຳມະການປະຊາຊົນແຂວງກວາງນາມ; ຮອງເລຂາຄະນະພັກ,ປະທານຄະນະກຳມະການປະຊາຊົນແຂງກວາງນາມ; ຮອງຫົວໜ້າ ອົງການກວດກາ ລັດຖະບານ; ຮອງຫົວໜ້າທັງເປັນ ຜູ້ປະຈຳການ ຫ້ອງວ່າການລັດຖະບານ; ລັດຖະມົນຕີ-ຫົວໜ້າ ຫ້ອງວ່າການລັດຖະບານ; ຮອງເລຂາຄະນະພັກ ລັດຖະບານ, ຮອງນາຍົກລັດຖະມົນຕີ ລັດຖະບານ ສະໄໝປີ 2011-2016. 
ປະຕິບັດໂດຍ: VNP/VNA