26/08/2021 12:41 GMT+7 Email Print Like 0

ທ່ານນາຍົກລັດຖະມົນຕີ ຟ້າມມິນຈິງ ຮັບແຕ່່ງຕັ້ງເປັນຫົວໜ້າຄະນະຊີ້ນຳແຫ່ງຊາດກ່ຽວກັບການປ້ອງກັນ, ຕ້ານໂລກລະບາດໂຄວິດ-19

ທ່ານເລຂາທິການໃຫຍ່ ຫງວຽນຝູຈ້ອງ ກໍ່ຮຽກຮ້ອງຕ້ອງຮີບເຮັ່ງສຸມໃສ່ຜັນຂະຫຍາຍຍຸດທະສາດວັກຊີນ, ດຳເນີິນການສັກວັກຊິນຢູ່ບັນດາບໍລິເວນຈຸດສຸມເຊິ່ງໂລກລະບາດພວມແຜ່ລະບາດຢ່າງຮ້າຍແຮງຄືຢູ່ບາງແຂວງທາງພາກໃຕ້.
ທ່ານນາຍົກລັດຖະມົນຕີ ຟ້າມມິນຈິງ. (ພາບ: TTXVN)

ທ່ານນາຍົກລັດຖະມົນຕີ ຟ້າມມິນຈິງ ຮັບແຕ່ງຕັ້ງເປັນຫົວໜ້າຄະນະຊີ້ນຳແຫ່ງຊາດກ່ຽວກັບການປ້ອງກັນ, ຕ້ານໂລກລະບາດໂຄວິດ-19. ຂໍ້ຕົກລົງດັ່ງກ່າວໄດ້ຍົກອອກມາທີ່ກອງປະຊຸມການນຳຫຼັກແຫຼ່ງຮັບຟັງລັດຖະບານລາຍງານກ່ຽວກັບສະພາບການໂລກລະບາດ ແລະ ວຽກງານຜັນຂະຫຍາຍບັນດາມາດຕະການຮີບດ່ວນໃນການປ້ອງກັນ, ຕ້ານໂລກລະບາດໂຄວິດ-19 ຢູ່ນະຄອນ ໂຮ່ຈີມິນ ແລະ ບັນດາແຂວງທາງພາກໃຕ້ ຫວຽດນາມ ໃນວັນທີ 24 ສິງຫາ, ພາຍໃຕ້ການເປັນປະທານຂອງທ່ານເລຂາທິການໃຫຍ່ ຫງວຽນຝູຈ້ອງ. ຕາມນັ້ນແລ້ວ, ນາຍົກລັດຖະມົນຕີຊີ້ນຳໂດຍກົງ, ບໍລິຫານລວມສູນ, ເປັນເອກະພາບຈາກຂັ້ນສູນກາງລົງຮອດທ້ອງຖິ່ນ, ຕອບສະໜອງຄວາມຮຽກຮ້ອງຕ້ອງການລະດົມທຸກແຫຼ່ງກຳລັງ, ມາດຕະການຢ່າງໄວ ແລະ ມີປະສິດທິຜົນທີ່ສຸດ ເພື່ອສະກັດກັ້ນການແຜ່ລະບາດ, ຄວບຄຸມໂລກລະບາດໃນຂອບເຂດທົ່ວປະເທດໂດຍໄວ.

        ກ່າວຄຳເຫັນສະຫຼຸບກອງປະຊຸມ, ທ່ານເລຂາທິການໃຫຍ່ ຫງວຽນຝູຈ້ອງ ເນັ້ນໜັກວ່າ:

        “ໃນໄລຍະຈະມາເຖິງຕ້ອງສືບຕໍ່ປະຕິບັດດ້ວຍຈິດໃຈຢ່າງຂ້ຽວຂາດກວ່າອີກ. ດີທີ່ສຸດແມ່ນຕ້ອງບັນລຸປະສິດທິຜົນ, ແຕ່ກໍ່ຕ້ອງຍ້ອງຍໍຊົມເຊີຍບັນດາເຂດທີ່ໄດ້ປະຕິບັດເປັນຢ່າງດີ ຍ້ອນຢູ່ຫຼາຍແຫ່ງມີຜູ້ໄດ້ເສຍສະຫຼະລືນເນື້ອລືນຕົວ ຫ່າງໄກຈາກຄອບຄົວ. ສິ່ງຫຍຸ້ງຍາກທີ່ສຸດແມ່ນ ປະຈຸບັນຕ້ອງມານະພະຍາຍາມເປັນເຈົ້າການຄາດຄະເນສະພາບການ ແລະ ວາງອອກແຜນການເພື່ອຮັບມື, ຄະນະຊີ້ນຳຕ້ອງມີແຜນການຢ່າງລະອຽດ, ແໜ້ນແຟ້ນ, ຈັດແບ່ງວຽກງານຢ່າງຈະແຈ້ງຖືກຕ້ອງຕາມບົດບາດ”.

        ທ່ານເລຂາທິການໃຫຍ່ ຫງວຽນຝູຈ້ອງ ກໍ່ຮຽກຮ້ອງຕ້ອງຮີບເຮັ່ງສຸມໃສ່ຜັນຂະຫຍາຍຍຸດທະສາດວັກຊີນ, ດຳເນີິນການສັກວັກຊິນຢູ່ບັນດາບໍລິເວນຈຸດສຸມເຊິ່ງໂລກລະບາດພວມແຜ່ລະບາດຢ່າງຮ້າຍແຮງຄືຢູ່ບາງແຂວງທາງພາກໃຕ້. ພ້ອມກັນນັ້ນ, ຮັກສາສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ, ບໍ່ປະໃຫ້ຖືກຕົກເຂົ້າໃນທ່າຮັບ, ບັງເອີນ; ບໍ່ປະໃຫ້ບັນດາອິດທິກຳລັງທີ່ເປັນປໍລະປັກ, ປະຕິການຍູ້ແຍ່ແກ່ດຶງຫວັງມ້າງທຳລາຍພັກ, ລັດ, ກີດຂວາງວຽກງານປ້ອງກັນ, ຕ້ານໂລກລະບາດ. ສຸມແຫຼ່ງກຳລັງເພື່ອເບິ່ງແຍງດູແລສຸຂະພາບ, ປົກປ້ອງຊີວິດອິນຊີໃຫ້ແກ່ປະຊາຊົນ.

(ແຫຼ່ງຄັດຈາກ VOV)