21/05/2016 11:03 GMT+7 Email Print Like 0

ທ່ານນາຍົກລັດຖະມົນຕີ ຫງວຽນຊວນຟຸກ ພົບປະເຈລະຈາກັບປະທານາທິບໍດີສະຫະພັນ ລັດເຊຍ


ທ່ານ​ນາຍົກລັດຖະມົນຕີ ຫງວຽນ​ຊວນ​ຟຸກ ​ໄດ້ພົບ​ປະ​ເຈລະຈາ​ກັບ
​ທ່ານ​ປະທານາທິບໍ ສະຫະພັນ ລັດ​ເຊຍ Vladimir Putin
(ພາບ: VGP/QuangHieu)

​      ໃນ​ຂອບ​ເຂດ​ກອງ​ປະຊຸມ​ຂັ້ນ​ສູງ​ສະ​ເຫຼີ​ມສະຫຼອງ 20 ປີ​ແຫ່ງ​ການ​ພົວພັນ​ຄູ່​ເຈລະຈາ ອາ​ຊຽນ - ລັດ​ເຊຍ ຕາມ​ຄຳ​ເຊີນ​ຂອງ​ທ່ານ​ປະທານາທິບໍດີ​ສະຫະພັນ ລັດ​ເຊຍ Vladimir Putin, ຕອນ​ຄ່ຳ​ວັນ​ທີ 19/05 ຕາມ​ເວລາ Sochi ກົງ​ກັບ​ຕອນ​ທ່ຽງ​ຄືນ​ວັນ​ທີ 19/05 ຕາມ​ເວລາ ຮ່າ​ໂນ້ຍ, ທ່ານ​ນາຍົກລັດຖະມົນຕີ ຫງວຽນ​ຊວນ​ຟຸກ ​ໄດ້ພົບ​ປະ​ເຈລະຈາ​ກັບ​ທ່ານ​ປະທານາທິບໍ ສະຫະພັນ ລັດ​ເຊຍ Vladimir Putin.
        ທ່ານ​ປະທານາທິບໍດີ Vladimir Putin ຕີ​ລາຄາ​ສູງ​ບົດບາດ​ຂອງ ຫວຽດນາມ ຢູ່​ອາຊີ​ຕາ​ເວັນ​ອອກ​ສ່ຽງ​ໃຕ້ ​ແລະ ຢືນຢັນ​ວ່າ ຫວຽດນາມ ຍາມ​ໃດ​ກໍ່​ແມ່ນ​ໜຶ່ງ​ໃນ​ບັນດາ​ບຸລິມະສິດທາງ​ດ້ານ​ການ​ຕ່າງປະ​ເທດ​ຂອງ ລັດ​ເຊຍ ຢູ່​ພາກ​ພື້ນ ອາຊີ - ປາຊີ​ຟິກ. ທ່ານ​ນາຍົກລັດຖະມົນຕີ ຫງວຽນຊວນ​ຟຸກ ​ໃຫ້​ຮູ້​ວ່າ: ຫວຽດນາມ ຍາມ​​ໃດ​ກໍ່​ພ້ອມ​ແລ້ວ​ທີ່ຈະ​​ເປັນ​ຂົວ​ເຊື່ອ​ມຕໍ່ ​ເພື່ອ​ໃຫ້​ວິ​ສາ​ຫະກິດ ລັດ​ເຊຍ ​ເປີດ​ກ້ວາງ​ການ​ເຄື່ອນ​ໄຫວ​ຢູ່​ຕະຫລາດ​ບັນດາ​ປະ​ເທດ​ໃນ​ພາກ​ພື້ນ ອາຊີ​ຕາ​ເວັນ​ອອກ​ສ່ຽງ​ໃຕ້​ເວົ້າ​ລວມ ​ແລະ ອາ​ຊຽນ​ເວົ້າ​ສະ​ເພາະ, ພິ​ເສດ​ແມ່ນ​ໃນ​ສະພາບ​ທີ່ ຫວຽດນາມ ​ໄດ້ ​ແລະ ພວ​ມລົງ​ນາມ, ​ເຂົ້າ​ຮ່ວມ​ສັນຍາ​ການ​ຄ້າ​ເສລີ​ຫລາຍ​ສະບັບ​ກັບ​ບັນດາ​ປະ​ເທດ ​ແລະ ອົງການ​ຈັດ​ຕັ້ງ.
