07/07/2020 11:14 GMT+7 Email Print Like 0

ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ເຂົ້າຮ່ວມພິທີໄຂກອງປະຊຸມສະພາປະຊາຊົນນະຄອນຮ່າໂນ້ຍ

      ຕອນເຊ້ົາວັນທີ 6 ກໍລະກົດ, ສະພາປະຊາຊົນນະຄອນຮ່າໂນ້ຍ ໄດ້ດໍາເນີນພິທີໄຂກອງປະຊຸມຄັ້ງທີີ 15, ສະພາປະຊາຊົນຊຸດທີ 15, ອາຍຸການ 2016 – 2021.

ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ກ່າວຄໍາເຫັນທີ່ກອງປະຊຸມ (ພາບ:TTXVN) 
      ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ໄດ້ຕີລາຄາສູງເສດຖະກິດຂອງນະຄອນຮ່າໂນ້ຍໃນໄລຍະ 6 ເດືອນຕົ້ນປີ 2020 ສືບຕໍ່ເຕີບໂຕ, ຍອດຜະລິດຕະພັນພາຍໃນບໍລິເວນຮ່າໂນ້ຍ ຄາດວ່າເພີ່ມຂຶ້ນ 3,39% ເຊິ່ງສູງກວ່າ ລະດັບ 1,81% ຍອດຜະລິດຕະພັນພາຍໃນປະເທດ. ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ປາດຖະໜາວ່າ ນະຄອນ ຮ່າໂນ້ຍ ສືບຕໍ່ຍູ້ແຮງການປະຕິຮູບ, ຫັນລະບຽບການບໍລິຫານເປັນງ່າຍດາຍ, ປົວແປງສະພາບແວດລ້ອມດໍາເນີນທຸລະກິດ, ສຸມໃສ່ແກ້ໄຂບັນດາຂໍ້ຕິດຂັດ, ບັນຫາຮ້ອນເຮັ່ງ, ສ້າງເງື່ອນໄຂສະດວກໃຫ້ແກ່ນັກລົງທຶນ, ວິສາຫະກິດ. ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ເນັ້ນໜັ້ກວ່າ:
        “ຕ້ອງຍົກສູງປະສິດທິຜົນຂອງໜ້າທີ່ຕິດຕາມກວດກາ ເພື່ອແນໃສ່ຍົກສູງປະສິດທິພາບ, ປະສິດທິຜົນການເຄື່ອນໄຫວຂອງກົງຈັກອໍານາດປົກຄອງນະຄອນຮ່າໂນ້ຍ. ສຸມໃສ່ການຕິດຕາມກວດກາບັນດາບັນຫາສໍາຄັນ, ບັນຫາທີ່ປະຊາຊົນພວມສົນໃຈ, ເປັນເຈົ້າການສົມທົບກັບ ແນວໂຮມປະເທດຊາດ, ໝູ່ຄະນະ, ອົງການສື່ມວນຊົນ, ພ້ອມກັບປະຊາຊົນພິຈາລະນາ ແລະ ແກ້ໄຂບັນດາຂໍ້ສະເໜີແນະຂອງຜູ້ມີສິດເລືອກຕັ້ງ ແລະ ບັນດາບົດສະຫຼຸບພາຍຫຼັງການຕິດຕາມກວດກາຢ່າງສົມເຫດສົມຜົນ. ພ້ອມກັນນັ້ນ, ສືບຕໍ່ປະຕິບັດວຽກງານພົບປະກັບຜູ້ມີສິດເລືອກຕັ້ງໃຫ້ເປັນຢ່າງດີ ເພື່ອກໍາແໜ້ນຄວາມໃນໃຈ, ຄວາມມຸ່ງຫວັງຂອງປະຊາຊົນ ປະກອບສ່ວນຍົກສູງທີ່ຕັ້ງ ແລະ ປະສິດທິຜົນການເຄື່ອນໄຫວຂອງສະພາປະຊາຊົນຕື່ມອີກ.
 (ແຫຼ່ງຄັດຈາກ VOV)