        ການ​ນຳ 2 ທ່ານ​ເຫັນ​ດີ​ເປັນ​ເອກະ​ພາບ​ຄວນ​ສືບ​ຕໍ່​ສົມທົບ​ກັນ​ຢ່າງ​​ແໜ້ນ​ແຟ້ນ ​ແລະ ​ເອົາ​ໃຈ​ໃສ່​ເປັນ​ພິ​ເສດ​ຍົກສູງ​ປະສິດທິ​ຜົນ​ຂອງ​ບັນດາ​ລາຍການ ​ແລະ ໂຄງການຮ່ວມ​ມື​ທີ່​ມີ​ຈຸດ​ສູ​ມ, ພິ​ເສດ​ແມ່ນ​ໃນ​ການ​ແລກປ່ຽນ​ດ້ານການ​ຄ້າ, ນ້ຳມັນ​ອາຍ​​ແກັສ, ​ໄຟຟ້າ​ນິວ​ເຄຼຍ, ການທ່ອງທ່ຽວ​ເປັນ​ພື້ນຖານ ​ເພື່ອ​ເພີ່ມ​ທະວີ​ການ​ຮ່ວມ​ມື​ໃນ​ບັນດາ​ຂົງ​ເຂດ​ອື່ນໆ. ທ່ານ​ນາຍົກລັດຖະມົນຕີ ຫງວຽນ​ຊວນ​ຟຸກ ​ແລະ ທ່ານ​ປະທານາທິບໍດີ Vladimir Putin ກໍ່​ໄດ້​ແລກປ່ຽນ​ກ່ຽວ​ກັບຫລາຍ​ບັນຫາ​ສາກົນ ​ແລະ ພາກ​ພື້ນ​ເຊິ່ງ​ຕ່າງ​ຝ່າຍ​ຕ່າງ​ມີ​ຄວາມ​ສົນ​ໃຈ, ​ເຫັນ​ດີ​ເປັນ​ເອກ​ະພາບ​ສືບ​ຕໍ່​ສົມທົບ​ກັນ​ຢ່າງ​ແໜ້ນ​ແຟ້ນຢູ່​ບັນດາ​ເວທີ​ປາ​ໄສ​ຫລາຍ​ຝ່າຍ​ຄື: ສະຫະ​ປະຊາ​ຊາດ, APEC, ASEM, ASEAN…
        ​ເມື່ອ​ແລກປ່ຽນ​ກ່ຽວ​ກັບ​ບັນດາ​ການ​ຜັນ​ແປທີ່​ສັບສົນ​ໃນ​ໄລຍະ​ມໍ່ໆ​ມາ​ນີ້​ຢູ່​ທະ​ເລ​ຕາ​ເວັນ​ອອກ, ທ່ານ​ປະທານາທິບໍດີ Vladimir Putin ​ແບ່ງ​ປັນ​ວ່າ: ລັດ​ເຊຍ ​ເອົາ​ໃຈ​ໃສ່​ຕິດຕາມສະພາບ​ການ​ຢູ່​ອາຊີ​ຕາ​ເວັນ​ອອກສ່ຽງ​ໃຕ້​ເວົ້າ​ລວມ ​ແລະ ຢູ່​ທະ​ເລ​ຕາ​ເວັນ​ອອກ​ເວົ້າ​ສະ​ເພາະ, ຢືນຢັນ​ຫຼັກ​ໝັ້ນ​ຂອງ ລັດ​ເຊຍ ​ແມ່ນ​ຄວນ​ແກ້​ໄຂ​ບັນດາ​ການ​ຂັດ​ແຍ້​ງກັນຢູ່​ທະ​ເລ​ຕາ​ເວັນ​ອອກ​ດ້ວຍ​ມາດ​ຕະການ​ໂດຍສັນຕິ​ວິ​ທີບົນ​ພື້ນຖານ​ເຄົາລົບ​ກົດໝາຍ​ສາກົນ, ກ່ອນ​ອື່ນ​ໝົດ​ແມ່ນ​ສົນທິສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ວ່າ​ດ້ວຍ​​ທະ​ເລປີ 1982 (UNCLOS), ຜັນ​ຂະຫຍາຍ​ຖະ​ແຫຼ​ງການ​ກ່ຽວ​ກັບ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກຢ່າງ​ຄົບ​ຖ້ວນ ​ແລະ ມີ​ປະສິດທິ​ຜົນ, ສະໜັບສະໜູນ​ເລື່ອງ ອາ​ຊຽນ ​ແລະ ຈີນ ສົມທົບ​ກັນ​ສ້າງ​ປະມວນ​ຂໍ້​ກຳນົດ​ການ​ປະພຶດ​ຢູ່​ທະ​ເລ​ຕາ​ເວັນ​ອອກ.
 (ແຫຼ່ງຄັດຈາກ VOV)